Geedhe Cubbo Hujeeke Manjiꞌaa Jaalalanna Mararte Leellisha Dandeettaaki Hittate?

1. Mitti manji jabaxxa cubbo hujoole maa kada?

SAXXEMMAXXE qoꞌneꞌni Phawuloosi Qorontoosixxe gubaꞌe giddo, hujendeexxa jabaxxa cubbo abideemmaki hittate kaddeexxa uundeennan. Cubbo hujeemmaki manjichchi aadde aaga gopheemmaxxeꞌe, gubaꞌe giddiiꞌni fulchinaamman. Kaddomaleꞌe, tenne qoꞌneki umi yaadixxi xiqse ifissaꞌneeshshanni, Mageni jabaxxa cubbo hujeeka mitte mitte manna aadde aagaashsha akeekaaxxa ifissaan. (Roome 2:4) Kunni manni aadde aagaashsha geedhe gargaartaaki hittate?

2-3. Mitti addetiki jaali noꞌoki jabaxxa cubbo hujeexxa egennonnole maa assa hasissa? Mayee?

² Geedhe mitti manji jabaxxa cubbo hujeexxa egeꞌna gophphoole, okkonee manjo gargaartaa qici hedhebaan. Tenneꞌaa mitti addetik jaali noꞌoki gubaꞌetenaaꞌni fuchinaashshaa assitaaxxa jabaxxa cubbo hujeexxa egennonnole maa assa hasissa? Gargaarsakee geedhetiba maraashsha jajjabeessa hasissaan.—Isa. 1:18; Huje 20:28; 1 Pheexi. 5:2.

³ Kaddomaleꞌe, Geedheteꞌni mare kula giboolenaꞌa? Ikki manji hasisaaka gargaarsa alfaashsha noꞌonni marrennexxi geedheteꞌni kula hasissaan. Dayyuwwa noꞌoxxi baxxoꞌaa hasa gonphaannaxxee, iitta assati jaalala insaꞌneꞌaa anfeennexxa leellisha dandeennannon. Cubbo hujeeki manji cubbotike oraꞌni meꞌa ittin sufeexxe kaddoole, Yihowwanni afeexxi mittunte miidhendaꞌni meꞌitaan. Gubaꞌetika summanna balleessaaxxi hexxaan. Tenneꞌaa Yihowwaanna okkone manjiꞌaa jaalala anfeennaxxeꞌe worbunteti tarkaaffe adhdhinannon.—Faaro 27:14.

GEEDHE JABAXXA CUBBO HUJEEKA MANJO GARGAARTAAKI HITTATE?

4. Geedhe jabaxxa cubbo hujeeka manjo haasoositaa wodda herregi insaꞌneki maachcho kada hasissa?

⁴ Gubaꞌe giddo mitti manji cubbo hujaa wodda geedhetixxi una insaꞌne giddiiꞌni komite kaddeꞌe ergatendaaxxa dandeette affeexxa sase dayyuwwa mellitaan.a Tinni dayyuwwanna miketixxenna umo ifika heeshshi assitaaxxe kada hasissaan. Insaꞌne dedha hujeeka manjo aadde aagaashsha gargaaratee woꞌlaannaaxxa yanna ikki manji jijjiiremaashsha hunnati woꞌlaancho assa hasissabaaxxa egenneꞌeen. (Zeda. 30:19) Geedhe cubbo hujeeki manji duuchchi, mootichchi Daawitishsha aadde aagaan hiteꞌe heqqitabaan. (2 Samu. 12:13) Mitti mitti cubbo hujeeki manji Yihowwaka gorsa adhdha gibatee melledhaaxxi hexxaan. (Dada. 4:6-8) Kaddoolenna, geedhetiki herregi dandeesissee qicoꞌni, cubbo hujeeki manji aadde aagaashsha gargaaraten. Geedhe cubbo hujeeka manjo haasoositaa wodda insaꞌnee gargaaraaki hundaayyetiki seeruwwi hoonte?

5. Geedhe cubbo hujeeka manjo haasoossitaa wodda qalli hitaaki gorsi hoonte? (2 Ximootwosi 2:24-26) (Fakke uudi.)

⁵ Geedhe cubbo hujeeka manjo baꞌeeke gedhechchishsha assiteꞌe uuddaan. (Luqa. 15:4, 6) Tenneꞌaa konnee manjo haasoossinaa wodda isoo mitaaxxa yaane haasoꞌa, elobaaxxe hedinonni isoo uuda, ittan seeriinke kadebaake orinni isoo abiddabaan. Ittan bukki hinaaxxa yanna, insaꞌnexxi huje kaddeexxa yaane egeꞌnatee qortuma qora calla assine hendabaan. Tenne irra 2 Ximootwosi 2:24-26 keꞌni kulemeeka adabuwwa leellinshaan. (Xiqse yaansis.) Geedhe cubbo hujeeke manjixxa qalbe tuqatee woꞌlaancho assitaa wodda baꞌluntenna shaqqunte leellisha hasissaan.

6. Geedhe cubbo hujeeka manjo haasoositebaa edi darre qalbe ifixxa qophpheeffattaaki hittate? (Roome 2:4)

⁶ Geedhe qalbe ifixxa qophpheessexxaan. Insaꞌne cubbo hujeeka manjo haasoosinaa wodda duuchchiinxe yaanenni Yihowwaa fakkaatatee woꞌlaanati, Phawuloosi: “Mageni baꞌlunte isixxinni aadde aaggattoshsha ateꞌe akeekatee [woꞌlaanaꞌneen]” hiyyeeka yaada qalli hinaan. (Roome 2:4 yaansis.) Geedhetixxi taakkaaxxi huje, Kirsitoosixxe akeette hunda hexxeꞌe gedhebo isika allalate kaddeexxa qalli hitaan. (Isa. 11:3, 4; Mat. 18:18-20) Komite cubbo hujeeke manjinni afendebaa edi darre, herregi insaꞌneki cubbo hujeeki manji aadde aagaashsha gargaarate kaddeexxa kadhati heddaan. Maxaafa Qullichchakeꞌninna borruwwa noꞌoxxeꞌni qoꞌne assitaan, ittan qalbeeffanna alfatee Yihowwabaa kadhattaan. Insaꞌnenna konne manjixxa hedino, adabanna meꞌinjo isika jijjiirteꞌe cubbo hujaashsha assiteexxa egeꞌna hasissaaxxa yaane hendaan.—Fakke. 20:5.

7-8. Geedhe cubbo hujeeka manjo haasoositaa wodda ossunteti Yihowwaa fakkaatta dandeettaaki hittate?

⁷ Geedhe Yihowwaka ossuntetika fakkeenna hordoffaan. Insaꞌne Yihowwa, edo cubbo hujeemmaka manna gargaareemmaki hittate kaddeexxa qalli hinaan. Fakkeennakeꞌe, Yihowwa Qayeeni cubbotike oraꞌni meꞌoole maa kadaaxxanna isiꞌaa ajajemeexxe kaddoole, eebbisemaaxxa kulee wodda ossunteti isoo haasoosseemman. (Dada. 4:6, 7) Yihowwa Daawitii gorsatee wabeekkichcho Naataani ergeemman, Naataaninna Daawiti aadde aagaashsha gargaaratee fakkeenna laꞌoonfateemman. (2 Samu. 12:1-7) Ittan Yihowwa jallichcha kadeeke Israꞌeelike ardibaa wabeekkooleeyye isixxa “higge-higgeeni” “erga” ittin sufeemman. (Ermi. 7:24, 25) Ardi isiki, isike gargaarsi belo aadde aagoꞌaa heqqaammabaan. Tenne irra aadde aangaashsha jajjabeessatee ediseen hedhe gargaaraamman.

⁸ Geedhetinna cubbo hujeeka manjo gargaaratee woꞌlaandaa wodda Yihowwaka fakkeenna hordoffaan. 2 Ximootwosi 4:2 xxe hundaayyeshsha, rakkoteꞌn ibeeka mitte addetika jaalo haasoosinaa wodda “yoꞌoxxe ossuntenni” haasoosinaaxxa egenneꞌeen. Qoꞌnetiki qallassanji tennee xiqse uuddaaxxa: “[Cubbo hujeeki manji] eloxxa yaane assatixxa halcha afaashsha assatee duuchchinii wodda ifi hiraꞌneekenna ossaameessa kadeexxa leellisha hasissaan. [Mitti geerchi] hifataꞌneexxee yookiin shookaꞌneexxe kaddoole, cubbo hujeemmaki manji gorsa isika laqabaaxxi yookiin aadde aaga gibaaxxi hexxaan.”

9-10. Geedhe mitti manji cubbo hujeexxa addatashsha gargaara dandeettaaki hittate?

⁹ Geedhe cubbotibaa akeekkeexxi yaane maachcho kaddeexxa egeꞌnatee woꞌlaandaan. Fakkeennakeꞌe, cubbo hujeeki Kirsitaani ifixxe qoꞌneꞌninna ergachchoteꞌni balalli hiyyeexxi laaniki gophaꞌni meꞌee? Yihowwabaa duuchchinii wodda kadhata waalee? Yookiin kadhataꞌneeki summi calliꞌaandee? Isoo akeekkaꞌneexxi elobaaxxe halcha? Ayyinnite yanna saꞌissaammaki? Dayyeeffataammaxxi yaane hitta hexxeexxemmaꞌa? Tinni melledheexxi yaanuwwa hedino isixxanna halcha isixxa jijjiirteeki hittate? Taꞌa shiqixxe yannaꞌni murteessedheexxi murtenna asseexxi yaane anna isika Yihowwaa, yaadisseexxa egeꞌnee?

¹⁰ Insaꞌnee uuddabaaxxe yaaneꞌni eꞌyinebaangi hasisaaka qortuma calla qorati, cubbo hujeeki manji cubbotike oranaaꞌni higaashshanna cubbo hujeexxa addataashsha gargaarraan. (Fakke. 20:5) Ittan lebendaaxxa, Naataani Daawitii gorsatee fakkeenna laꞌoonfateemmashsha, geedhetinna mitti manji hujeexxa cubbo hubataashsha, ittan asseexxi yaane dedhiinxe kaddeexxa hubataashsha gargaaratee fakkeenna laꞌoonfattaaxxi hexxaan. Dedha kunni cubbo hujeeki manji taakkaaxxe bukkii baro asseexxe yaaneꞌaa qalbeti yaadaaxxi hexxaan. Matanga aadde aagaaxxinna hexxaan.

11. Yesuusi cubbaaleeyye abidaammaki hittate?

¹¹ Geedhe Yesuusii fakkaatatee woꞌlaandaan. Reyotenaaꞌni keꞌeeki Yesuusi, Xerseesike bogika Saꞌoolii: “Saꞌooli, Saꞌooli, mayeete anee shorritaatteki?” hiyyati giddo isixxa egeꞌnaashsha assaaka qortuma qoreemman. Yesuusi konne qortuminni Phawuloosi assateꞌni hedheexxi yaane dedhake kaddeexxa hubataashsha gargaareen. (Huje 9:3-6) Ittan Yesuusi “Elizaabeeli” hiyyendeexxa manjichcho, “aadde aaggaashsha iseꞌaa yanna uwweennen” hiyyeemman.—Leellisha. 2:20, 21.

12-13. Geedhe cubbo hujeeke mitte manjiꞌaa aadde aagaaxxa yanna uutaaki hittate? (Fakke uudi.)

¹² Geedhe Yesuusika fakkeenna hordoffaammaxxeꞌe, mitti cubbo hujeeki manji aadde aagabaan hiyye murteessatee muddandabaan. Mitti mitti manji aadde aagaaki komite bukki hiteꞌe, isoo haasoositaaxxe taakkaanxe bukkiiꞌnite kada dandeettaan. Welekee kinni yanna hasissaaxxi hexxaan. Tenneꞌaa geedhe cubbo hujeeka manjo mittele calla kaddebaangi wele woddanna haasoosatee progiraama fulchitaaxxi hexxaan. Dedha kunni cubbo hujeeki Kirsitaani, taakkaaxxe bukkii wodda geedhe haasootteemmaxxa yaane adda heda safaaxxi hexxaan. Ifi heeshshi asseꞌe Yihowwa isiꞌaa gattowwaal hiyyaashsha kadhataaxxinna hexxaan. (Faaro 32:5; 38:18) Tenneꞌaa itti aandaaxxe bukkiiꞌni taakkaaxxe bukkii wodda leellisheemmakenaaꞌni gargariti hedheeeka manfasa leellishaaxxi hexxaan.

¹³ Geedhe cubbo hujeeka manjo aadde aagaashsha gargaaratee marartenna baꞌlunte leellishshaan. Yihowwa woꞌlaancho insaꞌnexxa eebbisoꞌaa kadhattaan, ittan kunni cubbo hujeeki Kirsitaaninna qalbeefateexxi aadde aagaaxxa adde asseꞌnaan.—2 Ximo. 2:25, 26.

14. Mitti cubbo hujeeki manji aadde aagaa wodda galati hasisaaki ayyiꞌaate? Mayee?

¹⁴ Mitti cubbo hujeeki manji aadde aaga yoꞌoshsha gammachchiissaaxxe yaanen! (Luqa. 15:7, 10) Galati hasisaaki ayyiꞌaate? Geedheteete? Cubbichcha uuddaaxxa Phawuloosi: “Dedha Mageni . . ..aadde aangaashsha gargaaraaxxi hexxaan” hiyye borreesseexxa qalli hiyye. (2 Ximo. 2:25) Qoꞌnetiki qallassanji tenne xiqseꞌaa iitta hiyyeen: “Tenne hedinotixxenna adabiinxe jijjiirraaꞌa galati hasisaaki manjokeete kadebaangi Yihowwaaten. Buutotinna fuggoke oraꞌni meꞌaammaki Kirsitaani iitta hexxeexxa jijjiirra assaashsha gargaareeki isoten. Phawuloosi itta aana, aadde aaga affeexxa mitte mitte laꞌo ifiseen, tinninna cubbichchi manji dhugaatixxa toggitte egeꞌna alfaashsha assitaaxxa, qalbetibaa higaashsha gargaartaaxxanna Seexaniinxe fonxoronaaꞌni fulaashsha assitaaxxa haasoꞌeen.—2 Ximo. 2:26.”

15. Geedhe aadde aageeka manjo gargaara ittin ediꞌaa suffaaki hitta?

¹⁵ Cubbo hujeeki manji aadde aagaa wodda Seexaniinxa fonxoro faachcheeffatanna toggichcha oraꞌni meꞌa ittin ediꞌaa sufaashsha, geedhe adde isixxa jabeesitaaxxa toꞌe isiꞌaa assitaan. (Ibra. 12:12, 13) Geedhe mitti manji hujeexxa cubbo ayyeꞌninna diideesiteꞌe haasoottabaan. Kaddomaleꞌe, gubaꞌe egeꞌna hasissaaxxi yaanuwwa heente kada dandeetta?

“DUUCHCHIINGE MANJI EDO XIXI”

16. 1 Ximootwosi 5:20 xxe hundaayyeshsha, Phawuloosi “manji edo” hiyyeexxi yaane maachchoke?

¹⁶ 1 Ximootwosi 5:20 yaansis. Phawuloosi gubaꞌetike geercho kadeeke Ximootwosiꞌaa tenne yaane borreesseeki “cubbo huja aadate assedheeka manjo” abidaa qico ifisateeten. Phawuloosi iitta hiyyeeki maa hiyyatee haseete? Iitta hiyyeeki gubaꞌe giddo hedheeke “duuchchinii manji edo” hiyyatee haseetebaan. Tenne irra, mitti manji cubbo hujeexxa egeꞌneeka heenooka manjo ifisateete kada gophpheebaan. Kunni manni naqaashe yookiin kunni cubbo hujeeki manji cubbo hujeexxa isinni kuleeke manjo kada dandeꞌaan. Geedhe tenne yaane abiddeexxanna cubbo hujemmaki manjiꞌa xixichchi uwwemeexxa konne mannaꞌni maliki kullaan.

17. Mitti manji hujeexxa cubbo gubaꞌe duuchchi egendoole yookiin egeꞌnendaachcho fakkaattaꞌnoole hitta hedheeki egeꞌnishanji kulema? Mayee?

¹⁷ Mitte mitte buutonaaꞌni kexxeexxa hujendeexxi cubbo gubaꞌe duuchchi egendaaxxi yookiin egeꞌnema gattabaaxxi hexxaan. Tennenaaꞌni kexxeexxa, “duuchchinii manji edo” hitaaxxi hiyya gubaꞌe giddonna hedheeka ifissaaxxe kada dandeettaan. Tenneꞌaa mitti geerchi cubbo hujeeke dayyiꞌaa yookiin dayyoꞌaa xixichchi uwwemeexxa gubaꞌeteꞌn egeꞌnishaan. Mayee? Phawuloosi welinna cubbo hujabaashsha “xexxeꞌachchiisanjoke kadaashshaten” hiyyeen.

18. Tommennaa saddeeta wogganni buttiꞌaa hexxeexxi cuuphendeexxi oose cubbo hujaa wodda geedhe maa assita? (Fakke uudi.)

¹⁸ Cuuphendeexxi 18 woggaa buttaa hexxeexxi oose jabaxxa cubbo hujjaa wodda maa assina? Geedhetixxi una konnee kalaala geyebaaka belto, Kirsitaana kadeeki hadi isiki hedheexxe bakkaꞌni lame geedhe haasoositaashsha assitaan.b Geedhe beltiinki hadi belti insaꞌneki aadde aagaashsha gargaaratee maa asseexxa kokkaan. Kunni kalaala geyebaaki belti eloka adaba afoole, ittan hadi isiki gargaaraꞌneexxe kaddoole, lame geedhe, geedhetixxi komite beltikinninna hadi isikinni bukki hiyya hasissabaaxxa murteessitaan. Duuchchiinxi iimi darre, belto konnee jaalalati toggi assatixxa maganne Mageni uwweeki hado isikeeten. (Zeda. 6:6, 7; Fakke. 6:20; 22:6; Effe. 6:2-4) Geedhe oddo-oddo beltiinki hadi, belto insaꞌnekee hasisaaka gargaarsa assaꞌneexxa kokkaan. Kaddomaleꞌe, kunni cuuphemeeki kalaala geyebaaki belti aadde aaga gibeꞌe cubbotike oraꞌni meꞌa ittin sufoolenaꞌa? Iitta hexxeexxi yaane kaddaa wodda, geedhetixxi komite konne beltinni Kirsitaana kadeeke hadi hedheeba mitteba bukki hitaan.

“YIHOWWA HARANGA JAALALTICHCHAKENNA MARARTICHCHAKEN”

19. Geedhe cubbo hujeeka manjo haasoositaa wodda Yihowwaa fakkaatatee woꞌlaandaaki hittate?

¹⁹ Komite giddo ergatendaꞌneexxi geedhe Yihowwa edo, gubaꞌetika caꞌinne heqqatixxa maganne affeen. (1 Qoro. 5:7) Dandeesisseexxe kaddoole, cubbo hujeeki manji aadde aagaashsha gargaaratee hansaꞌneen. Konnee manjo gargaartaa wodda geedhe, qajeelto uushsho affaan, ittan higabaani hitenna heddabaan. Mayee? Buutotinna ‘haranga jaalaltichchanna marartetike’ kadeeka Yihowwaa fakkaatatee hassaammaxxeeten. (Yaꞌiqo. 5:11) Woggati lummeꞌedheeki hawaarya Yohaannisi iitta hedheeka manfasa leellisheemmaki hittate kaddeexxa hubatte. Isinna: “Eeyyendineexxe oose anxee, tenne yaane borreessaanneki cubbo hujjinabaashshaten. Ayyinna cubbo hujeexxe kaddoole kinni, Aabiba gargaarsanjo anfeennen, isinna qullichcha kadeeke Yesuusi Kirsitoositen” hiyeen.—1 Yoha. 2:1.

20. Tenne barachchoxxe muuxamiinxe qoꞌneꞌni barantaannexxi yaane maachcho?

²⁰ Yaadissaaxxa mitti Kirsitaani aadde aaga gibaaxxi hexxaan. Iitta kaddaa wodda kunni manji gubaꞌe giddiiꞌni fulcha hasissaan. Geedhe iitta hexxeexxa haꞌura yaane abiddaaki hittate? Konne qortumika hiissichcho itti aandaaxxe muuxamiinxe qoꞌneꞌni uundannon.