DAW 4
Mungkan Nnan Ga Gale Chyum Laika Hpe Hpa Majaw Shapraw Ai Kun?
Congo (Kinshasa)
Rwanda
A.D tsa ban masum, mali daram hta, Symmachus a Greek ga gale Chyum, Shakawn Kungdawn 69:31 Hta Karai Kasang a amying lawm
Yehowa Sakse Ni gaw shi ning ladaw law law hta Chyum Laika hpan law law hpe jailang wa nna, dip shabra wa ma ai. Raitim, Karai Kasang ra sharawng ai lam re ai “teng man ai lam” hpe masha ni chye wa hkra karum ya na matu, Chyum Laika nnan langai dip shapraw ra ai hpe chye wa ma ai. (1 Timohti 2:3, 4) Dai majaw 1950 ning kaw nna, dai ni lang nga ai ga hte ka da ai Mungkan Nnan Ga Gale Chyum Laika hpe daw hte daw Inglik ga hku dip shapraw hpang ai. Ndai Chyum Laika hpe ga amyu baw 130 jan hte tup hkrak ga gale dip shapraw da ai.
Chye na loi ai Chyum Laika ra nga ai. Prat masa galai shai wa ai hte maren ga amyu ni mung galai shai wa ai. Chyum Laika law law hta lawm ai ga si ni gaw, n dan leng ai, prat n dep mat sai majaw chye na yak ai. Chyum Laika madung hte grau bung ai moi ka da ai Chyum Laika daw ni hpe tam mu wa ai majaw, Chyum Laika hta Hebre, Aramaic, hte Greek ga ni hpe gara hku jailang da ai hpe grau chye na wa ai.
Karai a Mungga hpe tup hkrak ga gale da ai Chyum Laika ra ai. Chyum Laika hpe ga gale ai ni gaw, Karai Kasang lam matsun ya nna ka da ai hpe galai kau ai, gram lajang ai ni n galaw ai sha, madung ga si ni hpe tup hkrak ga gale ra ai. Raitim, Chyum Laika law malawng hta, Karai Kasang a amying Yehowa hpe n ka bang ma ai.
Shalat ai Madu hpe shagrau ai Chyum Laika ra ai. (2 Samuela 23:2) Lawu na sumla hta madun da ai hte maren, moi ka da ai Chyum Laika daw ni hta Karai Kasang a amying Yehowa gaw 7,000 lang daram lawm ai. Mungkan Nnan Ga Gale Chyum Laika hta dai hte maren ka bang da ai. (Shakawn 83:17) Shaning hku na hkra shakut nna tam sawk sagawn da ai majaw, ndai Chyum Laika gaw Karai Kasang myit mang ai hpe dan dan leng leng madun dan nna grai hti pyaw ai. Na a amyu ga hte Mungkan Nnan Ga Gale Chyum Laika n nga yang pyi, Yehowa A Mungga hpe shani shagu hti ai akyang nga hkra galaw na matu n-gun jaw mayu ai.—Yawshu 1:8; Shakawn 1:2, 3.
Ga gale Chyum Laika nnan hpe dip shapraw na matu anhte hpa majaw daw dan ai kun?
Karai Kasang ra sharawng ai lam chye mayu ai ni yawng a matu gara akyang gaw kaja ai kun?