LECCIÓN 22
¿Ndixi kuu kee miíní tá kuaʼa̱nní kástu̱ʼunní saʼa̱ noticia va̱ʼa?
Tá ni̱kundaa̱ ininí ña̱ ndaa̱ va̱xi nuu̱ Biblia, kuu káʼánní: “¡Nditáʼa̱n na̱yivi kánian kanaʼá ña̱yóʼo!”. Ta miía̱ndaa̱ ndísa; nditáʼa̱n na̱yivi xiniñúʼúnna kanaʼána ña̱yóʼo. Jo ndakána va̱xi ña̱ yu̱ʼúní ña̱ kánian káʼa̱nní nuu̱ javaka̱na saʼa̱ ña̱ jákuáʼaní. Ná kande̱ʼéyó ndíki̱án kuu chindeé miíní jaá ná kujii̱ ininí káʼa̱nní xíʼín javaka̱na saʼa̱ noticia va̱ʼa va̱xi nuu̱ Biblia.
1. ¿Ndixi kuu keení jaá nakaniní nuu̱ na̱ xíni̱ táʼan xíʼínní ña̱ kati̱ʼaní?
Na̱ discípulo Jesús ni̱kachina: “O̱ kúu taꞌon dánkoo nduꞌu̱ ña̱ kaꞌa̱n ndu̱ sa̱ꞌá ña̱ ni̱ xini ndu̱, xíꞌín sa̱ꞌá ña̱ ni̱ seídóꞌo ndu” (Hechos 4:20). Ña̱ ndayaʼvi ña̱ ndaa̱ nuu̱na ni̱kuni̱na nakanina ña̱yóʼo nuu̱ nditáʼa̱n na̱yivi. ¿Á janí ndóʼo miíní? Ta jaá kían, ndukúní ndixi kuu káʼa̱nní xíʼín na̱veʼení o na̱ netáʼan va̱ʼa xíʼínní saʼa̱ ña̱ kati̱ʼaní, jo vií káʼa̱nní xíʼínna (kaʼviní Colosenses 4:6).
Java ña̱ kuu káʼa̱nní jaá kusáʼání
Tá ndatúʼúnní xíʼín na̱veʼení, kusáʼání káʼa̱nní saʼa̱ Biblia ta káchiní “Semana yóʼo ni̱kati̱ʼai saʼa̱ iin ña̱ʼa ndayaʼvi ndiva̱ʼo”.
Tá iin na̱ netáʼan va̱ʼa xíʼínní kíʼvi̱na o ndóʼona tu̱ndóʼó, kaʼviní iin texto Biblia ña̱ naki̱ʼo ta̱ndeé ini nuu̱na.
Tá na̱ kuchúun xíʼínní ndakatu̱ʼúnna miíní ndiku̱ú ña̱ ni̱keení jini̱ semana, nakaniní xíʼínna ña̱ ni̱kati̱ʼaní nuu̱ jákuáʼaní Biblia o nuu̱ ni̱saʼa̱nní reunión congregación.
Jánaʼa̱ní nuu̱ na̱ netáʼan va̱ʼa xíʼínní sitio internet jw.org.
Kánaní javaka̱na nuu̱ jákuáʼaní Biblia o jánaʼa̱ní nuu̱na ndixi kaka̱na iin curso jákuáʼana Biblia nuu̱ jw.org.
2. ¿Ndiva̱ʼa kúni̱ʼi ña̱ kuʼu̱nní kástu̱ʼunní saʼa̱ Tu̱ʼun Ndio̱s xíʼín na̱ congregación?
Na̱ discípulo Jesús o̱ju̱ú sa̱va̱ʼa nuu̱ na̱ náʼá oo̱nnina ni̱saka̱ʼa̱nna noticia va̱ʼa. Jesús “ni̱ta̱ndaꞌána ivi̱ ta ivi̱na kuaʼa̱nna nuu̱ ndijaá kúú ñuu” jaá kástu̱ʼunna saʼa̱ Tu̱ʼun Ndio̱s (Lucas 10:1, TNM). Saʼa̱ ña̱ yíko̱ ni̱ka̱stu̱ʼunna kuaʼa̱ na̱yivi ni̱xinijo̱ʼo saʼa̱ noticia va̱ʼa. Ta janí, na̱ discípulo ni̱kujii̱ ndiva̱ʼo inina ña̱ ni̱chindeé táʼanna ni̱keena ña̱yóʼo (Lucas 10:17, TNM). Ta miíní, ¿á ko̱ kutoóní kuʼu̱nní kástu̱ʼunní saʼa̱ noticia va̱ʼa xíʼín na̱ congregación?
NÁ KUNDAA̱ VA̱ʼA CHÁÁKA̱ INIYÓ SAʼA̱ TEMA YÓʼO
Ná kande̱ʼéyó ndíki̱án kuu chindeé miíní jaá ná o̱yu̱ʼúka̱ní ta ná kujii̱ ininí ña̱ kuʼu̱nní kástu̱ʼunní saʼa̱ noticia va̱ʼa.
3. Jeová jaá kuití chindeéna miíní
Java na̱yivi kúni̱na kuʼu̱nna kástu̱ʼunna saʼa̱ noticia va̱ʼa jo ndíʼi inina saʼa̱ ndixi kuu kee na̱yivi xíʼínna o ndíki̱án kuu nákani kuáchi̱ inina saʼa̱na.
Ta miíní, tá nákani ininí ña̱ káʼa̱nní xíʼín javaka̱na saʼa̱ ña̱ kati̱ʼaní kuaʼa̱nní, ¿á va̱xi ña̱ yu̱ʼúní, o ko̱? Ta ¿ndiva̱ʼa?
Kande̱ʼéndó VIDEO ta kanatúʼúnndó saʼa̱ ña̱ va̱xi yóʼo:
¿Ndixi ni̱kee na̱kuálí ni̱ya̱ʼa nuu̱ video jaá ko̱yu̱ʼúka̱na?
Kaʼvindó Isaías 41:10 ta kanatúʼúnndó saʼa̱ ña̱ va̱xi yóʼo:
¿Ndiva̱ʼa kánian kaka̱taʼvi̱ní tá yu̱ʼúní káʼa̱nní saʼa̱ Tu̱ʼun Ndio̱s?
¿Á náʼání?
Kuaʼa̱ na̱ testigo Jeová viti, ni̱sakáʼánna ña̱ ni iin kivi̱ o̱kúu saa̱na káʼa̱nna saʼa̱ Tu̱ʼun Ndio̱s. Tátu̱ʼun, iin ta̱a naní Sergey ni̱sakáʼánra ña̱ ko̱ ndayaʼvi miívára ta sa̱ʼá ña̱yóʼo ña̱ kuáchi̱ ndiva̱ʼo ni̱sakuuña nuu̱ra ña̱ káʼa̱nra xíʼín javaka̱ na̱yivi. Jo ni̱kusáʼára jákuáʼara Tu̱ʼun Ndio̱s. Ta káchira: “Va̱árá yu̱ʼúi, ni̱kusáʼái ndatúʼúin xíʼín javaka̱na saʼa̱ ña̱ jákuáʼai. Ta kúú, ña̱yóʼo ni̱chindeéán yuʼu̱ ta nda̱ ánima̱i ni̱saa̱ ndijaá ña̱ jánaʼa̱ Tu̱ʼun Ndio̱s”.
4. Naʼa̱ní ña̱ ió ña̱ñúʼúní nuu̱na
Tá kuaʼa̱nní kástu̱ʼunní saʼa̱ Tu̱ʼun Ndio̱s xíʼín ingana o̱nákaní oo̱n ininí ndíki̱án káʼa̱nní xíʼínna, janí nákani ininí ndixi keení jaá káʼa̱nní xíʼínna. Kaʼvindó 2 Timoteo 2:24 xíʼín 1 Pedro 3:15, ta kanatúʼúnndó saʼa̱ ña̱ va̱xi yóʼo:
¿Ndixi kuu keení ña̱ káʼa̱n versículo yóʼo tá káʼa̱nní xíʼín ingana saʼa̱ Tu̱ʼun Ndio̱s?
Tá ndakána java na̱veʼení o na̱ netáʼan va̱ʼa xíʼínní ko̱ nátaʼan inina ña̱ káʼa̱nní. ¿Ndíki̱án kánian keení? Ta ¿ndíki̱án ko̱ kánian keení?
¿Ndiva̱ʼa kánian naʼa̱yó ña̱ ió ña̱ñúʼúyó nuu̱na tá ndatúʼúnyó xíʼínna ta ndiva̱ʼa ko̱ kánian káʼa̱nyó xíʼínna ndíki̱án kánian keena o kandísana?
5. Ña̱ káʼa̱nyó saʼa̱ noticia va̱ʼa naki̱ʼo ña̱ kujii̱ iniyó
Jeová ni̱xi̱ʼo chúun nuu̱ Jesús ña̱ ná kástu̱ʼunna saʼa̱ noticia va̱ʼa. ¿Ndixi ni̱sande̱ʼé Jesús chúun yóʼo? Kaʼvindó Juan 4:34 ta kanatúʼúnndó saʼa̱ ña̱ va̱xi yóʼo:
Ña̱ sa̱sáʼanyó comida va̱ʼa sáʼan xíʼo ña̱ ta̱kúyó ta kujii̱ iniyó. ¿Ndiva̱ʼa ni̱kachi Jesús ña̱ keeyó ña̱ kúni̱ Ndio̱s, tátu̱ʼun ña̱ kástu̱ʼunyó saʼa̱ noticia va̱ʼa, kúúña tátu̱ʼun ña̱ kasáʼanyó?
Ndixi káʼán miíní, ¿ndiku̱ú ña̱ va̱ʼa niʼi̱ní tá ná káʼa̱nní saʼa̱ noticia va̱ʼa?
Java ña̱ kuu keení
Tá kuaʼa̱nní reunión tein semana, kande̱ʼéní java tátu̱ʼun ki̱ʼo kuu keení jaá kusáʼání ndatúʼúnní xíʼín na̱yivi.
Káʼa̱nní xíʼín na̱ jánaʼa̱ nuu̱ní ndíki̱án kánian keení jaá kanuu kivi̱ní nuu̱ programa reunión tein semana. Ña̱ ki̱ʼana yáʼaní chindeéán miíní jaá niʼi̱ ininí ndixi káʼa̱nní ña̱ kati̱ʼaní nuu̱ ingana.
Kuchúunní sección “Ña̱ káʼa̱n inga na̱yivi” xíʼín “Ña̱ ndakatu̱ʼún javaka̱na” ña̱ va̱xi nuu̱ curso jákuáʼaní yóʼo jaá kati̱ʼaní ndixi keení nandiónéʼení ña̱ ndakatu̱ʼúnna o ña̱ káʼa̱n kuáchi̱ javana.
ÑA̱ NDAKATU̱ʼÚN JAVAKA̱NA: “¿Á ió va̱ʼón? ¿Ndá chúun keeón viti?”.
¿Ndixi kuu keení jaá o̱jaya̱ʼa oo̱nní ña̱yóʼo ta káʼa̱nní saʼa̱ ña̱ kati̱ʼaní nuu̱ Tu̱ʼun Ndio̱s?
ÑA̱ NI̱KATI̱ʼAYÓ
Ña̱ káʼa̱nyó saʼa̱ noticia va̱ʼa ki̱ʼo ña̱ kujii̱ iniyó, ta ña̱ kusáʼání káʼa̱nní ko̱ kúúña iin ña̱ kuáchi̱ tátu̱ʼun ki̱ʼo nákani ininí.
¿Á naku̱ʼun inión?
¿Ndíki̱án kuu chindeéní jaá jánaʼa̱ní saʼa̱ noticia va̱ʼa?
¿Ndíki̱án kuu keení jaá naʼa̱ní ña̱ ió ña̱ñúʼúní tá káʼa̱nní?
¿Ndíki̱án kuu keení jaá o̱yu̱ʼúka̱ní tá kástu̱ʼunní saʼa̱ noticia va̱ʼa?
KUU NANDUKÚNÍ JAVAKA̱ ÑA̱ʼA
Kande̱ʼéní kumi̱ ña̱ʼa kuu keení tá jánaʼa̱ní ta kuchúunní tarjeta contacto jw.org.
Tátu̱ʼun kuu keení jaá ki̱ʼoní tarjeta contacto jw.org (1:43)
Kande̱ʼéní saʼa̱ kumi̱ ña̱ʼa va̱ʼa kuu keení jaá káʼa̱nní saʼa̱ noticia va̱ʼa.
“¿Á kúni̱ miíní nandukúní na̱yivi jaá nduuna na̱ kuendá Ndio̱s?” (La Atalaya, septiembre de 2020)
Nandukúní iin ña̱ nakani Tu̱ʼun Ndio̱s kuu chindeéyó jaá ndeé koo iniyó tá kástu̱ʼunyó saʼa̱ noticia va̱ʼa va̱árá kúúyó na̱kuálí.
Kaʼviní ndixi kuu keení jaá káʼa̱nní saʼa̱ Tu̱ʼun Ndio̱s xíʼín na̱veʼení na̱ ko̱xini̱ saʼa̱ Jeová.
“Ndixi kuu keeyó jaá saa̱yó nda̱ ánima̱ na̱veʼeyó na̱ ko̱ kandísa” (La Atalaya, 15 de marzo de 2014)