Karai Kasang Abraham A Makam Masham Hpe Dinglik Yu Ai

NDAI sumla kaw e, Abraham hpa galaw nga ai hpe mu a ni? Nhtu langai mi hte shadang sha hpe sat na hku, hkyen taw nga ai. Shi hpa majaw dai hku galaw ai kun? Shawng nnan e, Abraham hte Sara ndai shadang sha hpe gara hku nna lu wa ai lam hpe yu yu ga.

Shan kaw shadang sha langai mi lu na re, nga nna Karai Kasang ga sadi jaw tawn da ai hpe matsing tawn mu. Raitimung nmai byin na zawn nawn ai. Abraham hte sara gaw grai asak kaba masai. Raitimung nmai byin na zawn myit nawn ai amu ni hpe Karai Kasang gaw byin lu hkra galaw lu ai nga nna Abraham kam ai. Dai rai nna hpa byin wa ai kun?

Karai Kasang ga sadi jaw ai hpang laning mi lai sai. Dai shaloi Abraham a asak 100 ning rai nna, sara a asak gaw 90 ning du ai aten hta Isak ngu mying ai shadang sha langai mi lu wa ma ai. Karai Kasang gaw shi a ga sadi hpe shadik shatup ai.

Raitimung Isak kaba wa ai shaloi, Yehowa gaw Abraham a makam masham hpe dinglik yu ai. ‘Abraham e!’ nga nna shaga dat ai. Abraham gaw : ‘Ngai nang e nga nngai’ nga nna htan dat ai. Dai shaloi Karai Kasang gaw ning nga nna tsun ai. ‘Nang tsaw ra ai na a shandang sha shingtai Isak hpe, shaga nna ngai nang hpe madun na ra ai bum de lung wa u; Dai shara kaw e na a kasha hpe sat nna, wan nat hkungga nawng ya rit,’ nga nna tsun ai.

Abraham gaw shi a kasha hpe grai tsaw ra ai majaw dai aga hpe na lu jang yawn ai. Bai nna Abraham a kashu kasha ni gaw, Hkanan mung hta nga na re, nga nna Karai Kasang ga sadi jaw tawn ai hpe mung myit yu u. Isak lama wa si mat wa yang gaw, dai ga sadi ni gara hku nna hkum tsup wa sana kun? Abraham gaw nchye na sai. Raitimung Karai Kasang a ga hpe matut nna madat ai.

Abraham gaw bum de du jang Isak hpe tsumri de gyit nhtawm, shi galaw tawn ai tawn hkungri a ntsa e mara dat ai. Dai hpang e shi a kasha hpe sat na matu nhtu hpe shaw la ai. Dai shaloi e Karai Kasang a lamu kasa gaw: ‘Abraham e, Abraham e!’ nga nna shaga dat ai. Abraham mung: ‘Ngai nang e nga nga ngai!’ nga nna htan wu ai.

‘Karai Kasang gaw, ‘Ama hpe hkum hkra et!’ shi hpe hpa mung hkum di u; nang gaw na a shadang sha shingtai hpe n lahpawt ai sha, ngai hpe nawng, ya ai majaw, nang ngai hpe teng teng kam sham ai gaw ngai ya chye ni ai,’ nga nna tsun ai.

Abraham gaw Karai Kasang hpe kade daram kam sham ai hpe yu yu mu. Yehowa n-galaw lu ai hpa mung nnga ai. Isak hpe si ai kaw na bai jahkrung ya lu ai nga nna, Abraham kam ai. Kaja wa Abraham gaw shi a kasha hpe sat kau na matu, Karai Kasang nra ai. Dai majaw mung Karai Kasang gaw makau na sumwum langai mi hta sagu kasha langai mi hpe dau nga hkra galaw tawn nhtawm, shi a kasha a malai dai sagu hpe nawng ya na matu, Abraham hpe tsun ai.