ÑA̱ SÁNAʼA̱ ÑA̱ 5

Na̱ néʼe táʼan va̱ʼa síʼín ndióxi̱ kundoo na nuu̱ ñúʼu̱ ntseʼei̱ ña̱ núchí

Nuu̱ Ñúʼu̱ núchí e̱kúndoo na̱yivi kiñi. Ndióxi̱ ko̱ ñi kúñi̱ ra̱ ña̱ ná koo tu̱ndóʼó, ñi ña̱ ná ndíʼi̱ʼví iñi yó ñi ña̱ ná ndoʼo iñi yó. Cháá ga̱ ñi chinuu̱, Ndióxi̱ sa­ndunúchí rá Ñúʼu̱ ntseʼei̱ yóʼo. ¿Ñixi? Ná kunde̱ʼé yó ña̱ kachí Tu̱ʼun Ndióxi̱.

Na̱yivi na̱ va̱ʼa iñi. Na̱ néʼe táʼan va̱ʼa síʼín Ndióxi̱ kundoo na nuu̱ Ñúʼu̱ núchí. Na̱ yóʼo kukuu na na̱yivi na̱ va̱ʼa iñi sítáʼan tsa kee na ña̱ kúñi̱ Ndióxi̱ Jeo­vá (Proverbios 2:​21).

Koo kuaʼa̱ ntsiva̱ʼa ña̱ kasíaʼan yó. Nuu̱ Ñúʼu̱ núchí, ñi iin na̱yivi e̱kúu ga̱ na̱ siaʼa̱ so̱ko. Tu̱ʼun Ndióxi̱ kachía̱: “Ta ko̱ó ga̱ jo̱ko kixi nu̱ ná ta ni a̱ íchi̱ ga̱ ini na tikui̱í” (Apocalipsis 7:​16).

Koo veʼe ña̱ va̱ʼa ntsiva̱ʼa tsa kusii̱ iñi na kuchúun na. Nuu̱ Ñúʼu̱ núchí, ntsiʼi na̱yivi koo veʼe mií ná, tsa ntsiʼi na̱yivi kusii̱ iñi na kuchúun na (Isaías 65:​21-​23).

Nuu̱ iñíí ñúʼu̱ ntseʼei̱ kundoo vivií na̱yivi. Na̱yivi e̱káʼñí táʼan ga̱ na̱ tsa ñi e̱kañi táʼan ga̱ na̱. Tu̱ʼun Ndióxi̱ kachía̱ ña̱: “ [Ndióxi̱] sántsíʼi [ra] ña̱ siáʼñí táʼan na” (Salmo 46:​8, 9).

E̱kóo ga̱ kueʼe̱. Tu̱ʼun Ndióxi̱ kachía̱ ña̱: “Ñi iin na̱yivi [na̱ kundoo nuu̱ Ñúʼu̱ núchí] ñi̱ e̱káchi na: ‘Yuʼu̱ kuʼvi̱i̱ʼ ” (Isaías 33:​24). Tsa na̱yivi na̱ ko̱ kuvi kakanuu va̱ʼa vitsi kakanuu va̱ʼa na, na̱ kuaá nuu̱ ndatuvi nuu̱ ná, tsa na̱ sóʼó tsaso̱ʼó va̱ʼa na, na̱ ñíʼi̱ ndakaʼa̱n na̱ (Isaías 35:​5, 6).

E̱táʼnda̱ ga̱ ini na ta ni a̱ ndíʼi̱ʼvi̱ ga̱ na̱ ta ni a̱ kíví ga̱ na̱. Tu̱ʼun Ndióxi̱ kachía̱: “Ta ni a̱ kíví ga̱ na̱. Ta ni a̱ kuáku ga̱ na̱. Ta ni a̱ táʼnda̱ ga̱ ini na. Ta ni a̱ ndíʼi̱ʼvi̱ ga̱ na̱. Jáchi̱ sa̱ na̱jándiʼi Ndióxi̱ sa̱ʼa̱ [...] ndiʼi ña̱ kán” (Apocalipsis 21:4).

E̱kóo ga̱ na̱yivi na̱ kiñi. Ndióxi̱ Jeo­vá kachí ra̱: “Ña̱ na̱yivi kiñi, e̱kútsaku ga̱ na̱ sata ñúʼu̱ ntseʼei; tsa na̱ ko̱ kée ña̱ va̱ʼa, naá ná inteéva” (Proverbios 2:​22).

Na̱yivi kuʼvi iñi táʼan na tsa koo tuviñúʼú iñi na. Ntsinuʼu ña̱ nda̱a̱ ña̱ va̱ʼa koo kán e̱kóo ga̱ ña̱ kandají táʼan na. Na̱yivi kaneʼe táʼan va̱ʼa na tsa kee na ntsiʼi ña̱ kúñi̱ Ndióxi̱ (Isaías 26:9).