Hkristan Prat Hte Magam Zuphpawng Shaman Laika Buk A Matu Lakap Da Ai Lam Ni
JANUARY 7-13
Wenyi Sut Gan Ni Hpe Sawk Sagawn Ai Lam
(Kasa 21:23, 24) Dai rai nna anhte tsun ai hte maren hkan galaw u: anhte kaw ga shaka da ai marai mali nga ma ai. 24 Dai ni hpe shaga la nna, shanhte hte rau nang hkum jasan jaseng u; shanhte baw shangun lu hkra hkungga jahpu shapraw ya u: shaloi she na a lam shanhte na ai shi n teng nga ai hte, nang hkum nan jep ai tara htung hking hkan shatsup ai wa rai nga ai gaw, masha nlang chye na na ma ra ai.
bt 184-185 ¶10-12
“Ngai Mara N Lu Ai Lam Ga Htan Ai Hpe Madat Mara Ya Mi”
10 Gara hku mi raitim, Pawlu gaw Laban Nhtoi hta bungli n galaw ai, lusha nkau mi hpe n sha ai lam zawn Yuda htung tara nkau hpe hkan ai ni a ntsa chye na ya wa ai. (Rom 14:1-6) Dai hta n-ga, shi gaw matu gadoi ai hte seng nna, tara ni hpe n jahkrat wa ai. Kaja wa nga yang, Timohti a kawa gaw Greek masha re ai majaw, Yuda ni Timohti hpe ntsen ai myit nga na hpe tsang nna, Pawlu gaw shi hpe matu gadoi ya wa ai. (Kas 16:3) Matu gadoi ai lam gaw, tinang hkrai dawdan ra ai lam re. Pawlu gaw, “matu gadoi hkam ai lam rai ti mung, matu gadoi n hkam ai lam rai ti mung, hpa akyu n nga ai rai nna, tsaw ra myit hte shachyen ai makam masham hkrai sha, akyu rawng nga ai” nga nna Galati nawku hpung masha ni hpe tsun wa ai. (Gal 5:6) Raitim, Jep Ai Tara hku nna matu gadoi ai lam, Yehowa Karai Kasang a myiman lu na matu, matu gadoi ra ai nga nna hkam la ai lam ni gaw, makam masham n nga ai hte bung ai.
11 Pawlu hte seng ai shiga ni gaw n teng ai raitim, de a majaw, kamsham ai Yuda ni myit naw shanut nga ma ai. De a majaw, salang ni gaw Pawlu hpe ndai hku galaw shangun ai: “Anhte kaw ga shaka da ai marai mali nga ma ai. Dai ni hpe shaga la nna, shanhte hte rau nang hkum jasan jaseng u; shanhte baw shangun lu hkra hkungga jahpu shapraw ya u: shaloi she na a lam shanhte na ai shi n teng nga ai hte, nang hkum nan jep ai tara htung hking hkan shatsup ai wa rai nga ai gaw, masha nlang chye na na ma ra ai.”—Kas 21:23, 24.
12 Manghkang gaw, tinang hte seng ai n teng n man shiga hpe n re ai sha, Mawshe a Jep Ai Tara hpe kamsham ai, Yuda masha ni a myit rawt ai lam re nga nna, Pawlu ninghkap tsun mai ai. Raitim, shi gaw Karai Kasang a npawt tara ni hte nhtan n shai dingsa, galai shai nna galaw ya na matu jin jin rai wa ai. Dai lam n byin shi yang Pawlu ndai hku ka wa ai: “Yuda ni hpe lum la lu hkra, Yuda ni hta e Yuda masha zawn, ngai tai nga nngai; ngai hkum tara npu e n nga ti mung, tara npu na ni hpe lum la lu hkra, tara npu na ni hta e tara npu e nga ai wa zawn, ngai tai nga nngai.” (1Ko 9:20) Ndai masa hta Pawlu gaw, Yerusalem na salang ni hte rau jawm galaw nna, “tara npu e nga ai wa zawn” byin wa ai. Shi dai hku galaw nna, dai ni anhte a matu kasi kaja madun wa ai. Anhte myit sumru da ai hte maren, shanang nna n galaw ai sha myitsu salang ni hte rau jawm galaw ra ai.—Heb 13:17.
(Kasa 22:16) Ya hpa rai ganung nga n ta? rawt u Shi a amying ningsang hpe gang shaga let baptisma hkam la nna, na yubak kashin kamun kau u, ngu nngai.
nwtsty hkaja matsing hta na Kas 22:16
Shi a amying ningsang hpe gang shaga let . . . na yubak kashin kamun kau u: Shing nrai “shi a amying hpe gang shaga nna na yubak kashin kamun kau u.” Marai langai gaw, shi a yubak hpe kashin kau na matu, hka hta hkalup hkam ai hku nna n re ai sha Yesu a amying hpe shaga ai hku nna re. Dai hta, Yesu hpe kamsham ai hte Hkristan magam bungli galaw ai hku nna kamsham ai lam madun ra ai lam ni lawm ai.—Kas 10:43; Yak 2:14, 18.
Chyum Hti Lamang
(Kasa 21:1-19) Ya anhte gaw shanhte hpe jahka kau da nna li jawn sa wa yang, Kusa tsunlawng de ang ang rai wa nna, hpang shani e Rodo tsunlawng de du ga ai; dai kaw nna Patara mare de du jang, 2 Hpinisi mung de rap wa ai li mu nna, dai hta jawn sa wa ga ai. 3 Ya Kupru tsunlawng mu mada jang, de a hkra maga hku lai mat wa nhtawm, Suri mung de anhte jawn sa wa nna, hpaga rai jahkrat na matu, Turu mare hta sek ga ai. 4 Dai yang na sape ni hpe tam mu nna, dai mare hta sanit ya hkring ga ai: dai sape ni mung Pawlu hpe, Yerusalem de n sa na lam, Wenyi hte tsun mu ai. 5 Sanit ya nhtoi lai jang, anhte bai pru wa ga ai; shanhte mung, madu jan kasha ni hte rau, mare shinggan du hkra hkan sa dat ma ai rai nna, hka kau e hput di let, akyu hpyi ga ai: Shing rai shada da shakram ngut jang, 6 anhte li de shang nna, shanhte mung nta de bai wa ma ai. 7 Bai Turu mare na anhte a li jawn lam htum nga yang, anhte Toleme mare de du ga ai; dai yang na hpu nau ni hte shachyen nna, shanhte hte rau lani mi rau nga ga ai. 8 Hpang shani e anhte bai pru nna, Kesare mare de du ga ai; Shing rai sara sanit hta na, kabu gara shi ga hkaw tsun ai wa Hpilip a nta e, anhte shang manam nga ga ai. 9 Dai wa gaw myihtoi htoi ai shayi hkawn jet mali lu ai. 10 Shi a nta e anhte tawng marang mi nga nga yang, Agabu ngu ai myihtoi langai mi, Yuda mung na sa du ai. 11 Dai wa anhte kaw shang nna Pawlu a shingkyit la nhtawm, shi dai dai shi a lagaw lata gyit nna, Chyoi pra ai Wenyi ning nga tsun nga ai, Ndai shingkyit madu hpe Yuda masha ni Yerusalem mare e ning di gyit nna, maigan amyu ni a lata de ap kau na ma ra ai da, nga nna tsun ai. 12 Ga dai na jang, anhte hte dai yang na ni gaw, Yerusalem de n sa na lam shi hpe hpyi hkum gaw ai. 13 Pawlu chyawm gaw, Nanhte hpa rai hkrap ngu hkrap ngoi nga nna, nye myit hpe gawng run shangun ya nga myit ta? gyit hkang ai sha n-ga, Madu Yesu a amying ningsang majaw, Yerusalem e sa si hkam na pyi ngai jin jin rai nga nngai, ngu nna htan shangap wu ai. 14 Shing rai n shabai lu gaw yang, Karai Kasang a myit rai nu ga, ngu nna anhte mung atsin sha nga ga ai. 15 Dai hpang anhte gaw arai shachyip la nna Yerusalem de lung wa ga ai. 16 Kesare na sape nkau mi mung, anhte hte rau sa ma ai rai nna, anhte hpe manam hkap na wa, Kupru masha, Manason ngu ai shawng shawng na sape langai mi kaw sa bang da mi ai. 17 Ya Yerusalem de du jang, hpu nau ni anhte hpe kabu gara ai myit hte hkap la mi ai. 18 Hpang shani e Pawlu anhte hte rau Yaku kaw shang nna, salang ni nlang mung hpawng nga ma la ai. 19 Shanhte hte shachyen ngut jang, shi gun hpai ai amu majaw, Karai Kasang maigan amyu ni hta shabyin wa ai amu lam langai hte langai hkai dan mu ai.
JANUARY 14-20
Wenyi Sut Gan Ni Hpe Sawk Sagawn Ai Lam
(Kasa 23:6) Dai hpawng nga ai ni hta nkau mi Saduke, nkau mi Hparishe rai nga ma ai hpe Pawlu chye da wu ai majaw, dai salang bawng hpe, Hpu nau ni e, ngai gaw Hparishe rai nga nngai; Hparishe kasha mung rai nga nngai; si ai ni bai hkrung rawt na myit mada ai lam majaw, ngai jeyang hkrum nga nngai, ngu nna jahtau dat wu ai.
nwtsty hkaja matsing hta na Kas 23:6
ngai gaw Hparishe rai nga nngai: Shawa masha nkau gaw Pawlu hpe chye ai. (Kas 22:5) Shi gaw shanhte ni hte rau Hparishe rai wa ai hpe chye ai majaw, shi hkum shi Hparishe a kasha ngu shaga ai lam hpe shanhte chye na ai. Pawlu gaw, myit rawt ai Hkristan byin wa ai hpe Sanhedrin na Hparishe ni chye ai majaw, shi hkum shi shut ai hku tsun nga ai n re ai hpe shanhte chye ai. Raitim, ndai shara hta Hparishe ngu tinang hkum tinang Pawlu hpa majaw tsun ai lam hpe, dai aten hta byin ai mabyin hpe yu nna chye na lu ai. Pawlu gaw, Saduke ngu n tsun ai sha Hparishe ngu shi hkum shi tsun ai gaw, bai hkrung rawt ai lam hpe Hparishe ni kamsham ai majaw re. Dai hku galaw nna, dai kaw du nga ai Hparishe ni hte bung ai lam ni hpe tsun dan lu wa ai. Ndai ndang kalang hkat ai lam hpe tsun ai hku nna, Sanhedarin hpung shang ni gaw, shi hpe chye na ya na re ngu, Pawlu myit mada wa ai. Shi a zai ladat awng dang wa ai. (Kas 23:7-9) Kasa 23:6 kaw Pawlu tsun ai ga gaw, Hkawhkam Agripa shawng hta shi hkum shi makawp maga ai shaloi, shi tsun ai ga hte mung bung nga ai. (Kas 26:5) Bai, Hpilipi hta nga ai Hkristan ni hpang de Roma kaw nna laika ka ai shaloi mung, shi gaw Hparishe kaw nna shangai wa ai lam, Pawlu bai tsun wa ai. (Hpl 3:5) Dai hte maren, kaga Hkristan ni mung, moi de Hparishe re ai lam Kas 15:5 hta tsun da ai gaw matsing hpa re.—Hkaja matsing hta na Kas 15:5 hpe yu u.
(Kasa 24:24) Dai hpang gade ya garai n na yang, Hpilik gaw, Yuda num Drusila ngu ai madu jan hte sa nna, Pawlu hpe shaga la nhtawm, Hkristu Yesu a makam masham lam tsun dan ai madat la wu ai.
(Kasa 24:27) Shing rai ni ning ladu hkrum jang, Hpilik a aya hta Porku Hpestu galai ai rai nna, Hpilik gaw Yuda masha ni a myi man shapa mayu ai majaw, Pawlu hpe sharen da let naw tawn da wu ai.
nwtsty hkaja matsing hta na Kas 24:24
Drusila: Kas 12:1 hta tsun da ai Herod gaw, Herod Agripa I rai nna, shi a nambat masum hpungdim shayi sha re. Shi gaw A.D. 38 daram hta shangai nna, Agripa II Bernike a kanau jan re. (Hkaja matsing hta na Kas 25:13 hte ခက်ဆစ် “ဟေရုဒ်” hpe yu u.) Munggyi Hpilik gaw, shi a nambat lahkawng madu wa re. Shi gaw, Emesa a Suri Hkawhkam Azizus hte shawng hkungran ai. Raitim, shi hte tara shang jahka nna, A.D. 54 ning daram (sh) shi asak 16 ning daram hta Hpilik hte bai hkungran wa ai. Hpilik a shawng hta Pawlu gaw “ding hpring ai lam, tinang hkum hkang ai lam hte du magang ra ai tara dara ai lam” tsun dan ai shaloi, Drusila mung dai kaw nga nga ai mai byin ai. (Kas 24:25) Hpilik gaw uphkang ai ahkaw ahkang, Hpestu hpe jaw kau ai shaloi, “Yuda masha ni a myi man shapa mayu ai majaw” Pawlu hpe naw sharen da ai. Nkau mi gaw, shi a asak aprat ram ai madu jan gaw, Yuda masha rai nna, madu jan myit ra hkra galaw ya ai re nga nna tsun ma ai.—Kas 24:27.
Chyum Hti Lamang
(Kasa 23:1-15) Shaloi Pawlu gaw dai salang bawng hpe azi yu da let, Hpu nau ni e, dai ni du hkra Karai Kasang a man e, hkum tsup ai myit mang hte ngai hkan sa ni ai, ngu mu ai. 2 Dai rai nna, hkinjawng agyi Anani gaw, Shi a n-gup bye ya mu nga nna makau e tsap nga ai ni hpe tsun mu ai. 3 Shaloi Pawlu gaw, Htun hpraw chya ai shakum e, Karai Kasang nang hpe mahtang bye na ndai: tara hku hte maren ngai hpe jeyang na she nang nang e dung nhtawm me, tara hte nhtan shai ai hku ngai hpe bye na hkang dat n ni? ngu wu ai. 4 Makau e tsap nga ai ni mung, Nang Karai Kasang a hkinjawng agyi wa hpe roi lu n ni? nga nna jet ma ai. 5 Pawlu gaw, Hpu nau ni e, shi hkinjawng agyi re ai ngai n chye nna rai sai; na amyu ntsa e up ai wa hpe roi lu na n rai, nga nna ka da nga ai, nga nna bai yin wu ai. 6 Dai hpawng nga ai ni hta nkau mi Saduke, nkau mi Hparishe rai nga ma ai hpe Pawlu chye da wu ai majaw, dai salang bawng hpe, Hpu nau ni e, ngai gaw Hparishe rai nga nngai; Hparishe kasha mung rai nga nngai; si ai ni bai hkrung rawt na myit mada ai lam majaw, ngai jeyang hkrum nga nngai, ngu nna jahtau dat wu ai. 7 Dai hku tsun dat yang, Hparishe ni hte Saduke ni shada da ndang hkat ma ai rai nna, shawa hpawng gaw myit shai shajang mat ma ai. 8 Kaning rai nme law, Saduke ni mahtang, hkrung rawt ngu ai n nga ai, lamu kasa hte wenyi mung n nga ai, nga nna tsun ma ai; Hparishe ni chyawm gaw dai lam lahkawng nga ai, kam ma ai. 9 Dai rai nna grai wa tsun garu bu nga ma ai; shaloi Hparishe hpung na laika ka ai sara ni nkau mi rawt nna, Ndai wa hta hpa mara mung anhte n mu ga ai; Wenyi, shing n rai, lamu kasa langai mi shi hte ga tsun ai rai yang, hpa re hka,—nga nna tsun hkat bu ma ai. 10 Shing rai nau wa dangrang hkat wa jang, shanhte Pawlu hpe ashep ashin di kau na, hpyenbu kaba tsang ai majaw, shanhte kaw yu wa nna, Pawlu hpe dai ni a ka-ang na kare la nhtawm, hpyen wing de shashawn la na, hpyen ma ni hpe hkang dat mu ai. 11 Dai shana Madu gaw shi a makau e tsap pru nna, Myit hkum ru et; nang nye a lam Yerusalem mare hta sakse hkam nit dai hte maren, Roma mare hta mung naw hkam lu na ndai, ngu nna tsun wu ai. 12 Ya nhtoi htoi yang Yuda masha ni jawm hpawng nna, Pawlu hpe garai n sat lu lu gaw, hpa mung n lu n sha na ga ai, nga nna tinang hkum dai dagam shaka ma ai. 13 Shing nga bawng ai ni marai mali shi jan rai nga ma ai. 14 Shanhte gaw hkinjawng ni hte salang ni hpang de sa nna, Pawlu hpe garai n sat lu lu gaw, hpa mung n chyim yu na, ngu nna anhte grai ngu dagam shaka tawn sagaw ai. 15 Dai re ai majaw, nanhte madu ni dai salang bawng hte rau, Pawlu a lam atsawm sha naw san yu mayu ai, ngu nna nanhte hpang de shi hpe shaga la na matu, hpyenbu kaba wa hpe hpyi dat mu; shaloi anhte gaw, shi garai n du yang lam lapran e shi hpe sat na jin jin rai nga na ga ai, ngu mu ai.
JANUARY 21-27
Wenyi Sut Gan Ni Hpe Sawk Sagawn Ai Lam
(Kasa 26:14) Shaloi anhte nlang ga de kadawng taw mat shajang nga yang, Hebre ga hte ngai hpe, Shawlu, Shawlu nang ngai hpe hpa rai zingri nga n ta? masawn hpe htawng yang, na a matu yak la ahka gaw, nga nna shaga ai nsen ngai na nngai.
nwtsty hkaja matsing hta na Kas 26:14
masawn hpe htawng yang: Masawn gaw, dusat ni hpe shadut gau ai shingna masen langai re. (Trg 3:31) Ndai “masawn hpe htawng yang” ngu ai ga shagawp hpe, Greek laili laika ni hta mu lu ai. Myit ja ai dumsu ni hpe shangun ai shaloi, masawn hpe lahkat htawng na nga yang, shanhte sha machyi na re. Dai ga shagawp gaw ndai mabyin kaw nna yu wa ai re. Shawlu Hkristan n byin shi yang, dai zawn akyang lailen nga wa ai. Yehowa madi shadaw ya nga ai, Yesu a hpang hkan ai ni hpe ning hkap gasat ai hku nna, Pawlu gaw shi hkum shi grai hkra machyi ai ning ma lu hkra galaw wa ai. (Shing daw Kas 5:38, 39; 1Tm 1:13, 14.) Hpj 12:11 hta “majawn” ngu tsun da ai gaw, hpaji jaw ga hkan sa na matu, madat nga ai ni hpe shadut ya ai, hpaji jaw ai wa a ga hpe ga shadawn hku nna tsun da ai.
nwt ga lachyum
Masawn, Majawn. Dusat ni hpe ahtawk na matu, hkau na galaw ai ni lang ai nchyan masen ai shingna galu. Madat ai wa hkap la wa hkra, shadut ya lu ai hpaji ga ni hpe, gau ai shingna hte shing daw da ai. “Masawn hpe htawng yang” ngu ai ga si gaw, myit ja ai dumsu a arawn alai kaw nna yu sa wa ai. Myit ja ai dumsu gaw, masawn hte ahtawk hkrum ai shaloi, myit ja nna shanang taw ai majaw, tinang hkum tinang sha machyi shangun ai.—Kas 26:14; Trg 3:31.
(Kasa 26:27) Hkawhkam Agripa e, myihtoi ni a ga hpe nang kam n ni? kam nga ndai gaw ngai chye nga nngai, ngu wu ai.
w03 11/15 16-17 ¶14
Mungdan Shiga Hpe Hkap La Na Matu Kaga Ni Hpe Karum
14 Agripa gaw, amying hkam Yuda langai sha re ai hpe Pawlu chye da ai. Yuda htung lai hte seng nna, Agripa chye da ai hta madung nna, Pawlu gaw shi hkaw tsun ai lam gaw, kaja wa nga yang Meshia a si ai lam, bai hkrung rawt ai lam hte seng nna “myihtoi ni hte Mawshe tsun ai lam hta kaga, ngai hpa mung n tsun jan nngai,” ngu nna dinglik dan wa ai. (Kas 26:22, 23) Agripa hpe Pawlu gaw, “Hkawhkam Agripa e, myihtoi ni a ga hpe nang kam n ni?” ngu nna, dingtawk san wa ai. Dai shaloi Agripa htai na matu yak wa ai. Myihtoi ni hpe n kam ai ngu tsun yang, kamsham ai Yuda masha langai hku nna, shi a sari hpoi mat na re. Raitim, Pawlu hte myit hkrum dat ga nga yang mung, kasa hte rau maren sha rai mat nna, shi hpe Hkristan langai nga nna tsun sana re. Pawlu gaw, shi a ga san hpe hpaji hte ndai hku htai wa ai: nang “kam nga ndai gaw ngai chye nga nngai.” Agripa gara hku htai na matu shadut hkrum wa ai kun? Shi gaw “Ga hkaw loi sha hte nang ngai hpe Hkristu a sape ganoi shatai lu” ndai nga nna bai htai wa ai. (Kas 26:27, 28) Agripa gaw Hkristan n byin wa tim, Pawlu a mungga gaw shi a myit masin hpe tsawmra hkra wa ai gaw dan dawng nga ai.—Heb 4:12.
Chyum Hti Lamang
(Kasa 25:1-12) Ya Hpestu dai mungdaw hta shang ai masum ya rai yang, Kesare mare kaw nna Yerusalem de lung wa ai. 2 Shaloi hkinjawng agyi ni hte Yuda masha ni a agyi salang ni, Pawlu a lam shi hpe sa tsun nna, 3 Pawlu hpe lam e hkap gyam sat kau lu hkra maw ai myit hte, shi hpe Yerusalem mare de sa dat ya na lam, chyeju hkap hpyi mu ai. 4 Rai ti mung Hpestu gaw, Pawlu hpe Kesare mare e she sharen tawn nga ai rai nna, gade n na yang shi mung dai de bai wa na rai nga ai majaw, 5 Nanhte hta na ahkang lu ai ni ngai hte rau yu wa nna, dai wa hta mara lama ma rawng yang gaw, sa shagun mu, ngu nna htan dat mu ai. 6 Shing rai shanhte kaw nhtoi matsat ya, shi ya daram hkring nga nhtawm, shi Kesare mare de bai yu wa nna, hpang shani e tara tingnyang hta dung let, Pawlu hpe shaga na hkang dat wu ai. 7 Shi du jang, Yerusalem na yu wa ai Yuda masha ni gaw Pawlu a grupyin e tsap nna, sakse n madun lu ai mara kaba law law wa shi a ntsa e shagun mu ai. 8 Pawlu chyawm gaw, Yuda masha ni a jep ai tara hpe mung, naw ku Htingnu hpe mung, hkawhkam Kehta hpe mung, ngai hpa n shut n hpyit yu nngai, ngu nna mara raw ga tsun nga ai. 9 Rai ti mung Hpestu gaw, Yuda masha ni kaw myi man pa mayu nna, Pawlu hpe, Nang Yerusalem mare de lung wa nna, dai yang e nye a man e ndai amu lam dawdan hkam na, nang hkraw nga n ni? ngu nna shi hpe san wu ai. 10 Pawlu chyawm gaw, Hkawhkam Kehta a tara tingnyang man e ning ya tsap nga nngai; dawdan ai rai yang, nang e dawdan mi: nang madu atsawm sha chye nga ai hte maren, Yuda masha ni hpe ngai kachyi mi muk shut ai n rai. 11 Ngai shut hpyit tawt lai ai wa rai nna, si ging ai mara lama ma galaw kau ai rai yang gaw, si hkam na lam ngai ndang ai n rai: Rai ti mung, ndai ni shagun ai mara langai mi muk n teng yang gaw, shanhte a lata de ngai hpe kadai wa ap kau lu na n rai. Hkawhkam Kehta kaw du na nngai, ngu nna htan wu ai. 12 Shaloi Hpestu gaw, salang bawng hte bawng ngut jang, Nang Kehta kaw du na nga nit dai: Kehta hpang de sa lu na re ai, ngu nna htan wu ai.
JANUARY 28–FEBRUARY 3
Wenyi Sut Gan Ni Hpe Sawk Sagawn Ai Lam
(Kasa 27:9, NW) Nhtoi tsawmra wa lai ngut ai hpang, mara raw ai nhtoi lusha gam aten lai sai majaw, hka hkrun lam hkawm sa na matu shoi hpa law wa ai.
nwtsty hkaja matsing hta na Kas 27:9
mara raw ai nhtoi lusha gam aten: Shing nrai, “n mut ta lusha gam.” Ga si a dingtawk lachyum gaw, “lusha gam” re. Dai “lusha gam” ngu ai Greek ga si gaw, Mawshe a tara n pu hta matsun da ai lusha gam ai lam hpe sha tsun ai. Dai gaw, shaning shagu galaw ai mara raw ai nhtoi hte matut mahkai nga ai. Dai hpe Yom Kippur (Hebre, yohm hak·kip·pu·rimʹ, “magap ya ai nhtoi”) ngu nna mung shaga ai. (Jaw 16:29-31; 23:26-32; Bhk 29:7; ခက်ဆစ် “အပြစ်ဖြေရာနေ့” hpe yu u.) “Tinang a myit masin hpe shagrit let” ngu ai hpe, mara raw ai nhtoi hte matut mahkai nna lang da ai. Dai ga gaw lusha gam ai hte hpawn, tinang hkum tinang nyet kau ai lam amyu myu hpe tsun mayu ai re. (Jaw 16:29, lawu matsing.) Kas 27:9 hta lang da ai “lusha gam” ngu ai ga si gaw, mara raw ai nhtoi hta tinang hkum tinang nyet kau nna lusha gam ai lam hpe tsun mayu ai re. Mara raw ai nhtoi gaw, September shata htum wa mahka kaw nna, October shata praw du hkra re ai.
(Kasa 28:11, NW) Shata masum na ai shaloi, “Zeu a kasha ni” a sumla lawm ai sanghpaw li hte anhte pru mat wa ai. Dai sanghpaw gaw, Alesandru mare kaw nna sa ai rai nna, Melite zunlawng hta nshung ta shalai nga ai.
nwtsty hkaja matsing hta na Kas 28:11
Zeu a kasha ni: Greek hte Roma maumwi mausa hku nga yang, Zeu a Kasha Ni (Greek, Di·oʹskou·roi) gaw, Castor hte Pollux hpara marun yan nau rai nga ai. Nat hpara Zeu (Jupiter) hte Spartan Hkawhkam Jan Leda a kasha ni rai nga ai. Panglai hta sanghpaw li ma ni tsin-yam hkrum ai shaloi, makawp maga ya ai nat hpara ni re ngu masha ni hkam la ma ai. Ndai sanghpaw li baw hta na ahkri ahkrai lam gaw, ndai Chyum Laika labau hpe myi mu sakse nan ka wa ai ngu ai hpe madi madun ai.
Chyum Hti Lamang
(Kasa 27:1-12) Ya, anhte hpe Itali mung de li hte sharap sa wa na myit shatawng da ngut jang, shanhte Pawlu hte kaga bawng ni nkau mi hpe, Agustu hpyen dap hte seng ai, Yuli ngu ai hpyen bu a lata hta ap dat mi ai. 2 Shaloi, Asi mung a nammukdara hkin-gau hkan na mare ni de garet shang hkawm wa ai, Adramuti na shanghpaw li hta anhte shang jawn ga ai: Htesaloni mare na Makedoni masha Aristarku mung anhte hte rau lawm nga ai. 3 Hpang shani e anhte Sidon mare hta sek ga ai; Yuli gaw Pawlu hpe matsan dum nna, shi a jinghku ni kaw sa jahkrum na hte galaw daw hkam sha na matu, ahkang jaw wu ai. 4 Dai kaw na pru jang, nbung n sun ai majaw, Kupru tsunlawng lahta hku garet nna, 5 Kiliki hte Pamhpuli mung na nawng makau hku rap tawng yang, Luki mung na Mura mare de du ga ai. 6 Dai shara e hpyen bu wa gaw, Itali mung de rap sa wa ai Alesandru mare na shanghpaw li mu hkrup nna, dai hta e anhte hpe shashawn mi ai. 7 Dai kaw nna nhtoi law law wa, yat yat sha sa wa nna, Kidu jut ang de yak let sha du lu jang, nbung n sun ai majaw, n shanang lu nna, Kreti tsunlawng hpe shinggun let, Salmone ginchyum ang hku sa wa nhtawm, 8 de a makau hku yak la ai hte garet hkawm wa yang, Lasea mare hte ni nga ai Daru Kaja ngu ai, li sek ai shara de du ga ai. 9 Ya nhtoi tsawmra wa na wa jang, lusha gam aten lai mat ai majaw, li hte hkawm sa hkrit ra ai ta du sai rai nna, 10 Pawlu gaw, Hkau ni e, ya hkawm yang, yak la nna ali hte arai ni sum na hta n-ga, anhte a asak pyi sum na zawn nawn da we ai, ngu nna shanhte hpe tsun shadum wu ai. 11 Hpyen bu wa mahtang, Pawlu a ga hta, Li hkang ai wa hte li madu a ga hpe, grau nna kam wu ai. 12 Daru dai mung nshung ta sek shatawt lu na n tai ai majaw, Hponik daru de du lu yang du hkra sa nna, dai yang nshung shatawt lu hkra du wa na lam, law malaw myit hkrum ma ai: dai shara gaw, Kreti tsunlawng na sinna dingdung hte sinna dingda de man yawng ai daru rai nga ai.