Jila Haꞌnooxxi Yihowwa Ulfaataaxxe Kaddaashsha Qophpheeffattinaaki Hittate?

1-2. Yihowwa buliitixxe jilaxxi barra hitta hexxeexxe kaddoꞌaa hasaꞌne?

AADHATEE uwwexxeete? Iittate kaddoole, baga gammaddineen! Hedino haꞌnooxxi jilatee qophpheeffatatiba calla hexxaaxxi egeꞌnendeexxen. Yihowwanna bulii haꞌnooxxeꞌni gammadaꞌneen. Isi haꞌnooxxi jilatixxia barra gammachchiissaaxxe kaddaashshanna ediꞌaa gammadinaꞌni welti hexxinoꞌaa hasaꞌneen.—Fak. 5:18; Meh. 3:11.

² Yihowwa haꞌnooxxi buliitixxi jila isi ulfaataashsha assitaaxxe kaddoꞌaa hasaꞌneen. Iitta hinaanneki mayeete? Iitta assa dandeettinaaki hittate? Tinni barachcho taakkaba miꞌlachcho assitaꞌneeki buliitixxe jilaꞌa qophpheeffatateꞌni hedheeke lame manjoꞌnitenna kaddoole, kulemeeki hundaayyetiki seeri jilateꞌni afemmaannole yookiin insaꞌne qixxeeffanteexxa yaane uundeꞌe yaada uunonnaa qoremmonnole, noꞌo duuchchiingi Yihowwa ulfaataaxxa yaane assinannoshsha gargaartaan.

YIHOWWAꞌA ULFEESSINAANNEKI MAYEETE?

3. Buliiteꞌni eꞌyatee hasaꞌneeki lami manni, buliitixxe jilaa qophpheeffataa wodda qalliyya hasissaaxxi yaane maachcho? Mayee?

³ Buliiteꞌni eꞌyateeꞌe qophpheessedhateꞌni hedheeki lami Kirsitaani, jila insaꞌneexxi Yihowwa Qaale isixxeꞌni fulcheeke hundaayyetike seerinni weli aaggaaxxe kada hasissaan. Mayee? Buutotinna buliꞌi hundeesseeki Yihowwate kademmaxxeeten. Taakkaa Addamiꞌaa miniinxa ama Heewanii uwweꞌe jila qophpheesseeki Yihowwaten. (Dad. 1:28; 2:24) Tenneꞌaa jila qopheessateꞌni hedheeki manni Mageniinxe hedinoꞌaa lumoxxa bakka uwwa hasissaan.

4. Buliiteꞌni eꞌyateeꞌe jila qophpheessaꞌneeki lami manni, jila insaꞌneexxixxa barra Yihowwaꞌa ulfeessinaꞌneexxa leellisha hasisseexxi wele buuto heente?

⁴ Jila haꞌnooxxixxa barra Yihowwaxxa hedino qalli hiyya hasisseeki mayeete kaddeexxa leellishshaaxxi wele buutonna hexxeen: Isi haꞌnooke iimatike Annan, ittan haꞌnooke eloke jaalon. (Ibr. 12:9) Tinni jaalunte ittin ediꞌaa suffoꞌaa hassinaꞌneexxi mansiissaaxxe yaanebaan. Jilatixxe barraꞌni yookiin wele barraꞌninna jaalo haꞌnooka yaadissaaxxi mitte yaanenna kaddoꞌaa ijjenda hassinaꞌnebaan. (Far. 25:14) Yihowwa haꞌnoꞌaa asseexxanna ediꞌaa assaaxxa yaane heddinaa wodda jila haꞌnooxxeꞌni ulfinni isiꞌaa hasisaachcho fakkaattaꞌnebaa?—Far. 116:12.

YIHOWWAꞌA ULFEESSITINAAKI HITTATE?

5. Buliiteꞌni eꞌyateeꞌe hasaꞌneeka lame manna, jilateꞌe qophpheeffantaashsha Maxaafi Qullichchi gargaaraaki hittate?

⁵ Maxaafa Qullichchakeꞌni Kirsitaaniinxi jila hitta hexxeexxe kada hasissaaxxa yookiin jilateꞌe dageeke manniꞌaa maachcho shiqisa hasissaaxxa diideesse kulaaki seeri hedhebaan. Yaane jeejiniinshanni, aadatishshanni, ittan manjiinxe halchashshanni gargarunte affeen. Dhugaatiki Kirsitaani mootumma fulchiteeka seera ulfeessanna hasissaan. (Mat. 22:21) Kaddoolenna, Maxaafi Qullichchiinke hundaayyetike seerishsha, qophpheessendeexxi jila Yihowwa ulfaataashshanna gammadaashsha assitaan. Hooneꞌe Maxaafi Qullichchiinka hundaayyetika seeruwwa qalliyya hasissata?

6. Buliiteꞌni eꞌyaꞌneeki lami manni buliiteꞌe mootumma fulchiteeke seeriꞌaa ajajema haranga hasisseeki mayeete?

⁶ Mootumma fulchiteeke seeriꞌaa ajajemme. (Rom. 13:1, 2) Heddo bogaꞌni, buliiteꞌni eꞌyateeꞌe qophpheteꞌni hedheeki manni, weli aaꞌne-heerummebaa edi darre mootumma fulchiteeka seera wonsha hasissaan. Buliiteꞌni eꞌyaateꞌe hasaꞌneeki lami manni, heꞌneeke bogika seera egeꞌna hasissaan. Seera konnee wonshatee maa assa hasissaaxxa egeꞌna gophphinoole gubaꞌetixxi geedhe gargaartaashsha qorre.b

7. Mitte jilaꞌa eloke hinaaki jeeji hitta hedheeke?

⁷ Gammachchiisaaki jeeji hedhaashsha asse. (1 Qo. 10:31, 32) Jila haꞌnooxxiki jeeji buttatika manfasa leellishaake kadebaangi, Mageniinke manfasinxa gumma leellishaake kadaashsha assateꞌe woꞌlaanne. (Gel. 5:19-26) Maxaafi Qullichchiinke hundaayyetike seerishsha, mushirrichchi haaroxxe maateke umo kademmaxxeꞌe, jilateꞌni assendaꞌneexxi yaane gammachchiisaaxxenna ulfeessissaaxxe kaddaashsha assatixxa maganne afeen. Jila iitta hexxeexxe kaddaashsha gargaartaaxxi yaane maachcho? Haasoꞌi jaalatiki, gammachchiisaakenna ulfinna afee garinni shiqaa wodda jilateꞌni bukki hiyyeeki duuchchi, tenne Yihowwa qophpheesseexxe buliitixxe qophpheꞌaa afeexxi saadino lebbaan. Shiqaꞌneeki haasoꞌi bulii shollinse uundaaxxe yaane kaddebaaxxa ifisaammaxxeꞌe, okkoꞌo bukki hiyyeeki manji duuchchi laꞌo alfaan. Tenneꞌaa dandeessissaꞌneexxe kaddoole, heddi Kirsitaani buliitiki haasoꞌi Bukkiiti Galmaꞌni shiqaashsha assaan. Bukkiitika Galma konne yaadiꞌaa laꞌoonfata hassinaꞌnoole, edissineexxi geedhetixxa una daddaabbeti qora hasissaan.

8. Inde-haꞌwinaaxxe bakkaꞌni ulfeesisaaki jeeji hedhaashsha gargaartaaxxi yaane maachcho? (Roome 13:13)

⁸ Roome 13:13 yaansis. Jilatixxa barra inde-haꞌwinaaxxa yaane qophpheessitinaꞌnoole, bakka itti buttatiki manfasi leellaaxxe kaddabaashsha assitinaaki hittate? Roome 13:13 keꞌni ‘sara saꞌe burraaqa’ hitaaxxi Giriketixxi hiyya manji bukki hiyyeꞌe mike belo haꞌwaꞌninna hashsha yanna belo sirba bane geeba hitaaxxa erga saꞌissitaan. Alkoole fakkaattaaxxa yaane shiqissinaꞌnoole ayyinna miketi iimi darre haꞌweꞌe machchoꞌabaashsha xexxeꞌatte.c Keesumma haꞌnooxxi weliꞌaan weli haasoottaꞌni geebbabaashsha assammaxxeꞌe, muuziqi banemaꞌnoole, muuziqiinki hafuuri bira saꞌabaashsha xexxeꞌata hasissaan. Muuziqiinxi bifanna gence ayyeenna guggufachchiissabaashsha edissineexxi xexxeꞌachchoti kokke.

9. Aadhe heerumaꞌneeki lami manni inde-haꞌwinaaxxa yanna, haasoonnaxxanna dayyeeffachchoteꞌe asssinaaxxa yaane uuddaaxxa heda hasissaaxxi yaane maachcho?

⁹ Mitte mitte bakkaꞌni inde-haꞌwinaaxxa yanna mushirrichchiinkinna mushirrichchotiki hadi yookiin jaaluwwi insaꞌneꞌe uuddaaxxa iimaa keꞌneexxi mitte mitte yaane haasonnaan, ittan mitte mitte jilaꞌni kinni mushirrichchi yookiini mushirrichcho dayyeeffachchoteꞌni saꞌissineexxa viidiyo yookiin fotuwwa leellinshaan. Tinni yaane heddo yanna jilatixxi barra gammachchiissaaxxe kaddaashsha assitaan. Kaddomaleꞌe, assendaꞌneexxi hiini yaanenna ijaartaaxxe kaddeexxa koka hasissaan. (Flp. 4:8) Ifi iitta hitine qorre: ‘Assendaꞌneexxi yaane welekeꞌe ulfinna anfeennexxa leellishsha? Buliitixxe qophpheꞌaa ulfinna anfeennexxa leellishsha?’ Giddiiꞌninni: ‘Assendaꞌneexxi yaane Yihowwa ulfaataashsha assitaaxxe?’ hitine ifi qorre. Mitte mitte geebo hasissaaxxe kaddoolenna, shookissaaxxe yaanuwwanni abidendeexxe rooruwwanaaꞌni bayyata haranga hasissaan. (Eff. 5:3) Maate haꞌnooxxi giddiiꞌninna jaaluwwi giddiiꞌni qophpheessitinaꞌneexxa yaane uuddaaxxa mitte mitte haasoonnaaxxi yaane hexxaan, kaddomaleꞌe, haꞌnoo hassinaꞌnebaaxxa yaane egenneexxanna halcha haꞌnooxxa ulfeessinaaxxa kokke.

10. Jilateꞌe qophpheeffattinaa wodda mike ifixxa egeꞌna hasisseeki mayeete? (1 Yohaannisi 2:15-17)

¹⁰ Mike ifixxa egeꞌne. (1 Yohaannisi 2:15-17 yaansis.) Yihowwa mageneeffatoole isixxi seeriinke kadebaake orinni manji insaꞌneꞌe jajaashshate kaddebaaki, isoo ulfeessateꞌe woꞌlaancho assinaaꞌnaa uudaa wodda yoꞌoshsha gammadaan. Tenneꞌaa mike ifixxa egeꞌneeki Kirstaani jilateꞌe hiyye miketenaaꞌni saꞌeeka maallaqa fulchabaan yookiin “qabeenna afeenneka uudde’ hiyyaꞌneexxa leellishaake orinni jila jilabaan. Jila haꞌnooxxi miketixxe kaddaashsha assa haꞌnoꞌaa laꞌo affeeki hittate? Noruwey hedhaꞌneeke Miiki hiyyemaake dayyixxa hedhotixxa baranno uundo. Miiki iitta hiyyeen: “Liqakeꞌni eꞌya gonpheennaxxeꞌe, qajeellisano kande ergatema ittin sufa dandeennennen. Jila noꞌoxxi miketixxemman, kaddoolenna taꞌi qicoꞌni gammachchiisaaxxenna dedhendabaaxxen.” Hindetike bogaꞌni hexxaꞌneexxi Tabiita hiyyendaaxxi dayyonna iitta hiteen: “Noꞌoo wixixxi assitaaxxe yaane giddo eꞌyineeꞌnon. Jila noꞌoxxi miketixxe kada, qophpheefatateꞌe yaane noꞌoꞌni shollexxaashshanna weli gonphe hexxebaashsha assiteen.”

11. Mushirrichchonna mushirrichchi oddoonotinna seefachchoti mike ifixxa egenneexxa leellinshaaki hittate? (Fakkuwwatanna uudi)

¹¹ Jilati baro maachcho oddoꞌwitinaaxxa murteessexxinee? Danchoondine leellitinoꞌaa hassinaꞌneexxi egeꞌnendeexxen. Matanga birenge baroꞌni, mushirrichchonna mushirrichchi eettenee barra danchoome leellateꞌe lumoxxa bakka uunaammaxxa Maxaafi Qullichchi haasoꞌaan. (Isa. 61:10) Mitti manji jilati baro oddoꞌwaaxxi seemma, wele wodda oddoꞌwaaxxa seemmanaaꞌni gargaritti hexxeexxe kaddaaxxi egeꞌnendeexxen. Kaddomaleꞌe, wele manjo shookissaaxxe yookiin guggufachchiissaaxxe kada hasissaabaan. (1 Xi. 2:9) Seemma yookiin wele seefatateꞌe assitinaꞌneexxi yaane jilatixxa barra manji lumoxxa bakka uwwaaxxe yaane kaddoqqe.—1 Ph. 3:3, 4.

12. Buliiteꞌni eꞌyateeꞌe qophphessedhateꞌni hedheeki lami manni, loola insaꞌnekeꞌni aadateꞌni assinaaxxe Maxaafi Qullichchi kiphabaaxxe yaanuwwanaaꞌni bayyata hasisseeki mayeete?

¹² Maxaafi Qullichchi kiphabaaxxe aadanaaꞌni bayyatte. (Lel. 18:4.) Tenne Seexaniinxe aadaꞌni, heddo jila battitte yaanenni, fuggokke manfasinninna seeri beloxxe addenni assinaaxxe yaanuwwanni daafendeexxen. Yihowwa iitta hexxexxe battitte yaanuwwanaaꞌni ifi heqqeꞌnannoshsha toggichchi orinni xexxeꞌachchiiseen. (2 Qo. 6:14-17) Haꞌnoo hexxinaꞌneeke loolaꞌni mitti mitti hedachchiisaaki galduminna aada hexxoole tenne yaanuwwaxxa hundaayye qorre, ittan jila haꞌnooxxeꞌni maa assitinaaxxa murteessexxinebaa edi darre hujeteꞌni hosissinaaka Maxaafi qullichchiinka hundaayyetika seeruwwa qoꞌnisse.

13. Buliiteꞌni eꞌyateeꞌe qophpheefatateꞌni hedheeki lami manni, uwwa adhdhateꞌe Yihowwa afeexxixxa uushsho anfeexxa leellinshaaki hittate?

¹³ Loola haꞌnookeꞌni jilateꞌe yeꞌemeeki manni weli aadhe-heerumeeke manniꞌaa gica uwwa baratendeexxe yaane? Manjiinki qabeenni iima buttande kademmaxxeꞌe, uunaaxxi yaanenna hunna ifixxishshani hexxeexxe kaddaaxxi hexxaan. Uwwa gammashsho lebbaaxxe yaane kaddemmaxxeꞌe, Yihowwa Kirsitaani uwwaashsha jajjabeessaꞌneen. (Fak. 11:25; Huj. 20:35) Kaddomaleꞌe, manji fedhii ifixxi belo gaddachcheme uwwaashsha assa hansaabeꞌnon, yookiin manji hunna ifixxeni uwwaaxxa heenooxxa uwwa tuffata hasissabaan. Yihowwashshanni manji noꞌaa uwwaaxxe yaaneꞌaa galateeffatatinna manji halcha ifixxeni hunna isixxi dandeetteexxa yaane uwwaashsha assati Yihowwaka fakkeenna hordonfannon.—2 Qo. 9:7.

HAꞌURTAAXXE YAANENAAꞌNI IFI HEQQEDHANNA INJIFATA

14. Buliiteꞌni eꞌyateeꞌe qophpheefatateꞌni hedheeke mitte mitte mannaꞌni futti hitaaxxi haꞌurtaaxxi yaanuwwa heente?

¹⁴ Jila haꞌnooxxi Yihowwa ulfaataaxxe kaddaashsha assateꞌe woꞌlaandinaaxxa yanna dedha haꞌurtaaxxi yaane futti hitaaxxi hexxaan. Fakkeennakeꞌe, mike haꞌnooxxi qicixxa jila qophpheessa haꞌurtaaxxi hexxaan. Solomoonixxa Giddichchuwwa hiyyendaaxxe bakkaꞌni hedhaꞌneeki Charli hiyyemaaki dayyi iitta hiyyen: “Sagale qophpheessendeexxe bakkabaꞌa ayyeeraa yeꞌnannoxxa murteessa noꞌoꞌni yoꞌoshsha haꞌurteemman. Noꞌonna heddo jaaluwwa anfeennan, ittan aada noꞌoxxeꞌni jilateꞌni afemeeka manjo duuchcha sagale qophpheessendeebaa yeꞌa baratendeexxe yaanen!” Iima kulendeemmaxxi Tabiita iitta hiteen: “Ani hedhaanneba baca sagale qophpeessa baratendeexxe yaanen. Jilateꞌni 100 manjibaa calla yeꞌateꞌe murteesseꞌneennexxa addate adhdha hado noꞌokeꞌni haꞌurteemman.” Hindeti bogaꞌni hexxaꞌneexxi Saara iitta hiteen: “Mitti mitti manni gurrakeꞌe lumoxxa bakka uwwaan. Langake annixxi oose aaxxeekinna heerundeeki jabaxxe jilanniten, tenneꞌa anxi jilanna insaꞌnexxi irra jabaxxe kaddaashsha assonnaa hega uudemennen.” Tenneenna ittan wele haꞌurtaaxxa yaanuwwa injifattinaashsha gargaartaaxxi yaane maachcho?

15. Jilateꞌe qophpheeffattinaa wodda Yihowwabaꞌa kadhata hasisseeki mayeete?

¹⁵ Jilateꞌe qophpheeffattinaa wodda duuchcha kadhatte. Haꞌnooꞌni haꞌurteexxa yaanenna qalbe haꞌnooxxeꞌni laqendaꞌneexxa yaane duuchcha kadhati Yihowwaꞌni kula dandeettinaan. (Flp. 4:6, 7) Yaane wixixxi assitaa wodda itittinaashshanna murte haꞌnooxxi heddi manni hasaꞌneexxenaaꞌni gargariti higgaa wodda eloxxa murte murteessexxinaashsha, isi haꞌnoo gargaaroꞌaa kadhatte. (1 Ph. 5:7) Yihowwa, kadha haꞌnooxxa hiisseeꞌnaa uuddinaa wodda isoꞌni affineexxi addenna jabaattaꞌni metaan. Iimiiꞌni uundennaxxi Tabiita iitta hiteen: “Aninna, ani heerumaanneki belti, hadi noꞌokinni weli aaga gonphannoxxeꞌe sodaanteennan. Tenneꞌa jilateꞌe qophpheefatateꞌe mariꞌantaannaxxa yanna duuchcha kadhati sanfaannan. Yihowwaka gargaarsa uundennen, oddo noꞌoxxeꞌninna nageꞌi hedhemman”

16-17. Jilateꞌe qophpheeffatinaa wodda eloxxi mariꞌe haꞌnoo gargaartaaki hittate?

¹⁶ Toggichcha kadeeke orinninna maliki mariꞌatte. (Fak. 15:22) Heddo murte murteessa hasissaaki haꞌnoo lamen. Jilatixxa barra, baajete fulcha, ayyeꞌe yexxinaaxxanna wele heddo yaane murteessitinaaki haꞌnooten. Mitte murte murteesseexxinebaa edi darre, lamining affineeke yaadaꞌni mariꞌatte, ittan hujeteꞌni hosisa dandeetinaake Maxaafi Qullichchinxe akeetteꞌninna galfateeki Kirstaani uwwaake gorsaꞌni mariꞌatte. Hassinaꞌneexxa yaane haasoottinaa wodda shaqqake, qeerrisine heddinaakenna weliinka yaada adhdhitinaake kadde. Jilateꞌe qophpheeffattinaa wodda hadi haꞌnooki mitte mitte yaane assitinaashsha qoraaxxi egeꞌnendeexxen, okkone wodda insaꞌnaa ulfinna afineexxa leellishshe. Tinni jila insaꞌnenna lumoxxa bakka uunaꞌneexxe yaanen. Insaꞌne hineexxa yaane assa gophphinaꞌnoole, mayeete kaddeexxa maliki haasoꞌe. (Qol. 4:6) Haꞌnoo lumoxxa bakka uutinaꞌneexxi yaane, jila haꞌnooxxi gammachchiissaaxxenna Yihowwa ulfataaxxe kaddoꞌa hassinaꞌneexxa hado haꞌnookeꞌni haasoꞌe.

¹⁷ Hadi haꞌnooki giddiiꞌninni, Yihowwaxxe Naqaashe kada gophoole, halcha haꞌnooxxa insaꞌneꞌni haasoꞌa haꞌurtaaxxi hexxaan, kaddoolenna herrega haꞌnooka egennaashsha assa dandeettinaan. Hindeti bogaꞌni hedhaꞌneeki Santoshi hiyyemaaki mitti dayyi iitta hiyyeen: “Hadi noꞌoki Hindu hiyyemaake haymaanootiinke seerishsha jillonnaꞌa hasaamman. Hado noꞌokeꞌni murte noꞌoxxa addate adhdha yoꞌoshsha haꞌurteemman. Tenneꞌaa Yihowwaꞌa yaadisabaaka insaꞌne hinaꞌneeka mitte mitte yaaduwwa adhdhinennen. Fakkeennakeꞌe, insaꞌne hinaꞌneexxa sagale qophpheessateꞌe hinennexxi noꞌo hendeennaxxa sagale waallennen, insaꞌne eeyya gonphaammaxxeꞌe huuni muuziqinna yookiin sirbi hedhabaashsha assinennen.”

18. Jilatixxi barra seeriki muuxendaaxxa kokateꞌe gargaartaaxxi yaane maachcho? (1 Qorontoosi 14:40) (Fakketanna uudi.)

¹⁸ Adda qophpheeffatte. Yaane eloqicinni orgeessitinoole, jilatixxa barra raankitinabaan. (1 Qorontoosi 14:40 yaansis.) Taywaane hedhaꞌneeki Waani iita hiyyeen: “Jilatixxi barra geltebaangi edinseꞌe, noꞌoo gargaarateꞌe ifi shiqiseeke manninni bukki hinennexxi harumaa qicoꞌni mariꞌantennen. Qophpheessineennexxe yaanuwwaꞌni mariꞌantennen, Jilatixxa bara yaane seeriki muuxendaaxxa kokateꞌe mitte mitte yaane woꞌlaannaꞌni uundennen.” Yexxineexxa keesumma ulfeessitinaaki duuchchiinxi yaane yannateꞌni muuxendaashsha assitinooleten.

19. Keesumma, sagale ittaaxxi bakka seeriinxe kaddaashsha assateꞌe haꞌnoo gargaartaaxxi yaane maachcho?

¹⁹ Edissine heddinoole heddo rakko dadendabaashsha assa dandeettinaan. (Fak. 22:3) Fakkeennakeꞌe, loola haꞌnookeꞌni manji yeꞌemebaangi sagale itateꞌe daga baratendeexxe yaane kaddoole, tinni yaane kaddabaashsha assateꞌe maa assitinaaxxa hedde. Huuni Yihowwaxxe Naqaashe kadebaaki manni assa hasissaaxxi yaane maachcho kaddeexxa kulle, mitte mitte jilaxxe aadaꞌa maa uushsho affineexxa ifisse. Jw.orgteꞌni “Yihowwaxxi Naqaashe Buliitixxa Jila Jildaꞌneeki Hittate?” hiyyaaka yaada yaansinsaashsha kula dandeetinaan. Sagale indaaxxi bakka seeriinxe kaddaashsha assateꞌe mitti galfateeki dayyi ‘jilatike sooreessa’ kadaashsha assa gargaartaan. (Yoh. 2:8) Jila tinni hitta muuxendoꞌaa hassinaꞌneexxa toggichcha kadeeke orinni isinni haasoottinoole, dayyi kunni jila haꞌnooxxi ulfinniinxe kaddaashshanna heddinee garinnimuuxendaashsha gargaaraan.

20. Buliiteꞌni eꞌyateꞌe qophpheefatateꞌni hedheeki lami manni jila insaꞌneexxa uuddaaxxa qalliyya hasissaaxxi yaane maachcho?

²⁰ Jilati bariꞌa herregineexxi yaane hitteexxe kaddeexxa heddinaa wodda yaane haꞌnoo wixixxi assitaaxxi hexxaan. Jila mitte barra calla kaddeexxa qalliyye. Tinni barra lamiki Yihowwaꞌa, gammashshoti ergatema saffinaꞌneexxe barran. Jila haꞌnooxxi miketixxenna Yihowwa ulfaataaxxe kaddaashsha dandeettineexxe yaane duuchcha asse. Yihowwaꞌni addate. Akeette isixxa hordoffineꞌe jilateꞌe qophpheeffattinoole, yannati uduma jila haꞌnooxxa qalli hitinaa wodda gammadinaaxxenna yaaddinaaxxi yaane hexxabaaxxe kaddaan.— Far. 37:3, 4.