LECCIÓN 24

¿Ndíki̱án káʼa̱n Tu̱ʼun Ndio̱s saʼa̱ na̱ kúú ángel?

Edición impresa

Jeová kúni̱na ña̱ ná kundaa̱ iniyó saʼa̱ na̱veʼena ndóyi indiví. Ta tein na̱yóʼo ndóyi na̱ kúú ángel ta janí xíni̱yó ña̱ nanína “de̱ʼe Ndio̱s” (Job 38:7). ¿Ndíki̱án jánaʼa̱ Tu̱ʼun Ndio̱s saʼa̱ na̱ kúú ángel? ¿Ndixi kuu kee na̱yóʼo xíʼín na̱yivi? ¿Á ndiʼi na̱ ángel kúú kuendá na̱veʼe Ndio̱s?

1. ¿Ndáyoo kúú na̱ ángel yóʼo?

Nda̱ tá kúmani̱ kava̱ʼa Jeová Ñúʼu̱ Ndeʼi̱, jaá ni̱kava̱ʼana na̱ kúú ángel. Kúúna espíritu tátu̱ʼun ki̱ʼo kúú mií Ndio̱s, ta na̱yóʼo o̱kúu kuniyóna, ta ndóyina indiví (Hebreos 1:14). Kuaʼa̱ millón kúú na̱ ángel yóʼo ta jíin jíin kúú iin ta iinna (Apocalipsis 5:11). Na̱yóʼo “kéena ña̱ káʼa̱n [Jeová] ta janí xinijo̱ʼona chúun saʼndána” (Salmo 103:20). Tá tiempo si̱naʼá, java íchi̱ Jeová sa̱chindáʼana na̱ ángel jaá kástu̱ʼunna ña̱ kúni̱ Ndio̱s ta chindeéna na̱yivi ta janí ña̱ jáka̱ku̱na na̱ ñuuna. Kivi̱ víti na̱ ángel chindeéna na̱ cristiano jaá naniʼi̱na na̱yivi na̱ kúni̱ kundaa̱ chááka̱ ini saʼa̱ Ndio̱s.

2. ¿Ndáyoo kúú Satanás xíʼín demonio?

Java ángel yóʼo ni̱ja̱ndákooña ña̱ kunijo̱ʼoan Jeová. Mií ña̱ kúú nu̱ú ko̱ ni̱xinijo̱ʼo Ndio̱s kúú “Ti̱míaʼá ña̱ naní Satanás, ña̱yóʼo kúú ña̱ jándáʼvia̱n na̱yivi inííkúú ñuyíví” (Apocalipsis 12:9, TNM). Saʼa̱ ña̱ ni̱kuni̱ Satanás kaʼndaña chúun nuu̱ javaka̱na, ni̱keean xíʼín na̱yivi míínu̱ú ni̱sandoyi nda̱ miísaʼa̱ ña̱ ná o̱kunijo̱ʼona ña̱ káʼa̱n Ndio̱s tátu̱ʼun kée mií Satanás. Tá ni̱ya̱ʼa tiempo ni̱kandeéña ña̱ nda̱ javaka̱ na̱ kúú ángel ná o̱kunijo̱ʼona ña̱ káʼa̱n Ndio̱s. Ta ndijaá ña̱ kúú ángel kini yóʼo naníña demonio. Jeová ni̱taxina ndijaá ángel kini yóʼo nuu̱ indiví ta ni̱na̱xino̱ña va̱xián nuu̱ Ñúʼu̱ Ndeʼi̱, ta sa̱yati ñúʼúvá ndiʼi nuu̱ña indee̱vá (kaʼviní Apocalipsis 12:9, 12, TNM).

3. ¿Ndixi kée Satanás xíʼín demonio jaá jándáʼvia̱n na̱yivi?

Satanás xíʼín demonio jándáʼvia̱n kuaʼa̱ na̱yivi xíʼín ña̱ kúú espiritismo xíʼín ña̱ naní ocultismo, ndijaá ña̱yóʼo kéyatian na̱yivi nuu̱ espíritu kini. Tátu̱ʼun, kée java na̱yivi kaʼvina ña̱ naní horóscopo o javaka̱na ndakatu̱ʼúnna ta̱ kúú astrólogo, na̱ nákuni iní, na̱ káchi kundaa̱ ini ña̱ koo chínuu̱, ndijaá na̱ kuchúun ña̱ tají. Java na̱yivi nandukúna kée tátana kueʼe̱ ndóʼona xíʼín ña̱ kuendá ocultismo. Ta javaka̱ na̱yivi jándaʼvíñana ña̱ kuu ndatúʼúnna xíʼín na̱ sa̱ ni̱xiʼi̱. Jo Jeová kástu̱ʼunna xíʼínyó: “o̱sa̱kuʼu̱nndó nuu̱ na̱ tají ni nuu̱ na̱ nákuni iní” (Levítico 19:31). Jáchi̱ Ndio̱s kúni̱na kandaána miíyó nuu̱ Satanás xíʼín nuu̱ ángel kini, jáchi̱ ña̱yóʼo kandajíán Jeová ta janí kúni̱ña kéendava̱ʼaña xíʼínyó.

NÁ KUNDAA̱ VA̱ʼA CHÁÁKA̱ INIYÓ SAʼA̱ TEMA YÓʼO

Ná káʼa̱nyó saʼa̱ ña̱ va̱ʼa kée na̱ kúú ángel Ndio̱s ta saʼa̱ ndiki̱ʼo kuu játi̱vi ña̱ kúú ocultismo miíyó, ta janí ná kande̱ʼéyó ndixi kuu keeyó jaá ná o̱nákavayó keeyó ña̱ kúni̱ Satanás xíʼín demonio.

Iin ángel chindeé ivi̱ na̱ testigo Jeová tá kauaʼana káʼa̱nna saʼa̱ Tu̱ʼun Nio̱s veʼe ta veʼe.

4. Na̱ kúú ángel Ndio̱s chindeéna na̱yivi saa̱na kundaa̱ inina saʼa̱ Jeová

Na̱ kúú ángel Ndio̱s ko̱ kuaʼa̱n miína kástu̱ʼunna xíʼín na̱yivi. Jo ña̱ kée ángel kúú ña̱ chindáʼana na̱ xínukuáchí nuu̱ Ndio̱s kuaʼa̱nna nandukúna na̱yivi kúni̱ kundaa̱ ini saʼa̱na. Kaʼvindó Apocalipsis 14:6, 7, TNM ta kanatúʼúnndó saʼa̱ ña̱ va̱xi yóʼo:

¿Ndiva̱ʼa xiniñúʼúnyó ña̱ ángel ná chindeénayó tá kuaʼa̱nyó kástu̱ʼunyó saʼa̱ Tu̱ʼun Ndio̱s?
¿Á kujii̱ ininí viti ña̱ ni̱kundaa̱ ininí ña̱ na̱ ángel kuu chindáʼana miíní kuʼu̱nní káʼa̱nní xíʼín inga na̱yivi jaá kunijo̱ʼona Tu̱ʼun Ndio̱s? Ta ¿ndiva̱ʼa?

Kuaʼa̱ ña̱ʼa kuchúun na̱ kee ña̱taji: tátu̱ʼun tabla nuu̱ ndatúʼ únna xíʼín espíritu kini, bola cristal, libro káʼa̱n saʼa̱ vampiro, cartas tarot, muñeco vudú, jusa chinima, amuleto, fetiches xíʼín javaka̱ ña̱ʼa kuchúunna tá ketajina.

5. O̱sa̱kandísaní espiritismo ta ni ña̱ kúú kuendá ocultismo

Satanás xíʼín demonio kandajíña Jeová, ta janí kandajíña miíyó. Kaʼvindó Lucas 9:38-42, TNM ta kanatúʼúnndó saʼa̱ ña̱ va̱xi yóʼo:

¿Ndíki̱án kée demonio xíʼín na̱yivi?

Ná o̱ki̱ʼayó íchi̱ ña̱ kíʼvi demonio veʼeyó ta kéendava̱ʼaña̱ xíʼínyó. Kaʼvindó Deuteronomio 18:10-12 ta kanatúʼúnndó saʼa̱ ña̱ va̱xi yóʼo:

¿Ndixi kée ña̱ ángel kini yóʼo jaá ná keeyó ña̱ kúni̱ña ta janí ná kuyatiyó nuu̱ña? ¿Ndiku̱ú ña̱ʼa kuendá ocultismo kéena nuu̱ ió miíní?
¿Ndixi xiní miíní á ña̱ va̱ʼa kían kée Ndio̱s ña̱ ko̱ kúni̱na chi̱ʼiyó miíyó tein ocultismo? Ta ¿ndiva̱ʼa?

Kande̱ʼéndó VIDEO ta kanatúʼúnndó saʼa̱ ña̱ va̱xi yóʼo:

VIDEO: “O̱sa̱kandísandó keendó ña̱ kúni̱ Ti̱míaʼá” (5:02)

¿Á káʼánní ña̱ amuleto ni̱kuchúun taleé Palesa kúúña ña̱ kini? Ta ¿ndiva̱ʼa?
¿Ndiku̱ú ña̱ ni̱kee Palesa jaá ko̱ ni̱keeka̱ñá ña̱ kúni̱ ángel kini?

Ndijaá na̱ kúú cristiano ndaa̱ ndísa jaá kuití ko̱ kéena ña̱ kúni̱ demonio. Kaʼvindó Hechos 19:19 xíʼín 1 Corintios 10:21, TNM ta kanatúʼúnndó saʼa̱ ña̱ va̱xi yóʼo:

¿Ndiva̱ʼa ña̱ kúni̱ʼi kúú ña̱ jánaání nuu̱ ndiku̱ú miívá ña̱ʼa ió nuu̱ní tá kúúña ña̱ kuendá ocultismo?

Iin ñáʼa̱ chiñuʼuñá java ña̱ʼa kuenda ña̱taji.

6. Kuu kandeéní xíʼín Satanás ta xíʼín demonio

Satanás saʼndá chúun nuu̱ demonio. Jo nuu̱ na̱ kúú ángel va̱ʼa arcángel Miguel kúú na̱ saʼndá chúun nuu̱ na̱yóʼo, ña̱yóʼo kúú inga kivi̱ Jesús. ¿Ndijaa̱ ví ndee̱ ió nuu̱ Miguel? Kaʼvindó Apocalipsis 12:7-9, TNM ta kanatúʼúnndó saʼa̱ ña̱ va̱xi yóʼo:

¿Ndáyoo kúúna ió chááka̱ ndee̱: Miguel xíʼín ángel va̱ʼa, o Satanás xíʼín ángel kini?
¿Á káʼánní ña̱ miíyó na̱ ndíko̱ Cristo á kánian yu̱ʼúyó Satanás xíʼín demonio?

Miíní kuu kandeéní xíʼín Satanás ta xíʼín demonio. Kaʼvindó Santiago 4:7 ta kanatúʼúnndó saʼa̱ ña̱ va̱xi yóʼo:

¿Ndíki̱án kuu kee miíní jaá ná o̱kandeé Satanás ni demonio xíʼínní?

ÑA̱ KÁʼA̱N INGA NA̱YIVI: “Ko̱ kúúña iin ña̱ kini ña̱ kujíkíyó o ña̱ kande̱ʼéyó película nuu̱ va̱xi káʼa̱n saʼa̱ magia o saʼa̱ ña̱ tají. Ña̱ sa̱jíkí oo̱nváyó kúúña”.