Bungli shakut ai gaw hkum hkrang shamu shamawt lam galaw ai hte bung. Ya a matu mung, hpang a matu mung akyu nga
Ramma Ni A Matu
11 Bungli Shakut Ai
Lachyum
Bungli shakut ai ngu ai gaw bungli n lata ai hpe tsun ai re. Tinang a ra kadawn lam hte kaga ni a ra kadawn lam hpe karum ya lu na matu, madang n tsaw ai bungli raitim pyi, bungli hpe shakut nna galaw ai.
Hpa Majaw Ahkyak Ai Kun?
Ra tim, n ra tim prat hta galaw ra na lit hpring tup re. Bungli shakut ai ni n law ai mungkan hta bungli shakut ai gaw akyu lu shangun ai.—Hpaji Ningli 3:13.
“Bungli shakut ai shaloi tinang hkum tinang arawng la ai. Myit dik lam hkamsha ai. Myit dik ai lam gaw, bungli hpe manu shadan wa shangun ai. Bungli shakut ai gaw mying kaja mung lu shangun ai.”—Reyun.
Chyum Laika Npawt Tara: “Galaw shakut ai lam shagu hta amyat rai nga ai.”—Ga Shagawp 14:23.
Galaw Mai Ai Lam
Lawu na lam ni hpe hkan sa nna, kaja ai ningmu nga hkra shalat u.
Galaw chye ai atsam nga ai hpe arawng la u. Nta bungli raitim, jawng laika raitim, kaga gara bungli raitim, bungli hta myit maju jung da u. Bungli ngut mat yang, grau lawan nna galaw chye hkra, grau kaja hkra galaw chye hkra galaw lu ai lam ni hpe tam u. Grau chye galaw wa yang, bungli galaw yang grau pyaw wa na re.
Chyum Laika Npawt Tara: “Tinang a amu hta marai shapraw ai wa hpe, nang mu hkrup n ni? Dai wa gaw, yu maya ni a man e n rai, hkawhkam wa a man e she tsap nga na ra ai.”—Ga Shagawp 22:29.
Lu wa na akyu hpe yu u. Masa lam law malawng hta, tinang a lit galaw ngut kre yang kaga wa hpe akyu jaw ai. Ga shadawn, nta bungli hpe shakut galaw yang, nta masha ni hpe lit tsang shangun ai.
Chyum Laika Npawt Tara: “Hkam sha ai hta jaw ya ai mahtang grau a nga ai.”—Kasa 20:35.
Grau galaw u. Lit ngut hkra galaw ai sha n-ga, grau galaw u. Masha ni shangun ai majaw n re ai sha, tinang a myit hte galaw u. Dai gaw na a prat hpe nang hkang nga ai re.—Mahte 5:41.
Chyum Laika Npawt Tara: “Myit ra ai hku san san rai u ga, na a myit n lawm yang gaw, ngai kaning mung n rai mayu nngai.”—Hpilemon 1:14.
Rap ra u. Bungli shakut ai ni gaw n lagawn ai zawn, bungli grai ma ai ni mung n re. Bungli shakut ai zawn, hkring sa na aten mung la ai.
Chyum Laika Npawt Tara: “Myit pyaw let latup mi sha lu ai gaw, myit ru myit yak ai hte nbung hpe shachyut let, lata lahkawng hpring lu ai hta, akyu grau nga ai.”—Hpaji Ningli 4:6.