Nhkrit Chye Ai Masha Langai

NDAI ram ma hpe masha ni jahpoi asawng nga ma ai hpe yu dat mu. Shi gaw kadai re ai hpe chye a ni? Shi gaw Yeramia re. Yeramia gaw Yehowa a ahkyak kaba ai myihtoi langai mi re.

Yoshia hkawhkam gaw mungdan kaw na gawngngu sumla hpe jahten kau hpang ai aten hta, kade nna yang Yehowa gaw Yeramia hpe shi a myihtoi galaw shangun ai. Raitimung Yeramia gaw shi a hkum hpe myihtoi galaw na grai naw kaji dum ai. Raitimung Yehowa gaw shi hpe karum na nga nna tsun ai.

Yeramia gaw Israela masha ni nshawp ai amu hpe hkum galaw mu, nga nna tsun ai. ‘Kaga masha ni nawku ai karai ni gaw shut ai karai re,’ nga nna tsun ai. Raitimung Israela masha ni law law teng man ai Karai Kasang Yehowa hpe nawku na hta gawngngu sumla hpe grau nna nawku mayu ma ai. Yeramia gaw, shanhte a nshawp nkap ai amu a majaw shanhte hpe Yehowa ari jaw na, nga nna tsun dan yang shanhte mani ma ai.

Shaning aten ni lai mat wa sai. Yoshia hkawhkam mung si mat wa sai. Dai hpang shata masum hta shi a kasha Yehoiakim gaw hkawhkam tai wa ai. Yeramia gaw, ‘nanhte nshawp nkap ai hpe n galai kau yang Yerusalem mare hpe jahten kau na re,’ nga nna masha ni hpe matut nna, sadi jaw ai. Hkinjawng ni gaw Yeramia hpe magra rim la nna: ‘Ndai lam ni tsun ai majaw nang hpe sat kau na,’ nga nna jahtau ma ai. Bai nna, ‘Yeramia gaw, anhte a mare hpe nhtan shai ai ga tsun ai majaw, shi hpe sat kau na re,’ nga nna Israela hkawhkam shadang sha ni hpe tsun ma ai.

Yeramia gaw ya hpa galaw na kun? Shi nhkrit ai. Shanhte yawng hpe tsun ai; ‘Ndai lam ni tsun na matu Yehowa ngai hpe, shangun dat ai. Nanhte a nshawp nkap ai amu hpe n kau da ma yang gaw Yerusalem mare hpe Yehowa jahten kau na re. Nanhte chye tawn da na matu gaw: nanhte ngai hpe sat kau yang, mara nkap ai masha langai mi hpe sat kau ai hte bung na re,’ nga ai.

Yeramia hpe hkawhkam shadang sha ni gaw, asak shalawt dat ma ai. Raitimung Israela masha ni gaw myit malai nlu ai. Hpang e Babelon hkawhkam Nebuhkadneza gaw Yerusalem mare hpe sa gasat ai. Hpang jahtum e Israela masha ni hpe Nebuhkadneza shi a mayam shatai la kau ai. Masha mum, sen hpe Babelon mare de rim woi mat wa ai. Tsasam masha ni gaw tinang ndu ga ai tsasam mung de shaga wa yang, gara hku nga na hpe myit yu ga.