Kaamole Oofa Waalanno?

Ateꞌninna iitta hexxeexxi yaane futti hitee? Iittate kaddoole, oofa ittin sufateꞌe yookiin waalateꞌe murteessexxattoshsha ateꞌe gargaartaaxxi yaane machcho?

Mitte mitte bogaꞌni, mootumma seerteexxe wogganaaꞌni saꞌe kaamole oofa hasaaki manji, dokiteeretenaaꞌni eeti alfa hasissaan. Iitta hedheeki seeruwwi fuleeke bogaꞌni hedhaꞌneeki Kirsitaanuwwi, mootummatika seeranna galcha insaꞌnexxeꞌni hexxeexxe baallooleeyyexxa murte ulfeessa hasissaan. (Rom. 13:1) Habanna heꞌnaannole, seeriki oofatixxa dandeette anfeennexxa konkannoki oruwwi hedheen.

ATIXXA OOFATIXXA DANDEETTE KOKI

Nashinaali Insitiuut on Eejing (NIA) hiyyendaaxxi orga oofa ittin sufateꞌe buttiiꞌni hedheeka qortumuwwa ifi qora hasissaaxxa eerteen:

• Oriinka beesisuwwa yaansisanna hashsha gargari hiisseꞌe uuda aneꞌni haꞌurtaꞌnee?

• Iimiꞌaa qokkiyye daaꞌwute uudanna qarqarakeꞌni hexxeexxa yaane caꞌa asse uuda dandeꞌaanne?

• Lekka anxa nedaaje uunammakenaaꞌni fireene abindammaxe peedaalebaꞌa edishsha rake hiissa haꞌurtaꞌnee?

• Laana oofaꞌni wele kaamole meꞌitabaashsha ora cufaanne?

• Heddole dedha hujaanne?, yookiin mise yaane maraꞌni ganaaꞌnaa kaamole anxi nooshshi hitee?, yookiini gadaaneessa affee?

• Fuggoshsha oofaaꞌnaa tiraafike aneꞌe uurrissaꞌneꞌe?

• Oofaꞌni mugaanne?

• Oofa aneꞌni haꞌurtaashsha assaaka qorsa adhdhateꞌni hedhenne?

• Mini hadi ankinna jaaluwwi, kaamole oofa anxi insaꞌneꞌe yaadissaꞌneexxa haasoonnaꞌnee?

Konne qortumuwwi giddiiꞌni mittekee yookiin lamekee eeti hite hissitottole, mitte mitte jijjiirra assateꞌe heda hasissaaxxi hexxaan. Fakkeennakeꞌe, giddiiꞌninni hashsha meꞌe saate qicoꞌni ooffattoxxa murteessedha hasissaan. Hitta ooffaattexxa duuchchinii wodda koki. Hitta ooffaattexxa mini hadi atiki yookiini jaaluwwi yaada uwwaashshanna qora dandeettatton. Seeriki oofateꞌe leenjo adhdhateꞌe hedanna hasissaaxxi hexxaan. Iimiiꞌni hedheeke heddo qortumuwwiꞌaꞌa eeti hite hiissitottole kinni, oofa waala eloxxen.a

MAXAAFI QULLICHCHIINKE HUNDAAYYETI SEERINNI AKEEKEMI

Oofatixxi dandeette noꞌoxxi baxxaꞌni metaꞌneexxa, dedha egeꞌna gonphannoxxi hexxaan. Ittani kaamole oofa uurrisateꞌe hedandi haꞌurtaaxxe yaane kada dandeettaan. Seeriki heddattoshshanna eloxxa murte murteessexxattoshsha gargaaraaki hundaayyetiki seeruwwi hoonte? Lame uundo.

Mike ifixxa egeꞌni. (Fak. 11:2) Woggati lummeꞌnaꞌni menanno wodda, edishsha uudanna laqa dandeennaaꞌnon, ittan bisi noꞌokiki jabeenninna ajajemaꞌnee qici goofaꞌni meꞌaan. Fakkeennakeꞌe, heddi manni woggati lummedhaa wodda sholla qicinni miidhemaꞌneexxa hubateexxi edo geebaammaxxa ispoortuwwa waaleꞌeen. Kaamole oofa uudaaxxanna yaadi weli fakkaataangen. Mike ifixxa egeꞌneeki mitti manji fayyunte ifixxeꞌe hiyyaa wodda kaamole oofa waalaan. (Fak. 22:3) Ittan mike ifixxa egeꞌneeki manji weli manji haasoꞌaaxxa yaane laqaan.—2 Samuꞌeli 21:15-17 welti hokkokis.

Lubbo balleessitabexxoshsha xexxeꞌati (Zed. 22:8) Kaamole seerik oofa gonphoole jabaxxa bala geesissaaxxe yaanen. Mitti manji dandeette afebaaki oofaꞌneexxe kaddoole ifixxanna weliinxa hedho miidhaan. Ittan balleessa ifixxe kaddaa wodda, baxxeexxe lubboꞌaanna qorema dandeꞌaan.

Oofa waalateꞌe murteessedha ateꞌni haꞌurtaꞌnoole, manji aneꞌe ulfeessabaan yookiin tuffataani hiteꞌe heddoxxeꞌe. Yihowwa ateꞌe eeyyaaki, mike ifixxa ageꞌna, ifi heeshshi assanna welekee heda fakkaataaka elolla adabuwwa affottoleten. Ittan isi ateꞌe gargaaroꞌaanna jajjabeesoꞌa kako aageen. (Isa. 46:4) Isi ateꞌe ijjenda hunabaan. Tenneꞌaa oofateꞌe yookiin oofa waalateꞌe murteessexxatto wodda beekkumanna qalbeeffanna atiꞌaꞌa uwwati isi ateꞌe gargaaraashsha kadhati.