Welekeꞌe Ulfinna Affineexxa Leellishshe

1. Manji, weli isoo ulfeessoꞌaa hasaꞌneeki mayeete? (Fakkeenna 22:1)

MANJI atiꞌaa ulfinna afeexxa leellishaa wodda gammaddaatte? Gammaddattoxxi egeꞌnendeexxe yaanen. Ulfinni manji duuchchi hasaaxxe yaanennen. Manji noꞌoo ulfeessaa wodda gammandannon. Maxaafi Qullichchinna “ulfaata birretenaaꞌninna worqetenaaꞌni caaldaan” hiyyaꞌneeki tenneꞌaaten!—Fakkeenna 22:1 yaansis.

2-3. Welekeꞌe ulfinna anfeennexxa leellisha haꞌurtaashsha assaaki mitti mitti jeejuwwi hoonte?

² Duuchchinii wodda welekeꞌe ulfinna anfeennexxa leellishsha shollaxxebaan. Wele ulfeessa haꞌurtaashsha assitaaxxi mitte buuto weliinxa gophe egeꞌnaten. Taꞌa heꞌnaanneki hedi manni wele ulfeesanfeennexxa leellisha duuchchinii wodda shollaxxebaan. Wele ulfeessa haꞌurtaashsha assitaaxxsaꞌnebaaxxe yannaꞌniten. Noꞌo kinni iitta kada hasissabaan. Mayee? Buutotinna Yihowwa, “duuchchiniinga manjo” ulfeessinonnaa hasaꞌneen.—1 Ph. 2:17.

³ Tenne qoꞌneꞌni wele ulfeessate hiyyo maa hiyyote kaddeexxanna (1) mini hadiꞌaa (2) noꞌoke addetike jaaluwwiꞌaa (3) Yihowwaxxe Naqaashe kadebaake manniꞌaa ulfinna anfeennexxa leellinshannoki hittate kaddeexxa mariꞌantannon. Haꞌuraake jeeji giddonni heꞌneꞌe wele ulfeessinannoki hittate kaddeexxanna barantannon.

ULFEESSATE HIYYO MAA HIYYOTE?

4. Ulfeessate hiyyo maa hiyyote?

⁴ Ulfinnake hiyyo maa hiyyote? Mitte mitte laagadaꞌni “ulfinna” nna “lummisa” hitaaxxi hiyya weli fakkaattaaxxa tika affeen. Hitta? “Ulfinna” hitaaxxi hiyya giddiiꞌninni, mitte manjiꞌaa hitta hexxeexxa uushsho anfeennexxa leellishshaaxxen. Mitte manjo ulfeessinanno wodda okkone manjiꞌaa, miꞌlachcho uunaannexxanna isiꞌa hendaannexxa leellinshannon. Dedha iitta assinaanneki adaba isikenaaꞌni, asseexxe yaanenaaꞌni yookiin afeexxe baallenaaꞌni kexxeexxennite kada dandeettaan. “Lummisa,” hitaaxxi hiyya mitte manjo hitta abindaannexxa leellishshaaxxen. Mitte manjo lumminsanno wodda insiꞌaa lumoxxa bakka anfeennexxa, saandaannexxanna ulfeessinaannexxa leellishaake orinni abindannon. Ulfinni dhugaatikenna qalbe giddike kada hasissaan.—Mat. 15:8.

5. Wele manjo ulfeessinannoshsha noꞌoo gargaartaaxxi yaane maachcho?

⁵ Yihowwa wele manna, ittan ‘mootummatixxa baallooleeyyenna’ ulfeessinonnaa hasaꞌneen. (Rom. 13:1, 7) Mitti mitti manni kinni; “Ani manjo ulfeessannoki mitti manji ulfeessissaaxxa yaane assaꞌnoole callan” hiyyaan. Tinni fakkaattaaxxe yaane? Noꞌo Yihowwaxxi ergantoole kandennaxxeꞌe, ayyeenna ulfeessinaanneki mitti manji assaꞌneexxa yaane calla uundaꞌnite kaddeebaaxxa egenneennen. Manjo ulfeessinaanneki, Yihowwaa eenannaxxeenna isoo gammachchiisatee hansaannaxxeeten.—Iya. 4:14; 1 Ph. 3:15.

6. Noꞌoo ulfeessaꞌnebaaka manjo ulfeessa dandeennanno? Ifisi. (Fakke uudi.)

⁶ Mitti mitti manni, ‘manjo ulfeessabaaka manjo ulfeessa dandeessissaa?’ hiyye qoraaxxi hexxaan. Eeti dandeessissaan. Mitte fakkeenna uundo. Mootichchi Saꞌooli belto isika Yoonaataanii manji edo salphiseemman. (1 Sa. 20:30-34) Kaddomaleꞌe, Saꞌooli reyeexxe barra qicoꞌni Yoonaataani anna isika bagedokeꞌni kiphaamman. (Zts. 20:12; 2 Sa. 1:23) Lumoki Kahnaatichchi Eeli Haannaa machchootteettenni hiyye summa balleesseemman. (1 Sa. 1:12-14) Eeli lumoke kahnaatichcho kadeenni hedheꞌe oose isixxi hujjeexxa balleessa egeꞌnaꞌninni waaleexxa Israꞌeeli bogaꞌni hedheeki manji duuchchi egeꞌneemman. Haanna tennee yaane egendoolenna isoo haasoossiteeki ulfinnikitemman. (1 Sa. 1:15-18; 2:22-24) Ittan Ateensi manni hawaarya Phawuloosii, ‘odichchake’ hiyyeemman. (Huj. 17:18) Kaddomaleꞌe, Phawuloosi insaꞌnee haasosseeki ulfinnikiten. (Huj. 17:22) Kunni fakkeenni, manjo ulfeessa shollexxaa wodda calla kadeebaaki haꞌurtaaxxa yannanna, Yihowwaa anfeennexxi jabaxxi jaalalanna isoo yaadisa gophatixxi seeriinxa sodaꞌa, manjo ulfeessinannoshsha tirtirsitaaxxa leellishaaken. Ulfinni noꞌoki hasisaaki ayyiꞌaate kaddeexxanna mayee ulfeessinaannexxa uundo.

MINI HADO ATIKA ULFEESSITAATTEXXA LEELLISHI

7. Mini hado ulfeessa haꞌurtaashsha assitaaxxi yaane maachcho kada dandeetta?

⁷ Haꞌurtaaxxa yaane. Qeerraaxxa yanna saꞌisinaanneki mini hadi noꞌokinniten. Tenneꞌaa jabeennanna gonphe insaꞌneexxa egenneennen. Mitti mitti mini hadi noꞌoki insaꞌnee karkarsa noꞌoꞌni haꞌurtaashsha assitaaxxa, dhibo yookiin quba saxxeexxa sammotixxa dhibo afaaxxi hexxaan. Weli kinni noꞌoo miitaaxxa yaane assaaxxinna haasoꞌaaxxi hexxaan. Hiiriqi kinni mini hafuura adhdhinaaxxenna nageꞌiinxe bakka kaddaashsha assati irra, mini hado ulfinni belo abidati mini giddo hogi keꞌaashsha assaan. Tennenaaꞌni kexxeexxa mini hadixxe oddooꞌni mittunte hexxabaan. Fakkeennakeꞌe, bisi noꞌokiki mikiti loꞌo hiyye hujjabaashsha assaake dhukkubishsha, mini giddonna weli tuffe hexxoole mittunte hexxabaan. Iitta hedhee dhukkuba ciꞌloomme fayyinsammashshani, mini hadi mittummati hedhateꞌe weli ulfeessa barata hasissaan.

8. Mini hadi giddo ulfinna leellisha hasissaan hinaanneki mayeete? (1 Ximootwosi 5:4, 8)

⁸ Ulfeessinaanneki mayeete? (1 Ximootwosi 5:4, 8 yaansis.) Phawuloosi, Ximootwosiꞌaa borreesseexxe taakkaxxe daddaabeꞌni, mini hadixxi una weliꞌaan weli hasissaaxxa yaane wonsha hasissaaxxa haasoꞌeen. Isinna mini hado noꞌoka ulfeessinaannexxi taakkaaxxi buuto ‘Magenokee heꞌnaanneke manna’ kandeennexxa leellishateete maleꞌe, ulfeessa hasissammanxee calla kaddeebaaxxa ifiseen. Tinni hiyya Mageno addatenshati mageneeffatanna isiꞌaa ergatema ifissaaxxen. Mini hado hundeesseki Yihowwaten. (Eff. 3:14, 15) Mini hado noꞌoka ulfeessinanno wodda mini hado orgeesseeka Yihowwaa ulfeessinannen hiyyoten. Tinni mini hadiꞌaa ulfinna leellinshannoshsha assitaaxxe jabaxxe buuton!

9. Miniinki anninna miniinxi ama weliꞌaan weli ulfeessinaaki hittate? (Fakkuwwatanna uudi.)

⁹ Ulfeessinaannexxa leellinshanno qico? Miniinxa ama isixxa ulfeessaaki miniinki anni, qofiti ittani manji giddo heꞌnaa woddanna ise isiꞌaa fiixate kaddeexxa leellishaan. (Fak. 31:28; 1 Ph. 3:7) Isi ijjenda isee ganabaan, salphisabaan, ittan ifi tuffattaashsha assitaaxxa yaane assabaan. Arjentiina hedhaꞌneeki Ariꞌeeli a itta hiyyeen: “Mitte mitte yanna mininxi ama anxi, isee dhibbaꞌneexxe dhibonaaꞌni kexxeexxa anee mitaaxxa yaane hasoottaan. Anee yowwitaa wodda isee iitta haasoottaꞌneeki anee miidhatee hasseete kaddebaaxxa qalliyyatee woꞌlaanannon. Yaane haꞌurtaa wodda 1 Qorontoosi 13:5 keꞌni hexxeexxa xiqse qalli hiyyannon, tinni xiqse iseꞌni jinnati irra ulfinniki haasoossannoshsha assiteen.” (Fak. 19:11) Miniinka anna iseka ulfeessitaaxxi miniinxi ama manji edonna elle isixxa haasoottaan. (Eff. 5:33) Ise yaaneti isoo ottabaan, ceeggattabaan, ittan ulfinna afebaa garinni yexxabaan; buutotinna ise tinni yaanuwwa bulii insaꞌneexxi diigendaashsha assaake ciilishshate kaddeexxa egendeꞌeen. (Fak. 14:1) Sammotixxe dhibonni rakkataꞌneeka miniinka anna affeexxi Xaaliyaane hexxaꞌnexxi mitte dayyo iitta hiteen: “Anki miniinki anni mitte mitte yanna heenoonxa yaane lummisaꞌneechcho aneꞌni labbaaxxi yanna hexxeen. Edo haasoꞌaannaxxi yaanenna goori anki isiꞌaa afeennaki ulfinni xeꞌyeexxa leellishaakemman. Wele manjiꞌaa ulfinna afeexxa leellishaake manjinni jaaloomennexxe qixxeꞌni, aninna anka miniinka anna edi irra ulfeessannoshsha assiteexxa hubateennen.”

10. Oose hado ulfeessitaꞌneexxa leellishshaaki hittate?

¹⁰ Oosee, hadi haꞌnooki fulcheeke seeriꞌaa ajajjemme. (Eff. 6:1-3) Hado haꞌnooka ulfinniki haasoosse. (Zts. 21:17) Hadi haꞌnooki woggati lummedhaꞌni meꞌaa wodda hasissaaxxe yaanenni insaꞌnee gargaarti insaꞌnaa ulfinna affineexxa leellishshe. Insaꞌnee karkarsateꞌe dandeettinaaxxa yaane duuchcha asse. Yihowwaxxe Naqaashe kadebaaka anna affeexxa Mariyaka fakkeenna uudde. Anni iseki dhibemeexxa yanna isoo karkarsitaan qico mekki assaamman. Mariya iitta hiteen: “Kadhataannaki anna ankeꞌe ulfinna afannoshsha calla kaddebaaki, ulfinna afeennexxa leellisha dandeꞌannoshshatemman. Yihowwa hado anka ulfeessonnaa hasaꞌnoolee ulfeessannoshsha hunna aniꞌaa uwwaani hiyye addataannan. Anna anka ulfeessateꞌe, isi adabiki jijjiiremaa qicoꞌni heqqa hasissabaaxxa barateennen.” Haꞌurtaaxxi yaane hexxeeꞌnaanni noꞌoka mini hado ulfeesinaannole, Yihowwaxxa qophphe ulfeessinaannexxa leellinshannon.

ADDETIKE JAALUWWA HAꞌNOOKEE ULFINNA AFFINEEXXA LEELLISHSHE

11. Addetika jaaluwwa ulfeessa haꞌurtaaki mayeete kada dandeetta?

¹¹ Haꞌurtaaxxa yaane. Noꞌoki addetiki jaaluwwi Maxaafi Qullichchiinke seerishsha hedheꞌneekenna kadoole, noꞌoo elobaa gerinni abidaaxxi, seeri belo noꞌoꞌni murteessaaxxi yookiin noꞌoo aarsaaxxi hexxaan. Mitti noꞌoki addetiki jaali noꞌoo ‘mufachchiissaa’ wodda isoo ulfeessa noꞌoꞌni haꞌurtaaxxi hexxaan. (Qol. 3:13) Adde wonxabeꞌnoshshata noꞌoo gargaartaaxxi yaane maachcho?

12. Addetika jaaluwwa ulfeessa haranga hasisseeki mayeete? (2 Pheexiroosi 2:9-12)

¹² Ulfeessinaanneki mayeete? (2 Pheexiroosi 2:9-12 yaansis.) Pheexiroosi, langaxxe daddaabbe isixxeꞌni, taakkake dhibeesso baroꞌni hexxemmaxxe gubaꞌeꞌni “ulfeessemeeka manna” yookiin gubaꞌetixxa geedhe ulfinni belo haasoossammaki mitti mitti manni hedheexxa borreesseen. Tennee yaane uuddaammaxxi addatendeexxi Mageniinxi erganna maa assiteemmaꞌa? Insaꞌne “Yihowwaa anfeeke ulfinninaaꞌni kexxeexxa” fuggoxxa yaane haasoꞌaammaka manna miidhaaka mitte jechchanna haasoonnebaan. Hedde meen! Qulliyye kaddeexxi Mageniinxi erganna konne kijiba kadeeke mannaꞌni fuggoxxa yaane haasoꞌa hassebaan. Tenne irra Yihowwa insaꞌneꞌni murtessaashshanna insaꞌnee xixaashsha bado isiꞌaa waalleen. (Rom. 14:10-12 hedheeka yaada Yih. 9 hokkokis.) Erganna Mageniinxenaaꞌni barantannoxxi yaane hexxeen. Noꞌoo moromaꞌneeka manna ulfinniki abida hasissaꞌnoole, noꞌoka addetika jaaluwwa faꞌi hittee qico ulfinniki abida hasissata! Matanga insaꞌnee ulfeessateꞌe ‘edinseenneke kada’ hasissaan. (Rom. 12:10) Iitta assati Yihowwaa ulfeessinaannexxa leellinshannon.

13-14. Gubaꞌe giddo hexxeexxa dayyuwwa ulfeessinaannexxa leellinshannoki hittate? Fakkeenniki kuli. (Fakkuwwatanna uudi.)

¹³ Ulfeessinaannexxa leellinshanno qico? Geedhee, wele jaalalati barsiisateꞌe dandeettineexxa yaane duuchcha asse. (Film. 8, 9) Mitte manjo gorsitinaa wodda hifoti kaddebaaki jaalalati gorse. Haꞌnoo dubarte dayyuwwaa, hamatanna summa balleessa gophati gubaꞌe giddo ulfinni hedhaashsha jabaxxa yaane assa dandeettinaan. (Tit. 2:3-5) Gubaꞌetixxi geedhe gubaꞌenna lassatixxa huje akeekateꞌe, ittan “fuggoke oraꞌni” meꞌaꞌneeka manjo gargaarateꞌe assitaꞌneexxa yaane kiphatinna saadati noꞌo duuchchiingi insaꞌnee ulfeessinaannexxa leellisha dandeennannon.—Gel. 6:1; 1 Xi. 5:17.

¹⁴ Rosiyo hiyyendaꞌneexxe dayyoꞌni isee gorseeka gubaꞌetika geercho ulfeessa haꞌurteemman. Isenna iitta hiteen: “Anee hunnati gorsaꞌneechcho fakkaatteemman. Mine summa isika balleessitaaxxe yaane haasoꞌaannan. Tenne yaane shoꞌatee woꞌlaanonnolenna, isi qalbe mittenni aniꞌaa hedaꞌneexxa mamaannaxxeꞌe gorsa isika adhdheennabaan.” Rosiyo gargaarteexxi yaane maachcho? Iitta hiteen: “1 Teselonqe 5:12, 13 yaansisennen. Dayyo konnee ulfeessaabeꞌnoxxa egeꞌnennexxa yanna wodani aneꞌee nageꞌa kuta safeen. Yihowwabaa kadhatennen, ittan hedino anxa toggi assedhannoshsha gargaaraaka yaada affeexxa borreessile qoꞌnisennen. Udumiiꞌni rakko okkone dayyixxe kaddebaaki holla anxe kaddeexxa hubatennen. Taꞌa wele manjo ulfeessateꞌe ifi heeshshi assa hasissaaxxa egeꞌneennen. Wele ulfeessateꞌe taꞌanna assa hasissaaxxi gatteexxi yaane hexxeen, wele ulfeessateꞌe woꞌlaanennexxe qixxeꞌni kinni Yihowwa aneꞌni gammadaaxxa addataannen.”

YIHOWWAXXE NAQAASHE KADEBAAKA MANNANNA ULFEESSE

15. Yihowwaxxe Naqaashe kadebaaka manna ulfeessa haꞌurtaꞌneeki mayeete kada dandeetta?

¹⁵ Haꞌurtaaxxa yaane. Ergatenshateꞌni heꞌne afemmannoki heddi manni Maxaafi Qullichchiinxe dhugaaꞌa jaalala afeekebaan. (Eff. 4:18) Hiirqi kinni kullaannexxa erga laqa eeyyabaan. Noꞌoki hujetike sooreessuwwinna barsiisanjiwwi fedheexxa yaane assinonnolenna shollaxxinni gammadabaake kadaaxxi, yookiin noꞌonni hujaꞌneekinna barataꞌneeki manni elobaaka adaba afeeka kadaaxxi hexxaan. Tennenaaꞌni kexxeexxa konne manniꞌaa anfeenneki ulfinni xeꞌyaꞌni maꞌaaxxinna insaꞌnaa ulfinna leellishsha waallannoxxi hexxaan.

16. Yihowwaa mageneeffataꞌnebaaka manna ulfeessa hasisseeki mayeete? (1 Pheexiroosi 2:12; 3:15)

¹⁶ Ulfeessinaanneki mayeete? Yihowwa isoo mageneeffataꞌnebaaka manna hitta abindaannexxa uudaꞌneexxa qalli hiyye. Hawaariya Pheexiroosi noꞌoki eloki adabi mitti mitti manni “Mageno ulfeessaashsha” assaaxxa Kirsitaana qalli asseen. Insaꞌne addantaꞌneexxa yaane “shaqquntetinna qalbe giddike ulfinninni” welekee kullaashsha jajjabeesseeki tenneꞌaaten. (1 Pheexiroosi 2:12; 3:15 yaansis.) Addetixxe buutonni rakko insaꞌneꞌni geltaa wodda yookiin adde ifixxee murteti mini edo yookiin ayyi edonna uurrine morkinaaxxa yanna, Kirsitaani Mageni edo hedheeshsha hedati addataꞌnebaaka manna ulfinniki abida hasissaamman. Yihowwa noꞌo haasoonnaannexxa yaanenna hitta haasoonnaannexxa uudaꞌneen, ittan laqaꞌneen. Tinni Yihowwaxxe Naqaashe kadebaaka manna ulfeessinannoshsha assitaaxxe gargariti hexxeexxe buuton.

17. Yihowwaxxe Naqaashe kadebaaka manna ulfeessinannoki hittate?

¹⁷ Ulfeessinaannexxa leellinshanno qico? Ergatenshateꞌni anfannoki manni heenooxxa Maxaafi Qullichchiinxa egeꞌna afeexxe yookiin egeꞌna gopheexxeꞌe noꞌo jala hedheeshsha asse uudda ijjenda hasissabaan. Kunni manni Mageni edo fiixake kadeexxanna noꞌonaaꞌni caalaaxxa heda hasissaan. (Hag. 2:7; Flp. 2:3) Addattaattexxe yaanenaaꞌni kexxeexxa mitti manji atee yowwoole, isi atiꞌaa jala hedheeshsha asse ifi hedaashsha assitaaxxa yaane haasoottoxxe. (1 Ph. 2:23) Seeri beloxxa yaane haasottottole rakke gattowwaalii qori. Atinni welti hujaꞌneeke manniꞌaa ulfinna affeettexxa leellishattoki hittate? Bebbeda hujallo kadi. Atinni welti hujaꞌneekenna atee hujisaꞌneeke mannike eloke adabaꞌni miꞌlachcho assatee woꞌlaan. (Tit. 2:9, 10) Dhugichcha, baredanna mitte qalbenni hujjaateke manjo kaddeeꞌnaanni, manji ateꞌni gammadenna gammadanna gophoole, Mageni kinni ateꞌni gammadaaxxa qalli hiyyi.—Qol. 3:22, 23.

18. Welekee ulfinna anfeennexxa leellisha ittin sufa noꞌaa eloxxeni hinaanneki mayeete?

¹⁸ Welekee ulfinna anfeennexxa leellisha ittini sunfannoshsha assitaaxxi eloxxi buutuwwa hexxeen. Mini hado noꞌoka ulfeesinanno wodda mini hadike Umo kadeeka Yihowwaa ulfeesinaannexxa leellinshannoxxa uundeennan. Ittani, gubaꞌe giddo hexxeexxa dayyuwwa noꞌoxxa ulfeesinanno wodda iimatika Anna noꞌoka ulfeesinaannen. Yihowwaa mageneeffataꞌnebaake manniꞌaa ulfinna anfeennexxa leellinshanno wodda kinni insaꞌne lumoka Mageno noꞌoka Yihowwaa, lumminsaaxxanna ulfeessinaaxxa bado alfinaashsha assinannon. Matanga insaꞌnee ulfeessinaaꞌnaanni insaꞌne noꞌoo ulfeessa gonphoolenna, insaꞌnee ulfeessa ittin sufa hasissaan. Mayee? Buutotinna Yihowwa noꞌoo eebbisaan. Yihowwa: “Anee ulfeessaaka ulfeessannon” hiyye kako aageen.—1 Sa. 2:30.