Yaansisaluwiinka Qortumuwwa

Isayaasi 60:1 keꞌn kulendeexxi “manjichcho” ayyete? ‘Kexxaꞌneekinna ifina’ xassitaꞌneeki hittate?

Isayaasi 60:1 iitta hiyyaan: “Tee manjo, keꞌi, ifina xassi, ifini atikinna dageꞌeen. Yihowwaki ulfinninna ateꞌni ifaan. Xiqsetike qarqaraꞌni hedheeki yaadi “manjichcho” tinni ettene yannaꞌni Yihuudake lumoke qachcha kadeemmaka Tsiyoon yookiin Iyyerusaalemii ifisaaken.a (Isa. 60:14; 62:1, 2) Qachchi kunninna gosa duuchchiꞌaa uurreemmakemman. Tinni Isayaasixxi tinbite lami qortumi keꞌaashsha assitaan: Taakkaki, Iyyerusaalemi ‘kexxeemmakinna’ manfasiinka ifina xassiteemmaki haanonna hittate? Langaki, tinni Isayaasixxi tinbite caalee garni baro noꞌokeꞌni muuxendaa?

Iyyerusaalemi ‘kexxeemmakinna’ manfasiinka ifina xassiteemmaki haanonna hittate? Iyyerusaalemiki qachchinna mageneeffachchotiki mini baꞌeeki Yihuudiki ardi 70 woggaꞌni Baabilooniꞌaa boojiꞌoti adhdhemeexxe yannamman. Kaddomaleꞌe Baabiloonixxi mootumma Meedonixxenna Faarsixxe mootummanni injifatendeechchi uduma, Baabiloonixxe galcha giddo hedhemmaki duuchchiing Israꞌeeliki ardi bogi ifikibaa higati dhugaatixxa mageeneeffachcho hiisse hundeessa dandeꞌaamman. (Izira 1:1-4) Keꞌitokeꞌni 537 K.I.E.D duuchchiinxe 12 Israꞌeelixxi gosanaaꞌni gateemmaki addatemeeki manni iitta asseemman. (Isa. 60:4) Insaꞌnenna Yihowwaaꞌa tolcha uwwa, ayyaanakee bukki hiyyanna mageeneeffachchotika mine hiissine ijaara sanfeen. (Izira 3:1-4, 7-11; 6:16-22) Iyyerusaalimike qachchaꞌni yokiin haaroba higeeke ardaꞌni Mageniinki ulfinni higgeen xaba safeen. Tennenaaꞌn kexxeexxa insaꞌnenna manfasiinxe hedhonni dukkana giddo hexxemmaxxe gosaaꞌa ifiniinxe muumme kandeen.

Kaddoolenna, tinni Isayaasixxi tinbite qarixxe Iyyerusaalemiꞌni muuxendeeki woꞌma kadeeke orinnitebaan. Duuchchiingi Israꞌeeliki ardi Magenokee ajajema itti sufeemabaan. (Neh. 13:27; Mil. 1:6-8; 2:13, 14; Mat. 15:7-9) Matanga Meesiyichcho kadeemmaka Yesuusi Kirsitoosina addante adhdhineemabaan. (Mat. 27:1, 2) Iyyerusaalemiki qachchinna mageneeffachchotiki mini 70 G.W higgeen baꞌeen.

Tinni yaadissaaxxi yaane kaddaaxxa Yihowwa ediseen kuleemman. (Dan. 9:24-27) Kabaaꞌni uundaaneshshanni Isayaasi 60 keꞌni kulendeexxi haaroꞌmatixxi tinbite, buttixxe Iyyerusaalemiꞌni woꞌma kadeeke orinni muuxendaashsha Mageniinke yaadamabaan.

Tinni Isayaasixxi tinbite noꞌoke baroꞌni caaleke garini muuxendaa? Eet, kaddomaleꞌe tinni yaane kaddaꞌneeki wele fakkeeniinxe manjichchoni tinnanna ‘iimixxe Iyyerusaaleminniten.’ Hawaarya Phawuloosi isee uuddaaxxa borreesee wodda “ise ama noꞌoxxen” hiyyeen. (Gela. 4:26) Iimixxi Iyyerusaalemi addatendeexxe manfasiinxe dadaxxeꞌe iimixxe Mageniinxe orgaxxe kutan. “Oose” isexxinna Yesuusitenna Phawuloosishsha iimatika tasfa afeeke 144,000 manfasiki hariiremeeke Kirsitaanan. Insaꞌnenna bukki hineeki ‘qullitte gosanaaꞌni’ ‘Mageniinxe Israꞌeelinaaꞌniten.’—1 Pheex. 2:9; Gela. 6:16.

Iimixxi Iyyerusaalemi ‘kexxeekinna ifina xassiteeki’ hittate? Isenna iitta assiteeki buttixxe hariirendeexxe oose isexxi darreeꞌniten. Insaꞌne assineexxi yaane Isayaasi hafuura adhdha 60 keꞌni kulendeexxe tinbitenni wele fakkaattaaki hittate kaddeexxa hokkokisiis.

Langake dhibbeesso baroꞌni hariiremeeki Kirsitaani waakkatooletixxe dhariinxe barachchoxxe buutonni manfasiinxe hedhoni dukkana giddo hedhemmaxxee “keꞌa” hasissaamman. (Mat. 13:37-43) Konne orinni insaꞌnenna butta duuchchixxe dhariinxe addaxxe galcha kaddeexxe Lumoxxe Baabiloonenni boojiꞌemeemman. Hariiremeeki Kirsitaaninna “tenne aadaki muuxami” safeexxe 1914 wogga qicoꞌni boojiꞌoteꞌni tureen. (Mat. 13:39, 40) Okkoneechchi uduma shiqixxe yannaꞌn 1919 woggaꞌni boojiꞌotenaaꞌni fulleexxi hirbageꞌni lassatixxe hujeꞌni duulati manfasiinka ifina xassa sanfeen.b Qeeraaxxe wogguwwaaꞌa duuchchiinxe gosanaaꞌni, ittan Mageniinxe Israꞌeelenaaꞌni gateeke mannaanna kaddo Isayaasi 60:3 keꞌn kulendeexxi “mootooleeyye” konne ifinibaa dagateꞌni hexxeen.—Leellisha. 5:9, 10.

Ediꞌaa kinni kunni hariiremeeki Kirsitaani iimatika xassa baꞌla qiconi xassaan. Hitta? Insaꞌnenna renneechchi uduma “Haaroxxe Iyyerusaalemixxe” yookiin Kirsitoosike mushurra kadeeke 144,000 xxe mootooleeyyetixxenna kayinaatetixxe kuta kandaan.—Leellisha. 14:1; 21:1, 2, 24; 22:3-5

Haarooxxi Iyyerusaalemi Isayaasi 60:1 keꞌni kulendeexxi tinbite muuxendaashsha jabaxxa yaane assitaan. (Isayaasi 60:1, 3, 5, 11, 19, 20, Leellisha Yohaannisixxa 21:2, 9-11, 22-26 keꞌn hedheeke yaadinni welt hokkokkisiis.) Buttixxi Iyyerusaalemi qarixxe Israꞌeelixxe mootummake oddoola kaddemashshani, Haarooxxi Iyyerusaaleminna Kirsitoosi haarooxxe aadaxxe galcha kaddaan. Haaroxxi Iyyerusaalemi ‘iimiiꞌni Mageniibaaꞌni [daggaaki]’ hittate? Miꞌlachcho isexxa buttatibaa wirri assatiten. Duuchchiinxe gosanaaꞌni fuleeki Mageno sodaataaki manni “ifina isekeꞌni meꞌaan.” Cubbotixxenna reyotixxe garbuntenaaꞌni fulaan. (Leellisha. 21:3, 4, 24) Tenne yaaneki muuxaminna Isayaasinna wele wabeekkoole haasoottemmasha duuchchiinxi yaane woꞌma kadeeke garinni haaroꞌmitaake kadaan. (Huje 3:21) Lumoxxi haaroonsa saffeeki Kirsitoosi Mootichcha kadeexxe yannan. Muuxendaaki kinni isixxe Kuma Woggake muuxamaꞌniten.