Yona Hte Nga Kaba

HKA kata na masha wa hpe yu yu mu. Shi kyin dut hkrum nga ai nrai ni? Nga kaba gaw shi hpe mayu kau na sha rai sai. Shi gaw kadai wa re ai hpe chye ma ni? Shi a amying hpe Yona nga ma ai. Shi gaw gara hku nna ndai zawn kyin dut hkrun ai kun? Yu yu ga.

Yona gaw Yehowa a myihtoi langai mi re. Myihtoi Elisha si mat ai hpang kade nna yang Yehowa gaw Yona hpe tsun ai: ‘Ninewe mare kaba de sa wa u; dai masha ni gaw grai nhkru ai amu galaw ma ai; dai lam hte seng nna shanhte hpe sa tsun u,’ nga nna shi hpe shangun dat ai.

Raitimung Yona nkam sa ai. Dai majaw Ninewe mare hte shai nna kaga shara de sa wa na matu sanghpawli langai mi hta lung jawn ai. Yona rawt hprawng ai hpe Yehowa n ra ai. Dai rai nna nbung laru kaba shabyin dat ai. Nbung laru kaba grai ja ai majaw sanghpaw li kanoi noi lup mat ai. Sanghpaw la ni hkrit ma ai majaw shanhte a karai kaw akyu hpyi ma ai.

Hpang jahtum e Yona tsun ai: ‘Ngai gaw sumsing lamu hte ginding aga hpe hpan da ai Karai Kasang Yehowa hpe nawku nngai. Yehowa shangun ai amu hpe n-galaw ai sha ngai hprawng hkawm nngai,’ nga ai. Shing nga jang sanghpaw la ni gaw: ‘Nbung laru sim mat na matu, nang hpe anhte kaning di na kun?’ nga nna tsun ai.

‘Ngai hpe panglai hka hta jahkrat bang dat mu. Nbung laru sim mat na re,’ nga nna Yona tsun ai. Sanghpaw la ni dai zawn n kam galaw ai. Raitimung nbung laru grau nna laja wa ai majaw hpang jahtum e, Yona hpe sanghpawli ntsa kaw nna jahkrat dat ma ai. Nbung laru koi mat nna, namukdara mung sim mat wa ai.

Yona hka hta lup mat wa ai hte nga kaba gaw shi hpe mayu kau ai. Raitimung Yona n si ai. Nga kaba a kan hta masum ya masum na rawng nga ai. Yehowa a ga hpe n madat nna Ninewe mare de n sa ai hpe Yona grai myit malai lu ai. Dai majaw shi hpa galaw ai hpe chye a ni?

Yona gaw Yehowa karum la na matu akyu hpyi ai. Dai rai nna Yehowa gaw Yona hpe nga kaba e hkarang de nhpat shapraw shangun ai. Dai hpang e, Yona gaw Ninewe mare de sa wa ai. Yehowa shangun ai amu hpe galaw na matu kade daram ahkyak ai lam hpe kasi n madun nga a ni?