HAAFUURA ADHDHA 08
Yihowwake Jaalo Kada Dandeettatton
Yihowwa isoo adda egendottaa hasaꞌneen. Mayee? Buutotinna isixxa ayyunte, ora isika, ittan noꞌaa afeeka yaada egendettexxe qixxeꞌni, isike jaalo kadatee affeettexxi halcha lebbaꞌni metaaxxa egeꞌnemmaxxeeten. Dhugaandinni Yihowwake jaalo kada dandeettatto? (Faaro 25:14 yaansis.) Jaalo isike kadatee maa assa hasissa? Maxaafi Qullichchi konne qortumuwwiꞌaa hiissichcho uwwaan, ittan Yihowwan jaalo kada ayyinninna jaaloommatenaaꞌn caaldaaki hittate kaddeexxa ifisaan.
1. Yihowwa maa kaddottaa hasaꞌne?
“Mageniinbaa shiqqe, isinna haꞌnoobaa shiqaan.” (Yaꞌiqoobi 4:8) Iitta hiyyo maa hiyyote? Yihowwa jaalo isike kandonnaa hasaꞌneen hiyyoten. Mitte mitte mannaꞌni leellabaake Mageninni jaalo kada haꞌurtaaxxe yaane fakkaattaan. Kaddomaleꞌe, Maxaafa Qullichchakeꞌn ayyunte isixxa egenneꞌe, isibaa shinqannoshsha duuchchiinxa yaane ifiseen. Maxaafa Qullichchakenaaꞌn, isi noꞌaa afeeka yaada yaansinsanno wodda isoo uuda gonphonnolenna isinni welt anfeennexxi jaalunte jabaattaꞌn metaan.
2. Yihowwa affeetteke jaalo duuchchanaaꞌni caaleeke jaalo kadeeki mayeete?
Yihowwa atee eeyyaꞌneeshsha ayyinna eeyyaaki hedhebaan. Isi gammaddaꞌni hexxottaanna rakko geltaa wodda gargaarsakee isibaa wirri hitottaa hasaꞌneen. ‘Atee yaadissaꞌneexxa yaane duuchcha isoꞌn huꞌni, buutotinna isi atiꞌaa hedaꞌneen.’ (1 Pheexiroosi 5:7) Yihowwa jaaluwwa isika duuchchinii wodda kiphatee, jajjabeessatee, ittan caqasatee qophphoꞌeeken.—Faaro 94:18, 19 yaansis.
3. Yihowwake jaaluwwa kadetee maa assa hasissa?
Yihowwa manjo duuchcha eeyyaan, Kaddomaleꞌe “qajeeli manjinni kinni, jabaxxa jaalunte afeen.” (Fakkeenna 3:32) Yihowwa jaaluwwi isiki, isi eeyyaꞌneexxa yaane assoꞌaanna gibaꞌneexxe yaanenaaꞌn bayyatoꞌaa hasaꞌneen. Mitti mitti manni Yihowwa eloxxenna elobaaxxe hiyye fulcheeka qullumatika seera heqqedha haꞌurtitte yaanen hiyye hedaan. Kaddomaleꞌe, Yihowwa baala noꞌoxxa egeꞌneꞌeen. Isi qalbet isoo eeyyaakenna gammachchiisate woꞌlaanaake manji duuchchibaa shiqaan.—Faaro 147:11; Ergantooletixxa Huje 10:34, 35.
BAꞌLAXXA QOꞌNE
Yihowwake jaalo kada dandeennannoki hittate kaddeexxa barantannon. Ittan isishsha hedheeki eloki jaali atiꞌaa hedhebaan hinaanneki mayeete kaddeexxa uundannon.
4. Abirhaami Yihowwake jaalomman
Maxaafi Qullichchi giddo hedheeki Abirhaamiki (Abiraamiki) raagi Magenike jaalo kadate hiyyo maa hiyyote kaddeexxa egennannoshsha gargaaraan. Abirhaamika raaga uudatee, Dadatika Maxaafa 12:1-4 yaansisse. Okkooꞌni qortumuwwakeꞌni mariꞌatte:
Yihowwa Abirhaami maa assaashsha qore?
Yihowwa Abirhaamiꞌaa maa assatee kako aage?
Abirhaami Yihowwa uwweexxe akeetteꞌaa ajajemeeki hittate?
5. Yihowwa jaaluwwi isiki assoꞌaa hasaꞌneexxa yaane
Yoꞌoxxa yanna jaaluwwi noꞌoki, noꞌo eenaannexxa yaane assoꞌaa hansannoxxi hexxaan.
Jaaluwwi atiki atiꞌaa assoꞌaa hassaattexxi mitte mitte yaane maachcho?
Taakkaka Yohaannisi 5:3 yaansisse, okkooꞌni qortumakeꞌni mariꞌatte:
Yihowwa jaaluwwi isiki maa assoꞌaa hasaꞌne?
Yihowwaa ajajematee adabiki yookiin ayyunte noꞌoxxinni jijiiremmenneke kada hasissaan. Isayaasi 48:17, 18 yaansisse, okkooꞌni qortumuwwakeꞌn mariꞌatte:
Yihowwa jaaluwwi isiki jijjiiremoꞌaa hasaꞌneeki mayeete?
Mitti eloki jaali atee gargaartaaxxanna atiꞌaa laꞌo affeexxa yaane kulaan. Yihowwanna jaaluwwa isikeeꞌe iittan assaan
6. Yihowwa jaaluwwa isikee assaaxxa yaane
Yihowwa jaaluwwi isiki rakko dandeꞌe saꞌaashsha gargaaraan. VIIDIYO uudde, okkooꞌni hundiiꞌn hedheeke qortumaꞌn mariꞌatte.
Viidiyoteꞌn uuddettexxe manjoꞌni, qajeelto kaddebaaxxi yaane sammo isexxibaa daggaamma wodda, Yihowwa isee gargaareeki hittate?
Isayaasi 41:10, 13 yaansisse, ittan qortumuwwakeꞌn mariꞌatte:
Yihowwa duuchchiinge jaaluwwa isikee maa assatee kako aagee?
Yihowwa atiꞌaa eloke jaalo kadaachcho fakkaattaꞌnee? Mayee?
Jabaxxa jaalunte affeettexxi jaaluwwa hasissaaxxe yannaꞌn atee gargaartammashshan, Yihowwanna iittan atee gargaaraan
7. Yihowwake jaalo kadatee, isoo haasoossanna isi haasoꞌaa wodda caqasa hasissaan
Weliꞌaan weli haasoꞌa jaalunte jabeestaan. Faaro 86:6, 11 yaansisse, okkooꞌni qortumuwwakeꞌn mariꞌatte:
Noꞌo Yihowwaa haasoossa dandeennannoki hittate?
Yihowwa noꞌoo haasoossaꞌneeki hittate?
Yihowwaa noꞌo haasoossinnannoki kadhatiten; isi kinni Maxaafi Qullichchi darreeꞌn noꞌoo haasoossaan
MITTI MITTI MANNI IITTA HIYYAAN: “Mageniinbaa shiqa dandeesissaaxxe yaanebaan.”
Yihowwake jaalo kada dandeennannoxxa kuldaaxxa, heene xiqse kula dandeettatto?
BUKKASSA
Yihowwa jaalo isike kaddottaa hasaꞌneen, ittan isibaa shiqqattoshsha gargaaraan.
Hige Qalliyya
Yihowwa jaaluwwa isika gargaaraaki hittate?
Yihowwaxxi akeette jaaluwwi isiki jijjiiremaashsha gargaartaaki hittate?
Yihowwa jaaluwwi isiki hunna insaꞌnexxi iimi darre hexxeexxa yaane assoꞌaa hasaꞌneechcho fakkaattaꞌnee? Mayee iitta hitette?
FIRFIRSI
Yihowwanni welt affeetexxi jaalunte hedho atixxa jijjiirtaaki hittate?
“Yihowwaa—Adda Egeꞌna Hasissaake Magenon” (Heqqecatixxa Xellepho, Bitidotteessa 15, 2003)
Yihowwanni welt affeettexxa jaalunte jabeessexxatto qico barat.
Mitte manjichcho Yihowwanni welt affeexxi jaalunte iseꞌe gargaartee qico yaansis.
Dargaggeeyye Yihowwanni welt affeexxa jaalunte uuddaaxxa haasootteexxa yaane caqasi.