Magam Hkrumzup Hpawng Galaw Ai A Yaw Shada Lam

1. Magam hkrumzup hpawng galaw ai a yaw shada lam hpa rai a ta?

¹ Kalang mi hta, sape 70 nsa hkaw shi yang, shanhte hte Yesu hkrumzup wa ai. (Luk. 10:1-11) “Mam Madu” Yehowa gaw, shanhte hte rau nga nna, lam matsun ya ai hpe tsun nna, Yesu n-gun jaw wa ai. Yesu mung, shanhte hkaw tsun bungli galaw lu hkra, lam matsun ni jaw ai sha n-ga “marai lahkawng” hpra ginrun nna, shangun dat ai. Ya mung, dai zawn sha re. Anhte hpe n-gun jaw na matu, lam matsun na matu atsawm hpawng na matu, magam hkrumzup hpawng galaw ra ai re.

2. Magam hkrumzup hpawng gaw aten kade na ra a ta?

² Magam hkrumzup hpawng gaw minit 10-15 daram na ai. Dai hta hpung garan ai, sa na lawk tsun dan ai, ngut yang akyu hpyi nna hpungdim dat ai. April shata kaw nna gaw minit 5-7 de galai kau sai. Raitim, zuphpawng ngut ai hpang galaw yang, dai hta grau yawm ging ai. Hpa majaw nga yang, Chyum Mungga ni hpe hpunau nauna ni madat ngut sai majaw re. Hkrumzup ten shayawm kau ai gaw, hkaw tsun bungli a matu aten grau lu shangun ai. Dai hta n-ga, hkaw tsun masha ni, lam woi ningshawng ni gaw, hkrumzup hpawng n hpang shi ai shaloi, hkaw tsun nga yang, dai hpe lung na matu, shanhte hkaw nga ai hpe chyahkring mi sha hkring ra na re. Ngut yang she, matut hkaw tsun mai ai.

3. Hpunau nauna ni akyu lu hkra, hkrumzup hpawng hpe gara hku lajang mai a ta?

³ Hkrumzup hpawng hpe atsawm lajang ra ai. Rai yang she, hkaw tsun masha ni akyu law law lu na re. Nawku hpung law malawng hta, hkrumzup hpawng hpe shara mi sha galaw ai hta, hpung garan nna galaw ai gaw grau akyu nga ai hpe mu lu ai. Dai majaw, magam hkrumzup hpawng hte lawk de sa ai shaloi loi mat ai. Lawk hpaawn ni mung, hkaw tsun masha ni hpe ginrun na matu, karum ya na matu grau loi wa na re. Myitsu salang hpung gaw, hkrumzup lam hpe gara hku galaw yang grau kaja na hpe buga ginra hta hkan nna, daw dan mai ai. Gara lawk de sa na, kadai hte ginrun na, yawng tsun ngut yang, hkrumzup hpawng hpe kadun dawk kyu hpyi nna hpungdim dat ra na re.

4. Magam hkrumzup hpawng gaw, kaga hpung zuphpawng ni zawn grai ahkyak ai ngu, hpa majaw sawn la ra a ta?

⁴ Hpung Zuphpawng Ni Zawn Grai Ahkyak Ai: Hkrumzup hpawng hpe, hkaw tsun sa na ni a matu galaw ya ai majaw hpunau nauna ni yawng lung na gaw nre. Raitim, hkrumzup hpawng mung, hpung zuphpawng ni zawn grai ahkyak ai ngu sawn la ra ai. Hpung zuphpawng yawng zawn, hkrumzup hpawng mung, Yehowa hkyen lajang ya ai majaw, shada da tsawra myit nga shangun nna, kaja ai akyang ni galaw shangun ai. (Heb. 10:24, 25) Hkrumzup hpawng woi awn ai wa gaw, atsawm shajin da yang she, bawngban ai lam gaw, Yehowa hpe shagrau nna, sa ai yawng akyu lu na re. Hkaw tsun sa na yawng, hkrumzup hpawng hpe shakut nna, sa lung ging ai.

Magam hkrumzup hpawng gaw kaga hpung zuphpawng ni daram n ahkyak ai ngu, ahpa atang nsawn ging ai

5. (a) Magam hkrumzup hpawng a matu shajin ai shaloi, magam hpaawn a lit gaw hpa rai a ta?(b) Nauna langai gaw hkrumzup hpawng hpe gara hku woi awn lu na kun?

⁵ Woi Awn Na Wa Shajin Ra Na Daw: Hpung zuphpawng ni hta, anhte a lit hpe jau lu da yang she, atsawm shajin nna, galaw lu na re. Magam hkrumzup hpawng mung, dai zawn sha re ai. Hkrumzup hpawng hpe garan galaw yang, lawk hpaawn shing nrai, ningtau hpaawn gaw woi awn mai ai. Nawku hpung ting, hkrumzup hpawng galaw yang, magam hpaawn gaw, woi awn na matu, langai ngai hpe lit jaw mat na re. Magam hpaawn nkau gaw, woi awn na ni yawng hpe lamang laika jaw nna, shana ai shara hta mung, shakap da ya na re. Hkrumzup hpawng kaw nna, akyu kade lu na ngu ai gaw, woi awn ai ni a sharin chye ai atsam hte atsawm lajang chye ai hta madung ai. Dai majaw, magam hpaawn gaw, hkrumzup hpawng woi awn ai wa hpe lit jaw ai shaloi, atsawm myit ra ai. Woi awn na matu myitsu salang, magam tau, hkalup hkam da ai atsam rawng hpunau ni nnga yang, magam hpaawn gaw hkalup hkam da ai atsam rawng nauna langai hpe, lit jaw mai ai. Laika man 6 hta, “Nauna Langai Hkrumzup Hpawng Lang Ai Shaloi” ngu ai lawk hpe yu u.

6. Woi awn ai wa gaw, atsawm shajin na matu hpa majaw ahkyak ai kun?

⁶ Hkaw Tsun Jawng, Magam Zuphpawng hta anhte lit lu ai shaloi, manu shadan nna atsawm shajin ma ai. Magam hkrumzup hpawng galaw na matu, lit lu ai shaloi mung, dai zawn galaw ging ai. Nkau mi gaw, zuphpawng sa ai aten hta she, tinang galaw ra ai lit a matu, myit ai, shajin ai baw galaw ma ai. Hkrumzup hpawng aten shayawm kau ai majaw, dai hpe lachyum nga ai hte, aten hkrak, atsawm ngut hkra, shajin da ra ai. Atsawm shajin ai hta, pru na lawk hpe tau hkrau chye da ai mung lawm ai.

7. Woi awn ai wa bawngban mai ai lam nkau gaw hpa rai a ta?

⁷ Bawngban Na Lam Ni: Lawk langai hte langai, masa nbung ai majaw, sadi ai hte myitsu ai mayam gaw, hkrumzup lam yawng a matu outline n galaw ya ai. “Hkrumzup Hpawng Laman Bawngban Mai Ai Ni” ngu ai lawk hta, bawngban mai na lam nkau hpe madun da ya ai. Hkrumzup hpawng hpe bawngban ai hku nna, galaw mat tim, kalang lang atsawm shajin da ai hkrang madun ni, jw.org/kac Web site kaw nna, htap htuk ai video ni hpe mung jailang mai ai. Tau hkrau shajin ai shaloi, hkaw tsun sa na ni hpe gara hku n-gun jaw nna, lam matsun ra na hpe hkrumzup hpawng woi awn ai wa myit da ra ai.

Magam hkrumzup hpawng a matu shajin ai shaloi, hkaw tsun sa na ni hpe gara hku n-gun jaw na, matsun na hpe woi awn na wa myit ra

8. Bat Kru Ya hte Laban Shani magam hkrumzup hpawng ni hta, gara lam ni bawngban ai gaw akyu lu na kun?

⁸ Ga shadawn, Bat Kru Ya hta hkaw tsun sa ai law malawng gaw, Sin Langchyi hte Dum Hprang! ni garan ma ai. Dai shani hta sha hkaw tsun sa ai ni gaw, Dinghku Nawku hta shaman da ai hkaw tsun ladat hpe matsing yang she matsing na re. Dai majaw, hkrumzup hpawng woi awn ai wa gaw, Anhte A Mungdan Magam jahtum laika man hta na hkaw tsun ladat langai ngai hpe bai maram ai gaw akyu lu na re. Shing nrai, magazine garan ai hta buga shiga, buga hta byin taw ai lam hte poi ni a lam gara hku tsun mai ai lam, shing nrai, nta madu magazine la yang, hpang kalang bai sa lu hkra, hpa ni tsun na kun, ngu ai lam ni hpe bawngban mai ai. Garan na magazine ni garan ga yang, hkrumzup hpawng woi awn ai wa gaw, shanhte a kadun dawk hpaji jaw ai lam, kaja ai mahkrum madup ni tsun dan na matu saw shaga mai ai. Laban shani hkrumzup hpawng hta, ndai shata garan na laika ni hpe mung, dai zawn galaw mai ai. Chyum Laika hkaja mai ai Kabu Gara Shiga brochure Karai Kasang A Ga Madat U brochure hte Chyum Laika Teng Sha Sharin Ya Ai laika buk ni hpe, galoi mung garan mai ai majaw, woi awn ai wa gaw, dai laika ni garan mai ai ladat hpe, kadun dawk bawngban mai ai.

9. Laksan campaign ladaw a Kru ya, Laban ni hta hpa ni bawngban mai ai kun?

⁹ Laksan campaign ladaw a Kru Ya, Laban ni hta, hkrumzup hpawng woi awn ai wa gaw, magazine ni hpe saw shaga laika, garan laika ni hte rau gara hku garan mai na shing nrai, nta madu myit lawm yang, hpa galaw ra na ni hpe bawngban mai ai. Campaign a grai ahkyak ai lam hpe madun dan ai mahkrum madup ni hpe mung, tsun dan mai ai.

10, 11. Hkrumzup hpawng kaw nna, akyu lu hkra hkaw tsun masha ni a shajin ai lam, hpa majaw ahkyak a ta?

¹⁰ Hkaw Tsun Masha Ni Shajin Ra Na Daw: Hkaw tsun masha ni mung, tau hkrau shajin da yang, magam hkrumzup hpawng gaw akyu rawng na re. Hkrumzup hpawng a matu shajin da u. Dinghku nawku kaw mung shajin mai ai. Rai yang, tinang shajin da ai lam ni hpe, garan ya lu na re. Atsawm shajin ai hta, hkrumzup hpawng nsa shi yang, nta kaw nna, magazine, laili laika ni shajin da ai mung lawm ai. Rai yang she, hkaw tsun lawk de kalang ta lu sa na re.

¹¹ Magam hkrumzup hpawng nhpang shi yang, du na matu grai ahkyak ai. Hpung zuphpawng yawng hpe aten dep du hkra, anhte shakut ma ai. Hkrumzup hpawng du ai hpang hkrat yang, tinang a majaw dingbai dingna byin chye ai. Gara hku na kun? Lawk woi awn na hpunau gaw, hpung n garan shi yang, lam amyu myu hpe myit ra ai. Masha nlaw yang nngut shi ai lawk hta sha, hkaw tsun na matu, lajang mai ai. Nkau gaw, hkrumzup hpawng de lam hkawm sa ai, lawk grai tsan ai nga yang, shanhte hpe lagaw leng, saike, mawdaw nga ai ni hte ginrun ya mai ai. Nhkru nhkra law ai shara ni hta, nauna ni hpe hpunau ni hte ginrun ya mai ai, shing nrai, nauna ni hte nau n tsan ai shara hta, hpunau ni sin ya na matu lit jaw mai ai. Asak kaba ai ni hpe kawng lung, kawng yu, nau n nga ai shara ni hta hkaw tsun na matu lit jaw mai ai. Hkaw tsun masha nnan hpe, kunghpan ai ni hte ginrun ya mai ai. Raitim, hkrumzup shara de hpang hkrat nna du mat yang, galaw da ai lamang ni hpe nnan kaw na bai galai shai ra na re. Kalang lang, amyu myu a majaw hpang hkrat chye ai. Raitim, ten shagu hpang hkrat ai akyang nga yang, tinang hkrai ndai hku san u: magam hkrumzup hpawng hpe, ngai manu n shadan ai kun? Shing nrai, tau hkrau shajin ai lam n nga na kun?

12. Tinang lata nna ginrun yang, gara lam hpe myit shalawm ra ai kun?

¹² Hkrumzup hpawng nhpang shi yang, kadai hte ginrun na hpe tinang lata mai ai. Shing nrai ginrun ya ai masha hte sa mai ai. Tinang lata nna ginrun yang, hkau ai ni hte sha, ayan ginrun na malai yawng hte, ginrun nna myit hpe “dam lada” shangun na kun? (2 Kor. 6:11-13) Masha nnan ni sharin atsam jat wa hkra, karum na matu kalang lang shanhte hte rau ginrun mai na kun? (1 Kor. 10:24; 1 Tim. 4:13, 15) Gara shara kaw nna hpang na ngu ai lam matsun hte, kaga lam matsun yawng hpe atsawm madat u. Hkrumzup hpawng ngut ai shaloi, lamang ni hpe galai shai ai lam n galaw ai sha, lawk de kalang ta sa ra ai.

13. Tinang a daw hpe atsawm galaw yang, hkrumzup hpawng kaw nna, gara hku akyu lu na kun?

¹³ Yesu atsawm shaman nna, shangun dat ai sape 70 gaw, hkaw tsun ngut ai hpang, “kabu gara ai myit hte bai wa” ma ai. (Luk. 10:17) Hkaw tsun nhpang shi yang, Yesu, shanhte hte hkrumzup wa ai majaw, awng dang ai re. Ya mung, hkrumzup hpawng kaw nna, akyu lu nga ai. Tinang a daw hpe atsawm galaw yang, hkrumzup hpawng kaw nna, n-gun jaw ai lam, matsun ai lam hte atsawm lajang ai lam ni lu nna, “masha amyu baw shagu a matu mara sakse tai lu u ga” ngu ai anhte a lit mung awng dang, ngut kre wa na re.—Mah. 24:14.

“Nauna Langai Hkrumzup Hpawng Woi Awn Ai Shaloi”

Magam hkrumzup hpawng woi awn ai nauna gaw, dung nna, baw magap da ra na re. Hpunau ni bawngban ai zawn galaw mai ai. Lung ai ni hpe, sharin shaga nga ai zawn nre ai sha, bawngban ai zawn galaw u. Hkalup hkam da ai nauna langai hpe kyu hpyi ya na matu saw yang, dai nauna mung baw magap ra ai. Hkrumzup hpawng hpang ngut yang she, hpunau langai du wa ai nga yang, nauna gaw dai hpe woi awn na matu, hpyi shawn ra na re. Magam hpaawn gaw, masa hpe tau hkrau myit da nna, hkrumzup hpawng atsawm galaw lu hkra, htap htuk ai lam matsun ni jaw da ra na re. Ga shadawn, nauna galaw nga ai hkrumzup hpawng de hkalup hkam da ai asak 11, 12 daram nga ai hpunau ni sa lung ai mung nga na re. Raitim, shi hta atsam n hpring ai ngu, magam hpaawn sawn la yang, hkrumzup hpawng hpe nauna sha, galaw mat na matu, tau hkrau tsun da ra na re. Shing nrai myitsu salang ni sha chye ai lam langai ngai a majaw, zuphpawng ni hta akyu hpyi na, woi awn na ahkang dawm la hkrum ai hpunau langai sa lung yang gaw gara hku ta? Myitsu salang ni gaw, hkrumzup hpawng woi awn ai nauna ni hpe dai hpunau hpe ahkang dawm la da ai ngu tsun dan na re. Raitim, hpa majaw ahkang dawm la da ai hpe gaw tsun dan na nre. Dai majaw, hkrumzup hpawng hpe shi sa lung yang, nauna ni sha matut galaw mat nna, akyu hpyi ging ai. Gara shani hta, nauna ni hkrumzup hpawng woi awn na lam, dai hpunau hpe myitsu salang ni tsun dan mai ai.

Hkrumzup Hpawng Laman Bawngban Mai Ai Ni:

Anhte A Mungdan Magam hta na hkaw tsun ladat langai.
jw.org/kac Web site hta na hkaw tsun bungli hte seng ai video langai ngai.
Kaja ai hkaw tsun ladat langai a lam nkau. Ga nhpaw tsun ai, bai kawan na matu tsun da ai, laili laika la ai shaloi mungkan grup alu hpe tsun ai lam.
Hkaw tsun bungli a matu n-gun jaw ai, lam matsun ya ai Chyum daw langai ngai.
Buga kaw nna shing nrai, anhte a laika ni hta na, hkaw tsun bungli mahkrum madup langai.
Anhte A Mungdan Magam hta lawm ai sumhpa kaw nna lam ni.
Kade n na shi yang galaw wa ai Magam Zuphpawng kaw nna lam ni.
Sin Langchyi kaw nna hkaw tsun bungli hte seng ai lam ni.
Hkaw Tsun Jawng laika buk hte ‘Ngai Kaw Sa Hkan Nang Rit’ laika buk ni hta na hkaw tsun bungli hte seng ai lam ni.
Hkaw tsun bungli hta jailang mai ai jw.org/kac Web site hta na lam langai ngai.
Hkaw tsun bungli hta lang mai ai Chyum Laika Kaw Na Chye Lu Ai Ni laika buk kaw nna lam langai.
Karai nga ai hpe nkam ai ni, hpan da ai hpe nkam ai ni, Hindu hpung, Bukda nawku hpung masha ni hte hkrum yang shaga mai ai lam.
Ga chye jahkring ai ni hpe bai htang mai ai lam.
Hkaw tsun bungli hta tinang a manang, atsawm tsun lu hkra karum ai lam.
Amyu ga nbung ai ni hte hkrum ai shaloi, bai htang mai ai lam.
Phone hte sakse hkam ai, kaga amyu ga shaga ai ni hpe tam ai bungli, masha hpawng man sakse hkam ai, bai kawan ai, Chyum Ga sharin ai lam ni zawn, hkaw tsun bungli lam nkau hta shang lawm mai ai lam.
Masa hta hkan nna galaw chye na, kaja ai myit nga na, kaja ai akyang madun na hte shim lum na matu, koi ra ai hte galaw ra na hpe sadi jaw lam.