Iinkia ame enentaimin iwiarnarta

Yuusa chichame unuimiatkur Jehovanu unuimiateamuka ii enentain ejeturkat tusar wakeraji. Nu unuimiateamuka ii enentaimmian ii itiur nekapeaj tura wari wakeraj nuna yapajiatniun yainkratkat tusar wakeraji. Tuma asamtai Esdras turamiania ainis turatniuitji, ninkia Yuus akupkamu chichaman amamkes unuimiatrattsa ni enentain iwiarnaruyayi (Ístras 7:10). Amesha itiura ainis turamniaitiam?

Yuus seata. Yuusa chichame unuimiatsuk ni chichame penker nekaatniun yainkiat tusam seata tura unuimiatrattamna nusha ame iwiakmarmin umiktinian yainmakat tusam seata (YKan. 119:​18, 34).

Nankaamantu enentaimcha ata. Mash neka nekapainia asar nankaamantu enentaimiainianka Jehová ni chichamenka paant nekamtikchaiti (Ruk. 10:21). Mash neka nuke ajattsam unuimiatrashtiniaitme. Yuusa chichame aujkum warinmansha yapajniatin nekaamamka nankaamantu enentaimtsuk yapajniata.

Nampet iiniu antukta. Nampetka ii enentain jeartamminiaitji tura nu antakur Yuus enentaimtustasar iwiarnartatji. Yuusa chichame unuimiatsuk emka nampet antamuka Jehovai enentaimsatniun yainmaktatji. Tura unuimiatrattajnia nusha umiktin wakeruktatji.