Hkristan Prat Hte Magam Zuphpawng Shaman Laika Buk A Matu Lakap Da Ai Lam Ni
MARCH 4-10
Wenyi Sut Gan Ni Hpe Sawk Sagawn Ai Lam
(Roma 12:1) Dai re ai majaw, hpu nau ni e, nanhte a hkum hkrang hpe, hkrung nga ai, chyoi pra ai hte, Karai Kasang kaw sharawng awng ai hkungga matu nawng ya na, Karai Kasang a chyeju hte ngai nanhte hpe shadut shahkat dat ma de ai: dai gaw nanhte a myit masin a daw jau ai lam rai nga ai.
Akyu Nga Ai Shangwi Shapyaw Lam Hpe Lata Mai Ai Lam
5Prat hta nang galaw ai lam yawng gaw, Yehowa hpe nawku daw jau ai lam hte matut mahkai nga ai. Pawlu gaw dai teng man ai lam hpe hpunau nauna ni dum nga na matu, Roma mare masha ni hpang de ka ai laika hta lachyum sung ai ga si hpe jailang wa ai. “Hkrung nga ai, chyoi pra ai hte, Karai Kasang kaw sharawng awng ai hkungga matu nawng ya na, Karai Kasang a chyeju hte ngai nanhte hpe shadut shahkat dat ma de ai: dai gaw nanhte a myit masin a daw jau ai lam rai nga ai” nga nna shi n-gun jaw wa ai. (Roma 12:1) Na a hkum hkrang hta nyan hpaji, myit masin, atsam marai ni lawm ai. Karai Kasang hpe nawku daw jau ai hta, dai ni yawng hpe nang akyu jashawn ai. (Marku 12:30) Dai zawn myit masin mahkra hte nawku daw jau ai lam hpe hkungga hku nna Pawlu tsun wa ai. “Hkungga” ngu tsun ai shaloi, anhte sadi ra na lam langai hpe dum shangun ai. Mawshe Tara hta nga yang, ra rawng ai hkungga hpe Karai Kasang n hkap la ai. (Jaw Jau 22:18-20) Dai hte maren, Hkristan langai a wenyi hkungga hta ra rawng ai lam lawm yang, Karai Kasang hkap la na n re. Gara lam hku nna dai zawn byin chye ai kun?
6Roma mare hta nga ai Hkristan ni hpe Pawlu gaw, “nanhte a daw shan ni hpe mung, . . . yubak hpe hkum ap ya myit” nga nna sadi jaw wa ai. ‘Hkum hkrang a arawn alai ni hpe sat kau’ na matu shi matut tsun wa ai. (Roma 6:12-14; 8:13) Shi a laika shawng na daw hta “hkum hkrang a arawn alai” hte seng ai ga shadawn nkau hpe tsun wa ai. Mara galaw chye ai masha ni hte seng nna “shanhte a n-gup matsa mawa hte kajet kaje hkrai hpring nga ma lu ai.” “Asai shapraw na shanhte a lagaw larau nga ai.” “Karai Kasang hpe hkrit kamyin ai lam, shanhte a myi man e n rawng ma lu ai” nga nna tsun wa ai. (Roma 3:13-18) Hkristan langai gaw shi a “hkum hkrang” hpe akyu jashawn nna, n kaja ai akyang lailen ni hpe galaw nga ai rai yang, shi a hkum hkrang hta ra rawng ai lam nga nga ai re. Ga shadawn, ya aten hta Hkristan langai gaw nse nsa sumla ni, grai mazut nna zingri zingrat ai hpe n-gun jaw ai sumla hkrung ni hpe dingsang yu taw ai nga yang, shi a myi gaw “yubak” hpe sak jaw nga ai majaw, shi a hkum hkrang yawng hpe matsat shabat byin shangun ai. Shi a nawku daw jau ai lam yawng gaw, n san seng ai hkungga byin wa nna Karai Kasang hkap la sana n re. (Tara Jahprang 15:21; 1 Petru 1:14-16; 2 Petru 3:11) Akyu n nga ai shangwi shapyaw lam hpe lata ai majaw, jaw ra ai manu gaw grai kaba la ai.
(Roma 13:1) Shinggyim masha nlang hte gaw, daru magam ahkang aya lu ai ni a npu e a taw nga mu ga: kaning rai nme law, Karai Kasang kaw nna sha n rai yang gaw, ahkang aya n nga nga ai: nga nga ai ahkang aya hte mung, Karai Kasang e san da ma nu ai.
w08 6/15 31 ¶4
Roma Laika Kaw Na Dan Dawng Ai Lam Ni
13:1—Daru magam ahkang aya lu ai ni a ahkang aya hpe gara lam hku nna, “Karai Kasang e san da” ai rai na kun? Mungkan a daru magam ahkang aya lu ai ni hpe “Karai Kasang e san da” ai ngu tsun ai gaw, Karai ahkang jaw da ai majaw shanhte uphkang lu ai rai nna, masa nkau mi hta gaw, shanhte a uphkang ai lam hpe Karai Kasang tau hkrau mu ai ngu tsun mayu ai re. Uphkang ai ni law law a lam Chyum Laika hta myihtoi da ai gaw, ndai lam jaw ai hpe asan sha madun nga ai.
Chyum Hti Lamang
(Roma 13:1-14) Shinggyim masha nlang hte gaw, daru magam ahkang aya lu ai ni a npu e a taw nga mu ga: kaning rai nme law, Karai Kasang kaw nna sha n rai yang gaw, ahkang aya n nga nga ai: nga nga ai ahkang aya hte mung, Karai Kasang e san da ma nu ai. 2 Dai re ai majaw, ahkang aya hpe lale ai wa gaw, Karai Kasang a tawn da ai aya hpe nhkap shadang nga ai; nhkap shadang nga ai ni chyawm gaw, tinang nan tara dara ai hkrum na ma ra ai. 3 Kaning rai nme law, du ni gaw kaja ai bungli a matu mara hkrithpa tai ma ai n rai; n kaja ai a matu mara hkrithpa rai ma ai. Ahkang aya lu ai wa hpe n hkrit mayu ai nga na myit ni? Mai kaja ai bungli galaw u, Shing rai jang shi nang hpe shakawn kungdawn na rin dai: 4 kaning rai nme law, shi gaw na a akyu ara a matu mara, Karai Kasang a hkringmang rai nga ai. N hkru n hkra ai bungli nang galaw n yang gaw, hkrit kang nga u; kaning rai nme law, shi gaw dai nhtu hpe be lagya hpye wu ai n rai; n hkru n hkra ai bungli galaw ai wa hpe pawt sindawng hkra matai tai ai wa ngu ai, Karai Kasang hkringmang shi rai nga ai. 5 Dai rai nna, pawt sindawng na hpe tsang ai majaw sha n rai, tinang a myit masin e hkang ai majaw mung, ahkang aya npu e nanhte taw lu na ma rin dai. 6 Dai majaw mung, nanhte hkansi bang nga myit dai; kaning rai nme law, Karai Kasang a agyi salang ni shanhte rai nga ma ai rai nna, ndai amu hpe tut nawng e a gun hpai nga ma ai. 7 langai hte langai hte hpe mai ang ai hte maren jaw ya mu: hkansi mai hta ai wa hpe hkansi, kang mai hta ai wa hpe kang, bang mu; hkrit kamyin mai ai wa hpe hkrit kamyin nga mu, hkungga lara ram ai wa hpe, hkungga lara di mu. 8 Shada da tsaw ra ai hta kaga, kadai hte mung hpa hka hkum kap mu: masha kaga hpe tsaw ra ai wa gaw jep ai tara hpe shatup ngut nu ai. 9 Kaning rai nme law, Masha num hkum shaw, masha hpe hkum sat, hkum lagu, myit hkum marin, nga ai hte htet da ai ga kaga naw nga a yang gaw, dai hte gaw, Na a htingbu wa hpe na a hkum hte maren nang tsaw ra lu na ndai, nga ai ga langai sha hta gumhpawn lawm nga ai. 10 Tsaw ra ai gaw htingbu wa hpe n hkru n hkra galaw yu ai n rai: dai rai nna tsaw ra ai gaw, jep ai tara a shatup shadik ai lam rai nga ai. 11 Dai hta kaga, ndai aten hpe nanhte chye nga myit dai majaw, nanhte a yup hprang wa na ahkying, ya e pyi rai ra ai; kaning rai nme law, shawng nnan kam sham saga ai hta, dai hkye hkrang la ai gaw ya e nan anhte hte grau nna ni wa sai. 12 Shana ahkying lai magang wa nna, shani nhtoi du magang wa ra ai. Dai re ai majaw, nsin hte seng ai bungli hpe anhte raw sharun kau nna, nhtoi a hpyen hking hpe dagraw nga ga. 13 Tangpyaw shalai ai hte chyaru nang ai, shawa num gasawi ai hte ngang kayut ai, ga law ga la ai hte manawn masham ai hpe n hkan tam ai sha, shani chyingtung na shingdi ai zawn anhte a hkawm nga ga. 14 Dai hta n-ga, Madu Yesu Hkristu hpe bu hpun dagraw nga mu: hkum shan a myit marin ai hku shadik na matu, hkum maw hkum hkyen nga myit.
MARCH 11-17
Wenyi Sut Gan Ni Hpe Sawk Sagawn Ai Lam
(Roma 15:27) Shanhte myit madu ma ti mung, dai gaw chyeju htang ai sha naw rai nga ai: kaning rai nme law, shanhte a wenyi wunli wun-gau hta maigan amyu ni jawm hpawm ma yang gaw, mungkan arai hte shanhte hpe galaw daw na, sut nga ai.
w89 12/1 24 ¶3
“Nanhte A Tsawra Ai Myit Majing Hpe Chyam Yu Na”
Maigan hpunau ni gaw, Yuda masha ni tsin-yam hkrum nga ai majaw karum mayu ai myit nga wa na re. Bai nna, Yerusalem kaw na hpunau ni hpe shanhte “chyeju htang” na lam nga ai. Maigan hpunau ni kabu gara shiga na la lu wa ai gaw, Yerusalem kaw na hpunau ni a majaw re. Dai lam hpe Pawlu mung ndai hku madi shadaw tsun wa ai: “Yuda amyu masha ni hkam la ai Wenyi shaman chyeju Sali wunli ni hpe maigan masha ni hpe mung jawm hpawm hkam la shangun masai rai nna maigan masha ni mung . . . arung arai ni hte Yuda masha ni hpe chyeju htang ai hku bai karum la ang ma ai.”—Roma 15:27, Kabu Gara Shiga Chyum Laika.
(Roma 16:25, JCLB) Karai Kasang hpe anhte shakawn shagrau nga ga! Ngai nanhte hpe hkaw tsun dan sai Yesu Hkristu a lam Kabu gara shiga hte moi chyaloi nhkoi prat kaw nna makoi magap da ai dai teng man ai lam e shadan shadawng dat ai hte maren shi gaw nanhte hpe nanhte a makam masham hta ngang ngang kang kang tsap shangun lu nga ai.
it-1-E 858 ¶5
Tau Hkrau Chye Ai, Tau Hkrau Masat Da Ai
Ga sadi tawn da ai Amyu Matu gaw, Meshia (sh) Hkristu rai nna, mungkan kaw nga ai dinghpring ai masha ni yawng gaw, shi hku nna shaman chyeju lu la na re. (Gal 3:8, 14) “Amyu matu” a lam hpe, Abela n shangai shi ai aten, Edin sun hta gumlau ai lam byin ngut ai hpang shawng nnan hku nna tsun wa ai. (Nin 3:15) “Makoi magap da ai dai teng man ai lam” gaw, shaning 4,000 na ai hpang she, dai Meshia “amyu matu” gaw kadai re ai hpe chye lu wa ai. Dai majaw, dai gaw teng sha “chyi nma hpri nhpra e kyem da” ai lam rai nga ai.—Rom 16:25-27; Ehp 1:8-10; 3:4-11.
Chyum Hti Lamang
(Roma 15:1-16) Dai rai nna anhte n-gun ja ai ni gaw, tinang pyaw ai lam n hkan ai sha, n-gun kya ai ni a magrau n grang ai hpe hkam sharang na, sut nga ai. 2 Anhte langai hte langai tinang a manang wa a ngamu ngamai na lam tau yu nna, shadaw shangang rai hkra shi hpe shapyaw nga ga. 3 Shing rai Hkristu mung shi hkum dai n shapyaw la ai sha, Nang hpe shatan ai ni a shatan nhkan ga, nye a ntsa e du ra ai, nga nna ka da nga ai hte maren, rai nga sai. 4 Kaning rai nme law, anhte shakut sharang nga lu nna, Chyum laika ni a shangwi shapyaw ai ga a majaw myit mada shara nga lu u ga, shawng e ka da ai lam shagu gaw, anhte hpe sharin achyin ya na matu, ka da nga sai. 5 Ya, anhte a Madu Yesu Hkristu a Kawa rai nga ai, Karai Kasang hpe, myit mang langai sha hte n-gup ga langai sha e shakawn kungdawn nga lu myit ga, 6 Hkristu Yesu a jaw e nanhte shada da myit mang ara sha rai nga lu u ga, shakut sharang ya ai hte shangwi shapyaw ya ai a Karai Kasang gaw, nanhte hpe awn nga u ga law. 7 Dai rai nna Karai Kasang a hpung shingkang a matu mara, Hkristu gaw anhte hpe hkap hkalum la ma ni ai hte maren, nanhte shada da hkap hkalum la mu. 8 Kaning rai nme law, ngai tsun nngai gaw, ji wa ni kaw jaw da ai ga ndat hpe shagrin lu na hte, maigan amyu ni mung chyeju majaw Karai Kasang hpe shakawn kungdawn lu mu ga, 9 Karai Kasang a teng man ai lam a matu mara, Hkristu gaw matu gadoi hkam ai ni a ali ama tai wa sai. Shing rai, Dai re ai majaw maigan amyu ni hta ngai nang hpe shakawn na nngai, Na amying nsang hpe mahkawn mangoi na nngai, nga nna ka da ai hte maren rai nga ai. 10 Bai shi gaw, Maigan amyu ni e, shi a amyu hte rau kabu gara nga mu, nga nna tsun ai. 11 Bai, Maigan amyu nlang hte e, dai Madu hpe shakawn mu; Amyu baw nlang hte gaw shi hpe kungdawn u ga, nga ai. 12 Bai Esaia gaw, Yese kaw nna kying ai ru npawt hte, Maigan amyu ni hpe up na paw pru ai wa rai na ra ai: Dai wa hpe maigan amyu ni myit mada na ma ra ai, nga ai. 13 Ya, Chyoi pra ai Wenyi a n-gun atsam hte myit mada ai lam hta nanhte gumring gumrat rai wa myit ga, myit mada npawt rai nga ai Karai Kasang gaw, kam sham ai lam hta e, chyeju hte ngwi pyaw ai amyu myu nanhte hpe jahpring shatsup ya myit ga law. 14 Nye a hpu nau ni e, nanhte nan lala kaja htum ai hte hpring tsup nga nna, chye chyang ai amyu myu htak rai nga ai hte, nanhte shada da sharin jep lu myit dai hpe, nanhte a lam ngai hkum nan kam da ma de ai. 15 Rai ti mung, Chyoi pra ai Wenyi e shachyoi shapra ai a majaw, maigan amyu ni gaw sharawng awng ai hkungga tai lu mu ga, Karai Kasang a kabu gara shi ga hta hkungga jaw let, maigan amyu ni a matu Hkristu Yesu a shangun ma ngai tai wa n ga; 16 Karai Kasang e ngai hpe jaw da ai chyeju majaw, nanhte hpe bai shadum shahprang na zawn, ngai nanhte hpe nden ja ai myit hte kau chyen ka dat ma de ai.
MARCH 18-24
Wenyi Sut Gan Ni Hpe Sawk Sagawn Ai Lam
(1 Korinhtu 1:20) Hpaji byeng-ya rawng ai wa kanang nga a ta? laika ka ai sara kanang nga a ta? ndai mungkan ga na bawmung wa kanang nga a ta? Mungkan ga a hpaji byeng-ya hpe, Karai Kasang shangawk shangak kau ya nu ai, n rai ni?
it-2-E 1193 ¶1
Hpaji Byeng-ya
Mungkan a uphkang du ni gaw, hpaji rawng ai hku uphkang lu ai zawn raitim, ‘hpung shingkang rawng ai Madu hpe wudang hta jen da’ ai hku nna, Hkristu kaw na Karai lajang ya ai lam hpe angawk angak shatai let nyet kau ai. (1Ko 1:18; 2:7, 8) ‘Angawk angak re ai masha ni, gawng kya ai ni, kaya hpa re ai ni’ hte “Karai Kasang kaw na angawk angak” re ai ngu mungkan hpaji chye ai ni sawn la da ai lam ni hpe, Karai Kasang gaw shi a yaw shada lam awng dang lu hkra akyu jashawn nga ai. Dai hku nna, mungkan hpaji chye ai ni hpe kaya jahkrum let, mungkan hpaji gaw angawk angak re ai hpe Karai Kasang sakse madun nga ai. (1Ko 1:19-28) Pawlu gaw, “ndai mungkan ga na hpaji byeng-ya” hte “ndai mungkan ga na hten bya nga ma ai du ni a hpaji byeng-ya” ni gaw kaman lila sha rai mat na hpe sadi jaw wa ai. Dai majaw, dai zawn mungkan hpaji ni gaw, Kasa ni hku nna ka da ai Karai Kasang a shiga hta n lawm wa ai. (1Ko 2:6, 13) “Mungkan ga a hkang ai tara [phi·lo·so·phiʹas, ga si dingtawk lachyum gaw hpaji hpe tsawra ai] hte masha a matsun maroi ga hkan ai zai byeng-ya hte lila rai nga ai hkalem hkalau ga” kaw mahkam n katut na matu, Kolose kaw na Hkristan ni hpe mung Pawlu sadi jaw wa ai.—Kol 2:8; daw kaji 20-23 hte mung shingdaw.
(1 Korinhtu 2:3-5) Bai, ngai gaw, gawngkya ai hte, hkrit kamyin nna hkrit gari ai law law hte, nanhte hte rau nga nga nngai rai nna, 4 nanhte a makam masham gaw, masha a hpaji byeng-ya hte n rai, 5 Karai Kasang a atsam hte sha grin nga lu u ga, nye a aga hte nye a hkaw dan ai gaw, shalen chye ai hpaji byeng-ya ningtam n nang ai sha, Wenyi hte atsam rawng ai sakse lam rai nga ai.
w08 7/15 27 ¶6
Korinhtu Laika Kaw Na Dan Dawng Ai Lam Ni
2:3-5. Pawlu gaw Greek myit mang hpaji hte hpaji sharin la ai madung shara re ai Korinhtu mare hta sakse hkam nga ai shaloi, madat nga ai ni hpe lau la lu na, n lu na hte seng nna myit tsang wa na re. Raitim, shi a hkrit tsang myit (sh) kaga gawng kya lam langai ngai a majaw, Karai jaw ai magam lit hpe n gun lu ai baw n byin hkra shi sadi wa ai. Dai zawn sha, anhte mung yakhkak ai masa ni a majaw, Karai Mungdan a kabu gara shiga hkaw tsun ai kaw nna, htingnut mat na ahkang n jaw ging ai. Pawlu galaw wa ai zawn, anhte ni mung Yehowa karum ya na hpe kam sham ai hte myit mada nga ging ai.
Chyum Hti Lamang
(1 Korinhtu 1:1-17) Karai Kasang myit ra ai hte maren, Yesu Hkristu a kasa aya hta dang da ai, ngai Pawlu hte hpu nau Sosteni gaw, Hkristu Yesu hta e shachyoi shapra ai hkrum nna, chyoi pra ai ni ngu na shaga la ai, 2 Korinhtu mare na Karai Kasang a Hpung hta lawm ai ni hte, shara shagu hkan na, shanhte a shara hta mung, an a shara hta mung, anhte a Madu Yesu Hkristu a amying ningsang hpe shaga nga ai ni yawng hte hpe, ga shana dat ga ai. 3 Anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw, nanhte hta e anga nga ma lit ga law. 4 Hkristu a sakse ga gaw nanhte hta e jung nga ma sa lit dai rai nna, 5 lam yawng mayawng hta ang ai, n-gup atsam shagu hte, chye chyang ai lam shagu hta, nanhte shi hta hkum tsup nga ma nit dai majaw, 6 Hkristu Yesu hta e nanhte hpe jaw da ai, Karai Kasang a chyeju hpe tau yu let, nanhte a lam Karai Kasang hpe ngai tut nawng e shakawn kungdawn nga nngai: 7 shingrai, anhte a Madu Yesu Hkristu a paw pru na lam ala let nga nga yang, hpa chyeju kumhpa mung nanhte n kadawn nga myit dai; 8 anhte a Madu Yesu Hkristu a nhtoi e mung, mara shagun shara n nga hkra, shi nanhte hpe shangang shakang na ma rin dai. 9 Anhte a Madu ngu ai, Kasha Yesu Hkristu hte kanawn mazum lu mu ga, nanhte hpe shaga la ai Karai Kasang chyawm gaw, kangka re ai wa rai nga ai. 10 Hpu nau ni e, nanhte nlang hte gaw ga langai sha tsun nga nna, nanhte hta e hka wa bra wa na lam n nga ai sha, myit mang langai sha hte mung sumtu langai sha hta e nanhte hkum tsup lu myit ga, anhte a Madu Yesu Hkristu a amying ningsang a marang e, ngai nanhte hpe shadut jahkat dat ma de ai. 11 Kaning rai nme law, ngai hpu ngai nau ni e, nanhte hta ga law ga la rai nga myit dai gaw, Hkloe a nta na ni, nanhte a lam ngai hpe sa shana ya mi ai. 12 Ning ngu nna ngai tsun ma de ai gaw, Ngai chyawm gaw Pawlu hte seng nngai, ngai mahtang Apolo hte seng nngai; ngai gaw Kehpa hte seng nngai, ngai gaw Hkristu hte seng nngai, nga nna nanhte langai hte langai tsun hkat shajang nga myit dai majaw, ngai tsun ma de ai, rai nga ai. 13 Hkristu gaw bra wa sa hka? Pawlu gaw nanhte a matu wudang hta jen da hkam sa ni? Pawlu a amying hta nanhte baptisma hkam ma nit ni? 14 Nye a amying hta nanhte baptisma hkam la sa ga ai, nga nna kadai mung tsun shara n nga u ga, 15 Krispu yan Geu hta kaga, nanhte hta na kadai hpe mung ngai baptisma n jaw nngai majaw, ngai myit ai htep ngu ni ai. 16 Stehpan a nta masha ni hpe mung ngai baptisma jaw ni ai; dai hta kaga gaw kadai hpe naw jaw nngai kun, ngai n dum nngai. 17 Kaning rai nme law, baptisma jaw na matu n rai, dai kabu gara shi ga tsun dan u ga she, Hkristu gaw ngai hpe shangun dat nngai: rai ti mung, Hkristu a wudang gaw kaman lila n rai u ga, n-gup hpaji hte tsun dan nngai n rai.
MARCH 25-31
Wenyi Sut Gan Ni Hpe Sawk Sagawn Ai Lam
(1 Korinhtu 4:9) Kaning rai nme law, sat na matu san da ai ni hpe zawn, Karai Kasang gaw kasa ni ngu ai anhte hpe hpang chyahtum e shadan dan ma ni ai, ngai myit nga nngai: anhte gaw mungkan ga hte, lamu kasa ni hte shinggyim masha ni a man e, ginsup poi dan ai ni tai wa sa ga ai.
w09 5/15 24 ¶16
Lamu Kasa Ni—“Amu Gun Hpai Shangun Ai Wenyi Ni”
Chyam dinglik hkrum ai Hkristan ni gaw ‘lamu kasa ni a man hta ginsup poi shang’ ai ni re. (1Ko 4:9) Lamu kasa ni gaw anhte sadi dung let galaw ai lam ni hpe mu ai shaloi, grai myit dik nna, shut hpyit ai marai langai myit malai la ai shaloi mung grai kabu ma ai. (Luk 15:10) Karai Kasang hpe hkrit hkungga ai Hkristan nauna ni a akyang lailen hpe lamu kasa ni sadi hkrup ma ai. “Lamu kasa ni hpe tau yu nna, numsha gaw baw ntsa e ahkang kumla nga” ra ai ngu Chyum Laika hta tsun da ai. (1Ko 11:3, 10) Hkristan nauna ni hte Karai a mayam yawng gaw, theocratic lamang hte woi awn ai hpe hkan sa na matu lamu kasa ni ra sharawng ma ai. Dai zawn, madat mara ai gaw sumsing lamu kaw nga ai Karai Kasang a kasha ni a matu, htap htuk ai sadi jaw lam rai nga ai.
(1 Korinhtu 6:3) Anhte lamu kasa hpe tara dara na re ai, nanhte n chye nga myit ni? dai rai nna, dinghta lam hte hpe grau nna tara dara lu na, n rai myit ni?
it-2-E 211
Tara
Lamu Kasa Ni A Matu Tara. Lamu kasa ni gaw, Shinggyim masha hta grau madang tsaw tim, Karai Kasang a tara npu hta nga ai. (Heb 1:7, 14; Shk 104:4) Yehowa gaw shi a hpyen wa Satan hpe pyi, tara hte hkang da ai. (Yob 1:12; 2:6) Lamu kasa agyi re ai Mihkaela gaw Nat Satan hte dang rang hkat ai shaloi, “Nang hpe Karai Kasang daru sharin shaga u ga!” ngu tsun nna, Yehowa hpe Tara Agyi Daju hku hkap la let hkungga ai lam madun wa ai. (Yud 9, JCLB; Zeh 3:2 hte shingdaw yu u.) Shagrau hkrum ai Yesu a npu hta lamu kasa yawng hpe Yehowa tawn da ya ai. (Heb 1:6; 1Pe 3:22; Mat 13:41; 25:31; Hpl 2:9-11) Dai majaw, Yesu a matsun hku nna, lamu kasa gaw Yawhan hpang de shiga sa wa ai. (Shr 1:1) 1 Korinhtu 6:3 hta Hkristu a wenyi hpunau ni gaw, lamu kasa ni hpe jeyang na ngu Pawlu tsun wa ai. Nat ni hpe jahten shamyit na matu tara dara ai lam hta, shanhte shang lawm na majaw re.
Chyum Hti Lamang
(1 Korinhtu 6:1-14) Nanhte shada da amu rawng myit yang gaw, chyoi pra ai ni a man e n re ai sha, n ding n man ai ni man e tara dara hkam na, nanhte hta na langai ngai sa wam nga myit ni? 2 Chyoi pra ai ni gaw mungkan ga hpe tara dara na ma ra ai, nanhte n chye nga myit ni? Mungkan ga gaw nanhte e tara dara ai hkrum a yang gaw, kaji htum ai lam hte hpe tara dara na, nanhte n ging nga myit ni? 3 Anhte lamu kasa hpe tara dara na re ai, nanhte n chye nga myit ni? dai rai nna, dinghta lam hte hpe grau nna tara dara lu na, n rai myit ni? 4 Shingrai yang, dinghta lam hte hpe tara dara shara nga myit yang gaw, Hpung kata e arawng n lu ai ni hpe nanhte tara agyi aya hta dang da ga myit ni? 5 Nanhte kaya myit ga she ndai lam ngai tsun nngai. Hpu nau shada a lapran e jeyang chye ai hpaji byeng-ya rawng ai masha langai mi pyi nanhte hta n nga a ni? 6 Hpu nau wa gaw hpu nau wa hte n kam n sham ai ni a man e pyi, shawk hkat nga a hka? 7 Shingrai, ya nanhte shada da shawk hkat ai amu rawng nga myit dai gaw, nanhte a shut ai lam majing rai nga ma lit dai. Hpa majaw sharu shatsang ai mahtang n hkam myit ta? Map lu map sha ai hpe hpa majaw n hkam myit ta? 8 Nanhte chyawm gaw, hpu nau ni hpe pyi, sharu shatsang ai hte map lu map sha myit dai. 9 N ding n man ai ni gaw Karai Kasang a mungdan a sali wunli n hkam la lu na re ai, nanhte n chye nga myit ni? Lam hkum dam myit: hpye ai amu galaw ai ni mung, gawngngu sumla naw ku ai ni mung, num shaw ai ni mung, ngang ai ni mung, la shada tam ai ni mung, 10 lagu lagut ni mung, nammak lawhpa ai ni mung, chyaru ya shang ai ni mung, shatan nhkan ai ni mung, dip lu dip sha ai ni mung, Karai Kasang a mungdan a sali wunli hpe hkam la lu n na rai. 11 Nanhte nkau mi gaw shingrai chyalu ni rai nga myit dai: rai ti mung, nanhte gaw anhte a Madu Yesu Hkristu a mying ningsang hte, anhte a Karai Kasang a Wenyi e kashin kamun kau ai mung, shachyoi shapra ai mung, dinghpring ngu ai mung, hkam la ma nit dai. 12 Yawng mayawng galaw na ahkang ngai lu nngai; rai ti mung, yawng mayawng hte wa akyu byin ai n rai. Yawng mayawng galaw na ahkang ngai lu nngai; rai ti mung, hpa lam a jaw e mung, ngai mayam n tai mayu nngai. 13 Shahpa gaw kan a matu, kan gaw shahpa a matu rai nga ai; rai ti mung, Karai Kasang gaw dai yan hpe rau jahten na ru ai. Dai hkum hkrang chyawm gaw hpye ai amu a matu n re ai sha, dai Madu a matu rai nga ai; dai Madu mung hkum hkrang a matu rai nga ai: 14 Karai Kasang chyawm gaw shi a n-gun hte dai Madu hpe hkrung sharawt wu ai rai nna, anhte hpe mung hkrung sharawt na mi ai.