Duuchchinii Wodda Qoꞌnissattoshsha Gargaartaaxxi Yaane Maachcho?
Ifixxa Maxaafi Qullichchiinxa qoꞌne, duuchchinii wodda, ittan gammachchiisaake garinni qoꞌnisa haꞌurtaꞌnee? Duuchchiniinge manjoꞌni haꞌurtaaxxi yanna hexxaan. Kaddomaleꞌe, duuchchinii wodda assitattoxxe yaanuwwa giddiiꞌni, fakkeennakeꞌe biso anshedha fakkaattaaxxa yaane hedi. Biso anshedhatee yannanna woꞌlaancho hasissaan, Kaddomaleꞌe, ansheꞌnennechchi uduma irri noꞌoo gammadaan! Iittan Maxaafi Qullichchiinxi qoꞌnenna ‘qaale isixxi wodiꞌiki caꞌa assiteꞌe anshiteꞌe’ irri noꞌoki gammadaashsha assitammaxxishshaten. (Effe. 5:26) Mitte mitte gargaaraaka yaaduwwa uundo:
Prograama fulchi. Ifixxi Maxaafi Qullichchiinxi qoꞌne, mitti Kirsitaani balalli hiyya hasissabaaxxe “irra caala hasissaaxxe yaanuwwa” giddiiꞌni mitteten. (Filph. 1:10) Fulchexxetteka prograama deetabexxoshsha, woraqatakeꞌni yannanna barra borreessiteꞌe leellaaxxe bakkaꞌni edo uggi. Yookiin qoꞌnetixxi yanna geltaa wodda atee qalli assitaashsha, bilbilakeꞌn alaarme wonsha eloxxen.
Halcha atixxa egeꞌni. Ateꞌni shollexxaaki mitte yaaneꞌni qeerraaxxe yannaꞌaa yookiin harumaaxxe yannaꞌaa miꞌlachcho assatee? Ataa elaaka jeeja egendeetteki ateten. Tenneꞌaa qoꞌnissattoka prograama tenne yaane heddaꞌni qixxeeffati. Qoꞌne assitattoxxi yanna geltaa wodda qoꞌnisatee hooddaattole, tomme daqiiqiꞌaa calla qoꞌnisatee woꞌlaandettelenaꞌa? Shiixxoonge daqiiqiꞌaa calla qoꞌnissottole heddo yaane baratatton. Mittele qoꞌnisa saffottole qoꞌnisatixxi halcha lebbaꞌni metaan.—Filph. 2:13.
Edissettexxi qoꞌnissattoka yaada melli. Qoꞌnetixxi yanna gelteeꞌnaa, qoꞌnissaattoxxa yaane heddaattexxe kaddoole ‘yanna atixxa elo garinni laꞌoonfata’ gopha dandeettatton. (Effe. 5:16) Qoꞌnisatee hassaattexxa barachchuwwa yookiin umo yaaduwwa borreessiteꞌe abixxitettelenaꞌa? Mitti qortumi sammo atixxibaa dagaa wodda borreessiteꞌe abixxi. Ittan duuchchinii wodda qoꞌnetike muuxamaꞌni qoꞌnisatee hassaatteka wele yaada, qallassanjo atikeꞌni lebbeꞌe borreessa dandeettatton.
Jijjiirra assi. Prograama atikeꞌni jijjiirra assatee woꞌlaan, tinninna qoꞌneteꞌni saꞌissitaatexxe yannaꞌni yookiin qoꞌnetee mellexxaatteke yaaduwwaꞌni jijjiirra assaten. Irra caala laꞌo affeexxi haano, hittee qico yookiin maachcho qoꞌnissaatte hitaaxxe kaddebaangi duuchchinii wodda qoꞌnisa hitaaxxen.
Duuchchinii wodda qoꞌnisatixxa aada anfoonnole laꞌo alfinannon. Yihowwabaa shinqannon, beekkumiinxa murte murteesseꞌnannon, ittan jabeennanna alfinannon.—Iya. 1:8.