Hadoo—Oose Haꞌnooxxi Adde Ifixxa jabeessexxaashsha Gargaarre

1-2. Maxaafa Qullichchakeꞌni hundeesseendeexxa adde noꞌoxxa uuddaaxxa oose qortuma qortaa wodda, hadi qortuma insaꞌneka uuda hasissaaki hittate?

HEDDI manni oose nossa lumoxxe huje kaddeexxa addataan. Oose affineeke hado kaddinoole, adde insaꞌnexxa jabeessateꞌe hujinnaꞌneexxe jabaxxe hujeꞌaa galateeffantaannen. (Zedag. 6:6, 7) Oose haꞌnooxxi gikki hittaꞌni daggaashshanni Maxaafa Qullichchakeꞌni hundeesseendeexxa adde noꞌoxxa, ittan Maxaafi Qullichchiinka adabuwwiinka seera uuddaaxxa jabaka qortuma qortaaxxi hexxaan.

² Taakka wodda oose haꞌnooxxi iitta hedheeka qortuma qortaa wodda Magenokeꞌninna Maxaafa Qullichchakeꞌni anfeexxi adde henoꞌmitechcho fakkaata dandeettaan. Oose nophphitaꞌni metaashshanni adde ifixxa jabeeseedhatee qortuma qora hexxeenxe yaanen. (1 Qoro. 13:11) Tenneꞌaa sodaatinnaaxxi mitte buutonna hexxebaan. Oose haꞌnooxxi qortaꞌneeka qalbe giddika qortuma insaꞌnexxa hedatixxa dandeette nosseꞌnaashsha gargaartinaaxxe futtii assitine uudde.

3. Tenne qoꞌneꞌni mariꞌantaanexxi yaane maachcho?

³ Tenne qoꞌneꞌni hadi oose insaꞌnexxi (1) adde ifixxa jabeesseexxashsha, (2) Maxaafi Qullichchiinke adabiinke seeruwwiꞌa affeexxa saadino nossexxaashsha, (3) adde ifixxee uurritaashsha gargaaraaki hittate kaddeexxa mariꞌantannon. Ittan oosetiki qortumi afeexxa eloxxa gummuwwanna Kirsitaaniinxa adde uuddaaxxa hadi ooseti hasooꞌaashsha ora bandaaxxa mini hadi assaaxxa mitte mitte yaanuwwa uundannon.

OOSE HAꞌNOOXXI ADDE IFIXXA JABEESSEXXAASHSHA GARGAARRE

4. Oose maa hiyyaaka qortuma qortaxxi hexxa? Mayee?

⁴ Kirsitaana kadeeki hadi oose insaꞌnexxi Magenokeꞌni adde affe ilendaabaaxxa egeꞌneꞌeen. Haꞌnonna ilendinee wodda Yihowwaꞌni adde affineemmabaan. Oose haꞌnooxxinna iittanden. Yannati uduma oose haꞌnooxxi: ‘Mageni hedheexxa hitta egeꞌnano? Maxaafi Qullichchi hiyyaꞌneexxi yaane addachchiissaaxxe?’ hiyyaaka qortuma qora saffaaxxi hexxaan. Maxaafi Qullichchinna “hedinotixxa dandeette” noꞌoxxa laꞌoonfantannoshshanna ‘duuchchiinxa yaane firfirsinannoshsha’ jajjabeessaan. (Roome 12:1; 1 Tese. 5:21) Oose haꞌnooxxi adde ifixxa jabeesseexxaashsha gargaara dandeettinaakita hittate?

5. Hadi oose insaꞌnexxi Maxaafa Qullichchakeꞌni affeexxa adde jabeesseexxaashsha gargaaratee maa assa dandeeꞌa? (Roome 12:2)

⁵ Oose haꞌnooxxi dhugaa ifiꞌaan kokkaashsha jajjabeessee. (Roome 12:2 yaansis.) Oose haꞌnooxxi qortuma qortaa wodda qoꞌnetika miyuwwa, kunninna Qoꞌne Kiphaaka Miya Yihowwaxxe Naqaasheꞌaa hitaꞌneexxa borreessile laꞌoonfatteexxi, qortumakee hiissichcho alfitaa qico leellishshe. Qoꞌne kiphaake miyaꞌni “Maxaafa Qullichcha” hiyaꞌneeke umi yaadi butti darreeꞌni, “Mageniinke Manfasixxe Akeettenni Borrreessemeen” hiyyaꞌneeke yaadaꞌni, Maxaafi Qullichchi manji borresseeke mitte eloke maxaafa calla kadeebaaxxa leellishaaka tarja alfa dandeettaan. Dhugaaten “Maxaafi Qullichchi Mageniinxe qaalen.” (1 Tese. 2:13 ) Fakkeennakeꞌe, qarike Asoorike Nenewe qachchaꞌni qoꞌne assa dandeettaan. Edi wodda mitti mitti mani Nenewete hinaaki qachchi ijjenda hedheekebaan hiyyaꞌni, Maxaafa Qullichcha busheeshshaamman. Kaddomaleꞌe, 1850 woggabaaꞌa diigemeeke Neneweke qachchixxi bututto buttini giddiiꞌni leelliteexxa yanna, Maxaafi Qullichchi haasoꞌeexxi yaane dhugaate kaddeexxa kokkessendeen. (Sofo. 2:13-15) Nenewe baxxaaxxa kuldaaxxi tinbiite muuxendeeki hittate kaddeexxa egeꞌnatee Sadaasa 2021 keꞌni fuldeexxe Heqqecatixxe Xellephoꞌni “Tennee Egendeettaꞌa?” hiyyaꞌneeka yaada uuda dandeettaan. Oose haꞌnooxxi borreessiluwwa noꞌoxxenaaꞌni badhatteexxa yaane insaykilopiidiyakenaaꞌni ittan wele addatendeexxe tarjiinxe muummuwwanaaꞌni, alfitteeke yaadinni welti hokkokiisiisati Maxaafi Qullichchakeꞌni affeexxi adde lebbaꞌni meꞌitaashsha assitaaxxa yaane alfa dandeettaan.

6. Hadi osse insaꞌnexxixxi hedinotixxi dandeettee nophpitaashsha gargaaraaki hittate? Fakkeenniki kuli. (Fakke uudi.)

⁶ Oose haꞌnooxxixxi hedinotixxi dandeette nophphitaashsha gargaarre. Hadi oose ifixxinni Maxaafa Qullichchakeꞌninna Magenokeꞌni anfeexxa adde uuddaaxxa, haasoꞌaaxxa gargaritti hexxeexxa futtii afeen. Hadi iitta hexxeexxa futtii alfa dandeꞌaaki, muuziyeeme, gargariti hedheeki hiddichchuwwi hedheexxa bakka yookiin Yihowwaxxe Naqaashexxe dame beero giddo afemaaka daaꞌwetika oddoola oose ifixxinni dooyyaaxxe yannan. Fakkeennakeꞌe, muuziyeeme dooyyitinaa wodda yookiin viidiyoti uuddinaaxxa yanna muuziyeeme giddo hedheeki raagi yookiin edi wodda manji laꞌoonfataammaki miyuwwi, Maxaafi Qullichchi haasoꞌaaxxe yaanenni shiqaaki hittate kaddeexxe oose haꞌnooxxee leellishshe. Tinninna Maxaafi Qullichchi hiyyaaꞌneexxi yaane dhugaate kaddeexxa oose haꞌnooxxi egendaashsha gargaara dandeettaan. Oose haꞌnooxxi 3,000 wogga tureeke Moꞌaabike Bexxichcha Kinjo hiyyemaakeꞌni, Mageniinki deettichchi summi hedheexxa egendee? Deettichchi Moꞌaabiki Bexxichchi Kinji, Ferensaye giddo Paariisi hiyyemaake qachchaꞌni Luvereesi hiyyendaaxxe muuziyeeme giddo afemaan. Moꞌaabika Bexxichcha Kinjo fakkeessine giissineeki Niwu Yorke Worwike affendaaxxe Yihowwaxxe Naqaashexxe Illitte Beero giddo “Maxaafa Qullichchanna Mageniinka Summa” hiyyemaake daaꞌwetike oddoolaꞌni afemaan. Konne Moꞌaabike Bexxichcha Kinjoꞌni, Moꞌaabiki Mootichchi Meesha Israꞌeeliꞌni jallateexxa borreessendeen. Maxaafi Qullichchiinna konnenni weli faakkaataange yaada haasoꞌaan. (2 Negis. 3:4, 5) Oose haꞌnooxxi Maxaafi Qullichchi haasoꞌaꞌneexxi yaane dhugaatixxenna toggittete kaddeexxa ille ifixxeninni uudda wodda, adde insaꞌnexxi jabbataꞌni meꞌitaan. 2 Zeena 9:6 welti hokkokisiisse.

7-8. (a) Dadendeexxe yaaneꞌni uundaannexxe danchummanaaꞌninna dadendee garanaaꞌni maa barantanno? Fakkenniki kuli. (Fakke uudi.) (b) Oose haꞌnooxxi dadatike Magenoꞌni affeexxa adde jabeessexxaashsha gargaaraa qortumuwwi hoonte?

⁷ Oose haꞌnooxxi dadendeexxa yaane adda hubatte uuddaashsha jajjabeesse. Oose haꞌnooxxenni hadi giddo yookiin hiddichchuwwi hedheexxe bakkaꞌni marendinaa wodda uuddinnaꞌneexxi yaane manbeꞌa assaa garinni dadendee qico oose hubattaashsha asse. Mayee? Buutotinna tinni yaanuwwa dadendee qici, beekkichchi dadalli hedheexxa kokessitammaxxeeten. Fakkeennakeꞌe, sayintistooti heddo dowwe affe dadendeexxa yaanuwwa heddo woggaa qoꞌnisaꞌni tureen. Nikola Fameli hiyyemaaki sayintistichi dadandeexxe yaanuwwaꞌni hexxeexxa dowwe laakkoonna wodda weli hordoffaaxxi wele dowwe afendaaxxa haasoꞌeen. Kunni laakkoossuwwinna Fiibonaachi sikuꞌens hiyyemaan. Tennee dowwe affeexxi yaanuwwa mitte mitte gaalakisetixxi bukkiiꞌi, haqanqaletiki qoshi, shafuwwinna suufetike daraaruwwan.a

⁸ Oose haꞌnooxxi barachchotike mineꞌni adda barattaꞌni meteexxe qixxeꞌni, heddo yaanexxa dhagga, seeri kunni akeekaꞌneexxa barattaan. Fakkeennakeꞌe, heddo haqqe weli fakkaataaxxa nophphinjiinxa akeette affeen. Mura lumollamma damebaa, lumollamma dame kinni shiixaramma damebaa qoodendaꞌni meꞌitaan. Iitta hedheeki dadumiinki seeri firaakitaal hiyyemaan. Kunni dadumiinki seeri wele dadaꞌninna afemaan. Iitta hedheeka manbeꞌa assaaka dadumiinka seeruwwa fulcheeki ayeete? Dadendeexxe yaaneꞌni hexxeexxa dadumiinxa akeette fulcheeki ayeete? Oose haꞌnooxxi iitta hedheeke qortumawwaꞌni heddaꞌni meꞌiteenxe qixxeꞌni duuchchiniinxa yaane dadeeki Magenoke kadeexxa affeexxi adde jabaattaꞌni meꞌitaan. (Ibra. 3:4) Oose haꞌnooxxa iitta hitine qorre, “Noꞌoo dadeeki Magenoke kadoole, gammandannoshsha assaaka adabiinka seruwwa noꞌaa fulcha hasissaaki isoten hine addata hasissabaa?” Okkooꞌni gammandannoshsha assaaka Mageni, Maxaafa Qullichchakeꞌni borreessiseeka yaada ifisa dandeettinaan.

NASA, ESA, and the Hubble Heritage (STScl/AURA)-ESA/Hubble Collaboration

MAXAAFI QULLICHCHIINKE ADABUWWIINKE SEERUWWAA ANFEEXXA SAADINO JABEESSEꞌNAASHSHA GARGAARRE

9. Oose haꞌnooxxi Maxaafi Qullichchiinki adabiinki seeruwwi, afeexxa laꞌo qortaaki mayeete kada dandeetta?

⁹ Oose haꞌnooxxi Maxaafi Qullichchiinki adabuwwiinki seeri, maa laꞌo affeexxa qortuma qortaa wodda, iitta hedheeka qortuma qorteeki mayeete kaddeexxa egeꞌnatee woꞌlaane. Konne qortuma qorteeki Maxaafi Qullichchi hiyyaꞌneexxi yaane dhugaate kaddeexxa addata gophpheete moo, kunni seeri afeexxa laꞌo weliki mariꞌattaa wodda maa hite ifissaaxxa egeꞌna gophpheexxeete? Buuto heenetenna kaddoole, Baro Baro Gammadiki Hedhi! Hiyyaꞌneeka maxaafa laꞌoonfatineꞌe, oose haꞌnooxxi Maxaafi Qullichchiinke adabuwwiinke seeriꞌa, affeexxa saadino nossexxaashsha gargaara dandeettinaan.b

10. Oose haꞌnooxxi Yihowwanni welti affeexxa ifixxa firunte lummisse uuddaashsha gargaara dandeettinaaki hittate?

¹⁰ Oose haꞌnooxxi Yihowwanni welti affeexxa ifixxa firunte lummisse uuddaashsha jajjabeesse. Oose haꞌnooxxa Maxaafa Qullichcha barsiissinaa wodda, Baro Baro Gammadiki Hedhi! Hiyyaake maxaafaꞌni hedheeka qortumuwwanna fakkeennuwwa laꞌoonfatineꞌe qalbe insaꞌneexxi giddo hedheeka yaada egeꞌnatee woꞌlaanne. (Fakke. 20:5) Fakkeennakeꞌe, hafuura adhdha 8 Yihowwaa noꞌoo heqqaakanna laꞌo afeeka gorsa uwwaake eloke jaalinni fakkeessaan. 1 Yohaannisi 5:3 keꞌni mariꞌattineechchi uduma, “Yihowwa eloke jaalo kadeexxa egennonnole, isi assinonnaa hasaꞌneexxa yaane uuda hasissaaki hittate?” hitine qorre. Kunni qortumi shollake fakkaataaxxi hexxeen. Kaddomaleꞌe, ‘Mageni seera uwweeki noꞌoo eeyyaammaxxeten’ hine addantaashsha gargaaraaxxi hexxaan.—Isa. 48:17, 18.

11. Oose haꞌnooxxi Maxaafi Qullichchiinki hundaayyetiki seeri afeexxa laꞌo saaddaashsha gargaara dandeettinaaki hittate? (Fakkeenna 2:10, 11)

¹¹ Maxaafi Qullichchiinka hundaayyetika seera hujeteꞌni hosisa noꞌaa laꞌo affeeki hittate kaddeexxa mariꞌatte. Maxaafa Qullichcha yookiin barratixxa xiqse yaansissinaa wodda Maxaafi Qullichchiinki hundaayyetiki seeri, mini hado haꞌnoka gargaareeki hittate kaddeexxa mariꞌtte. Fakkennakeꞌe, oose haꞌnooxxi bebbedanna addatemeeke kada affeexxa laꞌo egendee? (Ibra. 13:18) Maxaafi Qullichchiinka hundaayyetika seera hujeteꞌn hosisa fayyunte alfinannoshshanna gammandannoshsha gargaartaaki hittate kaddeexxa oose haꞌnooxxenni mariꞌata dandeetinaan. (Fakke. 14:29, 30) Iitta hexxeexxi mariꞌe oose haꞌnooxxi Maxaafi Qullichchiinka gorsa irran caala saaddaasha gargaartaaxxi hexxaan.—Fakkeenna 2:10, 11 yaansis.

12. Mitti anni belti isiki, Maxaafi Qullichchiinki hundaayyetiki seeri affeexxe laꞌoꞌaa saadino afaashsha gargaaraammaki hittate?

¹² Ferensaye hedhaꞌneeki Istivi hiyyemaꞌneeki mitti anni, isinna isixxi miniinxi ama Eetaani hiyyemaꞌneki, 16 woggaki belti insaꞌneki, Yihowwake seeri udumi darre hexxeexxa jaalala hubataashsha gargaareeki hittate kaddeexxa ifiseen: “Iitta hinee isoo qorrennen, ‘Yihowwa hundaayyetika seera ulfeessinannoshsha hasaꞌneeki mayeete? Tinni yaane isi noꞌoo eeyyaꞌneexxa leellishshaaki hittate? Konnee hundaayyetika seera hujeteꞌni hosisa gophphottole ateꞌni maachchi futti hiyya dandeꞌa?’” Tinni mariꞌe Eetani Yihowwa fulcheeke adabuwwiinke seeriꞌa afeexxi adde jabattaashsha assiteen. Isitivi lebeexxi: “Noꞌoki herregi Eetaani Maxaafi Qullichchi giddo hedheeki beekkumi manjiinke beekkuminaaꞌni irran caala hedheeke kadeexxa egeꞌnaashsha gargaaraten” hiyyeen.

13. Haddi oose insaꞌnexxi, Maxaafi Qullichchiinka hundaayyetika seera hujeteꞌn hosissaashsha leenjisa dandeꞌaaki hittate? Fakkeenniki kuli.

¹³ Oose haꞌnooxxi Maxaafi Qullichchiinka hundaayyetika seeruwwa hujeteꞌni hosissaashsha gargaarre. Iitta assa dandeettinaaxxi mitte futtiꞌi, oose haꞌnooxxi barachchotike mineꞌni mitte maxaafixxa kuta yaansissaashsha uuna woddaten. Maxaafi kunni, adabi beloxxa yaane hujaaka manjo yookiin aareti burqaꞌneeka manjo fakkante yaansinsaashsha ajajaꞌneeke kada dandeꞌaan. Oose haꞌnooxxi Maxaafi Qullichchiinke hundaayyetike seerishsha konne maxaafi giddo borreessendeexxi yaane hitta hexxeexxe kaddeexxa hubattaashsha gargaara dandeettinaan. (Fakke. 22:24, 25; 1 Qoro. 15:33; Filph. 4:8) Tinni mariꞌe yaansinsaashsha uuneexxe yaaneꞌni kutta giddo mariꞌantaa wodda, barachchiisanjo insaꞌneekenna welti barattaꞌneexxa barattooleꞌaa dhugaa kula dandeennaashsha gargaartaaxxi hexxaan.

OOSE HAꞌNOOXXI ADDE IFIXXEE UURRITAASHSHA QOPHPHEESSE

14. Kirsitaana kaddeexxi dargaggeeyye weliki mariꞌatatee haꞌurtaaxxi barachcho heente? Mayee?

¹⁴ Kirsitaana kaddeexxi dargaggeeyye adde ifixxee uurra sodaattaaxxi yannna hedha dandeettaan. Dedha barachchotike mineꞌni laaniinxe jijjiirraxxa barachcho barantaa wodda sodaantaaxxi hexxaan. Mayee? Dedha barachchiisanjuwwi laaniinxa jijjiirra dhugaatixxe barachchoshsha asseꞌe barsiisaaxxi hexxaan. Hado kaddinoole oose haꞌnooxxi sodaꞌa belo jabeenniki uurritaashsha gargaara dandeettinaaki hittate?

15. Kirsitaana kadeeki mitti dargaggeessi addataꞌneexxi yaane dhugaate kaddeexxa woꞌma qalbenni addataashsha gargaartaaxxi yaane maachcho?

¹⁵ Oose haꞌnooxxi addattaꞌneexxe yaaneꞌni irran caala kokiinxe kaddaashsha gargaarre. Oose haꞌnooxxi dadandeexxe yaaneka keꞌito egendeemmaxxee sodaata hasissabaan. (2 Ximo. 1:8) Mayee? Buutotinna heddi sayintisitoot hedho heddendebaangi dedhangeꞌni afendeen hiyye addataꞌnebaan. Kunni sayintisitoot, qorre qoꞌnisa dandeenabaaxxxa hedho affeexxa yaanuwwa dadeeki, mitti jabaka beekkuma afeeki dadalli hedheexxa hedheeke tarjanaaꞌni hubateꞌeen. Tennenaaꞌni kexxeexxa, butta duuchchaꞌni barsiinsaꞌneexxa laaniinxe jijjiirraxxa barachchco addantaꞌnebaan. Oose haꞌnooxxi weli dayyuwwinna dayyuwwa hedho afendeeki dadatitenc hiteꞌe addataꞌneeki mayeete kaddeexxa alalchati adde ifixxa jabeessedha dandeettaan.

16. Hadi oose insaꞌnexxi dadatike Magenoꞌni affeexxe addeꞌa uurritaashsha gargaara dandeꞌaaki hittate? (1 Pheexiroosi 3:15) (Fakke uudi.)

¹⁶ Oose haꞌnooxxi dadatike Magenoꞌni affeexxe addeꞌaa uurritaashsha qophpheesse. (1 Pheexiroosi 3:15 yaansis.) Jw.org teꞌni “Dargaggeeyetika Qortuma—Dadateꞌni moo Laaniinxe Jijjiirraꞌn?” hiyyaꞌneeka aanchi aanchiki fulaꞌneeka yaada oose haꞌnooxxinni mariꞌatati eloxxa laꞌo alfa dandeettinaan. Okkooꞌni oose haꞌnooxxi Dadalli hedheexxa weli manjinna egeꞌnaashsha gaargaaritoꞌa addachchiisaake yaadaꞌni mariꞌatte. Barachchotike minike jaaluwwinni moroma hasissabaaxxanna qallasse. Mitti manji mariꞌatatee fedhiitike kadaa wodda shollakanna addachchiisaaka yaada laꞌoonfantaashsha jajjabeesse. Fakkeennakeꞌe, barachchotike miniki jaali iitta hiyyaaxxi hexxaan; “Ani addatannoki uudannoxxe yaane callan, Mageno kinni ijjenda uude egeꞌnebeꞌnon.” Mitti Kirsitaana kadeeki dargaggeessi iitta hiyye hiissa dandeꞌaan. “Fakkeennakeꞌe, leemmeessi manjiinki hedhebaaba gongomi giddo meꞌitaꞌni mitte mineꞌni futti hitette hino. Maa hitee heddato? Kunni mini isoo ijaareeki manji hedheexxa kokeessaꞌnoole, iimateꞌninna buttateꞌni hexxeexxi duuchchiinxi yaane hedinotixxa dandeette afeeki mitti dadalli hedheexxa kokeessitabaa?” hiyya dandeettaan.

17. Hadi oose insaꞌnexxi Maxaafi Qullichchiinxa dhugaa welekee kuldaaxxa futtii halsitaashsha jajjabeessa dandeꞌaaki hittate? Fakkeenniki kuli.

¹⁷ Oose haꞌnooxxi Maxaafi Qullichchiinxa dhugaa welekee kuldaaxxa futtii halsitaashsha jajjabeesse. (Roome 10:10) Oose haꞌnooxxi adde ifixxa welekee kulatee assitaaxxa woꞌlaancho, mitte anno lekkati meꞌatee assitaaxxe woꞌlaanchonni fakkeessa dandeetinaan. Mitte anno taakkaa hitta uurrinaaxxa barattaan. Okkooꞌni laana mitte mitte takkaaro adhdha barataan. Weli fakkaattaaxxa, Kirsitaana kadeeki mitti dargaggeessi adde ifixxa welekee kulaa wodda shollaka ora laꞌoonfataa qico hadi leellisha dandeꞌaan. Fakkeennakeꞌe barachchotike minika jaalo iitta hiyye qora dandeꞌaan: “Injineerooti mitte yaane hujaꞌneeki dadendeexxe yaanenaaꞌni uudaꞌnite kaddeexxa egendeete? Dadeeki Hedhee? hiyyaꞌneeke umi yaadinni aanch aanchiki fuldaꞌneexxa viidiyo leellisheechchi uduma iitta hiyya dandeꞌaan: Sayintisitooti dadendeexxe yaanenaaꞌni uude giisseexxe yaaneꞌa summa alfaꞌneexxe kaddoole, keꞌitokeꞌni dadendeexxe yaneꞌaata saadino hasissaaki ayyiꞌaate? Iitta hedheeki shollaki ori, caaldeexxa yaane egeꞌnatixxi yorte insaꞌnexxi lebbaꞌni meꞌitaashsha assaaxxi hexxaan.

OOSE HAꞌNOOXXIXXI ADDE JABAATTAASHSHA GARGAARA ITTIN EDIꞌAA SUFFE

18. Hadi oose insaꞌnexxi Magenokeꞌni affeexxi adde jabaattaashsha gargaara ittin ediꞌaa sufaaki hittate?

¹⁸ Heꞌnaanneki Yihowwaꞌni adde afebaaki manni woꞌmeexxe buttaꞌniten. (2 Pheexi. 3:3) Tenneꞌaa oose haꞌnooxxa Maxaafa Qullichcha barsiissinaa wodda, oose haꞌnooxxi Mageniinxe Qaaleꞌaanna isi fulcheeke adabiinke seeruwwiꞌa affeexxi saadino lebbaashsha assaake yaaduwwaꞌni, qoꞌne assitaashsha jajjabeesse. Oose haꞌnooxxi Yihowwa dadeexxe manbeꞌa assitaaxxe yaanuwwaꞌni miꞌlachcho assitaashsha gargaarati, hedinotixxi dandeette insaꞌnexxi baꞌlattaashsha dammasse. Manbeꞌa assaake oruwwinni muuxendeexxe Maxaafi Qullichchiinxe tinbituwwaa saadino anfaashsha gargaarre. Duuchchiinxi iimi darre oose haꞌnooxxinni welti kadhatte, ittanni insaꞌnaanna kadhatte. Iitta assitinaꞌneexxe kaddoole, oose haꞌnooxxixxi adde jabaattaashsha gargaaratee assitinaꞌneexxa woꞌlaancho Yihowwa eebbisaaxxa kokiinke kada dandeetinaan.—2 Zeena 15:7