HAFUURA ADHDHA 07
Yihowwa Hitta Hedhee Mageno?
Mageno Yihowwaa heddatto wodda, sammo atixxibaa daggaꞌneexxi yaane maachcho? Isi bayya hexxe manbeꞌa assitammaxxe urjeshshate moo ifixxa ayyunte affebaangi jabaxxa hunna affemmaxxe banqoshshate? Yihowwa hitta hedhe Mageno? Yihowwa hitta hedheeka adabuwwa afeexxanna noꞌaa hedaꞌneexxa Maxaafa Qullichchakeꞌni ifiseen.
1. Mageno uuda gonphaanneki mayeete?
“Mageni Manfasaken.” (Yohaannisi 4:24) Yihowwa maaliinka biso afebaan. Isi manfasaken; hedhaꞌneekinna iimateꞌn noꞌo uuda dandeeꞌnnabeꞌnoxxe bakkaꞌniten.
2. Yihowwa hoonee adabuwwa afee?
Yihowwa leellaꞌneeke Mageno kada gophoolenna, isi ifixxa ayyuuntenna eloka adaba afeeke kadeexxa egeꞌna isoo eenannoshsha assitaan. Maxaafi Qullichchi: “Yihowwa toggitte murte eeyyaan, addatendeexxa ergantooleeyye isixxanna waalabaan” hiyyaan. (Faaro 37:28) Isi “jaalalatikenna [marartetiken]” giddiiꞌninni rakko geltaꞌneeke manniꞌaa jaalalanna mararte leellishaan. (Yaꞌiqoobi 5:11) Yihowwa rakkoti “qalbe enqendeekee shiqiken; adde woxeekanna gargaaran.” (Faaro 34:18, lekkatibaꞌika qallassanjo) Noꞌo assinannoxxi yaane Yihowwaa gammachchiissaaxxa yookiin yaadissaaxxa egendeette? Mitti manji isi gibaaxxa yaane assa wodda yaadan. (Faaro 78:40, 41) Kaddomaleꞌe, eloxxa yaane assinanno wodda kinni gammadaan.—Fakkeenna 27:11 yaansis.
3. Yihowwa noꞌoo eeyyaꞌneexxa leellisheeki hittate?
Jaalala Yihowwake adabuwwi giddiiꞌn haranga gargariti hedheeke adaban. Maxaafi Qullichchi Yihowwa jaalala afeexxa calla kaddebaangi, ‘isinni jaalalate’ kadeexxa haasoꞌaan. (1 Yohaannisi 4:8) Yihowwa jaalala afeexxa egennannoki Maxxafa Qullichchakenaaꞌn calla kaddebaangi, dadeexxe yaanenaaꞌninna hubata dandeennannon. (Ergantooletixxa Huje 14:17 yaansisi.) Fakkennakeꞌe, noꞌoo dadee qico hendo. Isi gargariti hexxeexxa bifa foyatixxa, muuzuqa laqe gammadatixxa, ittan sagale munxe anja iseka egeꞌnatixxa dandeette anfannoshsha asse dadeen. Tinninna gammandaꞌn heꞌnannoshsha hasaꞌneexxa leellishshaaxxen.
BAꞌLAXXA QOꞌNE
Yihowwa manbeꞌa assitaaxxa yaane hujateeꞌe maachcho laꞌoonfateexxa barantannon. Ittan manbeꞌa assaaka adabuwwa isika leellishee qiconna uundannon.
4. Manfasi qullichchi—Mageni gargariti hexxeexxa huje hujatee laꞌoonfataꞌneexxe hunnan
Noꞌo huje hujatee anga laꞌoonfantannashshanni, Yihowwanna manfasa qullichcha laꞌoonfataan. Manfasi qullichchi ifika biso affeexxe yaane kaddebaangi, Mageni huje hujatee laꞌoonfataꞌneexxe hunna kaddeexxa Maxaafi Qullichchi haasoꞌaan. Luqqaasi 11:13 ittan Ergantooletixxa Huje 2:17 yaansisse, ittan qortumuwwakeꞌn mariꞌatte:
Mageni manfasa isika kadhataake duuchchiꞌaa ‘dunaan.’ Iitta kaddoole, manfasi qullichchi ifixxa ayyunte afeechcho moo Mageni huje hujatee laꞌoonfataꞌneexxe hunna? Iitta hitetteki mayeete?
Yihowwa manbeꞌa assitaaxxa yaane assatee manfasa qullichcha laꞌoonfataan. Faaro 33:6 ittan 2 Pheexiroosi 1:20, 21 yaansisse, ittan qortumakeꞌn mariꞌatte:
Yihowwa heene yaanuwwa hujatee manfasa qullichcha laꞌoonfatee?
5. Yihowwa gammachchiisaaka adabuwwa afeen
Addatemeeki Mageniinki ergantichchi Muuse, Mageno adda egeꞌnatee haseemman. Tenneꞌaa isinna: “Atee egeꞌnannoshsha. . . ora atika aniꞌaa barsiisi” hiyyeemman. (Zetsiꞌaate 33:13) Yihowwanna Muuseꞌaa ayyunte isixxa ifisaaka adabuwwa kuleen. Zetsiꞌaate 34:4-6 yaansisse, ittan qortumuwwakeꞌn mariꞌatte:
Yihowwa Muuseꞌaa hoone ayyunte isixxa ifisaaka adabuwwa kuleemma?
Yihowwake adabuwwi giddiiꞌn, ati yoꞌoshsha eetatteki hoonte?
6. Yihowwa manjiinke beltiꞌaa hedaꞌneeke Magenon
Israꞌeeliki ardi Gibtse garbummateꞌn hedhemmaxxa yanna rakko insaꞌnexxenaaꞌn kexxeexxa, Yihowwa hittee qico yaadee? Oodiyo Caqasse yookiin Zetsiꞌaate 3:1-10 yaansisse. Okkooꞌni qortumuwwakeꞌn mariꞌatte.
Kunni raagi manjokeꞌn rakko gelta wodda Yihowwaꞌn maachchi laqemaaxxa barsiisaꞌneeke?—Laakkossa 7 nna 8 uudi.
Yihowwa manjo gargaaratee yortenna hunna afeechcho fakkaattaꞌnee? Mayee iitta hitette?
7. Dadendeexxi yaanuwwa Yihowwaka adabuwwa leellishshaan
Yihowwa dadeexxi yaanuwwa isi hitta hedheeka adabuwwa afeexxa egennannoshsha gargaartaan. VIIDIYO uudde. Okkooꞌn Roome 1:20 yaansisse, ittan buttiiꞌn hedheeke qortumaꞌn mariꞌatte.
Yihowwa dadeexxe yaanenaaꞌn hoone adaba isika hubatteette?
MITTI MITTI MANNI IITTA HIYYAAN: “Mageni ifixxa ayyunte afebaan, duuchchiinxe bakkaꞌn hedhammake hafuurshaten.”
Ateꞌni maa fakkaattaꞌne?
Mayee iitta hitette?
BUKKASSA
Yihowwa leellabaake manfasiinke bison, gargariti hedheeka gammachchiisaaka adabuwwa afeen; adabuwwi isiki giddiiꞌn taakkaki jaalalaten.
Hige Qalliyya
Yihowwaa illeti uuda gonphaanneki mayeete?
Manfasi qullichchi maachchoke?
Yihowwake adabanaaꞌn mitti mitti hoonte?
FIRFIRSI
Shoole lumolla Yihowwaka adaba baratati isooꞌo adda egeꞌn.
“Yihowwa Hitta Hedhee Mageno?” (Heqqecatixxa Xellepho Laakko. 1 2019)
Mageni duuchchiinxe bakkaꞌn afemabaan hinaanneka tarja hubat.
“Mageni Duuchchiinxe Bakkaˈn afemaa?” (Websayiteteꞌn fuleeka yaada)
Maxaafi Qullichchi manfasa qullichcha Mageniinxe anga hiyyaꞌneeki mayeete kadeexxa uudi.
“Manfasi Qullichchi Maachcho?” (Websayiteteˈn fuleeka yaada)
Ille afaammabaaki manjichchi Mageni isiꞌaa hedaꞌneexxa addata haꞌurteemman. Isixxa hedino jijjiireechchi maachcho kadeexxa yaansis.
“Taꞌa Wele Manjo Gargaara Dandeꞌannochcho Fakkattaꞌneen” (Heqecatixxa Xellepho, Onkoleessa 1, 2015)