Lame Haarooxxa Iimike Bisixxa Una

Baꞌleessa 18, 2023, Gidaadiinxe barraꞌn jw.org teꞌn, Dayyi Geeji Filiigilinna Jeefiri Windeeriki Yihowwaxxe Naqaashexxe Iimike Bisixxe Una kandeꞌe ergatemmaashsha baalloonsemmeexxa ifisaaki egeꞌnishaanji kulemeemman. Laminiingi dayyuwwi Yihowwaꞌa qeerraaxxe yannaꞌa addatenshat erganteeka raaga anfeen.

Dayyi Filiigili nophpheeki Ameeriki giddo dhidhimiinke Pensiliveeniyaꞌn kadda wodda hadi isikinna Mageno sodaataammaken. Isiꞌi qeeꞌlummateꞌn hedheeꞌna, hadi isiki gargaarisi haranga hasisaake shiixxooke hadi giddike qachchibaa meneen. Okkoneechchi uduma Sadaasa 20, 1988 woggaꞌn cuuphemeen.

Dayyi Filiigiliki hadi woꞌma yannaxxe ergatenshaꞌn eꞌyaashsha duuchchi wodda isoꞌo jajjabeessaamman. Hadi isiki rogiinka lumoka dooyyalluwwa ittan Beeteloota heddo yanna mine keessunsaammaxxeꞌe, Dayyi Filiigili tinni dayyuwwa hitte qico gammaddaammaxxa uuda dandeꞌaamman. Cuupheme turebaangi Birraꞌa 11, 1989 keꞌn duuchchi woddike qajeellisanjo kadeꞌe ergatema safeen. Lame wogga uduma 12 woggaꞌn hedhe Beetele ergatemateꞌe herregaammake herregaꞌn geyeen. Onkoleessa 1991 keꞌn, Birukiliine afendaaxxe Beeteleꞌn ergatema safeen.

Dayyi Filiigili Beetele Maxaafa Weli Abidiisatixxe hujeꞌn hujeechchinni uduma, Ergatenshatixxe Dippaaritimeenteꞌn dhaabemeen. Eeteneꞌe yannaꞌinna Ruusiike-laagadinni akeekendaꞌneexxe gubaꞌe giddo heenooxxe woggaꞌa ergatemeen. 2006 keꞌn, Beetele ergatendaꞌneexxa Naadiya hiyyenidaꞌneexxa dayyo aadheen. Insaꞌnenna Porchugeesi hiyyemaꞌneeki laagadi haasoꞌemaꞌneeke loolaꞌn ergatemmeen, ittan tomme wagganaaꞌn caaldaaxxe yannaꞌa Isippaanshi hiyyemaaki laagadi haasoꞌemaꞌneeke loolaꞌn ergatemmeen. Dayyi Filiigili Ergachchotixxe Dippaaritimeenteꞌn heddo wogga hujeechchi uduma, Barachchotixxe Komitetixxe Beeroꞌn okkooꞌn kinni, Ergachchotixxe Komitetixxe Beeroꞌn hujashsha dhaabemeen. Caansa 2022 keꞌn, Iimike Bisike Ergatenshatixxe Komiteke gargaarsanjo kade baalloonsemeen.

Dayyi Windeeri nophpheeki Ameeriki giddo Kaliforniya, Muriyeeta hiyyendaaxxe bakkaꞌniten, isinna nophpheeki dhuugaateke mineꞌn kadda wodda Caansa 29, 1986 keꞌn, cuuphemeen. Cuuphemeeke heenoke agenji uduma, kiphallo qajeellisanjo kadatee mudhdheen. Isinna tenneꞌe ergachcho yoꞌoshsha eeyyemmaxxeꞌe ittin ediꞌa sufatee haseen. Heddo agenijiꞌa kiphallo qajeellisanjo kadeꞌe ergatemeechchi uduma Onkoleessa 1, 1986 keꞌn, duuchchinii woddike qajeellisanjo kadeꞌe ergatema safeen.

Dayyi Windeeri qeeꞌlumma hedhemma wodda lame Beetele ergatendaammaxxa dayyuwwa isixxa uudatee mareen. Tinni dooyyanna gikki hiyyaꞌn meꞌaa wodda, Beetele ergatematixxi halcha hexxaashsha assiteen. Ella 1990 keꞌn, Wolkile hexxeexxe Beeteleꞌn ergatemaashsha yeꞌemeen.

Dayyi Windeeri Beetele hedhemma wodda gargariti hexxeexxe dippaartemeenteꞌn hujeen, tinniirinna Caꞌiniinxe Dippaartemeenteꞌn, Fichchiinxe Hujexxe Dippaartemeenteꞌn, ittan Beetelexxe Beeroꞌn. 1997 keꞌn, Anjeela hiyyendaꞌneexxa dayyo aadheexxe kadda wodda, okkooꞌn sanfeexxi Beetele welt ergatemmaꞌn turreen. 2014 keꞌn, Wooriwiikeꞌa hingeen, okkoonna Dayyi Windeeri butta duuchchike illitte beeroke ijaarsaꞌn gargaarsa assaamman. 2016 keꞌn, Paaterseene afeendaaxxe Heqqecatixxe Xellephoxxe Barachchoke Oddoolibaa jijjiremmeen, okkoonna Dayyi Windeeri Oodiyo/Viidiyotixxe Ergachchoꞌn hujaamman. Shoole wogga uduma, Wooriwiikeꞌaan hingeen, okkoonna Dayyi Windeeri Personeeli Komitetixxe Beeroꞌn dhaabemeen. Caansa 2022 keꞌn, Iimike Bisike Perseeneeli Komiteke gargaarsanjo kadeꞌe baalloonsemeen.

Yihowwa konne “uwwa kadeeka labballo” Mootumatixxa huje jabeenniki ittin ediꞌa huja dandeennaashsha eebisoꞌa kadhataannen.—Efe. 4:8.