Addatendeexxa Mageniinxa Erganna Fakkaatte

1-2. (a) Noꞌoxxenna ergannatixxe oddoꞌn hexxeexxi gargarunte maachcho? (b) Mageniinxa erganna fakkaantannoki hoone oruwwinnite?

YIHOWWA Ateeꞌe gargariti hedheekenna jaalala afeeke, isooꞌo mageneeffataꞌneeke mini hadixxe una kaddattoshsha dhugaatibaa yeꞌeen. Konne mini hadi giddo miiloonuwwati laakkoꞌendaaxxi addatendeexxi erganna afendaan. (Dan. 7:9, 10) Erganna uuddaaxxa hendanno wodda, insaꞌne noꞌonaaꞌni gargariti hingeeki hittate kaddeexxa hendannoxxi hexxaan. Fakkeennakeꞌe, erganna dadendeeki manjiinki belti dademeexxe qeerraaxxe wogguwwa edi darren. (Iyo. 38:4, 7) Insaꞌne noꞌo iimi darre jabaxxa hunna anfeen. Ittan manji cubbaaleeyyeten, insaꞌne kinni qulliyyeten.—Luq. 9:26.

² Kaddomaleꞌe, tinni gargarunte hexxoolenna erganna fakkaantannoki heddi oruwwi hedheen. Fakkeennakeꞌe, noꞌonna ergannatishshanni Yihowwaka eloka adaba leellisha dandeennannon. Insaꞌneshshnni ifiꞌaani murteessedhatixxa mabite anfeennen. Ergannatishshanni ifika summannaa gargariti hexxeexxa ayyunte, ittan Yihowwaxxe ergachchoꞌni hunjannoxxa gargariti hexxeexxa huje anfeennen. Ittin lebendaaxxa, ergannatishshanni noꞌonna dadatika anna noꞌoka mageneeffatatixxa halcha anfeennen.—1 Ph. 1:12.

3. Addatendeexxe ergannanaaꞌn maa barantanno?

³ Ergannati noꞌoo fakkeesitaaxxi heddo yaanuwwa hexxemmaxxeꞌe, eloke fakkeenna insaꞌnekenaaꞌn jajjabeenna ittan heddo laꞌo affeexxa barachcho alfinannon. Tenne qoꞌneꞌni, ifi heeshshi assati, manjo eeyyati, ossuntetinna gubaꞌetika caꞌinne heqqati addatendeexxe ergannaka fakkeenna hordonfanno qico uundannon.

ERGANNA IFI HEESHSHI ASSATIKA ADABA AFFEEN

4. (a) Erganna ifi heeshshi assatika adaba leellishshaꞌneeki hittate? (b) Erganna ifi heeshshi assitaꞌneeki mayeete? (Faaro 89:7)

⁴ Addatendeexxi erganna ifi heeshshi assatika adaba affeen. Erganna qeerraaxxe yannaxxa egeꞌna, hunnannaa beekkuma affeexxe kaddoolenna, Yihowwaxxe akeetteꞌaa hirendaan. (Far. 103:20) Uwwendeexxa huje hujjaa wodda assiteexxe yaaneꞌaa ijjenda ifi dukkabaan, yookiin manjiinxe hunna iimi darre hexxeexxa hunna, affeexxa leellishatee woꞌlaandabaan. Summi insaꞌneki egeꞌnema gophoolenna, Mageni hasaꞌneexxa yaane gammashshoti hunjaan.a (Dad. 32:24, 29; 2 Ne. 19:35) Yihowwaka ulfinna ifiꞌaa adhdhinabaan. Erganna konne qico ifi heeshshi assitaꞌneeki mayeete? Buutotinna, Yihowwaa eetaammaxxeenna qalbeti isooꞌo ulfeesitaammaxxeeten.—Faaro 89:7 yaansis.

5. Mitti Mageniinki ergantichchi hawaarya Yohaannisika dedha kuleexxa yanna, ifi heeshshi assatika adaba afeexxa leellisheeki hittate? (Fakketanna uudi.)

⁵ Erganna ifi heeshshi assatika adaba affeexxa leellishaaka mitte fakkeenna uudi. Mitti summiki kulemebaaki ergantichchi 96 G.W.ꞌni, manbeꞌa assitaaxxa leellisha hawaarya Yohaannisiꞌni leellisheemman. (Lel. 1:1) Yohaannisi tennee leellisha uudeechchi uduma maa asse? Mageniinka ergantichcho sagadatee woꞌlaaneemman. Kaddomaleꞌe kunni addatemeeki ergantichchi: “Heqqedhi! Iitta assitoxxe! Ani atinninna kaddoꞌo . . dayyuwwa atixxen welti ergatemaanneke garbichchan, Magenokee sagadi!” hiyyati sagadabaashsha rake kuteen. (Lel. 19:10) Kunni hittatta hedheeke ifi heeshshi assatike hiissichcho! Kunni ergantichchinna ulfinna yookiin saadino ifiaꞌaa hasaammakemmabaan. Isinna rakeexxi, Yohaannisi miꞌlachcho isixxa Mageno Yihowwabaa assaashsha kuleen. Eettenee yanna ergantichchi kunni Yohaannisiiꞌi tuffateemmabaan. Kunni ergantichchi, Yohaannisi irra qeerraaxxe yannaa ergatemeeke yookiin jabaxxa hunna afeekenna kadoole, Yohaannisini welt ergatemaꞌneeke garbichcha kadeexxa ifi heeshshi assati haasoꞌeen. Ittan cimaaleessa kadeeke Yohaannisika dedha kuleeki, isooꞌo miidhaa garinnitebaan. Tenne irra isooꞌo haasoosseeki ulfinnikiten. Ergatantichchi kunninna Yohaannisi tennee yaane asseeki, uudeexxe yaanenaaꞌn kexxeexxa manbeꞌa hiyyeete kadeexxa hubata gopheebaan.

6. Ifi heeshshi assati erganna fakkaata dandeennannoki hittate?

⁶ Ifi heeshshi assati erganna fakkaata dandeennannoki hittate? Noꞌonna insaꞌneshshanni uwwendeexxa huje hunjanno wodda, ifi lumminsebeꞌnongi yookiin assinennexxe yaaneꞌaa, summi noꞌoki yeꞌemaashsha assinebeꞌnongi huja dandeennannon. (1 Qo. 4:7) Wele manji irra Yihowwaa qeerraaxxe yannaꞌaa ergatemmoonnole, yookiin gargariti hexxeexxa mabite anfoonnole wele manjonaaꞌn saꞌneenneshsha assine ifi uuda hasissaabaan. Yohowwaxxe ergachchoꞌn caaldeexxa maganne anfanno wodda irran caala wele manjonaaꞌn jala heꞌneenneshsha assine ifi uuda hasissaan. (Luq. 9:48) Ergannatishshanni welekee ergatemmanno maleꞌe, assinaannexxe yaanenaaꞌn kexxeexxa manji noꞌoo saadoꞌaa hansaaꞌnon.

7. Mitti manji dedheexxa kullanno wodda yookiin gorsinanno wodda ifi heeshshi assinaannexxa leellinshannoki hittate?

⁷ Mitti addetiki jaali noꞌoki yookiin oose noꞌoxxi deeteexxa kullanno wodda yookiin gorsinanno wodda ifi heeshshi assinaannexxa leellisha dandeennannon. Gorsinanno wodda jabeesine gorsinannoxxi hexxaan. Kaddoolenna, Yohaannisika dedha shaqqunteti kuleemmake ergantichchishsha gorsinaanneka manjo miinebeꞌnongi jabeesineꞌe gorsa dandeennannon. Ifi lumminseꞌe uuda gonphaannole, ulfinnikinna mararteti Maxaafi Qullichchiki gorsinannon.—Qol. 4:6.

ERGANNA MANJO EETAAN

8. (a) Luqqaasi 15:10 xxe hundaayyeshsha, erganna manjokee jaalala affeexxa leellishsheeki hittate? (b) Erganna lassatixxe hujeꞌni assitaꞌneexxi yaane maachcho? (Fakke hexxeexxanna uudi.)

⁸ Erganna manjokenaaꞌn bayyatteexxe dadabaan. Insaꞌnenna manjo eenaan. Mageniinke gedhebonaaꞌn gargariti higeeki manji, aadde aageꞌe Yihowwabaa higaa wodda yookiin mitti manji baꞌnetike oranaaꞌn dhugaatibaa dagaa wodda gammaddaan. (Luqqaasi 15:10 yaansis.) Erganna Mageniinxe Motummaxxa dhugaaꞌa lassatixxa hujenna kiphphaan. (Lel. 14:6) Insaꞌnenna toggichcha kaddeeke orinni manjokee lassa gonphoolenna, Yihowwaꞌa egeꞌnatee hasaꞌneeke manjibaa baꞌlisanoole akeenkaan. Erganna duuchchinii wodda manjiinbaa marronnaaꞌa noꞌoo akeekkeexxa afoꞌo woꞌmineꞌe haasoꞌa dandeennabeꞌnoxxi egeꞌnendeexxen. Yihowwa manjo gargaarateꞌe yookiin ergantooleeyye isixxa akeekateeꞌe manfasa qullichchanna laꞌoonfata dandeꞌaan. (Huj. 16:6, 7) Kaddoolenna erganna baꞌla qicoꞌn laꞌoonfataan. Tenneꞌaa gammachchiissaꞌneexxa odo mannakee lassinanno wodda erganna noꞌoo kiphphaꞌneexxa addata dandeennannon.—“Kadha Insaꞌnexxi Laqqendeꞌeen” hitaꞌneexxa kollo uudi.

9. Manjo eeyyati erganna fakkaata dandeennannoki hittate?

⁹ Manjo eeyyati erganna fakkaata dandeennannoki hittate? Mitti manji Yihowwabaa higeexxa egeꞌnishshanji kulemaa wodda ergannatishshanni noꞌonna gammada dandeennannon. Dayyo konnee higgeen adhdhateenna isoo eenaannexxa kokeessateꞌe dandeennennexxa yaane duuchcha assinannon. (Luq. 15:4-7; 2 Qo. 2:6-8) Lassatixxe hujeꞌninna dandeenennexxa duuchcha assati erganna fakkaata dandeennannon. (Mek. 11:6) Ittan erganna gammachchiissaaxxa odo lassatixxe hujeꞌn noꞌoo kiphphammashshanni, noꞌonna dayyuwwa noꞌoxxa ergachchoteꞌn kinphannoka ora hasa dandeennannon. Fakkeennakeꞌe, reefi ergachcho saffeexxe baꞌlisanoolen ergatensha fulateꞌe pirograama fulchedha dandeenanno? Cindeexxi yookiin fayyuntetixxa koꞌo affeexxi dayyuwwa ergachcho fuldaashsha gargaara dandeennaanne?

10. Saaraxxe hedhotixxe barannonaaꞌn maa barantano?

¹⁰ Heꞌnenneki jeeji assa dandeennannoxxa yaane gabaloole maa assinanno? Ergannati welti lassatixxa huje hunjannoka wele ora taꞌanna haalsa dandeennannon. Hinde giddo hexxaꞌneexxe Saara,b hiyyendaꞌneexxe dayyoka hedhotika raaga uundo. Isenna 20 wogguwwa qajeellisanjo kadde ergatendaꞌni turteechchi uduma jaba qicinni dhibendeꞌe maꞌnatenaaꞌni keꞌa dandeꞌa gophpheen. Tennenaaꞌn kexxeexxa haranga yaaddeen. Kaddomaleꞌe, manfasiinxi dayyuwwa isexxi duuchchinii wodda Maxaafa Qullichcha yaansissaashsha assiteeke jaalalatike gargaarsinaaꞌn kexxeexxa Saara laaniginni qajeelto uushsho affaꞌn meteen. Konne jeejini giddo hexxe ergata dandeettaaka wele haarooka ora alfexxeen. Ofoldenna daddaabbe borreessa dandeꞌa gophphaamaxxeꞌe lassitaamaki bilbili callinitemman. Tenneꞌaa isenna higgeꞌe qortaammake manjibaa bilbila bilbildeen, insaꞌnenna, weli manjinna Maxaafa Qullichcha barata hasaaki hedha dandeꞌaaxxa kulleen. Itti aana kaddeexxi yaane maachcho? Saara heenooke agenjuwwi giddo barsiisateꞌe hunna isexxi iimi darre hedheeka 70 Maxaafa Qullichcha barataaka manjo affeen. Tenneꞌaa mitte mitte manna gubaꞌe giddo hexxeexxi dayyuwwa barsiissaashsha uuteen. Konne manni giddiiꞌn heddi taꞌa gubaꞌeteꞌn afemaꞌneen. Lassatixxe hujeꞌn dandeetteexxa duuchcha assitaꞌneexxe Saarashsha hexxeexxe dayyuwwanni welt erganna huja hittatta gammaddashsha assitaaxxe yaane!

ERGANNA JABEENNIKI OSSITAꞌNEEXXA LEELLISHSHEꞌEEN

11. Addatendeexxi erganna manbeꞌa assaa garinni jabaatte ossiteexxa leellishsheeki hittate?

¹¹ Addatendeexxi erganna jabaatee ossati eloke fakkeenna kaddaan. Insaꞌnenna heddo kuma wogguwwaꞌa ille uushshonna fuggoxxa yaane ossineen. Insaꞌneni welti ergatemaammaki Seexaninna wele erganna, Yihowwaꞌn jallattaa wodda uundeen. (Dad. 3:1; 6:1, 2; Yih. 6) Maxaafi Qullichchi, mitte addatemeeka Mageniinka erganjo, jabaxxa hunna afeeki mitti durriisi toggichcha kadeeke orinni moromeemmaxxa haasoꞌaan. (Dan. 10:13) Tennenaaꞌni caaldeexxa, erganna manjiinke beltike raagaꞌn heenooki manji calli, Yihowwaa dhugaatike orinni mageneffataaꞌnaꞌa uuddeen. Tinni yaane duuchchi hexxoolenna, addatendeexxi erganna, Yihowwaa gammashshotinna hinaaffeti ergatenshsha ittin suffeen. Insaꞌnenna Mageni mureexxe yaannaꞌn ille uushsho duuchcha balleessaaxxa egenneꞌeen.

12. Jabaante ossinannoshsha noꞌoo gargaartaaxxi yaane maachcho?

¹² Jabaante ossati erganna fakkaata dandeennannoki hittate? Ergannatishshanni noꞌonna ille uushshonna moronsha geltaaꞌnaa uundannoxxi hexxaan. Kaddomaleꞌe, noꞌonna insaꞌneshshanni Mageni mureexxe yaannaꞌn elobaaxxa yaane duuchcha balleessaaxxa addantaannen. Tenneꞌaa noꞌonna ‘adde wonxe eloxxa huje hujatenaaꞌn’ udumaa higa gophat, addatendeexxe ergantooleka fakkeenna hordonfannon. (Gel. 6:9) Ittan Mageni ossinannoshsha noꞌoo gargaarateꞌe kako aageen. (1 Qo. 10:13) Ossuntenna gammashsho anfannoshsha gargaaraaka manfasa uwwaashsha Yihowwabaa kadhata dandeennannon. (Gel. 5:22; Qol. 1:11) Moronsha ateꞌn geltoole maa assitatto? Woꞌma qalbeni Yihowwaꞌn addati malee sodaattoxxe. Yihowwa duuchchinii wodda atee gargaaraan, ittan jabeessaan.—Ibr. 13:6.

ERGANNA GUBAꞌETIKA CAꞌINNE HEQQITAAN

13. Tenne muuxamiinxe barruwwaꞌni, erganna haranga gargariti hexxeexxi hujjaꞌneexxi huje heente? (Matwoosi 13:47-49)

¹³ Muuxamiinxe barruwwaꞌn Yihowwa erganna hujjaaxxa haranga gargariti hexxeexxa huje uwween. (Matwoosi 13:47-49 yaansis.) Lassatixxi huje gargariti hedheeke milooneti laakkoꞌemaake mannixxa hubanno butatteen. Konne mannanaaꞌn mitti mitti dhugaatike Kirsitaana kadateꞌe hasissaaxxa tarkaaffe adhdheen, weli kinni iitta assebaangi gateen. Erganna “fuggaaleeyye qulliyyetenaaꞌn gargariti hiissateꞌe” dhaabendeꞌeen. Itta hiyyo insaꞌnaa gubaꞌe xuroositaaxxe yaanenaaꞌn heqqaatixxi huje uwwendeꞌeen hiyyoten. Kaddoolenna gargariti hexxeexxe buutonni noꞌonni bukki hiyya waaleeki huuni manjinna ijjenda langaxxa higabaan yookiin gubaꞌe giddo ijjenda mitte rakkonna hexxabaan hiyyotebaan. Kaddomaleꞌe erganna gubaꞌe xuroositaaxxe yaanenaaꞌn heqqateꞌe jabaatteꞌe hujaꞌneexxa addata dandeennannon.

14-15. Noꞌonna gubaꞌetika manfasiinkanna adabiinka caꞌinne heqqati ergannatika fakkeenna hordonfannoki hittate? (Fakkuwwatanna uudi.)

¹⁴ Noꞌonna ergannatishshanni gubaꞌetika caꞌinne heqqati insaꞌnee fakkaata dandeennannoki hittate? Gubaꞌe noꞌoxxi adabikinna manfasiki xuroottabaashsha noꞌonaaꞌn heqqendaaxxa yaane duuchcha assatiten. Tenneenna assa dandeennannoki, eloka jaalo melledhatinnaa elobaaxxa yaane hunjannoshsha noꞌoo tirtirsitaaxxe yaanenaaꞌn bayyatati qalbe noꞌoxxa heqqedhateꞌe jabaxxa woꞌlaancho assatiten. (Far. 101:3) Addetiki jaaluwwi noꞌokinna Yihowwaa addateme hedhaashsha gargaara dandeennannon. Fakkeennakeꞌe, mitti addetiki jaali noꞌoki jabaxxa cubbo hujeexxa egennonnole maa assa hasissa? Addetika jaalo noꞌoka eenaannaxxeꞌe hujeexxa cubbo geedheteꞌn mare kulaashsha jajjabeessinannon. Isi asseexxa yaane mare kula gophoole, noꞌo kuliyyo hasissaan. Manfasiinxe hedhonni gopheeki huuni addetiki jaali noꞌoki rake gargaarsa alfaashsha hansaannen!—Yaq. 5:14, 15.

¹⁵ Yaadisaaxxe kaddoolenna, mitte mitte jabaxxa cubbo hujeeka manjo gubaꞌetenaaꞌn fulcha hasissaan. Iitta hexxeexxi yaane kadda wodda insaꞌnenni ‘madda uurrinsannon.’c (1 Qo. 5:9-13) Tinni qophphe gubaꞌe xuroottabaashsha assitaan. Tennenaaꞌn caldeexxa gubaꞌetenaaꞌn fulchineeke manninni jaalooma waalati insaꞌnee eenaannexxa leellinshannon. Tinni jabaxxi noꞌoxxi murte, cubbo hujeeki manji Yihowwabaa higaasha assitaan. Insaꞌnenna hingaa wodda Yihowwaninna ergannati welti noꞌonna gammandannon.—Luq. 15:7.

16. Erganna fakkaatatee woꞌlaandaateki hoone oruwwinnite?

¹⁶ Yihowwa erganna isixxa egennannoshshanna insaꞌnenni welti hunjannoshsha assa noꞌaa lumoke ulfinnan! Tenneꞌaa manjo eeyyati, jabaate ossati, ittan gubaꞌe adabikinna manfasiki xuroottabashsha heqqati fakkeenna insaꞌneka hordonfo. Addatendeexxa erganna fakkaantaannole, baro barokee Yihowwaa mageneeffataꞌneeke mini hadixxe una kandannon.