Mageni Ayyete?

Manji buttateꞌn dademeexxe yannanaaꞌn safeꞌe, gargariti hedheeka meyyakanna labbaka magenuwwa mageneeffataꞌn tureen. Kaddoolenna, Maxaafi Qullichchi ‘duuchchiinge magenonaaꞌn saꞌaaki mitti Mageni’ hedheexxa haasoꞌaan. (2 Zeena 2:5) Kunni Mageni ayyete? Kunni Mageni weli manni mageneeffataꞌneeke magenonaaꞌn caaleeki hittate? Konne hafuura adhdhaꞌni, kunni Mageni noꞌaa ifi egeꞌnishee qico uundannon.

1. Mageniinki summi ayyete? Summa isika egennonnaa hasaꞌneexxa hitta egeꞌna dandeennanno?

Maxaafa Qullichchakeꞌn Mageni: “Ani Yihowwaten. Summi ankinna konneten” hiyyee ifi egeꞌnisheen. (Isayaasi 42:5, 8 yaansis.) “Yihowwa” hiyyaꞌneeki summi Ibrayisxetike laagada kada wodda, “Kaddaashsha Assaan” hitaaxxa tika afeen. Yihowwa summa isika egennonnaa hasaꞌneen. (Zetsiꞌaate 3:15) Tennee hitta egeꞌna dandeennanno? Maxaafa Qullichchakeꞌn summi isiki 7,000 iimi darre borreessemaashsha asseen!a Yihowwa, hiyyaꞌneeki summi “iimateꞌninna buttateꞌn dhugaatike Mageno kadeeki” isi calli yeꞌemaake summan.—Zedaagimi 4:39.

2. Yihowwa uuddaaxxa Maxaafi Qullichchi maa hiyya?

Maxaafi Qullichchi, Yihowwa manji mageneeffataꞌneeke hoone magenonaaꞌn, isin calli dhugaatike kadeexxa haasoꞌaan. Mayee? Heddo buutuwwa hexxeen. Yihowwa baalle duuchchinaaꞌn caaldeexxa baalle afeekenna ‘isin calli butta duuchchaꞌni haranga lumoken.’ (Faaro 83:18 yaansis.) Isi “Duuchchiinxa dandeꞌaake” Mageno kadeemmaxxeeꞌe haseexxa yaane assatixxa hunna afeen. Iimateꞌninna buttateꞌn hexxeexxa hedho affeexxa ‘duuchchiinxa yaanuwwa dadeeki’ isoten. (Leellisha Yohaannisixxa 4:8, 11) Welekenaaꞌn gargariti hedheeke orinni, Yihowwa hedhemmabaaxxi yanna hexxebaan, ittan ediꞌaanna baro barokee hedhaan.—Faaro 90:2.

3. Mageni heddo ulfinniinka summa afeen, deettichchi summi kinni mitteken

Ulfinniinke summixxe oddoꞌninna deettichchi summixxe oddoꞌn hexxeexxa gargarunte egeꞌnatee, VIIDIYO uudde, ittan buttiiꞌn hedheeke qortumaꞌn mariꞌatte.

VIIDIYO: Heddo Ulfinniinka Summa Afoolenna Summi Isiki Mitteken (0:41)

• “Gootta,” hiyyaake ulfinniinke summixxenna deettichchi summixxe oddoꞌni hexxeexxi gargarunte maachcho?

Maxaafi Qullichchi manni heddo magenuwwanna goottuwwa mageneeffataammaxxa haasoꞌaan. Faaro 136:1-3 yaansisse, ittan qortumakeꞌn mariꞌatte:

• “Magenuwwi duuchchike Mageno” nna “goottoole duuchchike Gootta” hiyyemeeki ayyete?

4. Yihowwa summa isika egennonnaanna laꞌoonfantonnaa hasaꞌneen

VIIDIYO: Mageni Summa Afee?—Kutende Adhdhendeexxa (3:11)

• Yihowwa summa isika egennonnaa hasaꞌneechcho fakkaattaꞌne? Mayee?

Yihowwa summa isika laꞌoonfantonnaꞌaa hasaꞌneen. Roome 10:13 yaansisse, ittan buttiiꞌn hedheeke qortumuwwaꞌn mariꞌatte:

• Yihowwa, hiyyaꞌneeka Mageniinka summa laꞌoonfata hasisseeki mayeete?

• Mitti manji summa atika qalli hiyye yeꞌaa wodda ateꞌni maachchi laqema?

• Summa isika laꞌoonfantanno wodda Yihowwaꞌni maachchi laqemaachcho fakkaattaꞌne?

5. Yihowwa isibaa shiqqottaa hasaꞌneen

VIIDIYO: Dhugaatika Mageno Alfatee Assennexxa Woꞌlaancho (8:18)

• Viidiyoteꞌn uuddetteshshanni, Mageniinka summa egeꞌna Sootenixxa hedho jijjiirteeki hittate?

Mitte manjike jaalo kadatee edinsennexxi summa egeꞌna hasissaan. Yaꞌiqoobi 4:8a yaansisse, ittan buttiiꞌn hedheeke qortumuwwaꞌn mariꞌatte:

• Yihowwa maa assitattoshsha hasaꞌne?

• Mageniinka summa egeꞌnanna laꞌoonfata isibaa shiqqattoshsha gargartaaki hittate?

BUKKASSA

Dhugaatike Mageniki summi Yihowwaten. Yihowwa isibaaꞌa shiqatee, summa isika egennonnaanna laꞌoonfantonnaa hasaꞌneen.

Hige Qalliyya

• Yihowwa manni mageneefataꞌneeke magenuwwanaaꞌn gargariti higeeki hittate?

• Mageniinka summa laꞌoonfata hasisseeki mayeete?

• Yihowwa isibaa shiqqottaa hasaꞌneexxa hitta egeꞌna dandeettatto?

FIRFIRSI

Mageni hedheexxa kokeessitaaxxa onde bedduwwa yaansis.

“Mageni Hedhe?” (Websayitetꞌni fuleeka yaada)

Mageni hedheen hineꞌe addantannoshsha assitaaxxa yaanuwwa hubat.

“Mageno Dadeeki Ayyete?” (Heqqecatixxa Xellepho, Oriito 1, 2014)

Qarixxe yannaꞌn Mageniinka summa yeꞌnaꞌnee qico egeꞌnanna gonphonnolenna, taꞌixxe yannaꞌn Mageniinka summa yeꞌa hasisseeki mayeete kaddeexxa barat.

“Yihowwa Ayyete?” (Websayiteteꞌni fuleeka yaada)

Mageno hansenneke summinni yeꞌnonnole rakko hexxee? Mageni deettichcha kadeeka ifika mitte summa afeen hinaanneki mayeete kaddeexxa uudi.

“Mageni Meꞌe Summa Afee?” (Websayiteteꞌni fuleeka yaada)