Hkaw Tsun Bungli Hta Grau Kaja Hkra Galaw Ai Lam—⁠Ayan Hkaja Ai Akyang Nga Hkra Chyum Ga Sharin Hpe Shaman Ya U

Hpa Majaw Ahkyak: Chyum ga sharin ni, wenyi lam hta kung hpan wa na matu, Karai Kasang a Mungga hpe ntsa lam nre sha, sung htum ai lam ni hpe mung chye ra ai. (Heb. 5:12–6:1) Hkaja ai shaloi shakut shaja ra ai. Dai hta, nnan bai chye wa ai lam ni gaw, chye da chyalu re ai lam ni hte gara hku matut manoi ai, gara hku jailang mai ai, ngu ginhka maram chye ai lam ni lawm ai. (Ga Sha. 2:1-6) Chyum ga sharin gaw, tinang hkrai hkaja chye hkra sharin la na nga yang, U Hpung shapraw laika jailang nna Chyum Laika ga san ni hpe chye wa na re. Shanhte gaw chye wa ai lam ni hpe tatut jailang na nga yang, Hkristan ni hkrum na chyam dinglik lam ni hpe tawt lai lu hkra hkyen lajang nga ai hte bung na.—⁠Luka 6:47, 48.

Galaw Mai Ai Lam:

Hkaja lamang nhpang shi yang, Yehowa karum ya ai lam lu na matu akyu hpyi ai gaw ahkyak ai ngu shi hpe tsun dan u.—⁠Yawhan 14:26; 1 Kor. 2:10.
Chyum Laika hkaja lamang n hpang shi yang, tau hkrau hti da na matu, shawng nnan kaw nna n-gun jaw u. Tinang lang ai laika buk hpe madun u. Ahkyak ai ga si ni, ga yan ni hpe gara hku matsing mai ai lam shi hpe sharin ya u.
Ga san ni hpe shi chyena ai hku mahtai jaw shangun u. Ga san shagu hpe laika buk kaw na sha bai htai nna san htai galaw nga ai zawn, hkum galaw u.
Karai Kasang a mungga hpe shani shagu hti na matu shi hpe n-gun jaw u. jw.org/mya hta nga ai chyum laika hti na chyarang hpe madun u. Dai hta shi galaw mai ai lam ni hpe madun da ai. Chyum Laika hpe shani shagu hti ai akyang nga hkra, ngang kang ai dawdan lam jahkrat ra ai. Raitim, kaja wa akyu law law lu na re.—⁠Shk. 1:2, 3.
Sin Langchyi Laika Dum (sh) Sin Langchyi ONLINE LAIKA DUM hpe jailang nna, Chyum Laika ga san ni a mahtai hpe gara hku tam mai ai lam shi hpe madun u. Hpung zuphpawng ni hta lang nga ai laili laika ni a amying kadun hpe chye hkra karum ya u.

Ndai Shata Laman Shakut Yu U:

Hkaja ai daw jahtum du yang, shi hpa sharin la lu wa ai hte seng nna, Chyum ga sharin hpe hkaja mat wa ai lam nkau mi hpe bai tsun shangun u. Tinang hta Chyum ga sharin n nga yang, Chyum daw langai (sh) Sin Langchyi ga yan langai hpe hti nna kadun dawk tsun yu u. Dai hku galaw yang, tinang hkrai Laika hti ai atsam rawt jat wa na re.