TIMEƔRI TIS 6

Asefhem n yefyar

Yuḥenna 10:33-36

ACU ARA TXEDMEḌ: M’ara d-teɣreḍ afir, ur ţɛeddi ara din din ɣer uxemmim nniḍen. Ilaq aţ-ţetḥeqqeḍ belli fehmen wid i k-d-yeţḥessisen amek i gcudd wafir i d-teɣriḍ ɣer wayen i d-tessefhameḍ.

AMEK ARA TXEDMEḌ:

Ɛzel-ed imeslayen yesɛan azal. Mi d-teɣriḍ afir, beggen-ed imeslayen i gcudden qbala ɣer wayen iɣef i d-theddṛeḍ. Tzemreḍ a ten-id-tbeggneḍ ma tɛawdeḍ-d i leqraya n imeslayen-a, neɣ ma tḍelbeḍ i wid i k-d-yeţḥessisen a ten-id-afen.

Ma tɛawdeḍ-d i wayen yellan deg wafir s imeslayen nniḍen, ilaq ad walin s sshala wid i k-d-iţḥessisen lɛalaqa yellan ger wamek i d-yeţwabder deg Wedlis Iqedsen d wayen i tebɣiḍ a d-tiniḍ.
Beggen-ed axemmim iɣef i tebɣiḍ ad cfun wid i k-d-yeţḥessisen. Ma tqesdeḍ a d-tiniḍ, uqbel a d-teɣreḍ afir, d acu-ţ ssebba iɣef ara t-id-teɣreḍ, ssefhem-ed lɛalaqa yellan ger imeslayen i d-yufraren deg wafir-nni akk-d ssebba-yagi.

M’ara d-tessefhameḍ afir i d-teɣriḍ, eǧǧ Adlis Iqedsen yeldi. Ayagi ad iɛiwen wid i k-d-yeţḥessisen ad ẓren d acu i gcudden ayen ara d-tiniḍ ɣer wafir-nni i d-teɣriḍ.
Ur ssiwɛiṛ ara asefhem. Ur d-ssefham ara ţfaṣil ur ncudd ara qbala ɣer temsalt iɣef i d-theddṛeḍ. Nadi aţ-ţeẓreḍ d acu i ssnen yakan wid i k-d-yeţḥessisen ɣef temsalt-agi. Wali daɣen acḥal n leḥwayeǧ ara d-tessefhmeḍ akken a sen-yishil ad fehmen w’ad ṭebbqen ayen ara d-lemden.