¿Ndíki̱án kuni miíní tá ná saa̱ ní nuu̱ nátaka nduʼu̱?

Kuaʼa̱ na̱yivi ko̱ sáʼa̱n ka̱ na̱ veñu̱ʼu na jáchi̱ ko̱ chíndeé ná na̱ já kundaa̱ ini na saʼa̱ Tu̱ʼun Ndio̱s, ta ni ko̱ síʼa na tu̱ndeé ini nuu̱ ná saʼa̱ ndijaá ña̱ ndóʼo na. Saʼa̱ ña̱yóʼo, ¿ndiva̱ʼa kánian kuʼu̱n miíní nu̱ú nátaka na̱ testigo Jeová jákuáʼa na saʼa̱ Tu̱ʼun Ndio̱s? Ta, ¿ndixi kuu ini miíní tá ná kuʼu̱n ní yóʼo?

Kujii̱ ini miíní kanakaa̱ ní tein na̱yivi na̱ va̱ʼa ini ta ndíʼi ini na saʼa̱ java ka̱ na̱. Kivi̱ ni̱ si̱ndoyi na ni̱ xika tuun xíʼín Jesús, na̱ kuéntá Cristo ni̱ si̱ nátaka na já ni̱ si̱ nda̱ñu̱ʼu na Ndio̱s, ta ni̱ si̱ ja̱kuáʼa na Tutu ii̱, ta ni̱ si̱ si̱ʼa na to̱ndeé ini xíʼín táʼan na (Hebreos 10:24, 25). Tá si̱ na̱taka na, va̱ʼa ni̱ si̱kuu ini na jáchi̱ ñúchí ni̱ si̱neʼe táʼan va̱ʼa na xíʼín ñani táʼan na na̱ ni̱ si̱ ja̱kuáʼa xíʼín ná (2 Tesalonicenses 1:3; 3 Juan 14). Kivi̱ víti jaá ní nduʼu̱ kée nduʼu̱ tátu̱ʼun ni̱ si̱ kee na̱ kuéntá Cristo, ta ki̱ʼa jaá ní kúu ini nduʼu̱.

Chindeéán yóʼo miíyó já kee yó ña̱ káʼa̱n Tu̱ʼun Ndio̱s. Tátu̱ʼun ki̱ʼa ni̱ si̱ kee na̱ ñani táʼan yó tá si̱naʼá, kivi̱ víti na̱ ta̱a, na̱ ñáʼa̱, xíʼín na̱ va̱lí nátaka nduʼu̱ sinajo̱ʼo ndu ña̱ jánaʼa̱ na̱ xíni̱ chááka̱ saʼa̱ Tu̱ʼun Ndio̱s, ta na̱yóʼo jánaʼa̱ na̱ nu̱ú nduʼu̱ ndixi kuu kee ndu ña̱ káʼa̱n Tu̱ʼun Ndio̱s ndini kivi̱ (Deuteronomio 31:12; Nehemías 8:8). Ndijaá vá na̱ sáʼa̱n nu̱ú nátaka nduʼu̱ jákuáʼa ndu saʼa̱ Tu̱ʼun Ndio̱s, kuu kaʼa̱n na̱ saʼa̱ ña̱ jákuáʼa na, ta jaá ní kuu kata na yaa nuu̱ Ndio̱s, ta ki̱ʼa jaá kuu naʼa̱ na̱ ndixi kúu ini na (Hebreos 10:23).

Chindeéán miíní já kandeé chááka̱ ini ní Ndio̱s. Kivi̱ ni̱ si̱io apóstol Pablo jaá ni̱ taa ra iin tutu ni̱ ta̱ndaʼá rá nuu̱ iin congregación, ta ni̱ kachi ra: “Kóni̱i̱ saa̱i̱ kande̱ʼí ndo̱ʼó [...] dá ná naki̱ʼo táʼan yó to̱ndeé iní noo̱ iin rá iin yó no̱ó ña̱ ndaa̱ kándísa yó, chi̱ iin nóó kúú vá ña̱ kándísa yó” (Romanos 1:11, 12). Tá ná kuʼu̱n yó nu̱ú nátaka na̱ ñani táʼan yó ña̱yóʼo chindeéán miíyó, jáchi̱ kandeé chááka̱ ini yó Ndio̱s, ta jaá xinu̱ chááka̱ ini yó kandoyi yó tátu̱ʼun ki̱ʼa ndóyi na̱ ndíko̱ Cristo.

Tá ná kixi ní nuu̱ nátaka nduʼu̱ jaá kía̱n kuni ní ña̱ ña̱ ndaa̱ kúú ndiʼi ña̱yóʼo. Ta kujii̱ ini nduʼu̱ tá ná saa̱ ní. Ta ko̱ kíʼin ya̱ʼvi nduʼu̱ nuu̱ nátaka ndu, ta ni o̱káka̱ nduʼu̱ xu̱ʼún nuu̱ ní.

• ¿Ndixi nátaka nduʼu̱ jákuáʼa ndu saʼa̱ Tu̱ʼun Ndio̱s kivi̱ víti?

• Tá ná kuʼu̱n yó nuu̱ nátaka na̱ ndíko̱ Cristo jákuáʼa na Tu̱ʼun Ndio̱s, ¿ndixi chindeéán yóʼo miíyó?