Yihowwaxxe Jaalalanaaꞌni Laꞌo Alfinanno Qico

1. Yihowwa gammachchiisatee maassa dandeennanno?

MITTE Eetaatteke manjiꞌaa, danchanna laꞌo affeexxa uwwa uutetten. Kunni manji uwwa tenneꞌe, kaddabaaxxe bakkaꞌni afeeshshanni ugge iseenni qalliyya gophoole hittatta yaadissaaxxe yaane! Wele darrenaaꞌni manji kunni, uwwa tennee seeriki laꞌoonfataaꞌnaanna saadino isiꞌa afeexxa leellishaaꞌnaa uuddatto wodda gammaddattoxxi egeꞌnendeexxen. Fakkeenna konnenaaꞌni maa barantanno? Yihowwa noꞌaa hiyyeexxi Belto isika uwween. Noꞌonna fiixa kaddeexxe uwwa isixxeenna wodo qopheessaashsha assiteexxe jaalala isixxee saadino anfeennexxa leellinshanno wodda Yihowwa yoꞌoshsha gammadaan!—Yoh. 3:16; Rom. 5:7, 8.

2. Tenne qoꞌneꞌni mariꞌantannexxi yaane maachcho?

² Yanna saxxaꞌni metaashshanni, wodotixxe uwwaa anfeennexxi saadino qiiddaꞌni metaaxxi hexxaan. Tinninna Mageniinxa uwwa kaddabaaxxe bakkaꞌni anfeeshshanni uggatishshaten. Uwwa tennee alfinnennexxee gammandonnolenna, leellitabaaxxe bakkaꞌni suunqeenneshshaten. Iitta hexxeexxi yaane kaddabaashsha, Mageninna Kirsitoosi noꞌaa assineexxe yaaneꞌa anfeennexxa saadino duuchchinii wodda haaroonsedha hasissaan. Tinni qoꞌne iitta assinannoshsha gargaartaan. Tenne qoꞌneꞌni wodotenaaꞌni taꞌanna, ittan ediꞌaanna laꞌo alfa dandeennannoki hittate kaddeexxa mariꞌantannon. Ittan Qalliitike Ayyaanixxa yanna Yihowwaxxe Jaalalaa saadino anfeennexxa leellishatee maa assa dandeennannoxxa uundannon.

TAꞌA LAꞌO ALFINANNOKI HITTATE?

3. Wodotenaaꞌni taꞌni laꞌo alfinannoki mitti ori hoonte?

³ Yesuusike wodotike tolchanaaꞌni taꞌanna laꞌo alfateꞌni heꞌnennen. Fakkeennakeꞌe, wodotixxe sultonni Yihowwa cubbo noꞌoxxa gattowwaali hiyyaan. Isi cubbo noꞌoxxa gattowwaali hiyyatee gaddachchemabaan. Kaddomaleꞌe, isi gattowwaali hiyyatee hasaꞌneen. Mitti faarisanji saadino isixxa: “Yihowwaa ati elokeni, gattowwaal hiyyateenna qophphootteetteken” hiyyee ifiseen. Far. 86:5; 103:3, 10-13.

4. Yihowwa wodo qophpheesseeki ayyiꞌaate? (Luqqaasi 5:32; 1 Ximootwosi 1:15)

⁴ ‘Yihowwaxxi gattowwaali aniꞌaa hasissaake manjobaan’ hiyye hedaaki mitti mitti manji hedha dandeꞌaan. Dhugaaten noꞌo duuchchiniingi isixxi gattowwaal hasissaake mannammabaan. Hawaarya Phawuloosinna “hawaaryaatichcho hiyyemeꞌe yeꞌema hasissabaake” manjo kadeebaaxxa haasoꞌeen. Kaddoolenna ittin lebeexxi: “Taꞌa hedhenneba geyenneki Mageniinke badhaadhinniten” hiyyeen. (1Qo. 15:9, 10) Cubbo hunjennexxee aadde aanganno wodda Yihowwa noꞌaa gattowwaal hiyyaan. Mayee? Gattowwaali isixxi hasissaake manna kada gonphonnolenna isi noꞌoo eeyyammaxxeeten. Gattowwaali Yihowwaxxi aniꞌa hasissabaan hitee heddaattexxe kaddoole, Yihowwa wodo qophpheesseeki qulliyyeteete kaddeebaki aadde aaggaaxxe cubbaaleeyyaate kaddeexxa qalliyyi.—Luqqaasi 5:32; 1 Ximootwosi 1:15 yaansis.

5. Ayyetenna kandonnole ‘Yihowwaxxa gattowwaal alfatixxa mabite anfeennen’ hine heda dandeennanno? Ifisi.

⁵ Yihowwaa ergatemmaꞌni qeerraaxxa yanna turreenneke kandoonnolenna, ittan ayyinna Yihowwaxxa gattowwaal alfatixxa mabite anfeennen hinee heda dandeenaaꞌnon. Dhugaaten, Yihowwa addatenshati isiꞌa assineennexxa yaane ijjenda dedhabaan. (Ibr. 6:10) Isi Belto isika noꞌaa uwweeki, isiꞌaa ergatemmenneka hira kaffalateette kaddeebaaki tolangen. Yihowwaaꞌa heddo yaane asseennaxxeꞌe isixxa gattowwaal alfatixxa mabite afeenneni hine hendaannole, Kirsitoosi reyeeki tolange hiyyatishshatenni.—Gelaatiya 2:21 welti hokkokisiis.

6. Phawuloosi Yihowwaa jabaate ergatemaammaki mayeete?

⁶ Phawuloosi Mageniinki Gaachchanni isiꞌa hasisammake manjo kadeemmabaaxxa egeꞌneꞌeen. Iittate kaddoole, Yihowwaa jabaate ergatemaammaki mayeeteta? Isiꞌaa ergatemaammaki Yihowwaki gaachchanni hasisaake kadeexxa kokeessateete kaddebaangi, konnete hinabaake Yihowwake badhaadhaaꞌa saadino afeemmaxxa leellishateeten. (Eff. 3:7) Noꞌonna Phawuloosishshanni, gattowwaal Yihowwaxxa alfateete kaddebaangi, isiꞌa saadino anfennexxa leellishatee hinaaffeti ergatema ittin sufa hasissaan.

7. Wodotenaaꞌni taꞌanni laꞌo alfinannoki weli ori hoonte? (Roome 5:1; Yaꞌiqoobi 2:23)

⁷ Wodotenaaꞌni taꞌanni laꞌo alfinannoki weli ori, Yihowwanni welti ifixxe kaddeexxa jabaxxa firunte afaten.a Saxxemmaxxe qoꞌneꞌni baranteennashshanni, ilemmenne wodda Mageniki welti firunte anfeennabaan. Kaddomaleꞌe, wodotenaaꞌni kexxeexxa ‘Mageniki welti nageꞌa afanna’ isibaa shiqa dandeennannon.—Roome 5:1; Yaꞌiqoobi 2:23 yaansis.

8. Kadhatixxe mabiteꞌa Yihowwaa galateeffata hasisseeki mayeete?

⁸ Yihowwanni welti anfeennexxa firunte jabeessitaaxxe yaanuwwa geddiiꞌni mitte kadhatixxa mabite uundo. Yihowwa laqaꞌneexxi kadha ardi isiki mitteba bukki hiyyeeꞌnaa kadhantaaxxe kadha calla kaddeebaangi, noꞌo mitti mittingi qofitti kadhantannoxxa kadha laqaan. Kadha qalbe noꞌoxxi miirtaashshanna nageꞌa alfitaashsha assitaan. Kaddomaleꞌe, kadhatixxi laꞌo tenne callabaan, Yihowwanni welti anfeennexxi firuntenna jabaattaashsha assa dandeettaan. (Far. 65:2; Yaq. 4:8; 1 Yoh. 5:14) Yesuusi buttateꞌni hedhemma wodda, Yihowwa kadha isixxa laqaaxxanna kadha tinni kinni Anna isikenni afeexxa firunte duutaaxxa egeꞌneemmaxxeꞌe, duuchchinii wodda kadhataamman. (Luq. 5:16) Yesuusike tolchanaaꞌni kexxeexxa, Yihowwake jaaluwwa kaddanna isoo kadhati haasoossa dandeennennexxeꞌe galateeffata hasissaan!

EDIꞌAA LAꞌO ALFINANNOKI HITTATE?

9. Addatendeexxi Mageneeffatoole ediꞌaa wodotenaaꞌni laꞌo alfitaaki hittate?

⁹ Addatendeexxi Yihowwaxxi mageneeffatoole wodotenaaꞌni laꞌo alfitaaki hittate? Bari bariinxa hedho alfitaan. Heddo kuma wogguwwaa manji reyaaꞌni tureemmaxxeꞌe, heddo manjoꞌni tinni yaane kaddaachcho fakkaattabaan. Kaddomaleꞌe, keꞌitiinki Yihowwaki herregi manjiinki belti baro baro hedhaashshatemman. Addaami cubbo huja gopheele, duuchchiniingi manji baro baro hedha dandeꞌaamman. Tenne bari bariinxe hedhoki tasfi muuxemaaxxa addata haꞌurtaꞌneexxe fakkaattoolenna, Yihowwa hedho tennee higgeenni alfinannoshsha eeyyaꞌneeka Belto isika uwwati hira kaffaleen.—Rom. 8:32.

10. Hariiremeeki Kirsitaaninna weli gedhebi ediꞌaa halchati heqqedhaꞌneexxi yaane maachcho?

¹⁰ Bari bariinxi hedho ediꞌaa alfinaannexxe yaane kaddoolenna, Yihowwa taꞌanni isee halchati heqeꞌnonnaa hasaꞌneen. Hariremeeki Kirsitaani iimateꞌni hedhe Kirsitoosinni welti butta galchinaaxxa yanna halchati heqqedhaan. (Lel. 20:6) Weli gedhebi kinni, abarakenaaꞌninna yaaddotenaaꞌni fuleꞌe gennete kaddaaxxe buttaꞌni hedhaaxxa yanna addeti heqqedhaꞌneen. (Lel. 21:3, 4) Ati buttateꞌni muuxama affebaaxxe hedhoka tasfa afeeke weli gedhebi giddiiꞌnite? Kunni tasfi iimatike tasfanaaꞌni jala hedheekebaan. Buutotinna Yihowwa manjiinka belto dadeemmaki buttateꞌni gammadaꞌni baro baro hedhaashshatemman.

11-12. Gennete kaddaaxxe buttaꞌni alfatee halchat heqqeꞌnaanneki mitti mitti badhaadhuwwi hoonte? (Fakke uudi.)

¹¹ Gennete kaddaaxxe buttaꞌni hitta hexxeexxa hedho hexxattoxxa hedi. Elagophunnuu yookiin reyunnuu hite yaaddabexxon. (Isa. 25:8; 33:24) Yihowwa seeriinxe kaddeexxa henee yaanenna atiꞌaa wonshaan. Haarooxxe buttaꞌni baratatee hassaattexxi yaane maachcho? Fizikisetee? Kemistiretee? Muuzuqakee? Artetee? Okkone wodda miniinxa diizayine fulchatixxi, ijaarsiinxinna fichchiinxi huje hasissaaxxi mama affeexxebaan. Okkone wodda gargaarsiinxinna karkarsatixxi hujuwwa, tinninna sagale qophpheessatixxi, mitte miya giissatixxinna butta dancheessatixxi huje hexxaaxxi egeꞌnendeexxen. (Isa. 35:1; 65:21) Baro baro hexxaattaxxeꞌe hassaattexxa yaane duuchcha baratanna huja dandeettaton.

¹² Reyeeki manji keꞌeeꞌnaa adhdhinanno wodda hittatta hexxeexxi gammashsho hexxa! (Huj. 24:15) Laakkonne birrabaaxxa Yihowwaxxa huje qoꞌnissaꞌni Yihowwaaꞌa irran caala egendaꞌni metatto wodda, hittee qico gammaddattoxxa hedi. (Far. 104:24; Isa. 11:9) Duuchchiinxi iimi darre Yihowwaa fayyake wodaninni mageneeffata hittatta gammachchiissaaxxe yaane! Konnee badhaadha “cubboti afendaaxxe yannatixxe gammashshoꞌa” hite waaldatto? (Ibr. 11:25) Waawwoti! Ediꞌa alfinannoke badhaadha hineꞌe heene yaanenna taꞌa tolcha assinonnole unsha hinabeꞌnon. Gennetetiki tasfi duuchchinii wodda heqqeꞌnaꞌni calla heꞌnaanneke kadebaaxxa qalliyye. Buutotinna hose galoolenna muuxema isixxi gattabaan. Yihowwa Belto isika uwwat iitta hexxeexxa jaalala leellisha gopheele, iitta hexxeexxa hedho alfinannabaan!

YIHOWWAXXE JAALALAA SAADINO ANFEENNEXXA LEELLISHATEE ASSINANNOXXA YAANE

13. Yihowwaxxe jaalalaa saadino anfeennexxa leellishatee maa assa dandeennanno? (2Qorontoosi 6:1)

¹³ Yihowwa wodo noꞌaa qophpheesseexxee saadino anfeennexxa leellishatee maa assa dandeennanno? Hedho noꞌoxxeꞌni huje isixxee lumoxxa bakka uwwa dandeennannon. (Mat. 6:33) Yesuusi reyeeki “hedhoti hedheeki manji, konneechchinni udumiꞌa ifiꞌa hedhati irra, insaꞌnaa reyeekenna keꞌeekee [hedhaashshaten].” (2Qo. 5:15) Noꞌaa hasisaan hinaabeꞌnoka Yihowwake badhaadhika yaada deennonnaa hansaabeꞌnon.—2 Qorontoosi 6:1 yaansis.

14. Yihowwaxxe akeetteꞌni adde anfeennexxa leellisha dandeennannoki hittate?

¹⁴ Yihowwaxxe akkeetteꞌa hirematinna jaalala isixxee saadino anfeennexxa leellishsha dandeennannon. Hitta? Buttatixxa barachcho hittee qico barata hasissaaxxa yookiin hitta hexxeexxa huje huja hasissaaxxa murteesseꞌnanno wodda, Yihowwa hasaꞌneexxi yaane maachcho kaddeexxa heda hasissaan. (1Qo. 10:31; 2Qo. 5:7) Adde anfeennexxa hujeti leellinshanno wodda isoꞌni anfeennexxi addenna isinni anfeennexxi firunte edi irraan caala jabattaꞌni metaan. Tasfakeꞌni anfeennexxi addenna jabaattan.—Rom. 5:3-5; Yaq. 2:21, 22.

15. Qalliitike Ayyaanixxa yanna Yihowwaxxe jaalalaa saadino anfeennexxa leellisha dandeennannoki hittate?

¹⁵ Yihowwaxxe jaalalaa saadino anfeennexxa leellisha dandeennannoki weli ori taꞌanna hedheen. Kunninna; Qalliitike Ayyaanixxa yanna wodotee Yihowwa hittee qico galateeffantaannexxa leellinshaanneke oran. Qalliitike Ayyaaniꞌaa qophpheeffantaꞌninni welinna Ayyaana konneꞌni afemaashsha yeꞌ a dandeennannon. (1Xi. 2:4) Yexxaatteke manjoꞌni, Qalliitiki Ayyaani hitta ulfeessemaꞌneexxa kuli. Jw.org teꞌni Yesuusi Reyeeki Mayeete? ittan Yesuusixxe Reyooxxa Qallii hitaꞌneexxa viidiyo leellisha dandeettatton. Geedhe qiiddeexxa dayyuwwa yexxeexxa koka hasissaan. Mitti mitti baꞌeeki Yihowwaki gedhebi, isike gedhebi giddiꞌaa higaa wodda iimateꞌninna buttateꞌni kaddaaxxa gammashsho hedi! (Luq. 15:4-7) Qalliitike Ayyaani wodda, weliꞌaan weli calla kaddebaangi, giddiiꞌninni dage egꞌnebaaka manjo yookiin qeerraaxxe yanna uduma dageeka manjo nageꞌa aadhatee dandeennennexxa duuchcha assino. Bashshi hineꞌe waalleeenneshsha insaꞌneꞌni laqendoꞌa hansabenon!—Rom. 12:13.

16. Qalliitike Ayyaanixxa yanna ergatensha noꞌoxxa baꞌlisatee heda hasisseeki mayeete?

¹⁶ Qalliitike Ayyaanixxa yanna ergatensha atixxa baꞌlisa dandeettato? Kunni Mageninna Kirsitoosi noꞌaa assineexxe yaane duuchchiꞌaa, saadino anfeennexxa leellinshannoke eloke oran. Yihowwaxxi huje birra saxxeexxe qixxeꞌni gargaarsa isika irraan caala uundannon. Tinni kinni adde noꞌoxxi jabaattaꞌni metaashsha assitaan. (1Qo. 3:9) Ittan Barratixxe Xiqseꞌni nna torbatixxe oddooxxe bukkiitixxe Borreesileꞌni Qalliitike Ayyaanixxa torba Maxaafa Qullichcha yaansinsaaka prograama hordofi. Tenne Maxaafi Qullichchiinxa Xiqsuwwa Qoꞌnetixxe projekiteꞌa laꞌoonfata dandeettaton.

17. Yihowwaa gammachchiissaaxxi yaane maachcho? (“Yihowwaxxe jaalalaa saadino anfeennexxa leellinshannoka oruwwa” hitaꞌneexxa kollo uudi.)

¹⁷ Dhugaaten, hexxetteki jeeji tenne qoꞌneꞌni kulendeexxa yaane duuchcha hujeteꞌni hosissattoshsha uwwedhaake kada gopha dandeꞌaan. Yihowwa ati uutaattexxi yaane hetteexxe kaddeexxa weli uwweexxinni hokkokkisiise uuddabaaxxa; tenne irra qalbe atixxi giddo hexxeexxa yaane uudaaxxa qalli hiyyi. Isi fiixa kaddeexxa wodotixxa uwwa isixxa qalbe giddixxenni saaddaattexxa uudaa wodda gammadaan.—1Sa. 16:7; Mar. 12:41-44.

18. Mageno Yihowwaanna Yesuusi Kirsitoosii galateeffantaanneki mayeete?

¹⁸ Cubbo noꞌoxxi gattowwaal hiyyendanneeki, Yihowwanni welti jaalooma dandeennennekinna bari bariinxe hedhoka tasfa alfineenneki wodotenaaꞌni kexxeexxinniten. Iitta hexxeexxa eebba alfinannoshsha assiteexxe Yihowwaxxe jaalalaa saadino anfeennexxa duuchchinii wodda leellinsho. (1Yo. 4:19) Noꞌoo yoꞌoshsha eeyyeexxi hedho isixxa uwweeke Yesuusiꞌaanna saadino anfeennexxa leellinsho!—Yoh. 15:13.