HAFUURA ADHDHA 05
Maxaafi Qullichchi Mageniinxe Qaalen
Yihowwa Maxaafa Qullichcha noꞌaa uwween, kunni maxaafinna gargariti hedheeka 66—maxaafuwwa abideeken. Dedha ‘Maxaafi Qullichchi habaaꞌn dage? Maxaafi Qullichchiinki annichchi ayyete?’ hite qortattoxxinna hexxaan. Konne qortumiꞌa hiissichcho alfatee Mageniinxe erga kadeeki, Maxaafi Qullichchi noꞌobaa dagee qico uundo.
1. Maxaafa Qullichcha borreesseeki manjoke kadoole, Mageniinxe Qaalen hinaanneki mayeete?
Maxaafa Qullichcha gargariti hedheeki 40 manni, 1,600 wogga giddo borreesse bireen. Tinni yannanna 1513 K.I.E.D. naaꞌni 98 G.W qicoꞌni hexxeexxen. Borreessanooleetinna gargariti hedheeke baroꞌni hexxemmaxxen. Aada, jiro ittan galdumi insaꞌneki wel fakkaataammakebaan. Kaddomaleꞌe, insaꞌne borreessineeke Maxaafi Qullichchi giddo afemaaki yaadi weli ginoomaakebaan. Tinninna kada dandeetteeki Maxaafi Qullichchi Mageniinxe Qaale kademmaxxeeten. (1 Teselonqe 2:13 yaansis.) Insaꞌne borreessineeki ifike yaadabaan. ‘Magenokenaaꞌni adhdhineeka yaada manfasiki akeekemmeꞌe haasoonneen.’a (2 Pheexiroosi 1:21) Mageni yaada isika borreessinaashsha manfasi qullichchiki akeekati insaꞌnee laꞌoonfateen.—2 Ximootwosi 3:16.
2. Maxaafi Qullichchi qophpheessemeeki ayyiꞌaate?
“Butta duuchchaꞌni [hexxaaxxi] gosa, sannenna gargariti hedheeka laagada haasoꞌaaki manni” Maxaafi Qullichchi giddo hexxeexxe gammachchiissaaxxa odo laqatixxa futtii afeen. (Leellisha Yohaannisixxa 14:6 yaansis.) Mageni Maxaafa Qullichcha hoone maxaafi iimi darre, heddi laagadinni qophpheessemaashsha asseꞌen. Tenneꞌa habanna hedheeke kadoꞌo, hoonee laagadanna haasoꞌaꞌneeki manji Maxaafa Qullichcha alfanna yaansisa dandeꞌaan.
3. Yihowwa Maxaafa Qullichcha techchi qicoꞌn turaashsha asseeki hittate?
Maxaafi Qullichchi borreessemeemmaki qeerraaxxa yannaꞌa tura dandeꞌabaake miyuwwaꞌniten. Kunni miyuwwinna gogakennaa paappireesi hiyyemaaken. Kaddomaleꞌe, isiꞌa jaalala afeemmaki manni, xexxeꞌachchoti angati borreessaꞌni wele miyibaaꞌa jijjiiraamman. Jabaxxa baalle afeemmaki manni Maxaafa Qullichcha balleessateꞌe woꞌlaanoolenna, Maxaafi Qullichchi baꞌabaashsha hiyyaa wodda hedho ifixxa balatee banqarseeki manni hedhemman. Yihowwa isika yaada noꞌaa ifisabaashsha ayyinna yookiin hiini yaanenna kuta dandeettabaan! Maxaafi Qullichchi “Mageni noꞌokixxi qaale baro baro baxxebaangi hexxaan” hiyyaan.—Isayaasi 40:8.
BAꞌLAXXA QOꞌNE
Mageni Maxaafa Qullichcha manji borreessaashsha akeekee qico, baꞌebaangi techchi qicoꞌn turaashsha assee qiconnaa manji duuchchiꞌaa geyaashsha assee qico baꞌlinse uundannon.
4. Maxaafi Qullichchi isooꞌo borreesiseeki ayyete kadeexxa kulaan
VIIDIYO uudde. Okkooꞌni 2 Ximootwosi 3:16 yaansisse, ittan buttiiꞌn hedheeke qortumuwwaꞌn mariꞌatte.
Maxaafa Qullichcha borreesseeki manjoke kaddoole, Mageniinxe Qaale hiyya hitta dandeennanno?
Mageni manji yaada isika borreessaashsha asseꞌeen hine addata dandeenannon? Mayee?
Mitte beeroki borreessanji daddaabbe borreessoolenna borreessemeeki yaadi isike kadebaangi sooreessichchiinken. Iittan, manji Maxaafa Qullichcha borreessoolenna borreesseexxi erga Mageniinbaaꞌni daggeexxen
5. Maxaafi Qullichchi heddo rakkonaaꞌn saꞌeen
Maxaafi Qullichchi Mageniinxe Qaale kadoole, isi konnee maxaafa baꞌabaashsha heqqaan hine heda dandeennannon. Buttatiki raagi kokeessaꞌneeshshan, jabaxxa baalle afeemmaki manni Maxaafa Qullichcha balleessateꞌe woꞌlaaneꞌeen. Addetixxi akeekisanoole weli manji Maxaafa Qullichcha alfe yaansisabaashsha shoxxaamman. Kaddoolenna, heddi manni shorrichchinnaa reyo hedho insaꞌnexxeꞌn geltoolenna Maxaafi Qullichchi baꞌabaashsha jabaxxa woꞌlaancho asseꞌeen. Konne manni giddiiꞌn mitte manjika raaga egeꞌnatee, VIIDIYO uudde, ittan buttiiꞌn hedheeke qortumuwwaꞌn mariꞌatte.
Manni Maxaafi Qullichchi baꞌabaashsha asseexxa yaane egeꞌna Maxaafa Qullichcha yaansissattoshsha tirtirsitaa? Mayee?
Faaro 119:97 yansisse, ittan qortumakeꞌn mariꞌatte:
Heddi manni hedho balateꞌn banqarse Maxaafa Qullichcha tikaashshanna welekee geesisaashsha tirtirsiteexxi yaane maachcho?
6. Duuchchiinge manjiꞌaa kadaaka maxaafa
Maxaafi Qullichchiinsha baꞌla qicoꞌni tikemeꞌe manji duuchchiꞌaa geyeeki maxaafi hedhebaan. Ergantooletixxa Huje 10:34, 35 yansisse, ittan qortumuwwakeꞌn mariꞌatte:
Mageni Qaale isixxi baꞌla qicoꞌn tikende manji duuchchiꞌaa geltoꞌaa hasaꞌneeki mayeete?
Maxaafa Qullichcha uuddaaxxa barattettexxe yaanenaaꞌn ateꞌe manbeꞌa hitattoshsha assiteexxi heente?
Butta duuchchaꞌn hedheeke mannanaaꞌn
100%
baaꞌa geyaaki manni
aagaake laagadinni Maxaafa Qullichcha alfa dandeꞌaan
Maxaafi Qullichchi
3,000
iimi darre hedheeke laagadinni
woꞌmi yookiin gamisi afemaan
5,000,000,000
naaꞌni caalaaki Maxaafi taꞌixxe yannaꞌni maxxansemeꞌeen,
konne maxaafinni qixxoꞌaaki huuni maxaafinna hedhebaan
MITTI MITTI MANNI IITTA HIYYAAN: “Maxaafi Qullichchi qarike baroꞌni manji ifiꞌaan borreesseeke maxaafan.”
Ateꞌni maa fakkaattaꞌne?
Maxaafi Qullichchi Mageniinxe Qaale kadeexxa leellishaaki tarjuwwi hoonte?
BUKKASSA
Maxaafi Qullichchi Mageniinxe Qaalen, isinna duuchchiinge manjiꞌaa geyaashsha asseꞌeen.
Hige Qalliyya
Maxaafi Qullichchi Mageniinke manfasixxe akeettenni borreessemeen hiyyo maa hiyyote?
Maxaafi Qullichchi baꞌnetenaaꞌn gatee qico, tikemee qiconnaa manjiinxe angaꞌn geyee qico barattettexxe yaanenaaꞌni atee manbeꞌa hitattoshsha assiteexxi heente?
Mageni yaado isika atiꞌaa ifisatee tennee yaane duuchcha asseexxa egendatto wodda maachchi ateꞌni laqemaꞌne?
FIRFIRSI
Maxaafi Qullichchi angati borreessinaammaxxe yannanaaꞌn safeꞌe, taꞌixxe tika qicoꞌn saꞌisseeka raaga yaansis.
“Maxaafi Qullichchi Konne Bari Qicoꞌn Geyeeki Hittate?” (Dammaqe!, Sadaasa 2007)
Maxaafi Qullichchi isoꞌni gelteexxa sase hega uushsho dandeꞌe saꞌe, techchi qicoꞌn hitta geyeexxa yaansis.
“Maxaafi Qullichchi—Hitta Hexxeexxa Hegga Uushsho Saꞌee?” (Heqqecatixxa Xellepho Laakko. 4 2016)
Maxaafa Qullichcha tikatee manji saꞌisseexxa rakko uudi.
Maxaafi Qullichchi taakkaꞌa borreessemeemmake miyanaaꞌn haarooke miyibaaꞌa jijjiiremaꞌninna tikemaꞌn tureen. Kaddomaleꞌe erga jijjiirendeebaaxxa hitta addata dandeennanno?
a Hafuura adhdha 07 keꞌn ifisendeeshshan, manfasake hiyyo hujeteꞌn hexxeexxe Mageniinxe hunna hiyyoten.