Yaansisalluwwiinka Qortumuwwa

1 Ximootwosi 5:21 keꞌni “mellendeexxe erganna” hiyyendeexxi heente?

Hawaarya Phawuloosi Ximootwosiꞌaa iitta hiyyeꞌe borreesseemman: “Tola jibbatenaaꞌninna gamisatenaaꞌni bayyateeke orinni heqqitattoshsha Mageni edo, Yesuusi Kirsitoosi edonna mellendeexxe erganna edo jabeesseꞌe ajajaannen.”—1 Ximo. 5:21.

Edinsennexxi mellendeexxe hiyyendeexxi erganna heente kaddeexxa uundo. Tinni erganna 144,000 Kirsitaanabaan. Phawuloosi Ximootwosiꞌaa tenne daddaabbe borreesseexxa yanna hariiremeeki Kirsitaani reyotenaaꞌni keꞌe iimiꞌaa meꞌa safeemmabaan. Okkone wodda hawaaryaatenna weli Kirsitaani hariiremeeki manfasiinxe dada kada gopheemmaxxee, “mellendeexxe erganna” hiyyendeexxi insaꞌnetebaan.—1 Qoro. 15:50-54; 1 Tese. 4:13-17; 1 Yoha. 3:2.

Ittan “mellendeexxe erganna” hiyyendeexxi baꞌnetike wodiꞌi wodda Magenokeꞌni jallatteemmaxxe ergannabaan. Tinni erganna Seexana hordofati durriisuwwa kaddeexxen, ittanni Yesuusiinna morondaammaxxen. (Dada. 6:2; Luqa. 8:30, 31; 2 Pheexi. 2:4) Ediꞌaa insaꞌnenna 1,000 woggaꞌaa haranga qeerraaxxe bale giddo usuremmaan. Okkoneechchi uduma kinni Daabiloosinni welti baꞌnaan.—Yihu. 6; Leellisha. 20:1-3, 10.

Phawuloosi “mellendeexxe erganna” hiyyeexxi Magenonnaa Yesuusi Kirsitoosii, kiphphaaxxe iimateꞌn hexxaꞌneexxe erganna kada hasissaan.

Heddi kuminni laakkoꞌendaaxxi addatendeexxi erganna hexxeen. (Ibra. 12:22, 23) Duuchchiinxe ergannaaꞌa mitte yannaꞌni weli fakkaattaaxxi huje uwwendaani hine heda hasissabaan. (Leellisha. 14:17, 18) Fakkeennakeꞌe, 185,000 Asoorika sannachcha mitti ergantichchi calli balleesseemmaxxa qalli hiyye. (2 Neg. 19:35) Dedha heddo ergannaaꞌa Yesuusixxe Mootumma giddiiꞌni “gufo kaddaaxxa yaanuwwanna jallo hujaaka manna” qoccaashsha huje uwwendeexxi hexxaan. (Mat. 13:39-41) Wele erganna kinni “isiꞌaa mellemeeka manna” iimiꞌaa bukki assitaaxxi hexxaan. (Mat. 24:31) Ittanni wele ergannaaꞌa ‘ora noꞌoke duuchchaꞌni noꞌoo heqqitaashsha’ ajaji uwwemeen.—Faaro 91:11; Mat. 18:10; Matwoosi 4:11; Luqqaasi 22:43 welti hokkokkisiisi.

Taakkaka Ximootwosi 5:21 keꞌni “mellendeexxi erganna” hiyyendeexi, Mageniinke ardinni abidendeexxa gargariti hexxeexxa huje hujjaashsha dhaabendeexxe erganna kada gophpheebaan. Xiqsetike qarqaraꞌni hedheeke yaadaꞌni, Phawuloosi gubaꞌetiki ulfinni hasisaaxxa geedhe uuddaaxxa beekkumiinka gorsa uwween. Geedhe uwwendeexxa maganne “tola jibba belo yookiin gamisa belo” abida hasissaan. Ittan yaane mitte deettesateenna murtetee muddamma hasissabaan. Insaꞌne assinaꞌneexxi yaane duuchchi “Mageni edo, Yesuusi Kirsitoosi edonna mellendeexxe erganna edo” kaddemmaxxeꞌe, Phawuloosi manfasiinxe akeettenni uwweeka gorsa qalbe mittenni hordofa hasissaan. Mitte mitte erganna gubaꞌeti welti abidendeexxa huje hujjaashsha, tinniirinna heqqitaashsha, lassatixxa huje akeekkaashshanna Yihowwabaa riippoorte assitaashsha huje uwwendeexxi egeꞌnendeexxen.—Mat. 18:10; Leellisha. 14:6.