Lame Haarooxxa Iimike Bisixxa Una

ONKOLEESSA 5, 2024 woggatixxe bukkiiꞌni mitti gargariti hedheeki egeꞌnishanji kulemeemman: Egeꞌnishanjikinna Dayyi Jodi Jedilikinna Jekebi Remfiki Iimike Bisixxe una kande ergatemmaashsha baalloonsemmeexxa kulaakemman. Kunni laminiing dayyuwwi qeerraaxxe woggaaꞌa Yihowwaa addatenshati ergatemeeken.

Dayyi Jedili ilemeeki Yunaytid Istetise Mizuri hiyyendaaxxe bakkaꞌniten. Nophpheekinna dhugaatike mineꞌniten. Hadi isikinna hedhaammaki Yihowwaxxi Naqaashe adda hexxebaake loolaꞌniten. Tenneꞌaa gammachchiissaaxxa odo lassatee okkoo martaammaxxe gargariti hedheeke boganaaꞌni daggeexxe heddo dayyuwwanni afemaamman. Insaꞌnexxi jaalalanna mittunte hedho isixxa jijjiirteen. Isinna Onkoleessa 15, 1983 woggaꞌni cuuphemeen. Isi ergatensha yoꞌoshsha eeyyaamman, langake koobbixxa barachcho bireechchi uduma, Birraꞌa 1989 woggaꞌni duuchchi woddike qajeellisanjo kadeen.

Jedili dargaggummateꞌni hedhemmaxxa yanna hadi isiki isoonna dayyo isixxa Beetele dooyyinaashsha aadhe mareemman. Tennenaaꞌni kexxeexxa insaꞌne laminiingi Beetele ergatematika herrega fulcheꞌneen. Laminiingi herrengeeba genneꞌeen. Dayyi Jedili Birraꞌa 1990 woggaꞌni Wolkili Beetele yeꞌemeen. Isi taakkaa huje safeeki Caꞌiniinxe Dippartimeenteꞌniten, udumiiꞌni fayyunte heqqatixxe kutaꞌni ergatemeen.

Eettene yanna nophphinjokeꞌni hexxeexxinna dayyuwiinki gargaarsi hasisaammaxxi Isipaanishuffatike laagadinni akeekendaꞌneexxi gubaꞌuwwa shiqa hexxemman. Tenneꞌaa Jedili mitte gubaꞌebaa meꞌeexxi Isipaanishuffa barata safeen. Shiqonni okkone rogaꞌni qajeellisanjo kadde ergatendaꞌneexxe Demaarisi hiyyendaaxxe dayyonni afemeen. Buliiteꞌni eꞌyineechchi uduma isenna isinni welti Beetele ergatema saffeen.

Hado insaꞌneeka karkarsatee hineexxi 2005 woggaꞌni Beeteleeꞌni fulleen. Eettenee yanna, duuchchi woddixxe qajeellisano kandeꞌe ergatemmaamman. Dayyi Jedili Qajeellisanotixxe Ergachchoka Barachchoti Mine barsiisati gargaaraamman, ittan Hospitaaliki Afensiissaaxxe Komiteninna Looliinke Ijaarsiixxe Komitenni ergatemaamman.

Dayyi Jedilinna miniinxi ama isixxi 2013 woggaꞌni higgeen Worwikixxe Beeteleke ijaarsixxe projekteꞌni yeꞌemmeen. Okkooꞌni Paterseninna Wolkili ergatemmeen. Dayyi Jedili, Looliinxe Diizayinenna Ijaarsiinxe Dippartimenteꞌni, ittan Hospitaaliinxe Tarjiinxe Kutaꞌni ergatemeen. Caansa 2023 woggaꞌni kinni ergatenshatixxe Komiteke kiphallo kade baallonsemeen. Isinna uwwendeexxa huje hedaa wodda: “Mitte mitte yanna haarooxxi huje uwwendaa wodda, hunna anxi iimi dare hexxeeshsha fakkaattaan. Kaddomaleꞌe, eettene yanna Yihowwaꞌni addata hasissaan, buutotinna isi hunjonnaa hasaꞌneexxa heene yaanenna dandeennannoshsha assaan” Hiyyeen.

Dayyi Remfi ilemeeki Kalforiniya, Yunayitidi Isteetiseten. Oosumma hedhemma wodda ama isixxi qiiddeexxe kaddoolenna, isoo Maxaafa Qullichcha barsiisatee woꞌlandaamman. Wogga woggandeꞌni, addatendeexxe Yihowwaxxe naqaashe kaddeexxa ani isikixxa ama uudoꞌaanna maraamman. Isenna Maxaafa Qullichchakee afeexxa halcha nossedhaashsha gargaarteꞌen, tenneꞌaa 13 woggaꞌni Maxaafa Qullichcha baratatee qoreen. Birraꞌa 27, 1992, woggaꞌni cuuphemeen. Gammachchiissaaxxa ama isixxinna higge jabaatteen, ittan anni isikinna jabaante baranteechchi uduma cuuphemmeen.

Dayyi Remfi, dargaggumma hedhe, gammaddeexxa qajeellisano uudaamman. Isinna langake koobbixxa barachcho bireeshshanni Birraꞌa 1995 woggaꞌni qajeellisanjo kadeen. Gargaarsi haranga hasisaꞌneeba 2000 woggaꞌni, Ikuwadooriꞌaa meꞌeen. Okkoo Kaanadiiꞌni daggeexxe Inga hiyyendaaxxe qajeellisanjonni affemmeexxi, yannati uduma buliiteꞌni eꞌyineen. Buleteꞌni eꞌyineechchi uduma, Ikuwadoori shiixxooxxi baꞌlisanoole hexxeeke qachchaꞌni ergatema sanfeen. Taꞌixxe yannaꞌni itti shiixxooxxi baꞌlisanoole lumoxxe gubaꞌe kaddeen.

Okkooneechchi uduma dayyi Remfinna miniinxi ama isixxi gargari hexxeexxe qajeellisano kandeen, ittan addanna turrebaangi rogiinxa huje sanfeen. 2011 woggaꞌni kinni 132 soke Gilyaadike barachchoti minibaa yeꞌemmeen. Gilyaadiiꞌni eebbisemmeechchi uduma heddo bogaꞌni gargariti hexxeexxe ergatenshatixxe dhaabaꞌni, tinnirinna Beetele, misoonummatixxe ergatenshaꞌni, ittan rogiinxe hujeꞌni ergatemmeen. Dayyi Remfi Wengeelawootiinke Mootummatike Barachchotike Mineꞌni barsiisatixxa magannenna alfeemman.

Koroniinxe buutonni, dayyi Remfinna miniinxi ama isixxi Yunaytidi Isitetiseꞌaa hingeemman. Wolkilixxe Beetelebaa yeꞌemmeen, okkooꞌo Ergatenshatixxe Dippaartimentexxa leenjo adhdheen. Yannati uduma, Ikuwadoorixxe Dame Beeroxxe Komite kade ergatemaashsha dhaabemeen. 2023 woggaꞌni kinni Worwikeꞌaa dageen. Baꞌleessa 2024 woggaꞌni Ergatenshatixxe Komiteke kiphallo kade baalloonsemeen. Tennee ergatemeexxa baka duuchcha hedaa wodda, “Dhaabbemmennexxa bakka gargari assitaaxxi yaane manjokee ergatemmanne qico malee dhaabbemmennexxe bakkabaan” hiyyeen

Konne dayyuwwixxa jabaxxa huje yoꞌoshsha saandaannen, ittan ‘iitta hedheeka manna lumminseꞌe uundannen’—Flp. 2:29.