Hedho Afendeeki Hittate?

“[Mageni] hedhotixxe muummen.” (Faaro 36:9) Ati tennee yaane addattaate? Mitti mitti manni hedho hedendebaangi dedhangeꞌni afendeeshsha hedaan. Tinni dhugaate kaddoole, noꞌonna afemmeenneki futteessangen hiyyoten. Hedho affeexxa yaane dadeeki Megeno Yihowwate kadoole, hedho affeexxi yaane dadendeexxi buuto hexxeen. Tinni dhugaatebaa?a Maxaafi Qullichchi hedho saffeeki hittate kaddeexxa haasoꞌaꞌneeka raaganna raagi kunni addachchiisaake hinaanneki mayeete kaddeexxa uundannon.

1. Iimanna butta afendeeki hittate?

Maxaafi Qullichchi ‘Mageni keꞌitokeꞌni iimanna butta dadeexxa’ haasoꞌaan. (Dadatika Maxaafa 1:1) Baci sayintistooti iimanna butta keꞌito affeexxa addataan. Mageni iimanna butta dadeeki hittate? Isinna iimateꞌninna buttateꞌni hexxeexxa yaanuwwa duuchcha tinniirinna; urjuwwa, gaalakisuwwanna pilaaneetuwwa dadatee, “hujeteꞌni hexxeexxa” hunna isixxa yookiin manfasa qullichcha laꞌoonfateen.—Dadatika Maxaafa 1:2.

2. Mageni butta dadeeki mayeete?

Yihowwa ‘butta dadeeki manji hedhoꞌaate malee tolakebaan.’ (Isayaasi 45:18) Mageni pilaaneete noꞌo heꞌnaannexxa, leꞌmitabaaxxenna hedhotee eldaaxxe bakka assee dadeen. (Isayaasi 40:28; 42:5 yaansis.) Sayinsenna butta haranga gargariti hexxeexxa ifissaan. Buttati gadhi darre hedho manjiinxee hasissaaxxa yaanuwwa affeexxi wele pilaaneete hexxebaan.

3. Manjo biniinchakenaaꞌni gargariti hiissitaaxxi yaane maachcho?

Yihowwa butta dadeechchi uduma hedho affeexxa yaanuwwanna dadeen. Ediseexxi, butta biniinchuwwikinna hiddichchuwwiki woꞌmitaashsha asseen. Okkooꞌni, “Mageni manjo fakke ifixxeꞌni dadeen.” (Dadatika Maxaafa 1:27 yaansis.) Manjo wele dadanaaꞌni gargariti hiissitaaxxi yaane maachcho? Dademmeenneki Mageniinxe fakkeꞌnite kaddemmaxxeeꞌe, isishshani jaalala leellishshanna ille uushsho beloxxa yaane assa dandeennannon. Yihowwa laagada baratatixxa, dancha yaane jajatixxanna muuzuqa lanqanno wodda gammadatixxa dandeette anfannoshsha assee dadeen. Ittin lebendaaxxa, dadatika Mageno noꞌoka mageneeffatatixxi dandeettenna biniinchakenaaꞌn noꞌoo gargariti hiissitaan.

BAꞌLAXXA QOꞌNE

Hedho affeexxa yaane dadeeki hedheexxanna hedho affeexxe yaaneki raagi addachchiisaake kedeexxa uundannon. Ittan manjiinki adabi Mageno uuddaaxxa maa barsiisaaxxa uundannon.

4. Hedho dadeeka anna affeꞌeen

Manji dadendeexxe yaanenaaꞌni uude giisseexxe yaaneꞌaa summa alfaꞌneen. Tenneꞌaa, taakkaaꞌa dadendeexxe yaaneꞌa summa alfa hasissaaki ayyete? VIIDIYO uudde, ittan buttiiꞌni hedheeke qortumaꞌni mariꞌatte.

VIIDIYO: Magenokeꞌni Addata (2:43)

• Manji dadendeexxe yaanenaaꞌni uude heene yaanuwwa giissee?

Duuchchiinge miniꞌaa diizayne fulcheekinna ijaareeki manji hedheen. Kaddomaleꞌe, dadendeeꞌnaa uundaannexxa yaane giisse dadeekita ayyete? Ibraawiyaane 3:4 yaansisse, ittan qortumuwwakeꞌni mariꞌatte:

• Dadendeexxe yaanuwwa giddiiꞌni, dadumi iseki atee manbeꞌa assaꞌneexxi heente?

• Iimanna butta ittan duuchchiinxi yaane dadeeka anna afeꞌeen hine addata dandeennanno? Mayee iitta hitette?

Tennee Egendeettaꞌa?

Jw.org teꞌni “Hedho Dadanjo Affee?” ittan “Hedhotixxa Afensha Uuddaaxxa Keꞌeeka Yaaduwwa” hiyyaꞌneeke aanchi-aanchiki fulaꞌneeke yaadi hunda konnee yaada ifisaaka umo yaadanna viidiyo uudi.

“Duuchchiinga mine ijaareeki hedheexxi egeꞌnendeexxen, duuchchiinxa yaane hujeeki kinni Magenoken”

5. Maxaafi Qullichchi dada uuddaaxxa haasoꞌaꞌneeki yaadi addachchiisaaken

VIIDIYO: Iimanna Butta Dadeeki Hedhee?—Kuntende Adhdhendeexxa (3:51)

• Maxaafi Qullichchi buttanna hedho affeexxi yaane duuchchi, jaane barraꞌni, 24 saateke qeerinneꞌni calla dadendeen hiyye barsiisaa?

• Maxaafi Qullichchi dadendeexxa yaane uuddaaxa haasoꞌaꞌneeki raagi dhugaatikenna addachchiisaake? Mayee iitta hitette?

Dadatika Maxaafa 1:1 yaansisse, ittan qortumakeꞌni mariꞌatte:

• Sayintistooti iimanna butta keꞌito affeexxa addataan. Insaꞌneki yaadi taꞌa yaansissettexxe xiqsenni fakkaataaki hittate?

Mitti mitti manji Mageni hedho affeexxa yaane dadatee laaniinxa Jijjiirra laꞌoonfateen hiyyaan. Dadatika Maxaafa 1:21, 25, 27 yaansisse, ittan qortumakeꞌni mariꞌatte:

• Maxaafi Qullichchi Mageni edise shiixxaramma yaane dadeꞌe laaniinxa jijjiirra laꞌoonfateexxi, ettene yaanenaaꞌni; qulxuꞌme, unuunsaaka biniinchuwwanna manjo dadeeshsha barsiisaa moo duuchchiinxa yaane ‘gamo gamot’ dadeeshsha barsiisa?b

6. Mageni dadeexxe dada giddiiꞌni manji gargariti hexxeexxe dadan

Yihowwa noꞌoo dadeeki biniinchakenaaꞌni gargariti hedheeke orinniten. Dadatika Maxaafa 1:26 yaansisse, ittan qortumakeꞌni mariꞌatte:

• Noꞌo mageniinxe fakkeꞌni dademmeennaxxeeꞌe, jaalalanna mararte leellishsha dandeennannon. Tinni Yihowwaa uuddaaxxa maa barsiissa?

BUKKASSA

Iimanna butta ittan hedho affeexxa yaane duuchcha dadeeki Yihowwaten.

Hige Qalliyya

• Maxaafi Qullichchi iimanna butta afendeeki hittate hiyyee barsiisa?

• Mageni hedho affeexxa yaane laaniinxa Jijjiirra laꞌoonfate shiixxaramma yaanenaaꞌni afendaashsha asse moo duuchchiinxa yaane isi ifiꞌaa dade?

• Manjo dadendeexxe wele yaanenaaꞌni gargariti hiissitaaxxi yaane maachcho?

FIRFIRSI

Dadateꞌni leellaꞌneeka dadalliinka beekkuma baꞌla qicoꞌni egeꞌnatee woꞌlaan.

“Dadendeexxe Yaanenaaꞌni Maa Barantanno?” (Dammaqqee!, Birraꞌa 2006)

Mitti anni belto isikee Maxaafi Qullichchi giddo hedheeka dadatika raaga barsiisaꞌnee qico uudi.

“Duuchchiinxa Yaane Dadeeki Yihowwaten” 2:37

‘Laaniinxi jijjiirranna Maxaafi Qullichchi weli aagaa?’ hiyyaake qortumiꞌaa hiissichcho alfatee woꞌlaan.

“Mageni Gargariti Hexxeexxa Hedho Affeexxa Yaane Dadatee Laaniinxa Jijjiirra Laꞌoonfatee?” (Websayiteteꞌni fulee yaada)

Buttini giddiiꞌni afendeexxe miqeꞌni afemeeki tarjinna sayintiste assiteexxe qoꞌnexxe hundaayyeshsha, hedho afendeeki dadumikite moo ittan futteessange? Konnee yaada uuddaaxxa qoꞌne assi.

Hedho Afendee Qico Uuddaaxxa—Hiissichchi Hasisaaka Onde Qortumuwwa (biroshuure)