¿Á miía̱ndaa̱ ndísa kuu nataku na̱ ni̱xiʼi̱?

ÑA̱ KÁʼA̱N TU̱ʼUN NDIO̱S

“Kándísa yuʼu̱ ña̱ dánátaki [jánátaku] Ndios na̱ ni̱ xiʼi̱” (Hechos 24:​15, Tuti yóʼo kúú to̱ʼon Ndios, ta xíʼo ña kuendá saʼa̱ Jesús).

NDIXI CHINDEÉ ÑA̱YÓʼO MIÍYÓ

Tá ná kivi iin na̱yivi na̱ kúni̱yó, ña̱yóʼo ki̱ʼoña ta̱ndeé ini nuu̱yó (2 Corintios 1:​3, 4).

Viti ko̱ yu̱ʼúka̱yó kiviyó (Hebreos 2:​15).

Xíni̱ va̱ʼayó ña̱ chááka̱ chínuu̱ kande̱ʼé tukuyó na̱yivi na̱ kúni̱yó na̱ ni̱xiʼi̱ (Juan 11:​25).

¿Á MIÍA̱NDAA̱ KUU KANDÍSAYÓ ÑA̱ KÁʼA̱N TU̱ʼUN NDIO̱S?

Kuuvá kandísayó, ná kande̱ʼéyó uni̱ ña̱ naʼa̱ ña̱ jaá kían:

• Ni̱kava̱ʼa Ndio̱s ndijaá táʼa̱n ña̱ ta̱kú. Biblia káʼa̱nña ña̱ nuu̱ Jeová Ndio̱s va̱xi “ña̱ ta̱kú ña̱ kúú vida” (Salmo 36:9; Hechos 17:​24, 25). Ni̱keena ña̱ ná kutaku ndijaá táʼa̱n ña̱ ta̱kú, ta ña̱yóʼo naʼa̱ ña̱ ió ndee̱na ña̱ keena ña̱ ná nataku na̱ ni̱xiʼi̱.

• Tá si̱naʼá sa̱ ni̱naʼa̱vá Ndio̱s ña̱ kuuvá jánátakuna na̱ ni̱xiʼi̱. Tu̱ʼun Ndio̱s káʼa̱nña saʼa̱ una̱ taʼndá ña̱ ni̱ja̱nátaku Ndio̱s na̱yivi ni̱xiʼi̱ —ñáʼa̱ xíʼín ta̱a ta sa̱jíin sa̱jíin kuia̱na— ta ni̱natakuna nuu̱ Ñúʼu̱ Ndeʼi̱ yóʼo. Java na̱yóʼo ni̱natakuna tá ni̱ya̱ʼa cháá tiempo ña̱ ni̱xiʼi̱na; jo ni̱saio iin ta̱a ña̱ sa̱ ni̱ya̱ʼa kumi̱ví kivi̱ ña̱ ni̱xiʼi̱ra ta ni̱ja̱nátakunara (Juan 11:​39-​44).

• Kúu kíivá ini Ndio̱s jánátakuna na̱yivi na̱ ni̱xiʼi̱. Ko̱ nátaʼan míívá ini Jeová Ndio̱s ña̱ ná kivi na̱yivi jáchi̱ kandajína ña̱yóʼo (1 Corintios 15:​26). Kúu kíi inina jándíʼina nuu̱ ña̱yóʼo ta keena ña̱ ná nataku na̱ ni̱xiʼi̱. Na̱yivi na̱ ñuʼu ini Ndio̱s saʼa̱ kúni̱ kíina ña̱ ná nataku tukuna nuu̱ Ñúʼu̱ Ndeʼi̱ yóʼo (Job 14:​14, 15).