ÑA̱ SÁNAʼA̱ ÑA̱ 11

Ná e̱kúntsiku̱ yo̱ religión ña̱ ko̱ sánaʼa̱ ña̱ nda̱a̱ siaʼa̱ ndióxi̱

Satanás síʼín ña̱ kiñi ko̱ kúñi̱a̱ ña̱ ná sáchúun va̱ʼa yó nuu̱ Ndióxi̱. Satanás síʼín ña̱ kiñi ko̱ kúñi̱a̱ ña̱ na̱yivi ná kuyatsi na nuu̱ Ndióxi̱. ¿Ñixi? Kéa ña̱ ná kuntsiku̱ na̱yivi religión ña̱ ko̱ sánaʼa̱ ña̱ nda̱a̱ siaʼa̱ Ndióxi̱ (2 Corintios 11:​13-​15). Religión ña̱ ko̱ sánaʼa̱ ña̱ nda̱a̱ siaʼa̱ Ndióxi̱ kúñi̱a̱ kachia ña̱ kú ná na̱yivi na̱ ko̱ ntsíku̱n ña̱ kachí Tu̱ʼun Ndióxi̱. Religión ña̱ ko̱ sánaʼa̱ ña̱ nda̱a̱ siaʼa̱ Ndióxi̱ kíá tatún xu̱ʼún ña̱ ko̱ó ya̱ʼvi: tatún ña̱ ya̱ʼvi ntsiva̱ʼa kíá só ko̱ó ya̱ʼvia inteéva. Tsa kuvi koo kuaʼa̱ ntsiva̱ʼa tu̱ndóʼó nuu̱ yo̱ siaʼa̱ ña̱yóʼo.

Ndióxi̱ Jeo­vá ko̱ kútoó ra̱ ña̱ ná kuntsiku̱ yo̱ religión ña̱ ko̱ sánaʼa̱ ña̱ nda̱a̱ siaʼa̱ miírá, iin túʼún mií Jeo­vá va kú Ndióxi̱ tsa nda̱a̱. Tá ñi̱ sioó Jesús nuu̱ Ñúʼu̱ ntseʼei̱ yóʼo, ñi̱ kúñi̱ na̱ káʼñí ná ra. Na̱ yóʼo ñi̱ keekáʼno na Ndióxi̱ tatún ñi̱ kúñi̱ mií va na. Ñi̱ kachi na: “Ndióxi̱ kúú ndusa tatá nde̱”. Só ¿á ñi̱ sitaʼan iñi Jesús ta ñi̱ kaʼa̱n na̱ saá? Ko̱ ñí sitaʼan iñi ra̱. Jesús ñi̱ kachi ra: “Tatá ndo kúú tiñáʼá” (Juan 8:​41, 44). Na̱yivi na̱ ndóo kivi̱ vítsi, kuaʼa̱ na káʼán ná ña̱ kéekáʼno na Ndióxi̱, só e̱suú saá kíá, sáchúun na nuu̱ Satanás síʼín ña̱ kiñi (1 Corintios 10:​20).

Tatún iin yító kuiʼí ñi̱ tseʼei̱ kui̱ʼi tséʼeí vá kána nuu̱ to̱, na̱ ntsíku̱n religión ña̱ ko̱ sánaʼa̱ ña̱ nda̱a̱ siaʼa̱ Ndióxi̱ na̱yivi kiñi va kú ná. Nuu̱ iñíí kúú ñuyíví iyá kuaʼa̱ ntsivaʼa tu̱ndóʼó siaʼa̱ ña̱ kiñi ña̱ kée na̱yivi. Iyá na̱yivi na̱ kiñi ntsivaʼa, na̱ kée kua̱chi kiñi, na̱ káñi táʼan, na̱ sakuíʼná, na̱ siáʼñí táʼan. Ntsiʼi na̱yivi na̱ kée ña̱ kiñi yóʼo ntsíku̱n na̱ iin religión, só na̱ ntsíku̱n religión yóʼo ko̱ kée na ña̱ va̱ʼa. Ñi̱ e̱kuvi kaneʼe táʼan va̱ʼa na síʼín Ndióxi̱ Jeová tú kée na ña̱ kiñi (Mateo 7:​17, 18).

Na̱yivi na̱ ntsíku̱n religión ña̱ ko̱ sánaʼa̱ ña̱ nda̱a̱ siaʼa̱ Ndióxi̱ sánaʼa̱ na̱ ña̱ ná keekáʼno yó toʼó ña̱ iín ñuyíví yóʼo. Ndióxi̱ Jeová ko̱ kúñi̱ ra̱ ña̱ ná kée­káʼno yó toʼó ña̱ iín ñuyíví yóʼo. ¿Á va̱ʼa kúu iñi yó ña̱ na̱yivi ná e̱kaʼa̱n na̱ síʼín yó só va̱ʼa kaʼa̱n na̱ síʼín náʼná yó? ¿Á va̱ʼa kúu iñi yó kaneʼe táʼan va̱ʼa yó síʼín ná? Ko̱ó, e̱kúu mií vá. Ndióxi̱ Jeo­vá kúñi̱ ra̱ ña̱ ná kaʼa̱n yo̱ síʼín miírá, ko̱ kúñi̱ ra̱ ña̱ ná kaʼa̱n yo̱ síʼín toʼó ña̱ iín ñuyíví yóʼo ña̱ ko̱ tsakú (Éxodo 20:​4, 5).

Na̱yivi na̱ ntsíku̱n religión ña̱ ko̱ sánaʼa̱ ña̱ nda̱a̱ siaʼa̱ Ndióxi̱ kachí na̱ ña̱ va̱ʼa va ña̱ ná káʼñí táʼan na̱yivi. Jesús ñi̱ kachi ra ña̱ na̱ néʼe táʼan va̱ʼa síʼín Ndióxi̱ kúʼvi̱ iñi táʼan na. Ko̱ siáʼñí yó na̱yivi na̱ kúñi̱ yo̱ (Juan 13:​35). Tsa ñi ko̱ váʼa ña̱ káʼñí yó na̱yivi na̱ kiñi. Tá ñi̱ tsiín na Jesús, miíra̱ ko̱ ñí sándúkoo ra ña̱ na̱ ntsíku̱n ñaʼá ná chindeé ná ra̱ (Mateo 26:​51, 52).

Na̱yivi na̱ ntsíku̱n religión ña̱ ko̱ sánaʼa̱ ña̱ nda̱a̱ siaʼa̱ Ndióxi̱ kachí ná ña̱ na̱yivi kiñi kuʼu̱n na̱ intsayá. Tu̱ʼun Ndióxi̱ sánaʼa̱ ña̱ ña̱ siaʼa̱ kua̱chi, na̱yivi síʼi̱ va ná (Romanos 6:​23). Ndióxi̱ Jeo­vá kúñi̱ ra̱ na̱yivi. Ndióxi̱ tsa va̱ʼa ntsiva̱ʼa iñi ¿á sándúkoo ra ña̱ ná ndoʼo iñi yó? E̱sándúkoo ra ña̱ ndoʼo iñi yó. Nuu̱ Ñúʼu̱ ntseʼei̱ ña̱ núchí iin túʼún vá religión koo, religión ña̱ kúñi̱ Ndióxi̱ Jeo­vá ña̱ ná kuntsiku̱ na̱yivi (Apocalipsis 15:4). Ntsiʼi religión ña̱ ko̱ sánaʼa̱ ña̱ nda̱a̱ siaʼa̱ Ndióxi̱ naá ñá inteéva saáchi Satanás va kúa̱ indakaá sata̱ ña̱yóʼo.