Welekee Uwwat Caaldeexxa Gammashsho Alfe

1-2. Dadumiinxe dandeette kaddeexxe, adhdhat irra uwwat afendaaxxe gammashshonaaꞌni laꞌo alfinannoki hittate?

YIHOWWA manjo dadeeki adhdhat irra uwwati caaldeexxa gammashsho alfaashsha asseeten. (Huje 20:35) Iitta hinanno wodda adhdha gammachchiissabaan hiyyotee? Waawwot. Manji uwwaaxxa yaane adhdha gammachchiissaaxxa egenneennen. Kaddoolenna, irraan caala gammandannoki uunanno woddaten. Ittan Yihowwa konne orinni noꞌoo dadeeki noꞌonxe laꞌoꞌaan hiyyeeten. Hitta?

² Buutotinna Yihowwa konne orinni noꞌoo dadeemmaxxee gammashsho noꞌoxxi lebbaꞌni metaashsha assa dandeenannon. Manjokee uunannoxxa wele futtii halsati gammashsho noꞌoxxi lebbaꞌni metaashsha assa dandeenannon. Dademmeenneki gari manbeꞌa assaakebaa?—Faaro 139:14.

3. Yihowa “gammashshot Mageno” hiyyemeeki mayeete?

³ Qullitte borruwwa, uwwa gammandannoshsha assitaaxxa kokeessitaan, tenneꞌa Maxaafi Qullichchi Yihowwaa “gammashshot Mageno” hiyya, manbeꞌa hinannoshsha assitaaxxe yaanebaan. (1 Ximo. 1:11) Isi welekee uwwat taakkaken, ittan isixxenaaꞌni caaldeexxa uwwa uwwe egeꞌneeki hedhebaan. Hawaarya Phawuloosi hiyyemmashshanni, “hedho alfinenneki ittan leleꞌminaanneki isinniten.” (Huje 17:28) “Duuchchiinxa eloxxa uwwanna qullichcha badhaadha” alfinenneki Yihowwanaaꞌniten.—Yaꞌiqo. 1:17.

4. Caaldeexxa gammashsho alfinannoshsha noꞌoo gargaartaaxxi yaane maachcho?

⁴ Noꞌo duuchchiing welekee uwwat gammashsho alfatee hansannoxxi hexxaan. Gammashsho alfa dandeenannoki arjuntet Yihowwaa fakkaantonnoleten. (Effe. 5:1) Tenne qoꞌneꞌni uwwa noꞌoxxa manji saadaꞌnebaachcho fakkaattaa wodda maa assinannoxxa uundannon. Kunni qallassanjuwwi, uwwat gammashsho alfa ittin ediꞌaa sunfannoshshanna lephphinannoshsha gargaaraan.

ARJUNTETI YIHOWWAꞌA FAKKAATTE

5. Yihowwa mitte mitte noꞌaa uuwweexxi yaane heente?

⁵ Yihowwa arjake kadeexxa leellisheeki mitti mitti oruwwi hoonte? Heenooka fakkeenuwwa uundo. Yihowwa hedho noꞌoxxee hasissaaxxa yaane uwwaan. Duuchchinii wodda dananetixxa hedho hedhanna gonphonnole, Yihowwaka galata noꞌo giddiiꞌni heddi hedhotee hasissaaxxa yaane anfeennen. Fakkeennakeꞌe, sagale, seemmanna mine alfinannoshsha gargaaraan. (Faaro 4:8; Mat. 6:31-33; 1 Ximo. 6:6-8) Yihowwa noꞌaa maalakee hasissaaxxa yaane qophpheessaꞌneeki iitta assa hasissaammanxee calla? Waawwot! Yihowwa tennee yaanuwa noꞌaa uwwaꞌneeki mayeete?

6. Matwoosi 6:25, 26 kenaaꞌn maa barantanno?

⁶ Yihowwa maalakee noꞌaa hasissaaxxa yaane qophpheessaꞌneeki noꞌoo eeyyammaxxeeten. Matwoosi 6:25, 26 keꞌni yesuusi haasoꞌeeka yaada uundo. (Xiqse yaansis.) Yesuusi dadatika fakkeenna laꞌoonfate haasoꞌeemman. Ciꞌuwwa uuddaaxxanna iitta hiyyeen: “Insaꞌne facaansabaan, haaꞌminabaan yookiin gootarakeꞌni masseꞌnabaan.” Kaddooleenna, Itti aana maa hiyyeexxa hubatte: “Iimateꞌni hedheeki anni haꞌnooki insaꞌnee itisaan” hiyyeen. Okkooꞌni: “Haꞌnoo insaꞌnenaaꞌni saxxinabaa?” hiyye qoreen. Yesuusi iitta hiyyeeki maa barsiisatee haseete? Yihowwa edo isixxi mageneeffatoole biniinchakenaaꞌn caaleeka hira affeen. Yihowwa biniinchakee hasissaaxxa yaane uwwat karkarsaꞌnoole, noꞌaanna iittan assaaxxa addata dandeenannon! Mitte eloke annishsha Yihowwa maate isixxee hasissaaxxa yaane jaalalat qophpheessaan.—Faaro 145:16; Mat. 6:32.

7. Arjunteti Yihowwaa fakkaata dandeenannoki mitti ori hoonte? (Fakke uudi.)

⁷ Yihowwashshanni noꞌonna maalakee hasissaaxxa yaane jaalalati uwwa dandeenannon. Fakkeennakeꞌe, sagale yookiin seemma hasissaaxxi egendeettexxi dayyuwwa hexxee? Yihowwa insaꞌnaa hasissaaxxa yaane wonshatee ateꞌe laꞌoonfata dandeꞌaan. Yihowwaki ardi giddiiꞌninni bala geltaaxxa yanna arjunteti egeꞌnemeeken. Fakkeennakeꞌe, Koroniinxa yanna dayyuwwa gargaarsi hasisaake manjiꞌaa sagale, seemma ittan wele kiphpha assiteemman. Ittan heddi manni Butta duuchchaꞌni hujendaꞌneexxa lassatixxa huje kiphatee maallaqa buuseen. Kunni maallaqinna butta duuchchaꞌni bala gelteexxe bakkaꞌni dayyuwwatee hasissaaxxa yaane wonshatee gargaareen. Kunni arja kadeeki dayyuwwi, Ibraawiyaane 13:16 keꞌn “eloxxa yaane assanna affineexxa yaane welekee qooda deetinoqqe, Mageni iitta hedheeke tolchaꞌni haranga gammadaan” hiyyaꞌneeka gorsa hujeteꞌni hosisseen.

8. Yihowwaxxe hunnanaaꞌni laꞌo alfinannoki hoone oruwwinnite? (Isayaasi 40:29)

⁸ Yihowwa hunna uwwaan. Yihowwaꞌa gabala affebaaxxe hunna isixxenaaꞌni addatendeexxe mageneeffatoole isixxee uwwa yoꞌoshsha gammachchiissaan. (Isayaasi 40:29 yaansis.) Hega uushsho faachcheeffattattoshsha yookiin haꞌuraake jeeji giddo hexxeꞌe jabaatte ossitattoshsha Yihowwa hunna uwwaa kadhattee egendete? Mitte barraa calla hasissaaxxa hunna uwwaashsha kadhatteettexxinna hexxaan. Jabeenna alfatee kadhatteettexxi kadha hiissichcho alfitaa wodda, hawaarya Phawuloosi; “Hunna aniꞌa uwwaake isixxe sultonni, duuchchiinxe yaaneꞌa kadaaka jabeenna afeennen” hiyyeeki yaadi dhugaate kadeexxa kokeessitatton.—Filph. 4:13.

9. Yihowwa hunna isixxa arjuntet laꞌoonfataꞌneeka ora hordofa dandeenannoki hittate? (Fakke uudi.)

⁹ Qulliyyenna kada gonphonnole, Yihowwa hunna isixxa arjuntet laꞌoonfataꞌneeka ora hordofa dandeenannon. Yihowwa hunna manjokee uwwaꞌnee garinni, hunna noꞌoxxa welekee uwwa dandeenaaꞌnon. Kaddomaleꞌe, hunna noꞌoxxa wele manjo gargaaratee laꞌoonfata dandeenannon. Fakkeennakeꞌe, cindeexxe yookiin ela-gophpheexxe dayyuwwaa hasissaaxxa yaane dikko mare hira yookiin mini giddixxa huje gargaara dandeenannon. Heꞌnenneki jeeji uwwedhaꞌneexxe kaddoole, ifixxe fedhiini Bukkiitika Galma caꞌa assatixxanna haaroonsatixxa huje gargaara dandeenannon. Konne oruwwinni hunna noꞌoxxa laꞌoonfantaannexxe kaddoole, Yihowwaa mageneefataꞌneeke manniꞌa eloxxa laꞌo affeen.

10. Haasoꞌi afeexxa hunna welekee laꞌo afaa garinni laꞌoonfata dandeenannoki hittate?

¹⁰ Haasoonnannoxxi yaane jabaxxa hunna affeexxa deetinoqqe. Mitti manji asseexxe yaaneꞌa qalbet galateeffata isiꞌa laꞌo affeechcho fakkaattaꞌnee? Jajjabeenni hasisaaki egendeetteki manji hedhee? Iittate kaddoole, ati edisseen tennee yaane assiteettelenaꞌa? Mine mare qora, bilbila bilbila yookiin daddaabbe borreessa ittan bilbiliki harumaaxxa erganna borreessite erga dandeetatton. Haasootattoxxe yaaneꞌa okkone qico yaaddoxxeꞌe. Afoꞌo atikenaaꞌn fuldaaxxi eloxxi heenoonxi hiyya, addetiki jaali atiki addatenshat ittin ediꞌaa sufaashsha yookiin qajeela yaane hedaashsha assitoꞌa dandeettaan.—Fakke. 12:25; Effe. 4:29.

11. Yihowwa beekkuma isika laꞌoonfataꞌneeki hittate?

¹¹ Yihowwa beekkuma uwwaan. Hordofeesi Yaꞌiqoobi iitta hiyye borreesseen: “Haꞌnoo giddiiꞌni beekkumi xeꞌyeeki hedhoole Mageno kadhata ittin sufowwaal, Mageni ayyeenna ceeꞌmebaangi duuchchiniingeꞌe arjuntet uwwaan.” (Yaꞌiqo. 1:5; lqj) Tinni hiyya ifissaꞌneeshshanni, Yihowwa beekkuma isika shoꞌedhabaan. Tenne irra arjuntet welekee uwwaan. Yihowwa beekkuma uwwaa wodda ‘ceeꞌmabaaxxa’ yookiin ‘dedha qocabaaxxa’ qalliyye. Isi akeette isixxa halsinennexxee noꞌoo yaadissaaxxa yaane ijjenda assabaan. Matanga akeette isixxa halsinannoshsha noꞌoo jajjabeessaan.—Fakke. 2:1-6.

12. Beekkuma anfeenneka welekee barsiinsannoxxa heene futtii anfeene?

¹² Noꞌo maa assa dandenanno? Beekkuma anfeenneka welekee barsiisati, Yihowwaa fakkaata dandenanno? (Faaro 32:8) Yihowwaki ardi barateexxa yaane welekee barsiisaaxxa heddo futtii afeen. Fakkeennakeꞌe, heddo yanna reefi cuuphemeeka manjo ergachchotee leenjinsannon. Geedhe, gubaꞌetika ergatanjuwwanna cuuphemeeka dayyuwwa, gubaꞌe giddo uwwendaaxxa huje hunjaa qico egennaashsha barsiisatee ossuntet gargaartaan. Ittan lebandaaxxa, ijaaratikanna haaroonsatika beekkuma affeexxi dayyuwwa, okkone qiconna ijaarisiinxa dandeette affebaaxa dayyuwwa, tiꞌokiraasetike ijaarsixxa huje gargaartaashsha leenjissaan.

13. Wele manjo leenjinsanno wodda Yihowwaa fakkaantannoki hittate?

¹³ Wele manjo leenjisaaki manji, Yihowwa beekkuma isika uwwaꞌneeka ora hordofa eloxxen. Yihowwa beekkuma isika arjuntet uwwaꞌneexxa qalli hiyye. Noꞌonna isishshanni barsiinsaanneke manjiꞌaa egeꞌnanna hedhotixxa baranno noꞌoxxa tolanga uunaannen. Barsiinsaanneki manji soodi soodo bakka anxa adhdhaan hitaaxxe sodaꞌanni mitte mitte egenneennexxa yaane shoꞌedha hasissabaan. Yookiin ‘ayyete anee leenjiseemmaꞌa ifiꞌaan barantun’ hiyyanna hasissabaan. Iitta hexxeexxi hedino, Yihowwake ardixxe oddoꞌn bakka affebaan. Barsiinsaannexxe yaane calla kaddebaaki “ifinni” leenjinsaanneke manjiꞌaa uwwatee gammandaannen. (1 Tese. 2:8) ‘Insaꞌnenna wele bariisatixxa dandeette anfaaxxa’ addantaannen. (2 Ximo. 2:1, 2) Noꞌo duuchchiingi anfeenneka beekkuma arjunteti barsiinsaannexxe kaddoole, noꞌonna ittan barsiinsaanneki manji beekkolenna gammandaanneke kandannon.

ASSINAANNEXXA YAANE MANJI LUMMISE UUDAꞌNEBAACHCHO FAKKAATTAA WODDA

14. Heddi manni arjunteti assinaannexxa yaane uudaꞌneeki hittate?

¹⁴ Giddiiꞌninni dayyuwwa noꞌoxxee arjunte anfeennexxa leellinshanno wodda insaꞌnenna assinaannexxe yaaneꞌa saadino anfeexxa leellinshaan. Galateeffantannon hitaaxxa erga borreesineꞌe erginaan yookiin wele orinni galateeffantaꞌneexxa leellinshaaxxinna hexxaan. (Qola. 3:15.) Iitta hexxeexxa saadino laqa gammashsho noꞌoxxi lebbaashsha assitaan.

15. Mitti manji assinennexxa yaane saada gophoole qalli hiyya hasissaaxxi yaane maachcho?

¹⁵ Dhugaatishsha hexxoole, mitti mitti manni duuchchii wodda assinennexxa yaane lummise uudabaaxxi hexxaan. Mitte mitte wodda yanna noꞌoxxa, hunna yookiin anfeennexxa yaane uuneeꞌnaanni assinennexxa yaane manji lummise uudeebaachcho fakkaattaaxxi hexxaan. Iitta hexxaaxxa yanna gammashsho noꞌoxxi baxxabaashsha heqqedha dandeenannoki hittate? Tenne qoꞌnexxi xiqse, Huje 20:35 keꞌn maa hitaꞌneexxa qalli hiyye. Gammashsho noꞌoxxi hundeessendeeki uwwateꞌnite maleꞌe, unennexxe yaaneꞌa manji hiissaake hiissichchoꞌnitebaan. Assinaannexxa yaane manji saadaꞌnebaachcho fakkattoolenna uwwat gammashsho alfatee murteessedha dandeenannon. Hitta? Heenoka fakkeenna uundo.

16. Uunanno wodda miꞌlachcho assa hasissaaki mayekeꞌnite?

¹⁶ Welekee uutinaaxxa yanna Yihowwaa fakkaattinaꞌneexxa qalliyye. Yihowwa asseexxe yaaneꞌa manji isoo saadenna saadanna gophoole, isi manjokee eloxxa yaane uwwaan. (Mat. 5:43-48) Yihowwa manji noꞌaa ‘hisse assaaxxa mitte yaanenna heqqinebeꞌnong’ isishsha uunanno wodda ‘badhaadhi noꞌoki lumoke kadaaxxa’ kako aageen. (Luqa. 6:35) “Mitte yaanenna” hitaꞌneexxi hiyya saadino leellishshaaxxe kada dandeettaan. Assinennexxe yaaneꞌa hiissichcho alfinenna alfanna gonphonnole, gammashshot uunaannaxxeꞌe, Yihowwa manjokee assenennexxe eloxxe yaaneꞌaa noꞌaa wirri assee uuwwaan.—Fakke. 19:17; 2 Qoro. 9:7.

17. Manjokee uunaannexxa yaane uuddaaxxa toggitte kaddeexxe uushsho afa dandeenannoki hittate? (Luqqaasi 14:12-14)

¹⁷ Manjokee uunanno wodda toggitte kaddeexxe uushsho anfannoshsha gargaaraaka eloka gorsa Luqqaasi 14:12-14 qicoꞌn afa dandeenannon. (Xiqse yaansis.) Noꞌaa mitte yaane hiisse assa dandeꞌaaka manjo keesunsa yookiin wele oruwwinni arjunte leellisha dedhakebaan. Kaddomaleꞌe, manjokee uunaanneki noꞌaa hiissinee uunaan hitaaxxe hedinonnite kaddeexxa hubantonnolenaꞌa? Iittate kaddoole, Yesuusi haasoꞌeexxa yaane hujeteꞌni hosissa eloxxen. Noꞌoo keesunsaachcho afebaaxxa egenneenneka manjonna mine noꞌokeꞌni keesummummat adhdha dandeenannon. Iitta assinanno wodda Yihowwa fakkaantaannaxxeꞌe gammashsho alfinannon. Iitta hexxeexxi uushsho, weli manji assinennexxa yaane lummise uudabaaxxa yanna, gammashsho noꞌonaaꞌni baxxabaashsha heqqeꞌnannoshsha gargaartaan.

18. Maa assa hasissabaaxxa kokiinke kada hasissa? Mayee?

¹⁸ Mandoxxeꞌe. (1 Qoro. 13:7) Mitti manji assinennexxa yaane lummise uuda gophaꞌneexxe kaddoole iitta hineꞌe ifi qora dandeenannon: ‘Dhugaandinni kunni manji galateeffataꞌnebaange kadeete moo galateeffata dedheete?’ Dedha kunni manji noꞌo heqqinennexxa yaane assabaashsha assiteexxi wele yaanuwwanna hedha dandeettaan. Mitti mitti assendeexxe yaaneꞌa qalbet, gammadatenaaꞌn kexxeexxa maa hiyye haasoꞌaanxa mekki hiyyaakinna hedhaan. Giddiiꞌninni edo manjo gargaaraammake manjo kadoole, uunaaxxa yaane adhdha shokissaaxxi hexxaan. Buuto heenetenna kaddoole, Kirsitaanuntetixxi jaalala, donnooma gophat, gammashsho alfa ittin ediꞌaa sunfannoshsha assitaan.—Effe. 4:2.

19-20. Welekee uunanno wodda ossaameessa kada laꞌo affeen hinaanneki mayeete? (Fakke uudi.)

¹⁹ Ossaameessa kadi. Mootichchi Solomoon arja kada uuddaaxxa: “Qixxa atika wodiꞌi giddo huni, heddo barra uduma hiissitee alfitatton” hiyyee borreesseen. (Meki. 11:1) Tinni xiqse mitti manji arjunte noꞌoxxee “heddo barra uduma” hiissichcho uwwaaxxa leellishshsaaxxen. Tinni yaane dhugaate kaddeexxa leellishshaaxxa hedhotixxa baranno uundo.

²⁰ Qeerraaxxe wogga edi darre, mitte rogiinke iimke toꞌatallixxi miniinxi ama, reefi cuuphendeexxa dayyo Yihowwaꞌa addatende hexxaashsha jajjabeessatee daddaabbe borreesite ergiteemman. Saddeeta wogga uduma, dayyo tinninna daddaabbe borreesiteexxi; “saxxeexxa heddo wogguwwa haꞌnoo ergitineexxi daddaabbe aneꞌe hittee qico gargaarteexxa kulonnaa hasaannen” hiteen. Ittan lebbeexxi: “Borreessitineeki yaadinna jajjabeessaakemman, xiqsuwwatinna haranga qalbe anxi gammaddaashsha assiteen, tenne yaane haanonna dedhaaꞌnon.”a Mitte mitte iseꞌni gelteexxa rakko ifisseechchi uduma dayyo tinni iitta hiteen: “Dhugaati minenna afeennaxxa maganne duuchcha waale fulonna haseennaxxi yanna hexxemman. Kaddoolenna haꞌnoo borreessitineexxi xiqse aneꞌe tirtirsiteemmaxxeꞌe ittin ediꞌa sufa dandeꞌeennen.” Ittin lebbeexxi: “Tenne saddeeta wogga giddo haꞌnoo ergitineexxe daddaabbeshsha gargaarteexxi mitte yaanenna hexxebaan.” Konne rogiinke iimike toꞌatallixxi miniinxi ama ‘qeerraaxxe wogga uduma’ tenne saadino laqa hittee qico gammaddaashsha assitaaxxa hedde! Noꞌonna mitte manjiꞌa eloxxa yaane assinennexxe qeerraaxxe yanna uduma, ikki manji assinennexxe yaaneꞌa galateeffataaxxi hexxaan.

21. Arjuntet Yihowwaꞌa fakkaatatee murteessexxeeteki mayeete?

²¹ Iimiꞌni uundennashshanni Yihowwa noꞌoo dadeeki gargariti hexxeexxa dandeette anfannoshsha asseeten. Adhdha gammachchiissaaxxe yaane kaddoolenna, welekee uunanno wodda kinni, caaldeexxa gammashsho alfinannon. Addetika jaaluwwa noꞌoka gargaaranno wodda qalbe noꞌoxxi gammaddaan. Ittan insaꞌnenna assinennexxe yaaneꞌa galateeffantaa wodda gammandannon. Kaddoolenna, galateeffantenna galateeffatanna gonphoole, eloxxa yaane assinennexxee calla gammada dandeenannon. Haꞌnoo heene yaanenna uutunoole ‘Yihowwa uutineexxenaaꞌni haranga caaldeexxa uwwaaxxa’ deetinoqqe. (2 Zena. 25:9) Tenneꞌaa ayyaanna Yihowwa uwwaaxxe yaane iimi darre hexxeexxa yaane ijjenda uwwa dandeennaaꞌnon! Ittan lebendaaxxa, Yihowwanaaꞌni badhaadhda alfatenaaꞌn caaldeexxi yaane hexxebaan. Tenneꞌa iimatika Anna noꞌoka arjuntet fakkaata ittin ediꞌa sufatee murteesseꞌno.