Aten Hpe Hpaji Rawng Let Akyu Jashawn Mai Ai Lam

Lam 1: Hkan Sa Tara Nga U

Ahkyak shatai galaw ra ai ni hpe masat da u. Chyum Laika hta ndai hku hpaji jaw da ai: “Grau ahkyak ai lam ni hpe ginhka chye” nga u. (Hpilipi 1:10, NWT) Gara gaw grau ahkyak ai, gara hpe gaw kalang ta galaw ra ai, gara hpe gaw ahkyak shatai nna kalang ta galaw ra ai ngu ai lam ni hpe jahpan galaw da u. Ga shadawn, shana shat sa mari na matu ahkyak tim, kalang ta galaw ra yang she ra na re. Tinang ra ai sumla hkrung sa taw ai rai yang, kalang ta yu mayu na raitim, n galaw n mai galaw ra ai ahkyak ai lam n re.a

Tau Hkrau Myit Da U. Hpaji Ningli 10:10 hta: “Tawn ai nwa hpe n karang yang, n-gun grau dat ra nga ai” ngu tsun ai. Kahtap nna bai tsun ai gaw: “Hpaji byeng-ya chyawm gaw, lam madun chye nga ai.” Hpa sharin ya ai kun? Nwa hpe karang ai ngu ai gaw, tau hkrau lajang da ai ngu lachyum rai nna, aten hpe grai akyu rawng ai hku akyu jashawn lu na matu re. Aten hpe jahtum ai, masha hpe pu ba shangun ai, gaja wa galaw na matu n ra ai ni hpe, matsing jahpan kaw na shaw kau u. Bungli hpe shakut galaw ai majaw aten shajan lu wa yang mung, dai hku sha hkum nga taw. Hpang hta galaw na matu lajang da ai bungli ni hpe, ya jang galaw kau u. Nwa hpe tau hkrau karang da ai hpaji rawng ai wa zawn, tau hkrau lajang nna shajin da yang bungli law law ngut kre awng dang lu na re.

N Galaw Ra Ai Lam Ni Hpe Hkum Galaw. N ahkyak ai lam ni, aten hpe majoi shama shangun ai lam ni hpe galaw na matu hpyi shawn wa ai shaloi, n galaw na matu ningdang chye hkra shakut u. Galaw ra ai lam ni grai law wa yang, myit tsang wa nna kabu gara lam ni mat mat chye ai.

Lam 2: Aten Lagut Ni Hpe Koi U

Aten garawt nna n dawdan gwi ai lam. “Nbung madat ai wa gaw nli gat lu ai, n rai; sumwi mada ai wa gaw mam dan lu ai, n rai.” (Hpaji 11:4) Hpa lam sharin la lu ai kun? Aten garawt ai gaw, aten hpe mung, galaw ngut kre ai lam hpe mung lagu ai lagut re. Lamu marang kaja htum aten hpe sha, la nga ai hkauna galaw ai wa gaw galoi mung hkai lu na, dan la lu sana n re. Dai zawn sha, anhte mung atsawm sha n chye shi ai majaw, dawdan lam n lu jahkrat ai baw byin chye ai. Shing nrai, dawdan lam langai n jahkrat shi yang yawng gaw hkum tsup nga ra ai ngu, shadu ai majaw mung mai byin ai. Ahkyak ai dawdan lam ni jahkrat lu na matu, atsawm sawk sagawn nna myit ra ai. “Nyan tang ai wa gaw na mana kam nga ai; Myit su ai wa chyawm gaw tinang sa wa ai lam gawn yu nga ai” ngu nna Ga Shagawp 14:15 hta tsun da ai. Raitim, tatut hta gaw dawdan lam law malawng hpe, atsawm maram yu nna myit da ai hpang hta pyi, tup hkrak n re ai masa nkau hta dawdan kau ra ai re.​—Hpaji 11:6.

Tsep kawp hpring tsup lam hpe ra sharawng ai lam. “Ntsa de na [shing nrai Karai Kasang kaw na] hpaji byeng-ya chyawm gaw, . . . rap ra chye ai.’ (Yak 3:17, NWT) Kaja htum byin mayu ai myit nga ai gaw kaja ai. Raitim, kalang lang gaw tinang myit da ai hku n byin wa yang myit daw wa chye ai. Ga shadawn, amyu ga nnan hpe sharin la ai wa gaw, n shut hkra shakut na ngu n myit ging ai. Shut ai lam kaw nna sharin la lu ai. N shut hkra galaw na ngu myit da yang, rawt jat lam hpe la-nyen mat shangun ai. Tinang galaw lu ai daram hpe sha myit mada da ai gaw kaja htum re. “Myit shagrit ai ni, hpaji byeng-ya lu” ai ngu Ga Shagawp 11:2 hta tsun da ai. Myit shagrit shanem ai ni hte tinang galaw lu ai daram hte myit dik ai ni gaw, myit atsang hte ngwi pyaw lam hkamsha lu ai.

Lam 3: Rap Ra Nna Tatut Re U

Bungli hte bansa ai lam hpe rap ra hkra galaw u. “Myit pyaw let latup mi sha lu ai gaw, myit ru myit yak ai hte nbung hpe shachyut let, lata lahkawng hpring lu ai hta, akyu grau nga ai.” (Hpaji 4:6) Bungli grai ma ai ni gaw, shanhte galaw ai daram akyu bai n hkam la lu ai. Shanhte a aten hte n-gun n nga mat ai daram byin mat ai. Lagawn ai ni chyawm gaw, hpa n galaw ai majaw aten hpe majoi shama kau ai hte bung ai. Chyum Laika hta rap ra na matu n-gun jaw da ai. Bungli shakut u. Ngut yang, bansa nna hkring la u. Rap ra u. Dai hku galaw nna lu wa ai ngwi pyaw lam gaw, Karai Kasang jaw ai “kumhpaw kumhpa rai nga ai.”​—Hpaji 5:19.

Yup hkru hkra yup u. “Ngwi pyaw ai hte ngai kaleng taw nna yup nga nngai” ngu Chyum Laika ka ai marai langai tsun ai. (Shakawn 4:8) Asak ram sai law malawng gaw, hkum hkrang hte seng ai lam, myit hte seng ai lam, bawnu hte seng ai lam ni hpe bai shalan shabran la na matu, lana mi hkying hkum 8 yup ra ai. Yup ai gaw aten hpe akyu rawng hkra akyu jashawn ai lam langai re. Hpa majaw nga yang, matsing nyan hte sharin la lu ai atsam hpe rawt jat hkra karum ya lu ai majaw re. Yup n hkru yang, sharin hkam la lu ai lam hta gawng kya wa shangun nna, ang sha-a byin ai shoihpa ni, galaw shut ai lam ni, masin pawt ai lam ni byin shangun chye ai.

Tinang hkan dep lu ai bandung ni hpe jahkrat u. “Nang lu ai hta myit dik lu ai gaw arai lama ma hpe tut e ra marit nga ai hta grau kaja nga ai.” (Hpaji 6:9, JCLB) Lachyum gaw hpa rai? Hpaji rawng ai wa gaw, n mai byin ai bandung ni hpe hkan galaw na n re. Gumhpraw hkoi nna mari ai baw ni galaw na n re. De a malai, galaw lu ai daram galaw na matu hte tinang hta lu ai daram hte myit dik na matu sharin la na re.

Lam 4: Kaja Ai Tsang Madang Ni Hte Asak Hkrung U

Na a tsang madang hpe myit u. Gara gaw kaja ai, gara gaw n kaja ai, gara gaw ahkyak ai, gara hpe gaw galaw ging ai ngu ai hpe, na a tsang madang ni gaw dawdan ya na re. Prat gaw, pala langai rai yang, tsang madang ni gaw tinang gap mayu ai shara hpe hkra na matu karum ya ai. Dai majaw, kaja ai tsang madang ni gaw, prat hta ahkyak shatai ra ai ni hpe ahkyak shatai na matu, na a aten hpe atsawm akyu jashawn na matu karum ya na re. Dai zawn kaja ai tsang madang ni hpe gara kaw tam lu na kun? Masha law law gaw, Chyum Laika hta tam ma ai. Chyum Laika hta kaja ai tsang madang ni lawm ai.​—Ga Shagawp 2:6, 7.

Tsawra myit hpe kaja htum tsang madang byin hkra galaw u. Tsawra myit gaw “hkum tsup re ai makyit sumri” re ngu Kolose 3:14 hta tsun da ai. Tsawra myit n lawm ai sha, jet ai ngwi pyaw lam hte myit shimlum ai lam ni hpe tam mu na n re. Laksan hku nna kun dinghku kata kaw re. Tsawra myit a manu hpe ahkyak n shatai ai ni gaw, ja gumhpraw hte bungli hpe sha madung da ai majaw, hpang jahtum gaw ngwi pyaw lam mat mat ai baw byin mat chye ai. Chyum Laika hta tsawra myit a lam law law lawm nna, tsawra myit hpe ahkyak dik htum tsang madang langai hku tsun da ai.​​—⁠1 Korinhtu 13:1-3; 1 Yawhan 4:8.

Karai Kasang a lam chye hkra galaw lu na matu aten hpe masat da u. Jep ngu ai wa hta, shi a tsawra ai madu jan, shayi sha lahkawng hte shang gumhpraw kaja ai bungli sha n-ga, kaja ai manaw manang ni lu da ai. Shi a bungli gaw, tsi hte seng nna karum shingtau re ai majaw, masha law law shi shawng hta si mat ai hpe, chyahkring hkring mu ga ai. “Masha a prat gaw ndai hku sha byin nga sana i?” ngu nna shi hkum shi san ai. Lani mi hta, Yehowa Sakse ni shapraw ai laika nkau hpe hti hkrup nna, mahtai lu mat ai majaw grai ra sharawng mat ai.

Jep gaw, shi hti hkrup ai lam ni hpe, madu jan hte kasha ni hpe tsun dan ai. Shanhte mung myit lawm wa ai. Nta masha yawng Chyum Laika hpe hkaja hpang wa ai. Dai majaw, aten hpe grau akyu rawng ai hku lang chye wa nna, ngwi pyaw ai dinghku byin wa ai. Yakhkak jamjau lam n nga ai mungkan hta, htani htana asak hkrung na ngu ai myit mada lam mung lu wa ai.​—Shingran 21:3, 4.

Jep a mabyin gaw, Yesu tsun wa ai “wenyi hta matsan mayan rai nga ai ni gaw, a lu ma ai” ngu ai ga hpe myit dum shangun ai. (Mahte 5:3) Karai Kasang hpe chye chyang hkra galaw na matu, aten loi mi tawn da mai na kun? Dai hku galaw yang, chyahkring chyahkra a matu sha n-ga, prat tup a matu aten hpe kaja dik htum akyu jashawn nga ai re.