¿Ndíki̱án kúú Reino Ndio̱s?

Iin ña̱ kúni̱ʼi chááka̱ va̱xi nuu̱ Tu̱ʼun Ndio̱s kúú ña̱ nakaniña saʼa̱ Reino Ndio̱s. Jáchi̱ Reino yóʼo, kúú ña̱ kuchúun Jeová jaá keena ndijaá ña̱ ni̱kuni̱na koo nda̱ miísaʼa̱ nuu̱ Ñúʼu̱ Ndeʼi̱ yóʼo. ¿Ndíki̱án kúú Reino Ndio̱s? ¿Ndiva̱ʼa náʼáyó ña̱ sa̱ néʼe Reino Ndio̱s chúun? ¿Ndiku̱ú ña̱ sa̱ kandeé Reino Ndio̱s kéeña nda̱ viti? Ta ¿ndiku̱ú ña̱ kandeé Reino Ndio̱s keeña chááka̱ chínuu̱? Nuu̱ lección yóʼo xíʼín nuu̱ ivi̱ka̱ ña̱ va̱xi ki̱ʼoña respuesta sa̱ʼá ña̱yóʼo.

1. ¿Ndíki̱án kúú Reino Ndio̱s, ta ndáyoo kúú Rey ni̱ka̱xi Ndio̱s kaʼnda chúun?

Reino Ndio̱s kúú iin gobierno ni̱chikaa̱ mií Jeová. Ta Rey gobierno yóʼo kúú Jesucristo ta nda̱ indiví saʼndána chúun (Mateo 4:​17; Juan 18:​36). Ta Tu̱ʼun Ndio̱s, káchiña saʼa̱ Jesús: “Kaʼnda Jesús chúun [...] nditáʼa̱n tiempo” (Lucas 1:​32, 33, TNM). Saʼa̱ ña̱ kúú Jesús Rey nuu̱ Reino Ndio̱s, kaʼndana chúun nuu̱ ndijaá táʼa̱n na̱yivi kandoyi nuu̱ Ñúʼu̱ Ndeʼi̱ yóʼo.

2. ¿Ndáyoo kúú na̱ kaneʼe chúun xíʼín Jesús?

Jesús ko̱ néʼe túʼún miína chúun. Kuaʼa̱ “Na̱yivi ndijaá tribu, yúʼu̱, ñuu ta nación […] kaneʼena chúun” (Apocalipsis 5:​9, 10, TNM). ¿Ndijaa̱ kúú na̱ kaneʼe chúun xíʼín Cristo? Nda̱ tá ni̱saio Jesús nuu̱ Ñúʼu̱ Ndeʼi̱ yóʼo, kuaʼa̱ millón na̱yivi ni̱chikaa̱ ini ndíko̱na Cristo, ta kakuuna cristiano. Jo 144.000 kuitívá kúú na̱yivi na̱ ni̱ka̱xi Ndio̱s kuʼu̱n kaneʼe chúun xíʼín Jesús indiví (kaʼviní Apocalipsis 14:​1-4). Ndijaá javaka̱ na̱ kúú cristiano kandoyina ti̱xi ndáʼa̱ Reino Ndio̱s nuu̱ Ñúʼu̱ Ndeʼi̱ yóʼo (Salmo 37:​29).

3. ¿Ndiva̱ʼa Reino Ndio̱s kúú ña̱ va̱ʼa chááka̱ nuu̱ ndijaáka̱ ta̱ néʼe chúun ndóyi ñuyíví yóʼo?

Va̱árá ió java ta̱ néʼe chúun kúni̱ra keera ña̱ va̱ʼa, jo ko̱ nakaa̱ña nuu̱ ndáʼa̱ra ña̱ kandeéra keera ndijaá ña̱ chikaa̱ inira. Ta janí tá yáʼa tiempo nája̱ma tukuvá ta̱ néʼe chúun ta java ta̱yóʼo ko̱ ndiʼi inira ña̱ ndóʼo na̱ ñuura. Jo Jesús, na̱ kúú Rey Reino Ndio̱s, ni iin kivi̱ ko̱ iin miívá nája̱mana, ta chikaa̱na ingana. Ndio̱s Jeová ni̱chikaa̱na “iin reino ña̱ ni iin kivi̱ o̱ndiʼi miívá nuu̱ña” (Daniel 2:​44). Jesús kaʼndana chúun inííkúú nuu̱ Ñúʼu̱ Ndeʼi̱ ta o̱ka̱xina ndáyoo keena ña̱ va̱ʼa xíʼín. Jáchi̱ Jesús kúni̱ ndiva̱ʼona na̱yivi, va̱ʼa ndiva̱ʼo inina ta janí kúúna na̱ ndaa̱, ta jánaʼa̱na nuu̱ na̱yivi ña̱ ná keena tátu̱ʼun ki̱ʼa kée miína: ña̱ ná kúni̱na na̱yivi, ña̱ va̱ʼa ná koo inina ta ná kakuuna na̱ ndaa̱ xíʼín javaka̱na (kaʼviní Isaías 11:9).

4. Iin Reino káʼno ndiva̱ʼo kúú ña̱ kaʼnda chúun inííkúú ñuyíví

Jesucristo kúú na̱ ió kuaʼa̱ ndiva̱ʼo ndee̱ ta janí nakaa̱ña nuu̱ ndáʼa̱na ña̱ kuu kaneʼe va̱ʼana chúun, ña̱ ko̱ kuu kee ni iin ta̱ néʼe chúun ñuyíví yóʼo. Kaʼvindó Mateo 28:​18 ta kanatúʼúnndó saʼa̱ ña̱ va̱xi yóʼo:

• ¿Ndiva̱ʼa chúun ni̱natiin Jesús kúú ña̱ káʼno chááka̱ nuu̱ ndijaáka̱ña natiin ta̱ néʼe chúun ñuyíví yóʼo?

Ndijaá ta̱ néʼe chúun ñuyíví saʼndára chúun nuu̱ cháává na̱yivi ndóyi Ñúʼu̱ Ndeʼi̱ yóʼo ta janí cháává tiempo ta kúú ndiʼivá ña̱ néʼera chúun. ¿Á janí kuu ndoʼo Reino Ndio̱s? Kaʼvindó Daniel 7:​14 ta kanatúʼúnndó saʼa̱ ña̱ va̱xi yóʼo:

• ¿Ndá kúú ña̱ va̱ʼa ña̱ Reino Ndio̱s ni iin kivi̱ o̱ndiʼi nuu̱ña?

• ¿Ndá kúú ña̱ va̱ʼa ña̱ kaneʼe Reino Ndio̱s chúun inííkúú Ñúʼu̱ Ndeʼi̱?

5. Kánian nája̱ma ta̱ néʼe chúun ñuyíví yóʼo

¿Ndiva̱ʼa xiniñúʼúnyó ña̱ ná nája̱ma ndijaá ta̱ néʼe chúun ñuyíví yóʼo ta ná nakaa̱ Reino Ndio̱s? Kande̱ʼéndó VIDEO ta kanatúʼúnndó saʼa̱ ña̱ va̱xi yóʼo:

VIDEO: ¿Ndíki̱án kúú Reino Ndio̱s? (iin táʼvi) (1:​41)

• ¿Ndá tu̱ndóʼó kúú ña̱ kée ndijaá ta̱ néʼe chúun ñuyíví?

Kaʼvindó Eclesiastés 8:9 ta kanatúʼúnndó saʼa̱ ña̱ va̱xi yóʼo:

• ¿Á káʼán miíní ña̱ Reino Ndio̱s kúú ña̱ va̱ʼa chááka̱ kánian kaneʼe chúun ñuyíví yóʼo? Ta ¿ndiva̱ʼa?

6. Ndijaá na̱ kaʼnda chúun nuu̱ Reino Ndio̱s kundaa̱ va̱ʼa inina tátu̱ʼun ki̱ʼa ndóʼoyó

Saʼa̱ ña̱ Rey yó, Jesús, ni̱saiona nuu̱ Ñúʼu̱ Ndeʼi̱, kuu “kundaa̱ va̱ʼa inina ña̱ ndóʼoyó kée kua̱chi” (Hebreos 4:​15, TNM). Jeová ni̱ka̱xina 144.000 na̱ ta̱a xíʼín na̱ ñáʼa̱ ndíta ndaa̱ xíʼínna jaá kaʼndana chúun xíʼín Jesús. Na̱yivi yóʼo ni̱kanana nuu̱ “ndijaá tribu, yúʼu̱, ñuu ta nación” (Apocalipsis 5:​9, TNM).

• ¿Á Kujii̱ ini miíní kundaa̱ ininí ña̱ Jesús ta ndijaá na̱ kaʼnda chúun xíʼínna xíni̱ va̱ʼana ña̱ ndóʼoyó ndóyiyó ñuyíví? Ta ¿ndiva̱ʼa?

7. Ley Reino Ndio̱s kúú ña̱ va̱ʼa chááka̱ o̱ju̱ú ley ta̱a ñuyíví yóʼo

Ta̱ néʼe chúun kava̱ʼara ley saʼa̱ ña̱ kúni̱ra chindeéra ta kandaára na̱ ñuura. Reino Ndio̱s janí ió ley ña, ta na̱ ñuu Ndio̱s kánian kunijo̱ʼona ña̱yóʼo. Kaʼvindó 1 Corintios 6:​9-​11 ta kanatúʼúnndó saʼa̱ ña̱ va̱xi yóʼo:

• ¿Ndixi káʼán miíní koo ñuyíví tá ná saa̱ kivi̱ ña̱ ndijaá na̱yivi kunijo̱ʼona chúun saʼndá Ndio̱s?a

• ¿Ndixi xiníní á kánian kandati Jeová ña̱ na̱ ñuuna ná kunijo̱ʼona ndijaá chúun saʼndá Reino na? ¿Ndiva̱ʼa káʼánní ña̱ jaá kían?

• ¿Ndiva̱ʼa xíni̱yó ña̱ na̱yivi ko̱ xinijo̱ʼo ley yóʼo kuu saa̱na nája̱mana? (Kande̱ʼéndó versículo 11).

ÑA̱ NI̱KATI̱ʼAYÓ

Reino Ndio̱s kúú iin gobierno ndaa̱ ndísa ta nakaa̱ña indiví ta kaʼnda Reino Ndio̱s chúun inííkúú Ñúʼu̱ Ndeʼi̱.

¿Á naku̱ʼun inión?

• ¿Ndáyoo kúú ndijaá na̱ néʼe chúun nuu̱ Reino Ndio̱s?

• ¿Ndiva̱ʼa kúú Reino Ndio̱s iin gobierno va̱ʼa chááka̱ nuu̱ ndijaá ta̱ néʼe chúun ñuyíví yóʼo?

• ¿Ndíki̱án ndáti Jeová ná kee ndijaá na̱ kandoyi ti̱xi ndáʼa̱ Reino yóʼo?

KUU NANDUKÚNÍ JAVAKA̱ ÑA̱ʼA

Kaʼviní ña̱ ni̱ja̱naʼa̱ Jesús saʼa̱ ndeí kakaa̱ Reino Ndio̱s.

“¿Á kúú Reino Ndio̱s iin ña̱ nakaa̱ ini ánima̱yó?” (Artículo nuu̱ jw.org)

¿Ndiva̱ʼa ndíʼi chááka̱ ini na̱ testigo Jeová ña̱ kuita ndaa̱na xíʼín Reino Ndio̱s ta o̱ju̱ú xíʼín ta̱ néʼe chúun ñuyíví yóʼo?

Iin ndíta tuunna xíʼín Reino Ndio̱s (1:​44)

Jákuáʼaní saʼa̱ ña̱ nakani Tu̱ʼun Ndio̱s saʼa̱ na̱ 144.000 na̱yivi ni̱ka̱xi Jeová kaneʼena chúun xíʼín Jesús.

“¿Ndáyoo kúú na̱ kuʼu̱n indiví?” (Artículo nuu̱ jw.org)

¿Ndíki̱án ni̱kundaa̱ va̱ʼa ini iin ñáʼa̱ ni̱sakaa̱ veʼekaa̱ saʼa̱ ña̱ túʼún Ndio̱s vá kúú na̱ kandeé jánduva̱ʼa ñuyíví yóʼo?

“Ni̱kati̱ʼai ndixi kee Ndio̱s jándíʼina nuu̱ ndijaá ña̱ kini ió ñuyíví” (¡Despertad!, noviembre de 2011)