ÑA̱ SÁNAʼA̱ ÑA̱ 12

¿Ntse kuaʼa̱n yo̱ tá síʼi̱ yo̱?

Tá síʼi̱ yó naá yó inteéva. Kíá tatún ña̱ kíxi̱ naá yó (Juan 11:​11-​14). Na̱ ntsi̱i ko̱ tsáku ga̱ so̱ʼo na, ko̱ ndéʼé ga̱ na̱, ko̱ kaʼa̱n ga̱ na̱, ko̱ ndákañi ga̱ iñi na inteéva (Eclesiastés 9:​5, 10). Na̱yivi na̱ ntsíku̱n religión ña̱ ko̱ sánaʼa̱ ña̱ nda̱a̱ siaʼa̱ Ndióxi̱ kachí ná ña̱ tá síʼi̱ yo̱ nduú yó íñíma̱ va. Só Tu̱ʼun Ndióxi̱ ko̱ kachíá saá.

Na̱ ntsi̱i e̱kúvi sándóʼo na iñi yó ñi e̱kúvi chindeé ná miío. Kuaʼa̱ na̱yivi ndákuatú ná nuu̱ na̱ ntsi̱i saáchi káʼán ná ña̱ na̱ ntsi̱i tsakú va na. Ndióxi̱ ko̱ sitaʼan iñi ra ña̱yóʼo saáchi Tsimíaʼá va kúa̱ kée ña̱ na̱yivi ná kántsísia na ña̱yóʼo. Ntsikuií va ña̱yóʼo kée uun va na̱yivi ña̱, saáchi na̱ ntsi̱i ko̱ tsakú ga̱ na̱. Tsa ko̱ váʼa mií va ña̱ ná keekáʼno yó na̱ ntsi̱i á ña̱ yu̱ʼú yó ña̱ sandají ná miío. Mitúʼún va Ndióxi̱ Jeová kánia keekáʼno yó (Mateo 4:​10).

Na̱ yivi na̱ ñi̱ siʼi̱ ndatsaku tuku na. Cháá ga̱ ñi chinuu̱, Ndióxi̱ Jeo­vá sándátsaku ra na̱yivi, já ná kundoo na nuu̱ Ñúʼu̱ ntseʼei̱ ña̱ núchí (Juan 5:​28, 29; Hechos 24:​15). Ndióxi̱ Jeová kuvi sándúkásí rá iñi na̱yivi na̱ ñi̱ siʼi̱ kíá tatún tá kaʼa̱n yo̱ síʼín na̱yivi ña̱ ná ndukásí iñi na tá kíxi̱ naá ná (Marcos 5:​22, 23, 41, 42).

Na̱ ñuyíví yóʼo kachí ná ña̱ tá síʼi̱ yo̱ tsakú va íñíma̱ yó só e̱su̱ú saá kíá, Satanás ña̱ kú Tsimíaʼá kúa̱ kée ña̱ na̱yivi ná kántsísia na ña̱yóʼo. Satanás síʼín ña̱ kiñi kúñi̱a̱ ña̱ na̱yivi ná kántsísia na ña̱ tá síʼi̱ yó tsakú va íñíma̱ yó tsa kée yó ña̱ ná ndoʼo iñi na̱yivi na̱ tsakú. Tsimíaʼá sándaʼvía̱ na̱yivi, kúñi̱a̱ ña̱ ná kántsísia na ña̱ síañi na̱. Ña̱kán, Ndióxi̱ Jeo­vá ko̱ sitaʼan iñi ra ña̱ ná kaʼa̱n yó síʼín íñíma̱ ntsi̱i (Deuteronomio 18:​10-​12).