HKRISTAN PRAT HKRUN LAM
Yehowa Masat Da Ai Akyang Lailen Hte Seng Ai Tara Ni Hpe Hkan Nga U
Yehowa gaw masha ni hkan sa na matu akyang lailen hte seng ai tara jahkrat da ya ai. Ga shadawn, num langai hte la langai hkungran ngut yang, prat tup kanawn mazum na matu re. (Mah. 19:4-6, 9) Ngang akyang hten za ai lam yawng hpe shi n ra sharawng ai. (1 Kor. 6:9, 10) Bu hpun mawn sumli ai lam ni hte seng nna mung, shi a amyu masha ni hpe npawt tara ni jahkrat da ai.—T.Ja 22:5; 1 Tim. 2:9, 10.
Dai ni mungkan hta masha law law gaw Yehowa a madang ni hpe n hkan sa ai. (Rom. 1:18-32) Shanhte gaw bu hpun mawn sumli ai, galaw hkawm sa ai lam ni hta mying gumhkawng ai hku, masha ni ra sharawng ai hku hkan ma ai. Yu n htuk ai hku bu hpun ai hpe shakawng nna, shanhte a tsang madang hku n hkan ai ni hpe pyi mara tam ma ai.—1 Pet. 4:3, 4.
Yehowa Sakse hku nna anhte ni gaw, Karai Kasang masat da ai akyang lailen hte seng ai tara ni hpe marai rawng let hkan sa ra ai. (Rom. 12:9) Gara hku nna kun? Shi ra sharawng ai hpe atsawm chye hkra galaw da nna, chye da ai hte maren prat hta nga ai hku nna re. Bu hpun ai hte mawn sumli ai hpe lata ai shaloi, tinang hkum tinang ndai hku san u: ‘Ngai lata ai gaw Yehowa a madang ni hpe madun ai (sh) mungkan ra ai hku rai nga ai kun? Karai hpe hkrit ai Hkristan langai hku nna, bu hpun mawn sumli nga ai kun?’ Sumla hkrung (sh) TV lamang ni hpe lata ai shaloi tinang hkum tinang ndai hku san u: ‘Yehowa gaw ndai hpe ra na kun? Kade a tsang madang ni hpe n-gun jaw nga ai kun? Ngai lata dat ai shangwi shapyaw ai lam ni gaw nye a akyang lailen tsang madang ni hpe gawng kya shangun ai kun?’ (Shk. 101:3) Ndai gaw nta masha (sh) kaga masha ni hpe mung ahtu kataw shangun na kun?—1 Kor. 10:31-33.
Yehowa masat da ai akyang lailen hte seng ai tara ni hpe hkan sa na matu hpa majaw ahkyak ai kun? Kade n na yang, Yesu Hkristu gaw n kaja ai lam yawng hpe jahten kau na majaw re. (Ezk. 9:4-7) Yehowa myit ra ai lam hpe galaw ai ni sha ngam nga na re. (1 Yaw. 2:15-17) Dai majaw, Karai Kasang masat da ai tara ni hpe makawp maga yang, anhte a kaja ai arawn alai ni hpe mu ai ni gaw Yehowa hpe shagrau na re.—1 Pet. 2:11, 12.
Ngai lata ai bu hpun mawn sumli ai lam gaw nye a lailen madang hpe madun nga
Yehowa A Jinghku Byin U—La Langai Hte Num Langai Ngu Ai Video Hpe Yu Ngut Ai Hpang, Lawu Na Ga San Ni Hpe Maram Yu U:
Yehowa a madang ni hte maren asak hkrung ai gaw hpa majaw hpaji rawng ai kun?
Kanu Kawa ni gaw Ma ni hpe kaji ai aten kaw nna, Yehowa masat da ai akyang lailen hte seng ai tara ni hpe hpa majaw sharin ya ging ai kun?
Karai Kasang a mai kaja ai lam kaw nna kaga masha ni akyu lu hkra, asak kaji kaba yawng gara hku karum ya lu ai kun?