¿Ndixi kée yíko̱ ndó tu̱ndóʼó ndóʼo ndó?

Tá iin ta̱ ta̱a xíʼín iin ñá ñáʼa̱ tandaʼa̱ ná, ndóʼo ná kuaʼa̱ tu̱ndóʼó, tá ña̱yóʼo kía̱n saʼa̱ ña̱ si̱ jíin si̱ jíin nakani ini ná á saʼa̱ ña̱ jíin ndiva̱ʼa kúú ná á saʼa̱ ña̱ jíin ndiva̱ʼa ni̱ sáʼnu ná. Jaá ní ió tein ña̱ ndóʼo ná tu̱ndóʼó va̱árá o̱ju̱ú kua̱chi na̱ kíán á iin kuití vá va̱si java ga̱ tu̱ndóʼó nuu̱ na̱.

Kuaʼa̱ ná ko̱ó chí kuéntá ná tu̱ndóʼó ña̱ kúu, jo Tu̱ʼun Ndio̱s kachian ña̱ káni ndaja yíko̱ ná tu̱ndóʼó ña̱ ndóʼo ná (San Mateo 5:23, 24). Tá ná kée ná ña̱ káʼa̱n Tu̱ʼun Ndio̱s ndiʼi ña̱ kée ná kana va̱ʼa ña̱.

1 NDATU̱ʼUN NÍ SAʼA̱ TU̱NDÓʼÓ ÑA̱ NDÓʼO NÍ

ÑA̱ KÁʼA̱N TU̱ʼUN NDIO̱S: “Ió iin tiempo ña̱ kuu káʼa̱n yó” (Eclesiastés 3:1, 7). Káni tavá ní tiempo ndatu̱ʼun ní saʼa̱ tu̱ndóʼó ndóʼo ní; káʼa̱n ndaa̱ ní ndixi kúu ini ní ta ndíki̱án nakani ini ní saʼa̱ ña̱yóʼo. Si̱jaá kuití káʼa̱n ní ña̱ ndaa̱ (Efesios 4:25). Va̱árá sijo ndiva̱ʼa ini ní, kuaʼá ndeé vá ini ní o̱kanitáʼan ní. Tá ná káʼa̱n vií ní, ña̱yóʼo chindeéán miíní já o̱ndukáʼnu ga̱ tu̱ndóʼó (Proverbios 15:4; 26:20).

Va̱árá ko̱ó nataʼan ini ní ndixi kée na̱ ni̱ tandaʼa̱ xíʼín ní, si̱jaá vií káni kukuu ní; koo ña̱ñúʼú ní nuu̱ ná ta kiʼvi ini ní ná (Colosenses 4:6). Kée ní tata̱ ña̱ ná o̱yaʼa kuaʼa̱ tiempo já kée yíko̱ ní tu̱ndóʼó, tá o̱ndají tachi táʼan ndó (Efesios 4:26).

KÉE NÍ ÑA̱YÓʼO:

• Kaki ní iin hora ña̱ ndatu̱ʼun ní saʼa̱ tu̱ndóʼó

• Tá na̱ ni̱ tandaʼa̱ xíʼín ní káʼa̱n ná, va̱árá kúu ini ní káʼa̱n ní kuaʼá ndeé vá ini ní. Ndá tá ni̱ ndiʼi já kuu káʼa̱n ní

2 KUNIJO̱ʼO NÍ TA KUNDAA̱ INI NÍ

ÑA̱ KÁʼA̱N TU̱ʼUN NDIO̱S: “Kuʼu̱ sátáʼan ini ndo̱ saʼa̱ ndo̱. Ta táto̱ʼon ki̱ʼo ndóʼo ndó xíʼín na̱ veʼe mií ndó, ki̱ʼo dión kandoʼo ndó xíʼín dao ka̱ na̱. Ta koo ini ndo̱ koo ña̱ñóʼó ndó noo̱ iin rá iin ndó” (Romanos 12:10, Tyk). Káni kunijo̱ʼo ní ña̱ káʼa̱n na̱ ni̱ tandaʼa̱ xíʼín ní tá jaá ní káni kundaa̱ ini ní ndixi̱ kúu ini ná, “ko̱ ndítaʼan kaʼnda táʼan ndó” “ta koto a̱ ndíñeʼe jíkó ndo̱ mé ndó” (1 Pedro 3:8; Santiago 1:19). O̱kée ní tátu̱ʼun ña̱ sinijo̱ʼo ní. Jandakoo ní ña̱ kée ní ta ndatu̱ʼun ní xíʼín na̱ ni̱ tandaʼa̱ xíʼín ní á ndakatu̱ʼún ní ná ndá hora va̱ʼa ndatu̱ʼun ní xíʼín ná. Ta ndéʼé ní ná tátu̱ʼun iin na̱ néʼe táʼan va̱ʼa xíʼín ní tá o̱ju̱ú tátu̱ʼun na̱ kandají miíní, ña̱yóʼo chindeéán miíní já o̱ndúkueʼe kama ní (Eclesiastés 7:9).

KÉE NÍ ÑA̱YÓʼO:

• Kunijo̱ʼo ní ña̱ káʼa̱n na̱ ni̱ tandaʼa̱ xíʼín ní, va̱árá ko̱ó nataʼan ini ní ña̱ káʼa̱n na̱

• Káni kundaa̱ ini ní ndíki̱án kúni̱ na̱ kachi ná. Kunde̱ʼé ní ndixi kúu ná tá ndixi káʼa̱n na̱

3 NDUKUNDEÉ NÍ KÉE NÍ ÑA̱ KÁNI KÉE NÍ

ÑA̱ KÁʼA̱N TU̱ʼUN NDIO̱S: “Ndijaá chúun ió ña̱ va̱ʼa jo tu̱ʼun ña̱ káʼa̱n uun vá yó ko̱ó ña̱ʼa naniʼi̱ yó” (Proverbios 14:23). Tá o̱ju̱ú si̱va̱ʼa ndatu̱ʼun uun vá ndó ndíki̱án kée ndó. Káni kée ndó ña̱. Va̱árá ndukundeé ndó, jo chindeé ña̱ ndoʼó (Proverbios 10:4). Tá ná kaneʼe táʼan va̱ʼa ndó “ni̱ʼi ndó ña̱ va̱ʼa” (Eclesiastés 4:9).

KÉE NÍ ÑA̱YÓʼO:

• Nakani ini ndó ndíki̱án kuu kée ndó já chindeéán ndoʼó já kée yíko̱ ndó tu̱ndóʼó

• Ta yaʼa cháá kivi̱ kunde̱ʼé ndó ndixi chindeéán ndoʼó