Yaku Haran De Sa Ai

YAKU aga shaga nga ai ndai masha ni gaw, gadai ni rai ma ai hpe, nan hte chye ma ni? Ntoi law law bu hkawm sa wa ai hpang, hka htung langai mi a makau e, Yaku gaw shanhte hpe hkrum ai. Shanhte gaw sagu ni hpe rem nga ma ai.

Yaku gaw: ‘Nanhte ganang na masha ni rai ma ni?’ nga nna, san ai.

‘Haran kaw na rai nga ai law’ nga nna, bai htan ma ai.

‘Laban hpe chye ma ni?’ nga nna Yaku san ai. Chye ga ai ngu nna bai htan ma ai. ‘Htaw ra de yu dat u; Laban a shayi sha Rahkela shi a sagu hpung ni hte rau sa wa nga ai’ da. Tsawm ra tsan ai shara kaw nna, Rahkela sa wa nga ai hpe nanhte mu ani?

Yaku gaw shi a katsa Laban a sagu ni hte rau, sa wa nga ai, Rahkela hpe mu dat ai hte, hka htung na nlung tawng hpe sa galau kau ya ai. Sagu ni ntsin asawm sha lu lu na matu, re. Dai hpang Yaku gaw Rahkela hpe pup nna, shi gaw kadai re ai lam Rahkela hpe tsun dan ai. Rahkela gaw myit katu mat ai hte, nta de nhtang wa nna, kawa Laban hpe wa tsun dan ai.

Yaku shi a nta kaw e nga na re ai majaw, Laban gaw grai myit pyaw ai. Yaku gaw, Rahkela hpe, hpyi ai shaloi, Laban gaw kabu ai. Raitimung Rahkela hpe lu la na matu, shi a hkauna hta sanit ning amu galaw na matu tsun ai. Yaku gaw Rahkela hpe grai tsaw ra ai majaw amu galaw ya ai. Raitimung hkungran ai shani hta hpa byin ai hpe chye ani?

Laban gaw Yaku hpe Rahkela jaw ya na malai, shi a shayi sha kaba Lea hpe jaw ai. Yaku gaw Laban a matu sanit ning bai kahtap nna amu galaw ya na matu, myit hkrum ai majaw, Laban gaw Rahkela hpe mung matut ya wu ai. Dai aten e madu jan langai hta jan nna, la lu ai ahkang Karai Kasang jaw ai. Raitimung ya gaw Chyum Laika hta tsun da ai hte maren la langai hta madu jan langai sha la mai ai.