Hedho Noꞌoxxike Baro Duuchchaꞌni Noꞌoke Lumoke Barsiisanjonaaꞌni Barantennexxa Yaane

HADO ANKIKA FAKKEENNA

Hadi anki 1950 woggake muuxamibaa, Xaaliyaaniiꞌni Kanaada Sasikachuwaan hiyyendaaxxe galcha giddo afendaaxxe Kindersiliini hiyyendaaxxe bakkabaa meꞌeemman. Insaꞌne dhugaa baranteexxe shiixxooxxe yanna uduma, dhugaaꞌa hedho noꞌoxxeꞌni lumoxxa bakka uunaannexxe yaane kaddeen. Oosumma hedhenna wodda ergatenshateꞌni hadi ankinni qeerraxxa yanna saꞌissinaannaxxa qalli hiyyaannen, tenneꞌaa mitte mitte yanna saddeeta woggaꞌninni Ani “kiphallo qajeellisanjo” kadeenne manjon hiyyaꞌni roorraannan!

Hadi anki hiyyessake kaddoolenna Yihowwaa hiyye heene yaanenna tolcha assati eloke fakkeenna kedeen. Fakkeennakeꞌe, 1963 woggaꞌni Ameerika, Kaliforniya, Pasediina hiyyendaaxxe bakkaꞌni gosoole duuchchixxa bukkii marateꞌe hasisaaka maallaqa alfateꞌe anfeexxa heddo yaane gurguurreemman. Xaaliyaanuffa haasoꞌaaka manna gargaarateꞌe 1972 woggaꞌni, heꞌnennabaaꞌni 1000 kiilomeetirebaa bayyattaaxxe Kanaada, Birtiishi Kolombiyiinxe galchaꞌni giddo Tiraal hiyyendaaxxe bakkabaaꞌa menennen. Anni anki mitte lumoxxa shaqaxiinxa magaazino caꞌa assatixxanna qammachchatixxa huje hujaamman. Isinna Yihowwaa ergatematee hiyye heddo maallaqa alfa dandeꞌammaxxa futtii waaleen.

Hadi anki aniꞌaanna sase dayyuwwa anxee eloke fakkeenna kadeexxeꞌe yoꞌoshsha galateeffataannen. Kunni fakkeenni anxe tiꞌokiraasetixxe leenjoꞌaa jabaxxe hundaayye kadeen. Ittan duuchchiniixxee edise Mageniinxa Mootumma halsaannole, Yihowwa anee karkarsaaxxa hubatannoshshanna gargaareen.—Mat. 6:33.

WOꞌMA YANNAXXA ERGATENSHA SAFENNE QICO

Mitte danchanna woꞌma yannaxxe ergatenshaka herrega affeexxa Deebi hiyyendaaxxa dayyo 1980 waggaꞌni aadhennen. Woꞌma yannaxxa ergatensha safetee hansaannaxxeꞌe, Deebi buliiteꞌni sase agenjo turrennechchi uduma qajeellisanjo kaddeen. Buliiteꞌni eꞌyinennexxe mitte wogga uduma, gargaarsi hasisaaxxe mitte shiixxooxxe gubaꞌebaa meꞌinennen, okkoꞌo aninna qajeellisanjo kadeꞌe isenni welti ergatema safennen.

Heenooxxe yanna uduma adde wonxennexxi okkooꞌni meꞌatee murteesseꞌnennen. Edisennexxi rogiinke iimike toꞌatalloꞌni kullennen. Isinna jaalalati ittan toggichcha kadeeke orinni: “Yaane haꞌnooꞌni haꞌurtaashsha assitinaꞌneeki ifiꞌaanden. Hexxineeka jeeja uuddaaxxa miꞌlachcho assitinaꞌneeki qajeellitte yaaneꞌnitebaan. Tenneꞌaa irra, qajeelto kaddeexxa yaane heddinaꞌnoole, eloxxa hasinaꞌneexxa yaane alfitinaan” hiyyeen. Kunni noꞌaa hasisaammake gorsan. (Far. 141:5) Isi hiyyeeshshanni heddo gammachchiissaaxxi eloxxi yaanuwwa hexxeexxa hubantennen. Gubaꞌe giddo hexxeexxi heddo dargaggeeyyenna addataꞌnebaaka miniinka annuwwa affeexxi dayyuwwa Yihowwaa caaldeexxa yaane assatee hansaamman. Tinni noꞌaa laꞌo affeexxe barachchomman. Eloxxa yaane halsanna noꞌoꞌni haꞌurtaaxxe fakkaattaaxxa yaane Yihowwa toggi assaa qicoꞌni isoo heqqedha hasissaaxxa baranteennen. (Mik. 7:7) Noꞌonna gammashsho higgeen alfinennen, jeeji noꞌokinna jijiiremeen.

Qajeellisanotike barachchoti mineꞌni noꞌoo barsiisseeki barachchiisanjuwwi gadhike bogaꞌni ergatemeeken. Insaꞌnenna fotuwwa leellinshaꞌni, okkoꞌo insaꞌneꞌni gelteexxa haꞌurtaaxxa yaanenna alfineexxa eebba haasoonnaꞌni, miisoonoota kade ergatematixxi halcha noꞌo giddonna hexxaashsha assineen. Tenneꞌaa noꞌonna tenne ergatenshaꞌni geyatika herrega fulchedhatee murteesseꞌnennen.

Konne herregaꞌni geyateꞌe Biriitishi Kolombiyiiꞌni 4000 kiilomeetire bayyaattaaxxe Ferensaꞌuffa haasoonnaaxxe bakkabaa Kiwubeekiꞌa menennen. Ettene bakkaꞌni haarooxxa aadanna haarooka laagada barata hasissaamman. Wele noꞌoꞌni haꞌurteexxe yaane giddiiꞌni mitte maallaqiinxe heenoꞌman. Mitte yanna fichchi giddo manji bukki assedheeꞌnaa gatammaka dinnichcha qoceꞌneenna woddi hedhemman. Deebi dinnichcha konnee gargariti hedheeke orinni xeꞌmishshe hujjeen! Rakko hexxoolenna gammashshoti jabaate ossateꞌni miꞌlachcho assinaannan. Duuchchiinxi iimi darre Yihowwa noꞌoo karkarsaaxxa addantaannan.—Far. 64:10.

Mitte barra keekkantebeꞌnongi bilbili bilbilemeen. Bilbli kunni Kanaadixxe Beeteleꞌni ergatemmannoshsha yeꞌatee bilbilemeemmaken. Edinsennexxi Giliyaadike Barachchoti Mineꞌni baratatee forme wonshineennaxxeꞌe, Beetele yeꞌemmennexxe gammandonnolenna mitte darrenaaꞌni kinni yaandeennan. Kaddoolenna Beeteleꞌaa meꞌatee murteesseꞌnennen. Okko marrennexxi Dame Beeroxxe Komitexxe una kadeeka Keneezi Liitili hiyyemaaka dayyo “Giliyaade barantonnaa yeꞌemonnole maa kandannota?” hinennexxi qorrennen. Isinna “Gennebeꞌnoki riqichcha foonfabeꞌnon, yaane kaddaa wodda haasoonnannon” hiyyeen.

Mitte torba uduma Deebinna Ani Giliyaade barantannoshsha yeꞌemmeennen. Tenneꞌaa murte murteessedha hasissaamman. Dayyi Liitili: “Soodo gaabbitinabaaxxa, haꞌnoo hassinaꞌneexxa yaane fiꞌle. Mitte ora calla hordofa eloxxebaan, Yihowwa wele orinninna eebbisa dandeꞌaan” hiyyeen. Noꞌonna Giliyaadiꞌaa meꞌatee murteesseꞌnennen, Dayyi Liitiliki gorsi dhugaatike kadeexxa heddo woggaa hedho noꞌoxxeꞌni uundeennen. Yihowwaxxa huje hujatee murteessedhaꞌneeka manjo jajjabeessateꞌe noꞌonna isi haasoꞌeeka yaada heddole laꞌoonfateennen.

HEDHO MIISOONUMMATIXXA

Giliyaade 83 soxxe kutaꞌni barattaashsha yeꞌendeexxe 24 barattoole giddo noꞌonna heꞌnennaxxeꞌe yoꞌoshsha gammandeennan. Tinni yannanna Barachchotiki mini Brukiliin, Niwu Yorke hedhemmaxxe 1987 woggaꞌniten. Dayyi Yulsiis Glaasikinna Jaaki Redfordiki illitte barsiisano noꞌoxxemman. Ondi agenji anfebaꞌnongi mudeen, ittan Birraꞌa 6, 1987 waggaꞌni eebbisemmennen. Heyiti hiyyendaaxxe bakkaꞌni Jooninninna Meeri Gudixxen dhaabemmennen.

Konne boganaaꞌni miisoonoota 1962 woggaꞌni shorrineechchi uduma okkoꞌaa miisoonooti ergeme egeꞌnebaan. Eebbisemmennexxe sase torba uduma Heyitii koobuwwatixxe oddoꞌni hexxeexxe 35 baꞌlisanoole hexxeexxe gubaꞌe giddo ergatema sanfennen. Noꞌonna dargaggeeyyetenna hedhotixxa baranno anfeennarabaan, noꞌo lami heꞌnaannaki miisoonootiinke mineꞌniten. Loolakeꞌni hedhemmaki manni yoꞌoshsha hiyyeessakemman, ittan heddi manni borro yaansisa egeꞌneemmabaan. Taakkaxxe miisoonummatixxe yannaꞌni weliꞌaan welika bagedo, mootumma finqilchatee hassaꞌneexxa gamo, lolemaꞌneeki manni qachcha gunbaaꞌnaanna hobonbalte kexxeeꞌnaa uundeennen.

Heyitike bogaꞌni jabeennikinna gammashshoti hexxaꞌneexxe dayyuwwanaaꞌni heddo yaane baranteennen. Heddo dayyuwwa haꞌuraa jeeji giddo hexxoolenna, Yihowwaanna ergatenshateꞌe qalbe giddixxa jaalala anfeemman. Mitte cindeexxi boro yaansisa egendebaaxxi dayyo hexxemman, isenna 150 geltaaxxa xiqse sammoteꞌni abiddeemman. Barra barrandeꞌni uundaannexxi yaane manjiinxa rakko duuchcha tikkaaxxi Mageniinxe Mootuma kaddeexxa lassatee anfeennexxa shenunte jabeessiteen. Edo Maxaafa Qullichcha barsiinseennaki manni, duuchchi woddixxe qajeelisano, gargariti hexxeexxe qajeelisanonna gubaꞌetixxe geedhe kaddaaꞌnaa uundanno wodda yoꞌoshsha gammandaanneen.

Heyiti heꞌnenna wodda, Mormonxe addeke miisoonichcho kadeeke Tiriveeri hiyyemmaꞌneeke mitte dargaggeessinni heenoxxe yannaa Maxaafa Qullichcha mariꞌantaannan. Kunni dargaggeessi heenoxxe wogga uduma kekkatebeꞌnoxxa daddaabbe aniꞌaa ergeen. Isinna: “Daggaꞌneexxe lumoxxe bukkiiꞌni cuuphemaannen! Mormonxe addake miisoonichcho kadeꞌe hedhennaxxe bakkabaa Heyitiꞌaani higgennexxi gargariti hedheeke qajeellisanjo kadeꞌe ergatemonnaa hasaannen” hiyye borreessen. Isinna hiyyeeshshanni, miniinxe ama isixxinni heddo woggaaꞌa gargarit hedheeke qajeellisanjo kade ergatemeen.

AWUROPPIINBAA—OKKOꞌNI AFIRIKIINBAA

Awuroppi giddo uurriiteemmaxxi Mageniinxe Mootummaxxi huje reefi saffeemmaxxeꞌe noꞌonna okkoꞌo dhaabemmennen. Noꞌonna 1992 woggaꞌni hadi anki Xaaliyaaniꞌa meꞌebaa edi darre nophpheexxe bakka bira hedheeke Isiloveeniyiinke lumoke qachchibaa Lubiꞌaanaa menennen. Edo Yugozilaviya heyyendaaxxe bakkaꞌni bagedi yoꞌoshsha eebbeemman. Viꞌaananna Awustiraaliya hexxeexxi dame beero, ittan Zagraabi, Kiroshiya, Belgradinna Serbiya hexxeexxi beeruwwa konne bogaꞌni hexxeexxa lassatixxa huje toꞌattaamman. Taꞌa kunni bogi ifi dandeetteexxe mootumma kademmaxxeꞌe, duuchchiinxe bakkaꞌni Yihowwaxxe Naqaashexxi dame beero hexxeen.

Noꞌonna wele laagadanna aada barata hasissaamman. Loolakeꞌni hedheeki manni “Laagadi haꞌuraꞌneeken” hiyyaꞌnemman. Dhugaanden haꞌuraammangemman! Orga assitaꞌneexxa jijjiirra adhdhateꞌe ifi qophpheessiteexxa addatendeexxa dayyuwwa Yihowwa hitte qico eebbisaꞌneexxa uundanno wodda manbeꞌa hinennen. Yihowwa taꞌanna kaddoole toggiyya hasissaaxxa yaane hasissaaxxe yannaꞌni jaalalati toggi assaaꞌnaa uundeennen. Isiloviinya heꞌnennaxxa yanna edi wodda baranteennaxxi heddo barachcho noꞌoo yoꞌoshsha jabeessiteen, wele haarooxxa yaanenna baranteennen

Kaddomaleꞌe, jijjiirra ittin ediꞌa suffeen. Dhidhimike Afirkaꞌni 2000 woggaꞌni Koti Divori giddo ergatemmannoshsha dhaabemmennen. Okkooꞌni Sadaassa 2002 woggaꞌni weliꞌaan weliki bagedi boga okkoneꞌni keꞌemmaxxee waale Seeraaliyoniꞌaa baqantennen. Kunni 11 woggabaa tureeki weliꞌaan weliki bagedi uurreeki taꞌa shiqonden. Koti Divoriiꞌni dedhangeꞌni waale fulla shollaxxemmabaan. Kaddoolenna, edi wodda baranteennaxxi barachcho gammashsho noꞌonaaꞌni baxxebaangi heꞌnannoshsha gargaarteen.

Noꞌonna miꞌlachcho assineennaki loola okkoneꞌni hedhemmake dhugaa barata hasaammake mannaꞌninna bagediinxa yanna jabaatte ossiteexxe dayyuwwaꞌnitemman. Insaꞌne anfeexxi yaane heenoxxe kaddoolenna weliꞌaan weli gargaarraamman. Mitte dayyo Deebiꞌa seemma uuteen. Deebi seemma tennee adhdhatee hoodda woddi dayyo tinni: “Bagedi wodda wele bogaꞌni hexxeexxi dayyuwwa noꞌoo gargaartaamman. Noꞌonna insaꞌneeka fakkeenna hordofa hansaannen” hiteen.

Yannati uduma, Koti Divoriꞌaa hingennen, kaddomaleꞌe bagedi haarooba keꞌeen. Tenneꞌaa 2004 woggaꞌni rophphiyyiki 10 kilo calla kadaaka imaana mitte borsaꞌni adhdhine baqantennen. Mitte Ferensayitike bagediinke loolaꞌni hashsha okko galle, langa baro bariisa Siwzerlaandeꞌaa menennen. Hashsha Siwzerlaande hexxeexxa dame beero marre gennennen, Dame Beeroxxi Komitenna Ergantajuwiinke Leenjotike Barachchotike Minixxi barsiisannoole, miniinxe amuwwa insaꞌneexxinni mitteba eebbaxxanna xeꞌmitannexxa sagale, ittan Siwzerilaandexxa chokkoleete qophpheessinee noꞌoo qopheꞌneen. Assineexxi yannenna noꞌoo yoꞌoshsha gammachchiisseen.

Yannatee Gaana dhaabemmennen, okkooꞌni loli qiideechchi uduma Koti Divoriꞌaanni hingennen. Dayyuwwummatiki maabari noꞌaa leellisheexxi baꞌlunte, tennee nageellitte bakka waalle mennannoshshanna haarooxxa uwwendeexxa huje huja dandeennannoshsha noꞌoo gargaarteen. Aninna Deebi, dayyuwwa leellishsheexxi elle, Yihowwaxxe Orga giddo egeꞌnendeexxenna kaddoolenna, lumminseꞌe uuda hasissaaxxa haasoonnennen. Tinni haꞌurtitte yanna, leenjo eloxxa alfinnannoshsha assiteen.

BOROTIKE ODDICHCHI BOGIBAA

Illitte beeronaaꞌni 2006 woggaꞌni Borotike Oddichcha Bogaꞌni dhaabemmeennexxa kuldaaxxi daddaabbe ergendeen. Tinni kinni haarooka maruwwa, haꞌurtaaxxa yaanuwwa, Laagadanna aada barata laqqaaxxe yaanen. Tenne bakkaꞌn polotikiinxenna addetixxe buutonaaꞌn kexxeexxa yoꞌoxxi rakko hexxemman. Gubaꞌe giddo hedheeka heddo lagaadanna Yihowwaxxe organaaꞌn uwwendaꞌneexxa akeette hordofa idaageexxa mittunte uuda gammachchissaamman. Heddo dayyuwwa, mini hadonaaꞌni, welti barattaꞌneexxe oosenaaꞌni, ittan welti hujaꞌneeke manninaaꞌninna ollaꞌa insaꞌnekenaaꞌni geltaꞌneexxa hega uushsho worbunteti faachcheefantaaꞌnaa uuda insaꞌne saandannoshsha assiteen.

Isiraꞌeeli giddo Tel Aviv hiyyemaake qachchaꞌni 2012 woggaꞌni assendeexxe gargariti hexxeexxa awuraanjiinxe bukkiꞌn afemmeennan. Tinni awuraajiinxi bukkii bakka eettenneꞌni hedhemmake Yihowwake ardiꞌa, 33 G.W. Pheenxe qosixexxe barraꞌn lumoki manni afemeemmaxxe bukkii udumaꞌa, heddi manni bukki hiyya taakkaxxen. Tinni ijjenda dedha hasissaaxxe yannabaan!

Tenne woggaꞌni huje noꞌoxxa kunteeka boga dooyyinonnaa ergemmeennan. Okkoꞌaa heenooxxa borreessile iyyine meneennan, ergatensha fullaannan ittan heenooke manjinni bukki hinaannan. Lolii imaana kaꞌleeki sannachchi, fedenshatiki xaabuwwi duuchchiinxe bakkaꞌni hedhemman. Kaddomaleꞌe, heenoxxe baꞌlisanoolenni xexxeꞌachchoti mammaremmaannaxxee sodantebeꞌnongi ergatemmaannan.

AFIRIKIꞌAA HIGA

Kongo Kinshaasa ergatemmonnaa 2013 woggaꞌni dhaabemmennen, kunni bogi dadumiinke haanjinninni egeꞌnemeeke kaddoolenna hiyyummatinna bagediki miidhemeken. Taakkaa “edo Afirika heꞌnennaxxee, Afirika egennennen” hine hendeennan. Kaddomaleꞌe, heddo barantannoxxi yaanuwwa hexxemman, giddiiꞌninni mitte bakkanaaꞌni welebaa meꞌatee orinxinna riqichchiinxi rakko hexxemman. Miꞌlachcho assinannoxxi heddo yaane hexxemman, fakkeennakeꞌe dayyuwwa hexxaammaxxi jiro haꞌurtitte kaddoolenna anfeeki jaabenninna gammashsho, ergatenshatee anfeexxi hinaaffe, gubaꞌenna lumollamma bukkii maratee assinaꞌnexxi woꞌlaancho gammachchiissaaxxemman. Yihowwake gargaarsinninna eebba isixxinni Mootummatixxi huje baꞌlattaꞌni metaaꞌnaa uundeennen. Kongo saꞌissinnennexxe woꞌma yannaxxa ergatenshanaaꞌn lumoxxa laꞌo affeexxa barachchonna mini hadishsha eeyyaaka jaaluwwa alfineennen.

Harooxxi dhaaba 2017 woggake muuxamibaa gelteeꞌnaa bitaꞌike Afirikibaa meꞌinennen. Tinni dame beero edo ergatemmeennexxe duuchchinaaꞌni lumoxxemman, okko hunjonnaa dhaabemmeennaxxi hujenna noꞌaa haarooxxemman. Edo baranteennaxxi yaane noꞌoo gargarteꞌeen, taꞌanna barantannoxxi heddo yaane hexxeen. Heddo tomme wogguwwaꞌa addatendeꞌe jabeenniki uurriteexxa dayyuwwa noꞌoxxa yoꞌoshsha eenannen. Beetele hedhaꞌneeki manni gargari hexxeexxa gosanna aada afeeke kadoolenna huje mittunteti hunjaammaki gari manbeꞌa assammaken. Tinni, Yihowwa ardi isiki haarooxxa ayyunte oddoꞌwoolenna Maxaafi Qullichchiinke hundaayyetika seerisha hedhoole nageꞌa uwwati eebbiseexxa leellishshaaxxen.

Deebinna ani saxxemmaxxe heddo wogguwwaꞌa gammachchiissaaxxa mabituwwa alfineennen, ittan gargari hexxeexxa aadanna haarooka lagaaduwwa baranteennen. Tinni duchchi wodda shollaxxebaan, kaddomaleꞌe Yihowwa orgati darrenaꞌninna dayyuwwati gamiiꞌni addatendeexxa jaalala noꞌaa leellisheexxa hubanteennen. (Far. 144:2) Tinni woꞌma yannaxxi ergatensha eloxxe Yihowwaxxe ergantooleeyye kandannoshsha assiteexxa addantaannen.

Hadi anee nossee gari, eeyyaannexxi miniinxi ama Deebi anee gargaarte qicinna butta duuchchixxe manfasiinxe maateki fakkeenni anee badhaaseen. Ediꞌaanna noꞌoke Lumoke Barsiisanjonaaꞌni barata ittin sufateꞌe mudhdhineennen.