Noa Sanghpaw Li Langai Mi Shachyaw Ai

NOA gaw madu jan langai mi hte shadang sha masum lu ai. Shi a shadang sha ni a amying ni gaw, Shem, Ham, Yahpet nga ma ai. Shadang sha shagu hta madu jan langai hpra lu ma ai. Dai rai nna Noa kun dinghku masha ni gaw marai matsat rai ma ai.

Karai Kasang gaw Noa hpe lak lai ai amu langai mi hpe galaw shangun ai. Noa hpe sanghpaw li kaba langai mi shachyaw shangun ai. Sanghpaw li a hkrang zawn rai timung galu ai sutek kaba hte grau bung nga ai. ‘Dai hpe htap masum tsaw hkra galaw u; Sanghpaw li a kata e, gawk ni galaw bang u;’ nga nna Karai Kasang hkang da ai. Agawk ni gaw Noa hte shi a kun dinghku masha ni, dusat ni hte shanhte ra ai lusha ni bang tawn da na matu re.

Sanghpaw li kata de hka nshang lu hkra shachyaw u; nga nna mu Karai Kasang htet da ai. ‘Ngai gaw hka shau-ing kaba shaing dat nna, mungkan ting hpe jahten kau na nngai. Sanghpaw li kata e, n rawng ai ni mahkra si na mara ai’, nga nna tsun ai.

Noa hte shi a shadang sha ni gaw Yehowa a ga hpe madat nna, Sanghpaw li shachyaw hpang wa ma ai. Raitimung kaga masha ni gaw asawng asang rai nna mani ma ai. Shanhte gaw matut nna, nhkru nhkra ai a mu galaw nga ma ai. Karai Kasang kaning rai galaw wa na ra ai, nga nna Noa tsun timung kadai mung nkam ma ai.

Sanghpaw li kaba ai majaw aten ram ram na hkra shachyaw ra ai. Shaning law law na ai hpang, galaw ngut la ma ai. Ya bai Karai Kasang gaw, dusat nhprang ni hpe Sanghpaw li kata de woi bang u, nga nna shangun ai. Dusat nkau mi hpe ala hte ayi hpung gup nna woi bang u da. Kaga dusat nkau mi hpe rai jang gaw ayi ala hkum sanit nit di nna woi bang u. U amyu baw shagu hpe mung jashawn u. Noa mung Karai Kasang htet da ai hte maren galaw ai.

Dai hpang e Noa hte shi a kun dinghku masha ni mung Sanghpaw li kata de shang ma ai. Dai hpang e Karai Kasang gaw chyinghka hpe la kau ai. Sanghpaw li kata e, Noa hte shi a nta masha ni la nga ma ai. Nanhte mung shanhte hte rau Sanghpaw kata e, la nga ai ngu nna myit sum ru yu mu. Karai Kasang tsun da ai hte maren kaja teng teng hka shau kaba ing wa na kun?