Jaá kuití ni̱ si̱kee Samuel ña̱ kúni̱ Jeová

Nda̱á lóʼo̱ vá Samuel, ni̱ si̱io ra tabernáculo, yóʼo ni̱ si̱nukuáchí rá nuu̱ Ndio̱s. Nuu̱ tabernáculo yóʼo ni̱ si̱kekáʼnu na Jeová. ¿Á kúni̱ún kundaa̱ iniún ndiva̱ʼa ni̱ si̱io Samuel yóʼo? Já ná kundaa̱ va̱ʼa ini yó, xinañúʼú ná kunde̱ʼé yó yoo ni̱ si̱kuu naná Samuel. Ni̱ si̱naní ñá Ana.

Jaá kuití ni̱ si̱kúu ini Ana koo iin de̱ʼe ñá, jo ko̱ kuu koo de̱ʼe ñá. Ña̱káa ni̱ si̱ka̱taʼvi̱ ñá nuu̱ Ndio̱s ta ni̱ kachi ñá: “Síkái̱ ña̱mani̱ nuu̱ ní, Jeová, ná chindeé ní yuʼu̱”. Ta ni̱ kachi ñá xíʼín Ndio̱s: “Tá ná koo iin de̱ʼei̱ tandaʼái̱ rá ná kuʼu̱n rá koo rá tabernáculo ta káa kunikua̱chi ra nuu̱ ní”. Jeová ni̱ si̱nijo̱ʼo rá ña̱ ni̱ si̱ka̱taʼvi̱ Ana, nda̱ víti jaá ni̱ kuu koo iin de̱ʼe ñá. Ni̱ chikaa̱ ñá kivi̱ rá Samuel. Tá na̱kaa̱ rá uni̱ á komi̱ kuia̱, ni̱ kee ñá ña̱ ni ka̱ʼa̱n ñá xíʼín Ndio̱s ta ndáka ñá Samuel ná kuʼu̱n rá nuu̱ tabernáculo kunikua̱chi ra nuu̱ Ndio̱s ikáa.

Jutu̱ kúnu̱ú ni̱ si̱kachúun tabernáculo ni̱ si̱naní rá Elí. Ta uvi̱ de̱ʼe ra si̱va̱ʼa, jaá ní ni̱ si̱kachúun rá tabernáculo. Nuu̱ tabernáculo yóʼo ni̱ si̱kekáʼnu ná Jeová, ta ndiʼi na̱yivi na̱ kachúun yóʼo káni kée na ña̱ va̱ʼa. Jo Samuel sinde̱ʼé rá ña̱ de̱ʼe Elí kée ra kuaʼa̱ ña̱ kíni. ¿Á ni̱ kee Samuel ña̱ kíni tátu̱ʼun de̱ʼe Elí? ¿Ndíki̱án káʼáún?... Ko̱, Samuel jaá kuití ni̱ si̱kee ra ña̱ kúni̱ Jeová tátu̱ʼun ni̱ jánaʼa̱ tatá rá nuu̱ rá.

¿Ndíki̱án káni kée Elí xíʼín de̱ʼe ra? ¿Á ko̱ siniún ña̱ káni jána̱ní rá de̱ʼe ra?... ¡Jaa̱n jaá káni kée ra! Ko̱ káni kua̱ʼa rá íchi̱ ña̱ ná kachúun de̱ʼe ra tabernáculo. Jo Elí ko̱ñaʼa ni̱ kee ra. Ña̱káa ni̱ ndukueʼe ndiva̱ʼa Jeová xíʼín rá ta xíʼín uvi̱ de̱ʼe ra, ta ña̱káa Ndio̱s ni̱ kachi rá ña̱ víti ndóʼo ini ra.

Iin si̱kuaá jee, kíxi̱ Samuel kanduʼu̱ rá ta ni̱ sinijo̱ʼo ra ña̱ ió iin na̱ kana ñaʼá ta kachi ná. “¡Samuel!”, ta ni̱ kana̱kunu ra kuaʼa̱n rá nuu̱ na̱ka̱a Elí, ta ni̱ kachi ta̱yóʼo xíʼín ra: “Ko̱ káʼa̱n táʼan vái̱ xíʼíún”. Jaá ni̱ ndóʼo ra uvi̱ taʼnda̱. Jo taʼnda̱ kúú uni̱, Elí ni̱ kachi ra xíʼín Samuel: “Tá ná kunijo̱ʼo tukun ña̱ káʼa̱n na̱ xíʼíún, kachiún: ‘Káʼa̱n ní, Jeová. Sinijo̱ʼoi̱’”. Ta ni̱ kee Samuel tátu̱ʼun ni̱ ka̱ʼa̱n Elí xíʼín ra, jaá Jeová ni̱ kachi ra: “Káʼa̱n xíʼín Elí ña̱ saʼa̱ ña̱ na̱ veʼe ra kée na̱ ña̱ kíni koo tu̱ndóʼó nuu̱ ná víti”. ¿Á tu̱ndóʼó ni̱ keean xíʼín Samuel káʼa̱n ra ña̱yóʼo xíʼín Elí? ¿Ndíki̱án káʼáún?... Jaa̱n tu̱ndóʼó ndiva̱ʼa ni̱ si̱kuán nuu̱ rá. Jáchi̱ yuʼu̱ ra káʼa̱n rá ña̱yóʼo xíʼín Elí. Jo ni̱ sinijo̱ʼo ra ña̱ ni̱ káʼa̱n Jeová ta ni̱ ka̱ʼa̱n ra xíʼín Elí. Ni̱ sinukoo ña̱ ni̱ káʼa̱n Ndio̱s: cháá vá kivi̱ ni̱ ya̱ʼa, ta ni̱ siʼi̱ Elí xíʼín uvi̱ de̱ʼe ra.

Ió kuaʼa̱ ña̱ʼa ña̱ kuu kutu̱ʼva yó saʼa̱ ña̱ ni̱ kee Samuel. Va̱árá ni̱ si̱ni̱ rá ña̱ java ga̱ na̱yivi ni̱ si̱kee na ña̱ kíni, jo miírá jaá kuití ni̱ kee ra ña̱ kúni̱ Jeová. ¿Á kéeún tátu̱ʼun ni̱ kee Samuel? ¿Á kunijo̱ʼoún ndiʼi ña̱ káʼa̱n Jeová? Tá ná kunijo̱ʼoún ña káʼa̱n Jeová, kujii̱ ndiva̱ʼa ini ra xíʼíún, tá jaá ní kujii̱ ini tatá xíʼín naná.