Raja Siria sing jenengé Bèn-hadad bola-bali nyerang bangsa Israèl. Tapi, raja Israèl isa lolos merga dikandhani Nabi Èlisa. Mula, Bèn-hadad mutuské kanggo nyulik Èlisa. Bèn-hadad ngerti nèk Èlisa ana ing kutha Dotan. Terus, dhèwèké ngongkon prajurité nangkep Èlisa.

Wektu bengi, pasukan Siria teka ing Dotan. Ésuké, pelayané Èlisa metu, terus ndelok nèk kutha kuwi wis dikepung pasukan Siria. Dhèwèké wedi, terus mbengok, ’Pak, awaké dhéwé kudu piyé?’ Èlisa ngomong, ’Luwih akèh sing ndhukung awaké dhéwé ketimbang wong-wong kuwi.’ Pas kuwi, Yéhuwah nggawé pelayané Èlisa isa ndelok nèk ing pegunungan sekitaré kutha kuwi kebak jaran lan kréta perangé Yéhuwah sing murub.

Wektu arep ditangkep, Èlisa ndonga njaluk bantuané Yéhuwah. Bar kuwi, Yéhuwah nggawé pasukan Siria dadi bingung lan ora ngerti lagi ana ing ngendi. Terus, Èlisa ngomong karo wong-wong kuwi, ’Kowé kabèh salah dalan. Mèlua aku. Kowé bakal tak terké bèn isa ketemu karo wong sing mbok golèki.’ Wong-wong kuwi ngetutké Èlisa tekan Samaria, yaiku tempat tinggalé raja Israèl.

Pasukan Siria akhiré ngerti nèk lagi ana ing Samaria. Tapi, kuwi wis telat. Raja Israèl ngomong karo Èlisa, ’Apa aku kudu matèni wong-wong kuwi?’ Apa Èlisa nggunakké kesempatan iki kanggo balas dendam karo wong-wong sing arep nangkep dhèwèké? Ora. Èlisa ngomong, ’Aja mbok patèni. Wènèhana wong-wong kuwi mangan, terus kongkonen lunga.’ Mula, Raja nggawé pésta gedhé kanggo wong-wong kuwi. Terus, wong-wong kuwi dikon mulih.

Izebèl nduwé anak wédok sing jenengé Atalia. Atalia kuwi ya jahat kaya ibuné. Atalia nikah karo raja Yéhuda. Pas bojoné mati, anaké lanang dadi raja. Tapi, pas anaké kuwi mati, Atalia sing nggantèni dadi ratu ing Yéhuda. Mula, Atalia matèni kabèh keturunan raja. Putuné dhéwé ya dipatèni. Kabèh wong wedi karo Atalia.

Imam Agung Yéhoyada lan bojoné sing jenengé Yéhosyéba ngerti nèk Atalia kuwi jahat. Senajan bahaya, Yéhoyada lan bojoné ndhelikké salah siji putuné Atalia sing isih bayi sing jenengé Yéhoas. Yéhoas digedhèkké ing bait.

Pas Yéhoas umur pitung taun, Yéhoyada ngumpulké kabèh pemimpin pasukan lan wong Lèwi. Terus, Yéhoyada ngomong, ’Jaganen pintu bait. Aja nganti ana sing mlebu.’ Bar kuwi, Yéhoyada ndèlèhké mahkota ing sirahé Yéhoas. Yéhoas akhiré didadèkké raja Yéhuda. Wektu ndelok kuwi, wong Yéhuda seneng banget.

Ratu Atalia krungu swarané wong-wong kuwi. Terus, dhèwèké cepet-cepet lunga ing bait. Pas ndelok raja sing anyar, Atalia mbengok, ”Pengkhianatan! Pengkhianatan!” Bar kuwi, para pemimpin pasukan nangkep Atalia lan nggawa dhèwèké metu saka bait. Atalia akhiré dipatèni. Terus, piyé wong-wong sing wis éntuk pengaruh èlèk saka Atalia?

Merga dibantu Yéhoyada, wong-wong kuwi akhiré nggawé perjanjian nèk mung bakal nyembah Yéhuwah. Yéhoyada ngongkon wong-wong kuwi ngancurké kuil Baal lan brahala-brahala. Dhèwèké ya nugaské para imam lan wong Lèwi kanggo kerja ing bait. Yéhoyada péngin bèn bangsa kuwi isa ngibadah manèh ing bait. Yéhoyada ya ngongkon penjaga gerbang njaga bait. Tujuané bèn wong sing najis ing pandhangané Yéhuwah ora isa mlebu bait. Bar kuwi, Yéhoyada lan para pemimpin pasukan ngeterké Yéhoas ing istana. Terus, Yéhoas dikon lungguh ing takhta. Wong Yéhuda seneng banget. Saiki wong-wong kuwi isa nyembah Yéhuwah lan ora nyembah Baal manèh. Wong-wong kuwi ya akhiré isa bébas saka pengaruhé Atalia. Yéhoyada isa mbantu akèh wong merga dhèwèké kendel.