Kabu Gara Shiga Hpe Sharawng Ai Myit Hte Hkaw Tsun U

Hkaw tsun na matu yak nga ai kun? Law malawng gaw yak ai ngu htai ma ai. Hpa majaw kun? Lawk hta myit n lawm ai ni, ning hkap ai ni hte hkrum chye ai majaw (sh) masha tsasam ni hte n-gwi shaga ai majaw, anhte a ngwi pyaw lam ni yawm mat chye ai. Anhte nawku ai Karai Kasang gaw ngwi pyaw ai Karai re ai majaw, magam gun ai ni hpe mung kabu shangun mayu ai. (Shk. 100:2; 1 Tim. 1:11) Hkaw tsun bungli hta sharawng awng let shang lawm lu na matu, madung lam masum gaw hpa rai a ta?

Langai, myit mada lam shiga hpe anhte hkaw tsun ai re. Dai ni na masha ni hta, myit mada lam n nga ma ai majaw, anhte gaw “shiga kaja gun nna, ngwi pyaw ai lam” hpe tsun dan ma ai. (Esa. 52:7) Karai a Mungdan kabu gara shiga gaw anhte hpe ngwi pyaw shangun ai. Hkaw tsun n sa shi yang, mungkan ga hta Karai a Mungdan galaw ya na shaman chyeju ni hpe myit sumru yu u.

Lahkawng, anhte hkaw tsun ai kabu gara shiga gaw masha ni hpe hkum hkrang hte wenyi lam hta akyu jaw ai. Shanhte gaw shoihpa nga ai akyang lailen ni hpe kau da na matu sharin la nna, htani htana asak myit mada lam lu wa ma ai. (Esa. 48:17, 18; Rom. 1:16) Anhte galaw ai gaw, hkye mawai bungli re ngu nna myit yu mai ai. Nkau mi gaw hkye la ai hpe n ra tim, anhte gaw hkye la hkrum mayu ai masha ni hpe matut nna tam ra na re.​—⁠Mah. 10:11-14.

Masum, ahkyak htum gaw Yehowa hpe shagrau nga ai re. Shi gaw hkaw tsun ai bungli hpe grai manu shadan ai. (Esa. 43:10; Heb. 6:10) Dai hta n-ga, ndai bungli ngut kre lu na matu, shi a chyoi pra ai wenyi hpe nhpaw n-ya jaw ya ai. Dai majaw, ngwi pyaw lu na matu Yehowa a chyoi pra ai wenyi hpyi shawn u. (Gal. 5:22) Rai yang, anhte a myit tsang lam hpe awng dang lu nna nden marai hte hkaw tsun lu na re. (Kasa 4:31) Dai hta n-ga, lawk hta asawng asang di hkrum yang pyi, anhte lu da ai hkaw tsun bungli hpe sharawng ai myit hte galaw lu na re.​—⁠Ezk. 3:3.

Hkaja Ai Hte Myit Sumru Ai Kaw Na Ngwi Pyaw Lam Bai Lu Ngu Ai Video Hpe Yu Ngut Ai Hpang, Ndai Ga San Ni Hpe Htai U:

• Hkaw tsun bungli hta hkyinghkum law law shang lawm nga yang pyi, hkaja ai lamang gaw hpa majaw ahkyak ai kun?

• Meri hpe gara hku nna kasi la ging ai kun?

• Karai a Mungga hpe nang gara aten hta myit sawn sumru ai kun?

• Kabu gara shiga hpe hkaw tsun ai shaloi, nang hpa hkam sha lu wa ai kun?