HAFUURA ADHDHA 09
Kadha Mageniinbaa Shinqannoshsha Gargaartaan
Duuchchinii wodda hedho atixxeꞌe akeette hassaatte? Haranga hiissichcho alfatee hassaatteki qortumi hedhee? Dayyeessaaka yaada egeꞌna hassaatte? Yihowwabaa shiqa hassaatte? Kadha, tennee duuchchiinxa yaane alfa dandeettattoshsha gargaartaan. Kadhata dandeettattoki hittate? Mageni duuchchiinxa kadha laqaa? Kadha atixxa laqaaxxa addattattoshsha gargaartaaxxi yaane maachcho? Meeni uundo.
1. Kadhata hasissaaki ayyibaate? Maachchokeerii kadhata dandeennanno?
Yesuusi iimateꞌn hedheeke anni noꞌokibaa calla kadhata hasissaaxxa barsiiseen. Yesuusinna kadhataammaki Yihowwabaaten. Isinna iitta hiyyeen: “Konne orinni kadhatte: ‘Iimateꞌn hexxetteke anna noꞌokee . . . ’” (Matwoosi 6:9) Yihowwabaa kadhantanno wodda isinni welt anfeennexxi jaalunte jabaattaꞌni metaan.
Heene yaaneꞌaanna kadhata dandeennannon. Kaddomaleꞌe, Mageni noꞌoxxa kadha laqoꞌaa hansaannole, fedhii isixxishsha kadhata hasissaan.“Lanqaannexxi yaane heenetenna kaddoole, fedhii isixxin weli aagaake orinni lanqenne qicoꞌn isi kadha noꞌoxxa laqaan.” (1 Yohaannisi 5:14) Yesuusi heene yaanuwwa kadhata hasissaaxxa barsiiseen. (Matwoosi 6:9-13 yaansis.) Ittin lebendaaxxa, noꞌoo yaadissaaxxe yaaneꞌaanna kadde wele manjiꞌaa kadhata dandeennannon. Ittan Mageni noꞌaa asseexxe yaaneꞌaanna galateeffata dedha hasissabaan.
2. Kadhata hasissaaki hittate?
Maxaafi Qullichchi ‘qalbe noꞌoxxa Mageni edo dunnannoshsha’ jajjabeessaan. (Faaro 62:8) Tenneꞌaa kadha noꞌoxxi qalbe giddixxenaaꞌn burqiteexxe kada hasissaan. Hafuura laqinsaꞌni yookiin qalbe giddo, hansennexxe yannaꞌninna bakkaꞌn kadhata dandeennannon. Kadhantanno wodda uurra, ofoꞌla yookiin guluffata hasissaaxxa kulendeexxi yaane hexxebaan. Noꞌonaaꞌn heqqendaaxxi yaane, Yihowwaa ulfinna anfeennexxa leellishaake garinni kadhataten.
3. Yihowwa kadha noꞌoxxa laqe hiissaꞌneeki hittate?
Isi gargariti hedheeke orinni kadha noꞌoxxee hiissichcho uwwaan. Yihowwa qortumuwwakee hiissichcho alfinannoshsha, Maxaafa Qullichcha noꞌaa uwween. Maxaafa Qullichcha yaansisa ‘beekkuma afebaaka beeka assitaan.’ (Faaro 19:7; Yaꞌiqoobi 1:5 yaansis.) Mageni rakko noꞌoꞌn geltaa wodda sammo noꞌoxxi nageꞌa alfitaashsha gargaaraan. Ittan isika gargaarsa hansannoxxa yanna addetike jaaluwwi darreeꞌn noꞌoo gargaaraan.
BAꞌLAXXA QOꞌNE
Mageno gammachchiissaaxxa, qalbeti giddiiꞌn burqiteexxa kadha shiqisa dandeennanno qico qoꞌninsannon. Ittan kadhatenaaꞌn laꞌo alfinannoki hittate kaddeexxa uundannon.
4. Mageni kadha noꞌoxxa laqoꞌaa hansaannole noꞌo assa hasissaaxxi yaane hexxeen
Mageni kadha noꞌoxxa laqaashsha yookiin laqabaashsha assitaaxxi yaane maachchoke? VIIDIYO uudde.
Yihowwa isibaa kadhantonnaa hasaꞌneen. Faaro 65:2 yaansisse, okkooꞌni qortumuwwakeꞌn mariꞌatte:
‘Kadha laqaaki’ Mageni, ati isibaa kadhattottaa hasaꞌneechcho fakkaattaꞌnee? Mayee iitta hitette?
Mageni kadha noꞌoxxa laqoꞌaa hansaannole isike qullummatike seerixxe hundaayyeshsha hedha hasissaan. Mikiyaasi 3:4 nna 1 Pheexiroosi 3:12 yaansisse, okkooꞌni qortumakeꞌn mariꞌatte:
Yihowwa kadha noꞌoxxa laqaꞌneexxa addata dandeennannoki hittate?
Bagediinxa yanna laminiinxi gamo injifatatee kadhattaaxxi hexxaan. Mageni tenne kadha hiissaan hine heda dandeennanno?
5. Kadha noꞌoxxi qalbe giddixxenaaꞌn burqiteexxe kada hasissaan
Mitti mitti manni mitten kadha ise-iseen hiissaꞌni kadhata hasissaaxxa barateꞌeen. Mageni isibaa kadhantonnaa hasaꞌneeki iittatee? Matwoosi 6:7 yaansisse, okkooꞌni qortumakeꞌn mariꞌatte:
Kadhattatto wodda ‘weli fakkaattaanxa yaane ise-iseen hiissitaꞌni’ kadhattabexxoshsha atee gargaartaaxxi yaane maachcho?
Barra barrandeꞌni Yihowwa atiꞌa asseexxa mitte yaane qalli hitaꞌni ettene yaaneꞌaa isoo galateeffata dandeettatton. Torba mitteꞌaa barra barrandeꞌni iitta assitaattole, weli fakkaattaaxxa yaane ise iseen hiissitebexxong, isibaa kadhattattoxxa torbaane yaane affatton.
Mitti eloki anni oose isixxi qalbe giddixxin isoo haasoositoꞌaa hasammashshanni, Yihowwanna qalbe giddixxin isibaa kadhantonnaa hasaꞌneent
6. Kadha Magenokenaaꞌn alfinennexxe uwwan
Kadha eloxxe yannaꞌninna kadde elobaaxxe yannaꞌni noꞌaa jabeenna uutaaki hittate? VIIDIYO uudde.
Maxaafi Qullichchi, kadha sammotika nageꞌa alfinannoshsha gargaartaaxxa haasoꞌaan. Filphisiyuusi 4:6, 7 yaansisse, okkooꞌni qortumuwwakeꞌni mariꞌatte:
Kadha duuchchii wodda rakko noꞌonaaꞌni gattaashsha assanna gophphoole, noꞌoo gargaartaaki hittate?
Yihowwabaa kadhatatee hassaattexxi mitte mitte yaane heente?
Tenneꞌe Egendeettaꞌa?
“Ameen” hitaaxxi hiyya “eet kaddun” yookiin “dhugaaten” hiyyoten. Qarike baronaaꞌninni safeꞌe manni kadhatike muuxamaꞌni “ameen” hiyyaamman.—1 Zeena 16:36.
7. Kadhatee yanna dhaabi
Mitte mitte yanna huje noꞌoꞌni bira saxxammaxxeꞌe kadhatanda deenannoxxi yanna hedha dandeettaan. Yesuusi kadha hittee qico lummisee uudaammaꞌa? Matwoosi 14:23 nna Marqoosi 1:35 yaansisse, okkooꞌni qortumuwwakeꞌn mariꞌatte:
Yesuusi kadhataaxxa yanna alfatee maa asseemmaꞌa?
Atiꞌa kadhatee eldaaxxi yanna heente?
MITTI MITTI MANNI IITTA HIYYAAN: “Kadha sammo gammachchiisati gadhi darre wele laꞌo affebaan.”
Ati maa hitaatte?
BUKKASSA
Qalbe giddixxi kadha Mageniinbaa shinqannoshsha assitaan, sammotika nageꞌa uutaan, ittan Yihowwaa gammachchiisatee hasisaaka jabeenna noꞌaa uutaan.
Hige Qalliyya
Kadhata hasissaaki ayyibaate?
Kadhata hasissaaki hittate?
Kadhatenaaꞌni alfinannoxxi mitte mittte laꞌo heente?
FIRFIRSI
Kadha uuddaaxxa heddi manji qoraake qortumika hiissichcho uudi.
“Kadha Uuddaaxxa Egeꞌna Hasissaaxxa Torbaane Yaane” (Heqqecatixxa Xellepho, Onkoleessa 1, 2010)
Kadha hasisseeki mayeete kaddeexxanna kadha noꞌoxxa elchinannoki hittate kaddeexxa egeꞌn.
Maxaafi Qullichchi ayyibaa kadhata hasissaaxxa maa hiyyaaxxa qoꞌnis.
“Qulliyyetibaa Kadhata Hasissaa?” (Websayiteteꞌn fuleeka yaada)
Tenne muuziqiinxe viidiyonaaꞌn habanna yookiin haanonna kadhata dandeesissaaxxa uudi.