LECCIÓN 9
¿Ndíki̱án kanian kee ní já kati̱ʼa va̱ʼa ní miíní ta kuaʼa̱n ní nuu̱ nátaka yó?
Camboya
Ucrania
Tá jákuáʼa ní xíʼín na̱ testigo Jeová, á o̱ndaa̱ ña̱ xinañúʼú ka̱ miíní kaʼvi ní ña̱ jákuáʼa ní xíʼín na. Já ná chíndeéán miíyó ki̱ʼa jaá ní kánian kee yo̱ tá kuaʼa̱n yo̱ nuu̱ nátaka yó. Tá si̱jaá kuití kee ní ña̱yóʼo jaá kía̱n chindeé cháá ka̱ ña̱yóʼo miíní.
Kunde̱ʼé ní ndá ama ta nda̱ kúú nu̱ú kuu jákuáʼa ní. ¿Nda̱ kúú hora va̱ʼa cháá ka̱ kuu jákuáʼa ní? ¿Á ta naʼá ta kúmani̱ kásáʼá ní kachúun ní á ta si̱ ni̱ kuaá ta si̱kuaʼa̱n na̱ ku̱alí kuju̱ na? Va̱árá ko̱ kuaʼa̱ tiempo nuu̱ ní ña̱ jákuáʼa ní, jó kunde̱ʼé va̱ʼa ní ndá hora kuu jákuáʼa ní, ta o̱kúaʼa̱ ní íchi̱ ña̱ ni iin ña̱ʼa jatanián nuu̱ ní ña̱ jákuáʼa ní. Nandukú ní iin nu̱ú táxi̱ káa nuu̱ kuu jákuáʼa ní, ndaʼva ní tele, radio, celular. Xinañúʼú ka̱ kaka̱taʼvi̱ ní nuu̱ Ndio̱s já jákuáʼa ní, ña̱yóʼo chindeéán miíní ja ndandojo ní ndíʼi ña̱ ndiʼi ini ní ta jaá kundaa̱ va̱ʼa ini ní ña̱ jákuáʼa ní nuu̱ Tu̱ʼun Ndio̱s (Filipenses 4:6, 7).
Keʼi ní tutu ña̱ jákuáʼa na ta já kuu kaʼa̱n ní ña̱yóʼo nuu̱ nátaka na. Ta kasáʼá ní jákuáʼa ní kunde̱ʼé ní nda̱ saʼa̱ káʼa̱n ña̱. Nakani ini ní saʼa̱ título a capítulo tutu, kunde̱ʼé ní subtítulo xíʼín saʼa̱ ña̱ káʼa̱n ña̱ iin nakiʼin táʼan va ña̱ kuaʼa̱n ña̱, ta jaá ní kunde̱ʼé ní naʼná ña̱ va̱si nuuan, ta kaʼvi ní tu̱ʼun ña̱ ndakatu̱ʼún ña̱ ña̱ va̱si nuu̱ ja̱ndíʼi nuu̱ káʼa̱n ña saʼa̱ ña kúni̱ʼi va̱si nuu̱ tutu. Kaʼvi ní iin ta iin yíko̱ ta kunde̱ʼé ní ndá kuu nuu̱ nandiónéʼe ña̱ tu̱ʼun ndakatu̱ʼún yíko̱. Nandukú ní texto ña̱ vási nuu̱ yíko̱ ta kunde̱ʼé ní ña̱ nakiʼin táʼan va ña̱ kuaʼa̱ ña xíʼín ndiʼi ña̱ va̱si nuu̱ yíko̱ (Hechos 17:11). Tá ta ni̱ naniʼi̱ ní tu̱ʼun nuu̱ nandiónéʼe ña̱ ndakatu̱ʼún ña̱, keʼi ní cháá tu̱ʼun ña kuu chindeé miíní naku̱ʼun ini ní káʼa̱n ní. Tá ná kuʼu̱n ní nu̱ú nátaka na kuu va ndaniʼi̱ ní ndáʼa̱ ní káʼa̱n ní ña̱ ni̱ kundaa̱ ini ní ta kúni̱ ní.
Ta jákuáʼa ní ndijaá ña̱ jákuáʼa yó iin ta iin semana nu̱ú nátaka yó, kía̱n tátu̱ʼun ña̱ chikaa̱ va̱ʼa ní ñaʼá ña̱ va̱ʼa ini “sato” ní ñaʼá ña̱ va̱si nuu̱ Tu̱ʼun Ndio̱s (San Mateo 13:51, 52).
¿Ndíki̱án jaá kuití kánian kee ní já kati̱ʼa ní miíní ta kuaʼa̱n ní nu̱ú nátaka yó?
¿Ndixi kuu kee ní já kati̱ʼa va̱ʼa ní miíní já ndáni̱ʼi̱ ní ndáʼa̱ ní káʼa̱n ní nuu̱ nátaka yó?