Qalbe Giddixxenni Yihowwabaa Kadhantannoki Hittate?

1-2. (a) Qalbe noꞌoxxi giddo hexxeexxa yaane, Yihowwaꞌni farri assine kullabeꞌnoshsha kuttaaxxi yaane maachcho? (b) Yihowwa kadha noꞌoxxa gammashshoti laqaꞌneexxa hitta egeꞌna dandeennanno?

MITTE mitte yanna, kadha atixxi ise iseenni calla hiissite kadhattaatteeshsha, iimi iimi giddixxe kaddeeshsha yookiin kadhantammaxxeꞌe calla kadhattaattechcho fakkaattaꞌnee? Yaane iittate kaddoole, iitta fakkaattaꞌneeki ateꞌni callabaan. Buutotinna barra barrandeꞌni huje noꞌoꞌni birra saxxaammaxxeꞌe, harumaaxxa kadha calla kadhatatee yorrannoxxi hexxaan. Yookiin summa isika yeꞌandee gennabeꞌnoni hine hendaannaxxeꞌe, qalbe giddo hexxeexxa yaane Yihowwaꞌni farri asse kula haꞌurtaaxxi hexxaan.

² Maxaafi Qullichchi Yihowwa lummise uudaꞌneexxi kadha laagada dancheessine kadhantannoxxe kaddeebaaki, ifi heeshshi assineꞌe qalbe giddixxenni kadhantannoxxe kaddeexxa kokkeessaan. Isi “shaqqa manni shiqisaaxxa kadha” laqaan. (Far. 10:17) Buutotinna isi qalbe mitteni noꞌaa hedaammaxxeꞌe, kadha noꞌoxxeꞌni hinaannexxa yaane duuchcha gammashshoti laqaan.—Far. 139:1-3.

3. Tenne qoꞌneꞌni mariꞌantaanneki qortumuwwi hoonte?

³ Ifi iitta hine qorra dandeennannon: Woꞌma qalbenni Yihowwabaa kadhata dandeennannon hinaanneki mayeete? Kadha noꞌoxxi qalbe giddixxe kaddaashsha assinannoki hittate? Maxaafi Qullichchi giddo borreessendeexxi, qalbe giddixxenni shiqqeexxi kadha, kadhantaanneke oraꞌni jijjiirra assinannoshsha gargaartaaki hittate? Ittan gelteexxe rakkonaaꞌni kexxeexxa maa hine kadhantannoxxa mekki hinanno wodda maa assa dandeennanno? Konne qortumuwwika hiissichcho uundo

QALBE WOꞌMANNI YIHOWWABAA KADHATA

4. Mitte qalbenni Yihowwabaa kadhantannoshsha noꞌoo gargaartaaxxi yaane heente? (Faaro 119:145)

⁴ Yihowwa noꞌaa qabboꞌaa hasaꞌneeke addatemeeke jaalo kaddeexxa egeꞌna, mitte qalbenni isibaa kadhatannoshsha gargaartaan. Faaro 119 ki borreessalli Yihowwaaꞌa iitta hedheeke jaalishsha asse uudaamman. Kaddomaleꞌe, isoꞌni rakko geltaammabaan hiyyotebaan. Mitti mitti fuggoki manni summa isika balleessaamman. (Far. 119:23, 69, 78) Gonphe ifixxanna dandeꞌe hedha hasissaamman. (Far. 119:5) Kaddoolenna, qalbe isixxi giddo hexxeexxa yaane Yihowwa edo farri asse haasoꞌateꞌe sodaateemmabaan.—Faaro 119:145 yaansis.

5. Qajeellichcha kadebaaki yaadi, Yihowwabaa kadhantabeꞌnoshsha assoꞌaa waala hasissabaaki mayeete? Fakkeenniki kuli.

⁵ Yihowwa mitti jabaxxa balleessa hujeengi manji midde, isibaa kadhataashsha hasaꞌneen. (Isa. 55:6, 7) Tenneꞌaa qajeellichcha kadebaaki yaadi, Yihowwabaa kadhantabeꞌnoshsha assoꞌaa waala hasissabaan. Fakkeennakeꞌe, mitti rophphiyya oofaaki manji gargaarsa hasaa wodda ayyeretixxe tiraafikenni haasoꞌa dandeꞌaaxxa egeꞌneꞌeen. Oofalli kunni ora goreexxe yookiin dedha hujeexxee shookeexxi insaꞌnee haasoossa waalaa? Waawoti! Weli fakkaattaanxa deenonnolenna yookiin cubbo hunjonnolenna, woꞌma qalbenni Yihowwabaa kadhata dandeennannon.—Far. 119:25, 176.

KADHA NOꞌOXXI QALBE GIDDIXXE KADDAASHSHA ASSINANNOKI HITTATE?

6-7. Yihowwa afeeka adabuwwa heda kadha noꞌoxxi qalbe giddixxe kaddaashsha gargaartaaki hittate? Fakkeenniki kuli. (Lekkatibaꞌika qallassanjonna uudi.)

⁶ Qalbe noꞌoxxi giddo hedheeka yaadanna giddixxa hedino noꞌoxxa Yihowwa edo farri assine kullanno wodda kadha noꞌoxxi qalbe giddiiꞌni burqiteexxe kaddaꞌni metaan. Kadha noꞌoxxi qalbe giddiiꞌni burqiteexxe kaddaashshata gargaartaaxxi yaane maachcho?

⁷ Yihowwa hitta hedheeka adabuwwa afeexxa hedde.a Yihowwa hitta hedheeka adabuwwa afeexxa hendennexxe qixxeꞌni, yaada noꞌoka isi edo ifise kula shollexxaꞌni metaan. (Far. 145:8, 9, 18) Mararte afebaaka anna affeemmaxxa Kirsitiini hiyyendaaxxe dayyoka fakkeenna uundo. Kirsitiini iitta hiteen: “Yihowwaa anniinsha haasoossa aniꞌaa shollaxxemmabaan. Qullitte kada gopheennaxxeꞌe, isi anenaaꞌni bayyataachcho fakkaattaamman.” Isee gargaareeki Yihowwaki adabita hoonte? Isenna iitta hiteen: “Yihowwaxxi addatendeexxi jaalala sodaatabeꞌnoshsha anee gargaarteen. Isi duuchchinii wodda anee gargaaraaxxa egeꞌneennen. Matanga ibonnole isi anee jaalalati iimiꞌaa keꞌissaan. Tinni yaanenna giddixxa gammashsho anxa, ittan qalbe anxi giddo hexxeexxa yaaddo isoꞌni kuꞌlannoshsha gargaarteen.”

8-9. Kadhattebexxo edi darre kadhattaattexxa yaane heda maa laꞌo affee? Ifisi.

⁸ Kadhattaattexxa yaane hedi. Kadhattebexxo edi darre, mitte mitte qortumuwwa ifi qora dandeettatton. Fakkeennakeꞌe: ‘Taꞌixxe yannaꞌni aneꞌni haranga haꞌurteexxi yaane maachcho? Ani gattoowwaali hiyya hasissaꞌneeki manji hedhee? Yihowwaki gargaarsi hasisaꞌneexxi rakko shiqixxe yannaꞌni aneꞌni geltee?’ (2 Ne. 19:15-19) Ittan, Yihowwake summinni, Mootumma isixxenninna fedhii isixxen welti abidendaaxxe heene yaanuwwaa, Yihowwaa kadhantannoxxa Yesuusi barsiisseeka ora hordofa dandeennannon.—Mat. 6:9, 10.

⁹ Aliska hiyyendaaxxi dayyo, miniinki anni iseki jabaxxa sammotixxa kansere afeexxa egendeexxa yanna kadhata iseꞌni haꞌurteemman. Isenna yanna eetteneꞌe: “Yoꞌoshsha yaadennaxxeꞌe, kadhatonnaa hiyyanno wodda kadhatannonxi yaane anenaaꞌni baxxaamman” hiteen. Isee gargaarteexxi yaaneta maachcho? Isenna: “Kadhata safebeꞌno edi darre yaada bukki assedhatee hekki hiyye hedannon, tinninna ifiꞌaan calla kadhata hasissabaaxxa hubatannoshsha gargaarteen. Iitta assanno wodda yaadiki ititannon, qalbe giddixxenninna Yihowwabaa kadhata dandeꞌannon” hitteen.

10. Qeerrise kadhata hasisseeki mayeete? (Fakkuwwatanna uudi.)

¹⁰ Qeerrisse kadhati. Harumaaxxi kadha laꞌo affoolenna, qalbe noꞌoxxi giddo hexxeexxa yaane adda ifinsannoki qeerraaxxa kadha kadhantaannoleten.b Aliskaki miniinki anni Elijah, iitta hiyyeen: “Barra giddo heddole kadhatannon, ittan qeerrise kadhataannaxxeꞌe Yihowwabaaꞌa shiqeennen. Yihowwa, kadhatanno wodda ‘qeerrisseetten’ hiyyabaan, tenneꞌaa qeerrise kadhata dandeꞌannon.” Atinna iitta assatee woꞌlaan: Yaada atika xexxertaaxxi yaane hexxebaaba, matanga hafuura qerrisse kadhattattoxxa yannanna bakka footettexxi, qeerrisse kadhatatixxa aada nossedhi.

MAXAAFI QULLICHCHI GIDDO BORREESSENDEEXXA QALBE GIDDIXXA KADHA HEDI

11. Maxaafi Qullichchi giddo borreessendeexxa qalbe giddixxenni shiqqeexxa kadha heda noꞌaa maa laꞌo affee? (“Jeeji Atiki Insaꞌnekenni Fakkaataake?” hitaꞌneexxa kollonna uudi)

¹¹ Maxaafi Qullichchi giddo borreessendeexxa qalbe giddixxenni shiqqeexxa kadhanna faaro heda atiꞌaanna laꞌo affeen. Mageniinxi ergantoole qalbe insaꞌneexxi giddo hedheeka yaada ifinseeki hittate kaddeexxa heda, atinna qalbe atixxi giddo hexxeexxa yaane Yihowwaꞌni farri assite kuldattoshsha tirtirsitaan. Tinninna kadhattatto wodda laꞌoonfattattoxxa haarooxxa hiyyanna alfitattoshsha gargaartaan. Ittan ateꞌni geyeeke jeejinni welti metaaxxa kadhanna alfitattoxxi hexxaan.

12. Maxaafi Qullichchi giddo borreessendeexxa kadha yaansinsanno wodda hoone qortumuwwa ifi qora hasissa?

¹² Maxaafi Qullichchi giddo borreessendeexxa kadha yaansissatto wodda ifi iitta hite qori: ‘Tennee kadha kadhateeki ayyete? Iitta hiyye kadhateeki maachchi isoꞌni geyeeꞌnaate? Tenne kadhaꞌni hedheeki yaadi aninni shiqaakee? Tenne kadhanaaꞌni maa baratanno?’ Konne qortumuwwiꞌaa woꞌma hiissichcho alfatee wele qoꞌne assa hasissaaxxinna hexxaan, iitta assittottole kinni laꞌo alfittatton. Heenoka fakkeenna uundo.

13. Haannaxxe kadhanaaꞌni alfinannoxxi mitte barachcho heente? (1 Samuꞌeli 1:10, 11) (Fakkenna uudi.)

¹³ Taakkaka Samuꞌeli 1:10, 11 yaansis. Haanna tennee kadha kadhattee wodda lame jabaxxi rakko iseꞌni geltaamman. Ise ila affeemmabaan, ittan gina isexxinna hedho iseꞌni qaraartaashsha assitaamman. (1 Sa. 1:4-7) Uurrichcho affebaaxxi rakko ateꞌni geltaꞌnoole, Haannaxxe kadhanaaꞌni maa barachcho alfitatto? Ise hafuura adhdhiteeki qeerraaxxa yanna kadhatatinna qalbe isexxixxa baꞌo Yihowwaꞌni huꞌniteechchi uduman. (1 Sa. 1:12, 18) Gelteexxe rakkonaaꞌni kexxeexxa maachchi noꞌoꞌni laqemaꞌneexxa foꞌe kulati “baꞌo [noꞌoxxa] Yihowwaꞌni” huꞌninnanno wodda noꞌonna iseshshanni hafuura adhdhinannon.—Far. 55:22.

14. (a) Haannake fakkeennanaaꞌni wele barantannoxxi yaane maachcho? (b) Qaale Mageniinxa yaansisanna alalcha kadhantanno wodda heddo hinannoxxa yaane anfannoshsha gargaartaaki hittate? (Lekkatibaꞌika qallassanjo uudi.)

¹⁴ Haanna Samuꞌeelii ildeexxe heenoxxe wogga uduma, Lumoke Kahnaatichcho Eeliꞌni iyyemarte uuteen. (1 Sa. 1:24-28) Qalbe giddixxenni kadhatteexxe kadhanni, Yihowwa addatendeexxa ergantoole isixxa heqqaꞌneexxanna karkarsaaꞌneexxa affeexxa adde ifisseen.c (1 Sa. 2:1, 8, 9) Mini giddo hexxeexxi rakko gatanna gophphoole, Haanna miꞌlachcho assitaammaki Yihowwa isee eebbisaꞌneeke oraꞌnitemman. Maa barantanno? Noꞌonna rakko geltaaꞌnaanni jabaante ossinannoki, Yihowwa noꞌoo techchi qicoꞌni gargaaraꞌneeki hittate kaddeexxa hendaannoleten.

15. Ille uushsho galtaa wodda wabeekichchi Erimiyaasixxe kadhanaaꞌni maa barantanno? (Erimiyaasi 12:1)

¹⁵ Erimiyaasi 12:1 yaansis. Wabeekichchi Erimiyaasi, fuggaaleyyetixxa qabbeexxa hedho uudeexxi adde woxeemmaxxi yanna hexxemman. Gosa isinxe kadeeki Isiraꞌeelooti isoꞌni miiccama geesisaamman. (Er. 20:7, 8) Noꞌonna dhugitte kaddeebaaxxa yaane assaꞌneeke manniiꞌaa, yaane qabbeeꞌna uundanno wodda yookiin noꞌoo coorraa wodda Erimiyaasishsha hendannoxxi hexxaan. Erimiyaasii tinni yaane hifachchiissoolenna, Yihowwaxxa ille uushsho beloxxa huje mame egeꞌnebaan. Isi, Yihowwa jalliyye kadeeka arda isika xixaaꞌnaa uudeemmaxxeꞌe, Yihowwaxxe ille uushsho beloxxe hujeꞌni afeemmaxxi adde jabaatteemman. (Er. 32:19) Noꞌonna Yihowwa isi murteesseexxe yannaꞌni ille uushsho balleessaaxxa addantennexxi, noꞌoo hifachchiissaꞌneexxa yaane isi edo farri assine kula dandeennannon.

16. Heꞌnenneki jeeji assinannoxxa yaane gabaloole, boojiꞌoteꞌni hedhemmake Lewaawichchonaaꞌni maa barantanno? (Faaro 42:1-4) (Fakkuwwatanna uudi.)

¹⁶ Faaro 42:1-4 yaansis. Tenne faaroki borreessalli, Mageniinke ardinni mitteba mageneefata dandeꞌeemmabaan. Faaro isixxi qalbe isixxi giddo hexxemmaxxa yaane leellishshaan. Miniiꞌni fula dandeꞌa gonphonnole yookiin addetixxe buutonni usuremmoonnole noꞌoꞌninna isishshanni fakkaattaaxxi hexxaan. Yaadiki daanqannoxxa yanna qalbe noꞌoxxi giddo hexxeexxa yaane kadhati Yihowwa edo farri asse kula eloxxen. Tinninna yaada noꞌoka egennannoshshanna yaane baꞌlinse uundannoshsha gargaartaan. Fakkeennakeꞌe, Lewaawichchi Yihowwaa jajaaxxa haarooxxa futtii alfeemman. (Far. 42:5) Yihowwa isoo karkarsaꞌneeki hittate kaddeexxanna hedeemman. (Far. 42:8) Qalbe giddixxenni Yihowwabaa kadhata, qalbe noꞌoxxika yaada egennannoshsha, mike ifixxa heqqeꞌnannoshshanna jabaante oosinannoxxa hunna alfinannoshsha gargaartaan.

17. Wabeekichchi Yoonaasixxe kadhanaaꞌni maa barantanno? (Yonaasi 2:1, 2) (b) Faaruwwateꞌni hexxeexxi mitte mitte hiyyuwwa, haꞌurtaaxxi yaane geltaa wodda noꞌoo gargaartaaki hittate? (Lekkatibaꞌika qallassanjo uudi.)

¹⁷ Yonaasi 2:1, 2 yaansis. Wabeekichchi Yoonaasi, lumoxxe qulxuꞌmeke godobi giddo hedhemma wodda Yihowwabaa kadhateemman. Yoonaasi ajajema gophoolenna Yihowwa kadha isixxa laqaaxxa addateemman. Yoonaasi kadha isixxeꞌni, Faaruwwateꞌn afendaaxxa heddo hiyyuwwa laꞌoonfateen.d Isi Faaruwwa tennee adda egeꞌna gopheemmabaan. Faaruwwa tennee heda Yihowwa isoo gargaaraaxxa addataashsha assiteen. Weli fakkaattanxa, mitte mitte xiqsuwwa qalliyyatee woꞌlaannaannole, xiqsuwwatinna sammo noꞌoxxibaa daggaan, ittan haꞌurtaaxxi yaane gelteeꞌnaa Yihowwabaa kadhantanno wodda isenna noꞌoo jajjabeessitaan.

KADHATI YIHOWWABAA SHIQA ITTIN SUFI

18-19. Maa hine kadhantannoxxa mekki hinannoxxa yanna, Roome 8:26, 27 keꞌni maa hiyyaaki dayyeessaaki yaadi hedhe? Fakkeenniki kuli.

¹⁸ Roome 8:26, 27 yaansis. Birasaxxeexxe yaaddonaaꞌni kexxeexxa mitte mitte wodda maa hine kadhantannoxxa mekki hinannoxxi hexxaan. Kaddoolenna, gargaarsa anfeennen. Eettene yanna Mageniinki qullichchi manfasi noꞌaa “kadhataan.” Hitta? Yihowwa manfasi qullichchi isikinni, heddo kadha Qaale isixxeꞌni borreessende turtaashsha asseꞌeen. Yaada noꞌoka caꞌa assine ifisa dandeꞌa gonphannoxxa yanna, Yihowwa tenne kadha giddo hedheeka yaada noꞌo kadhantonnaa hansaannekishsha asse uuddeexxi hiissichcho uwwaan.

¹⁹ Tennee yaane heda, Ruusiya hexxaꞌneexxa Yeleena hiyyendaꞌneexxa dayyo gargaarteen. Ise Yihowwabaa kadhatteexxeenna Maxaafa Qullichcha yaansisseexxeꞌe usurendeemman. Yeleena yaaddo birasaxxaa wodda kadhata haꞌurtaaxxa hubatteꞌeen. Iitta hiteen: “okkooꞌni yaaddo birasaxxaaxxanna maa hiyye kadhatannoxxa mekki hiyyannoxxa yanna, Yihowwa qarixxi ergantoole isixxi, manfasiinxe akeettenni kadhatteexxa kadha . . . ani kadhatonnaa hasaannexxishsha asse uudaaxxa qalli hiyyeennen. . . . Tinninna haranga jabaxxe rakko giddo anee jajjabeessiteen.”

20. Haꞌuraake jeeji giddo heꞌnanno wodda sammo noꞌoxxa kadhatee qophpheessinannoki hittate?

²⁰ Haꞌura jeeji giddo heꞌnannoxxa yanna mitti yaadinni kadhata haꞌurtaan. Sammo noꞌoxxa qophpheessedhateꞌe, Faarotike maxaafixxa oodiyo caqasa dandeennannon. Mootichchi Daawiti assemmashsha noꞌonna qalbe noꞌoxxeꞌni hexxeexxa yaane woraqatakeꞌn borreessa dandeennannon. (Far. 18, 34, 142; faarotike umoꞌni hedheeka ifisanjo.) Kadhatee sammo noꞌoxxa qophpheesseꞌnannoki hittate kaddeexxa kulaaki toggichchi seeri hedhebaan. (Far. 141:2) Tenneꞌaa sammo qophpheeffatateꞌe aniꞌaa eldaan hitattoxxa yaane assi.

21. Woꞌma qalbenni Yihowwabaa kadhantaanneki mayeete?

²¹ Yihowwa mitte yaane haasonnebeꞌno edi darrenni qalbe noꞌoxxi giddo hedheeka yaada egeꞌneen, tinninna gammandannoshsha assitaaxxe yaanen. (Far. 139:4) Kaddoolenna isoꞌni addantaannexxa kadhati haasoonnaaꞌnaa laqoꞌaa hasaꞌneen. Tenneꞌaa iimateꞌni hedheeke Anna atikibaa kadhatatee hooddoxxe. Qaale isixxeꞌni borreessendeexxe kadhaꞌni alalchati kadhatee kadaaka uduuda alfi. Woꞌma qalbenni isibaa kadhati. Gammaddatto woddanna yaaddatto wodda kadhati isoo haasoossi. Atiki dhugaatiki jaali, Yihowwa duuchchinii wodda atinni hedheen!