იცხოვრე ქრისტიანული პრინციპებით

სიახლე შუა კვირის შეხვედრის პროგრამაში

2018 წლის იანვრიდან შუა კვირის შეხვედრაზე განვიხილავთ დამატებით მასალასა და მედიაფაილებს, რომლებიც აღებულია „ახალი ქვეყნიერების თარგმანის“ სასწავლო გამოცემიდან (nwtsty), მიუხედავად იმისა, რომ ის ჯერ არ არის ხელმისაწვდომი ქართულ ენაზე. ეს მასალა დაგეხმარება, უფრო საფუძვლიანად მოემზადო კრების შეხვედრებისთვის. რაც მთავარია, ის უფრო დაგაახლოებს მოსიყვარულე მამასთან, იეჰოვასთან!

დამატებითი მასალა

ეს ინფორმაცია წარმოდგენას გვიქმნის კულტურულ თუ ლინგვისტურ თავისებურებებსა და გეოგრაფიულ ადგილებზე, რომლებსაც არაერთ ბიბლიურ მუხლში ვხვდებით.

მათე 12:20

მბჟუტავი პატრუქი: ძველ დროში ოთახის გასანათებლად იყენებდნენ თიხის ჭურჭელს, რომელსაც ზეითუნის ზეთით ავსებდნენ. მასში ჩადებული იყო სელისგან დამზადებული პატრუქი, რომელიც იწოვდა ზეთს. „მბჟუტავ პატრუქად“ ნათარგმნი ბერძნული ფრაზა შესაძლოა მიუთითებდეს მბოლავ ფითილზე, რომლის ნამწვი ჯერ კიდევ ღვივის, თუმცა ალი უკვე ჩამქრალია ან სადაცაა ჩაქრება. ესაიას 42:3-ში ნაწინასწარმეტყველები იყო, როგორი თანამგრძნობი იქნებოდა იესო; ის არასდროს ჩაუქრობდა იმედის უკანასკნელ ნაპერწკალს დაჩაგრულ და თავმდაბალ ადამიანებს.

მათე 26:13

„ჭეშმარიტებას გეუბნებით“: „ჭეშმარიტებად“ გადმოტანილი სიტყვა „ამინ“ ებრაული სიტყვა „ამენის“ ბერძნული ტრანსლიტერაციაა, რაც ნიშნავს „დაე, იყოს ასე“ ან „ჭეშმარიტად“. ვიდრე იესო რამეს იტყოდა, ის ხშირად იყენებდა ამ გამოთქმას იმის ხაზგასასმელად, რომ მის მიერ წარმოთქმული სიტყვები, წინასწარმეტყველება თუ დაპირება სანდო და უტყუარი იყო. „ამინის“ ამგვარი გამოყენება სახარებების გარდა რელიგიურ ლიტერატურაში სხვაგან არსად გვხვდება. იოანეს სახარებიდან ჩანს, რომ იესო ხშირად ორჯერ ზედიზედ იყენებდა სიტყვას „ამინ“, რაც ქართულად შემდეგნაირად ითარგმნა: „ჭეშმარიტებას, ჭეშმარიტებას გეუბნებით“ (იოან. 1:51).

მედიაფაილები

სურათები, ილუსტრაციები, უხმო ვიდეოები და გრაფიკული ანიმაციები ბიბლიის სხვადასხვა მუხლში მოხსენიებულ არაერთ დეტალს ჰფენს ნათელს.

„ბეთფაგე, ზეთისხილის მთა და იერუსალიმი“

ამ მოკლე ვიდეორგოლში ნაჩვენებია იერუსალიმისკენ მიმავალი გზის მონაკვეთი სოფელ ეთ-ტურიდან (სავარაუდოდ, იგივე ბეთფაგე, რომელიც იერუსალიმის აღმოსავლეთით მდებარეობდა) ზეთისხილის მთის ერთ-ერთ შემაღლებულ ადგილამდე. ბეთანია გაშენებულია ბეთფაგეს აღმოსავლეთით, ზეთისხილის მთის აღმოსავლეთ ფერდობზე. როცა იესო და მისი მოწაფეები იერუსალიმში იყვნენ ხოლმე, ღამის გასათევად სწორედ ბეთანიაში რჩებოდნენ, რომელიც დღეს ელ-აზარიეს სახელითაა ცნობილი. ეს არაბული წარმოშობის სახელი ნიშნავს „ლაზარეს ადგილ-მამულს“. ეჭვგარეშეა, რომ იესო მართას, მარიამისა და ლაზარეს სახლში რჩებოდა ხოლმე (მათ. 21:17; მარ. 11:11; ლუკ. 21:37; იოან. 11:1). მათი სახლიდან იერუსალიმში რომ ჩასულიყო, იესო შესაძლოა სწორედ იმ გზას გადიოდა, რომელიც ვიდეოშია ნაჩვენები. როცა ახ. წ. 33 წლის 9 ნისანს ჩოჩორზე ამხედრებული იესო ზეთისხილის მთიდან იერუსალიმში ჩავიდა, შეიძლება სწორედ ბეთფაგედან იერუსალიმამდე მიმავალ გზას დაადგა.

გზა ბეთანიიდან ბეთფაგემდე
ბეთფაგე
ზეთისხილის მთა
კედრონის ველი
ტაძრის მთა

ქუსლის ძვალში გაყრილი ლურსმანი

ფოტოზე ასახულია ადამიანის ქუსლის ძვალში გაყრილი 11,5 სანტიმეტრი სიგრძის რკინის ლურსმანი. ეს არის ზუსტი ასლი იმ არქეოლოგიური არტეფაქტისა, რომელიც 1968 წელს იერუსალიმის ჩრდილოეთ ნაწილში აღმოაჩინეს და რომელიც რომის იმპერიის მმართველობის ეპოქას მიეკუთვნება. ეს არქეოლოგიური აღმოჩენა ადასტურებს, რომ რომაელები, როგორც ჩანს, სიკვდილმისჯილებს ლურსმნებით აჭედებდნენ ხის ძელზე. შესაძლოა სწორედ ასეთი ლურსმნებით მიაჭედეს იესო ქრისტე ძელზე რომაელმა ჯარისკაცებმა. ეს არტეფაქტი აღმოჩენილ იქნა ქვის ყუთში, ეგრეთ წოდებულ ოსუარიუმში, სადაც ინახავდნენ მიცვალებულის ძვლებს სხეულის გახრწნის შემდეგ. ეს იმაზე მიუთითებს, რომ მათ, ვისაც ძელზე სიკვდილით სჯიდნენ, ზოგიერთ შემთხვევაში სამარხში ასვენებდნენ (მათ. 27:35).